حەدیسا چل و چارێ
عَنْ عَائِشَةَ - رَضِيَ الله عَنْها – قالت: قَالَ رَسُولُ الله -صَلَّى الله عَلَيْهِ وَسَلَّمَ-: ( الرَّضَاعَةُ تُحَرِّمُ مَا تُحَرِّمُ الْوِلَادَةُ ).رواه البخاري ومسلم
ژ عائیشایێ -خودێ ژێ رازى بت- دبێژت: پێغهمبهرى -سلاڤ لێ بن- گۆت: شیردان وێ حهرام دكهت یا بوون حهرام دكهت. بوخارى وموسلم ڤهدگوهێزن
مهعنا: ئهو تشتێ ب ڕێكا بوون ونهسهبێ ل سهر مرۆڤى حهرام دبت، ههر ئهو ب ڕێكا دانا شیرى ژى ل سهر وى حهرام دبت، وئهڤه ئیشارهته بۆ مهسهلا شویكرن وژنئینانێ.
وئاشكهرایه كو د شریعهتى دا هندهك ژن ههنه، ل سهر مرۆڤى حهرامه وان ماره بكـهت، ژ بهر وێ پهیوهندیا نهسهبێ یا ب ڕێكا بوون ومرۆڤاینیێ د ناڤبهرا مرۆڤى ووان دا ههى، وئهو ژن دو ڕهنگن:
🔘ئێك: ئهو ژنێن بۆ مرۆڤى حهرام حهرامبوونهكا ههر وههر، ئهگهر ب تنێ ژى بن، وئهڤه دو پشكن:
🔘أ- ئهوێن ژ بهر نهسهبێ ب تنێ حهرام دبن، وهكى: دهیك وهندى بلند ببت، وكچ وهندى نزم ببت، وخویشك وهندى نزم ببت، ومهت وخالهت یێن وى ویێن دهیك وبابێن وى.
🔘ب- ئهوێن ژ بهر نهسهبێ د گهل خزماینیێ حهرام دبن، وهكى: ژنبابێ وهندى بلند ببت، وبویك، وخهسوى وهندى بلند ببت، ونهڤسیا وى ژ وێ ژنێ یا هاتیه ڤهگوهاستن وهندى نزم ببت، وژنێن نهڤسیێن وى.
وڤى ڕهنگى ب ههرد پشكان ڤه ژن وزهلام تێدا دپشكدارن.
🔘دو: ئهو ژنێن بۆ مرۆڤى حهرام حهرامبوونهكا ههر وههر، ئهگهر پێكڤه بـن، وئـهڤــه ب نسبهت زهلامى ب تنێیه، چونكى ژنێ دو مێر پێكڤه نابن! و ژ ڤى ڕهنگیه: كۆمكرنا د ناڤبهرا وان ههردو ژنان دا یێن كو ئهگهر ئێك ژ وان زهلام با چێ نهدبوو یا دى شوى پێ بكهت، وهكى دو خویشكان، وژنێ وخالهتا وێ یان مهتا وێ.
ئهڤه ئهو ژنن یێن مارهكرنا وان ب ڕێكا نهسهبێ بۆ مرۆڤى حهرام دبن، وئـهگــهر مـه ئـهڤــه زانـى، دێ بــۆ مـه ئاشكهرا بت كو ههر ئێكا وهكى ڤان ب ڕێكا شیرى ژى بگههته مرۆڤى بۆ مرۆڤى یا حهرامه، یهعنى -بۆ نموونه- ئهگهر ژنهكێ شیر دابته كوڕهكى ئهو ل سهر وى حهرام دبت؛ چونكى دبته دهیكا وى، وكچێن وێ دبنه خویشكێن وى، وخویشكێن وێ دبنه خالهتێن وى.. وهۆسا.
بهلێ جوداییهك ل ڤێرێ ههیه، ئهو ژى ئهڤهیه: حهرامبوونا ب ڕێكا شیرى ژ وى مرۆڤى یێ شیر ڤهخوارى بۆ عهیالێ وى دچت، بهلێ بۆ خویشك وبرا، ودهیك وباب، وخالهت وخال، ومهت ومامێن وى ناچت، یهعنى: ئهگهر كوڕهكى شیرێ ژنهكێ خوار ئهو دبته كوڕێ وێ، وكوڕێ وى دبته نهڤیێ وێ، بهلێ برایێ وى نابته كوڕێ وێ، وخویشكا وى نابته كچا وێ.. وهۆسا.
⚪️مفایێ حهدیسێ:
ئهڤ حهدیسه هندێ دگههینت كو ئهو حهرامیا نهسهب پهیدا دكهت، دانا شیرى ژى پهیدا دكهت.
