حهدیسا سیهــ و شەشێ
عَنْ أَبِى هُرَيْرَةَ - رَضِيَ الله عَنْهُ – قَالَ: قَالَ رَسُولُ الله -صلى الله عليه وسلم-: (مَنْ نَفَّسَ عَنْ مُؤْمِنٍ كُرْبَةً مِنْ كُرَبِ الدُّنْيَا، نَفَّسَ الله عَنْهُ كُرْبَةً مِنْ كُرَبِ يَوْمِ الْقِيَامَةِ، وَمَنْ يَسَّرَ عَلَى مُعْسِرٍ، يَسَّرَ الله عَلَيْهِ فِى الدُّنْيَا وَالآخِرَةِ، وَمَنْ سَتَرَ مُسْلِمًا سَتَرَهُ الله فِى الدُّنْيَا وَالآخِرَةِ، وَالله فِى عَوْنِ الْعَبْدِ مَا كَانَ الْعَبْدُ فِى عَوْنِ أَخِيهِ، وَمَنْ سَلَكَ طَرِيقًا يَلْتَمِسُ فِيهِ عِلْمًا سَهَّلَ الله لَهُ بِهِ طَرِيقًا إِلَى الجَنَّةِ، وَمَا اجْتَمَعَ قَوْمٌ فِى بَيْتٍ مِنْ بُيُوتِ اللَّهِ يَتْلُونَ كِتَابَ الله وَيَتَدَارَسُونَهُ بَيْنَهُمْ إِلاَّ نَزَلَتْ عَلَيْهِمُ السَّكِينَةُ، وَغَشِيَتْهُمُ الرَّحْمَةُ، وَحَفَّتْهُمُ الْمَلاَئِكَةُ، وَذَكَرَهُمُ الله فِيمَنْ عِنْدَهُ، وَمَنْ بَطَّأَ بِهِ عَمَلُهُ لَمْ يُـسْـرِعْ بِهِ نَسَبُهُ). رواه مسلم
ژ ئــهبــوو هورهیرهى -خودێ ژێ رازى بت- دبێژت: پێغهمبهرى -سلاڤ لێ بن- گۆت: ههچیێ دژواریهكێ ژ دژواریێن دنیایێ ژ سهر خودان باوهرهكى ڕاكهت، خودێ دژواریهكێ ژ دژواریێن قیامهتێ دێ ژ سهر وى ڕاكهت، وههچیێ ل سهر مرۆڤهكێ تهنگاڤ بكهته بهرفرههى، خودێ ل دنیایێ وئاخرهتێ دێ ل سهر وى كهته بهرفرههى، وههچیێ موسلمانهكى ستاره بكهت، خودێ ل دنیایێ وئاخرهتێ دێ وى ستاره كهت، وخودێ هاریكارێ عهبدیه هندى عهبد هاریكارێ برایێ خۆ بت، وههچیێ ڕێكهكێ بگرت دا زانینهكێ بخوازت، خودێ ب وێ چهندێ ڕێكهكێ بۆ بهحهشتێ دێ ل بهر وى ب ساناهى ئێخت، وههر كۆمهكا ل مالهك ژ مالێن خودێ ڕویننه خوارێ، كیتابا خودێ بخوینن ونیشا ئێك ودو بدهن، رحهتى دێ ب سهر وان دا ئێت، ودلۆڤانى دێ وان ڤهگرت، وملیاكهت دێ ل دۆرا وان بن، وخودێ دێ بهحسێ وان ل نك وان ملیاكهتان كهت ئهوێن ل نك وى، وههچیێ كارێ وى وى ڤههێلت، نهسهبا وى وى پێش نائێخت. موسلم ڤهدگوهێزت
ئهڤ حهدیسه كۆمهكا زانین وقاعیده وتۆرهیێن گرنگ نیشا مه ددهت، دا ئهم كارى پێ بكهین، ژ وان:
🌼بهرفرههكرنا ل سهر خهلكى:
ڤێجا چ مرۆڤ ب دهستێ خۆ د ههوارا كهسهكى بچت، ووى ژ نهخۆشى ودژواریهكێ بینته دهر، یان ل سهر سڤك بكهت، یان ژى ب مالێ خۆ هارى وى بكهت ووى ژ تهنگاڤیهكێ بینتهدهر.. ئهوێ ڤێ چهندێ بكهت خودێ ژى ل دنیایێ وئاخرهتێ دێ ل سهر وى كهته فرههى، ووى ژ تهنگاڤیان ئینتهدهر.
🌼ستارهكرنا موسلمانان:
گومان تێدا نینه كو چو مرۆڤ نینن دبێ كێماسى بن، وكهسهك نینه یێ بێ گونههـ ژى بت، وههر ئێك ژ مه هند عهیب ههنه كو ئهگهر خودێ وان ئاشـكـهرا بـكـهت شــهرمــا وى پێ د ناڤ خهلكى دا بچت، وچونكى ئـهصل د مرۆڤێ موسلمان دا ئهوه وى ئهو بۆ برایێ خۆ بڤێت یێ بۆ خۆ دڤێت، دهمێ ئهو عهیب وكێماسیهكێ ل نك برایهكێ خۆ ببینت، وى ستاره بكهت، وشـهرمـا وى پــێ د ناڤ خهلكى دا نهبهت، وهندهك كهس ههنه هزر دكـهن ب هێجهتا ڕهخنهگرتنێ یان شیرهتكرنێ وان مافێ ههى عهیبێن خهلكى ئاشكهرا بكهن، وئهو ب خۆ وهسا نینه، ههتكبرن تشتهكه وڕهخنهگرتن وشیرهتكرن تشتهكێ دیه!
وكانێ چاوا پێتڤیه مرۆڤ برایێ خۆ ستاره بكهت، وعهیبێن وى د ناڤ خهلكى دا بهلاڤ نهكهت، یا پێتڤیتر ئهوه -وهكى ئاشكهرا- كو مرۆڤ گونههـ وعهیبێن خۆ ب خۆ ژى ڤهشێرت وژێ تۆبه بكهت وئاشكهرا نهكهت.
🌼هاریكاریا خهلكى:
وههر چهنده بهرى نوكه حهدیسێ بهحسێ ڕهنگهكێ هاریكاریێ كربوو، كو مرۆڤ برایهكێ خۆ ژ تهنگاڤیێ بینتهدهر، بهلێ حهدیس ل ڤێرێ بهحسێ هاریكاریێ ب ڕهنگهگێ گشتى دكهت، كو مرۆڤ د خێرا برایێ خۆ دا بت، ووى كارى بۆ وى بكهت یێ مفایێ وى تێدا بت.. ئهوێ ب ڤى ڕهنگى بت، خودێ ژى دێ هاریكاریا وى كهت، وئهوێ خودێ ل هارى بت ئهو تێرا وى ههیه.
🌼خواستنا علمى:
ب تایبهتى وى علمى یێ ل ئاخرهتێ مفایى دگههینتێ، وئاشكهرایه كو علم ل مرۆڤى ناگهڕیێت دڤێت مرۆڤ ل علمى بگهڕیێت، وئهو كهسێ ڤێ زهحمهتێ بدهته بهر خۆ، و ل علمى بگهڕیێت، خودێ كارێ وى دێ ب سناهى ئێخت، ودێ وى علمى دهتێ یێ بهرێ وى ددهته ڕێكا بهحهشتێ، یان ژ بهر داخوازا وى بۆ علمى، خودێ بهرێ وى دێ دهته هیدایهتێ، ئهوا دبته ئهگهرا چوونا وى بۆ بهحهشتێ.
🌼خێرا خواندن ونیشادانا قورئانێ:
وعلمێ ژ ههمیان مهزنتر، علمێ قورئانێیه، لهو حهدیسێ د دویڤ دا ئیشارهت دا وان مرۆڤان یێن ل مزگهفتێ كۆم دبن، وقورئانێ دخوینن ونیشا ئێك ودو ددهن، چار خێرێن مهزن وهكى پێغهمبهرى -سلاڤ لێ بن- ئاشكهرا دكهت، خودێ ددهته ڤان كهسان:
1- خودێ تهناهى ودلڕحهتیێ ددهته وان، لهو ئهو ههست ب خۆشیا دلى دكهن.
2- رهحم ودلۆڤانى ژ نك خودێ ب سهر وان دا دئێته خوارێ.
3- ملیاكهت ل دۆرا وان كۆم دبن، ودوعایێن خێرێ بۆ وان دكهن.
4- خودێ، ب ههمى مهزنیا خۆ ڤه، بهحسێ وان ب باشى ل نك وان ملیاكهتان دكهت، ئهوێن ل نك وى.. وبهسه بۆ مرۆڤى سهرفهرازى كو خودێ بهحسێ وى بكهت.
🌼جزا ب كاریه نه ب نهسهبێ:
وئهڤه ئێك ژ گرنگترین تهرازیێن ئیسلامێیه بۆ كێشانا مرۆڤان، بهایێ مرۆڤى د وى كارى دایه یێ ئهو دكهت، وههر ئێك جزایێ خۆ ل دویڤ كارێ خۆ وهردگرت، نه كو ل دویڤ بنهمال ونهسهبا خۆ، وئهوێ كارێ وى یێ باش وى پێشڤه نهبهت، نهسهبا وى قهت وى پێشڤه نابهت، وههر ژ بهر ڤێ چهندێ پێغهمبهرى -سلاڤ لێ بن- دگـۆتــه مرۆڤێن خۆ یێن نێزیك: هوین ب كارێ خۆ یێ باش خۆ ژ خودێ بكڕن، ئهز چو مفایى ناگههینمه ههوه!
⚪️مفایێن حهدیسێ:
1- خێرا هاریكاریا مرۆڤێن تهنگاڤ وبێ ڕێ گهلهكه.
2- ههر وهسا خێرا ستارهكرنا مرۆڤێ موسلمان.
3- دڤــێــت ئــهم ل وان ڕێكا بچین یێن علم پێ ب دهست مه دكهڤت، ب تایبهتى علمى قورئانێ.
4- حهدیس خێرا كۆمبوونا ل مزگهفتێ بۆ خواندن وخۆفێركرنا قورئانێ بۆ مه ئاشكهرا دكهت.
5- جزایێ ههر ئێكى ل دویڤ كارێ وى دئێتهدان، وئهگهر كارێ وى یێ باش نهبت، فایدێ وى ناكهت ئهو ژ بنهمالهكا باش بت.
