( 12 )
قیامەت نێزیك بوو وهەیڤ شەق بوو
د جــزیـا ( 27 ) ێدا ژ قـورئانێ سوورەتەكا تایبەت ب ناڤێ ( سورە القمر ) هەیە ، ژ ( 55 ) ئایەتان پێك دئێت ، وئەڤ سوورەتە ـ وەكی زانایێن تەفسیرێ دبێژن ـ ژ وان سوورەتانە یێن كـو ل مـەكـەهـێ هاتینە خوارێ ، لەو ئەو ژی وەكی بارا پـتـر ژ سوورەتێن ل مـەكـەهـێ هاتینە خوارێ ل دۆر مەسەلا باوەری ئینانا ب وەحی وئایەتێن قورئانێ دزڤڕت ، وبەحسێ وێ دویماهیا خراب دكەت یا كو چاڤەرێی كافران دكەت ل دنیایێ بەری ئاخرەتێ ..
وئەڤ سوورتە ژ پێغەمبەری ـ سلاڤ لـێ بن ـ دخوازت كو ئەو ڕویێ خۆ ژ ڤان كافران وەرگێڕت ، وبێهنا خـۆ ل وان فـرەهــ بكەت حەتا ڕۆژا ڕابوونا مەزن دئێت ، دەمێ ئەو وەكی كولی ژ قەبرێن خۆ دەردكەڤن ، و ل گازیا خودایێ خۆ دچن ..
وسوورەتا ( القمر ) هەر ژ دەسپێكێ خواندەڤانی ژ نێزیكبوونا ڕۆژا قیامەتێ دترسـیـنـت ، ئەو ڕۆژا پێغەمبەر ـ سلاڤ لـێ بن ـ د دەر حەقا وێ دا دبێژت : [ بعثت أنا والساعة كهاتين ـ ئـەز وقـیـامـەت وەكی ڤان هەر دووان هاتینە هنارتن ] وئـیـشـارەت ب تـبـلا خۆ یا شاهدێ ویا ناڤێ دا (وەکی بوخاری و موسلم ژێ ریوایەت دکەن ) ، پاشی سوورەت د دویڤ دا ئێكسەر بەحسێ ئێك ژ وان موعجزەیێن بەرچاڤ دكەت یێن خودێ ل سەر دەستێ پێغەمبەرێ خۆ یێ دویماهیێ ـ سلاڤ لـێ بن ـ پەیداكرین ، دا پشتەڤانیا وی پێ بكەت بەرانبەر درەوپێكرنا بوتپەرێسێن مللەتێ وی ، وهەر چەندە ئەوێن ئامادەبووین ژ وان كافـران هـەمـیـان ئــەڤ مــوعـجـزە ب چاڤ دیت ژی بەلـێ ل شـویـنـا ئـەو باوەریێ پێ بینن ، وان كافری پێ كر وپێغەمبەرێ خودێ ـ سلاڤ لـێ بن ـ ب سێرەبەندیێ گونەهبار كر ، ئەو پێغەمبەرێ حەتا عەمرێ وی بوویە چل سال ژی وان ب خۆ دگۆتێ : (ڕاستگۆیێ ئەمین ) ! ومەخسەدا مە ب وێ موعجزەیا پەردەدڕ ئەو بوو ئەوا د مەجالـێ تەحەددیێ دا ل سەر دەستێ پێغەمبەری ـ سلاڤ لـێ بن ـ پەیدا بووی ، دەمێ هەیڤ هاتیە كەلاشتن وبوویە دو پرت ، ئەو موعجزەیا نێزیكە عەقلێ مرۆڤی نەشێت تەصەوور بكەت ، وبۆ دەمەكێ درێژ بوویە جهێ حێبەتیا مرۆڤی ، ودبت ئەگەر مـەسـەلا باوەریـێ نــەبـا هـەر نەهاتبا قەبویلكرن ! بەلـێ ژ رەحما خودێ بوو ب مرۆڤی وی هندەك شاهدێن ماددی ل سەر بانێ هەیڤێ ب خۆ هێلاین كو ببنە دەلیل ل سەر ڕاستیا ڤێ موعجزەیێ .. وپـشـتـی پـتـر ژ 1394 سالان ل سەر ب جههاتنا ڤێ موعجزەیێ وی هند شیان دانە مرۆڤی كو بشێت علمێ خۆ پێش بێخت وهندەك ئامیرەتێن وەسا دورست بكەت پێ بفڕت وبدادەتە سەر بانێ هەیڤێ ، دا بزڤڕت ودەلیلەكێ موكم ل سەر ڕاستیا قورئانێ ل دەمێ زانینێ پێشكێش بكەت !
وبەری ئەم بەحسێ ڤێ موعجزەیا پێغەمبەری ـ سلاڤ لـێ بن ـ ژ لایێ علمی ڤە بكەین ، دا بەرێ خۆ بدەینە كتێبێن تەفسیرێ وحەدیسێ كانێ بۆ ڤێ سەرهاتیێ چ دبێژن ..
ئیمامێ بوخاری وچەند زانایەكێن دی ژی ژ هژمارەكا صەحابیان ڤەدگوهێزن كو ل دۆرێن سالا پێنجێ بـەری مـشـەخـتـبوونێ كافرێن مەكەهێ دەمێ هەڤڕكی د گەل پێغەمبەری ـ سلاڤ لـێ بن ـ دكر وبۆ ڕاوەستاندنا وی وان داخواز ژێ كر ئەو هندەك ئایەتێن عەجێب نیشا چاڤێن وان بدەت وئەڤە عەدەتێ كافران یێ كەڤنە نوی یە ، دەمێ ئەو دكەڤنە د مەجالـێ دان وستاندنێ دا د گەل پێغەمبەر ودویكەفتیێن وان ، وپشتی چو د دەستان دا نەمینت هندەك تشتێن نەمەعقوول وخیلافێ عـەدەتـی ژ وان دخوازن ، دا ئەگەر وان ئەو داخوازی بۆ ب جـهــ نەئینان بێژنە خەلكێ سادە : هێ بەرێ خۆ بدەنێ چ ددرەوینن !
ڤێجا ژ وان داخوازێن كو وان ژ پێغەمبەری ـ سلاڤ لـێ بن ـ كری ئەڤە بوو وان گۆتێ : ئەگەر ڕاستە تو پێغەمبەری ووەحی بۆ تە ژ نك خودێ دئێت پا كا ڤێ هەیڤا ئەم ل عەسمانی دبینین ل بەر چاڤێن مە بكە دوكەر !
داخوازەكا ( تافـه ) بوو وەكی خودانێن خۆ .. وەكی ڕۆژەكێ دەمێ مللەتێ صالحی گۆتیێ : ئەگەر ڕاستە تو پێغەمبەری كانێ حێشتـرەكێ بۆ مە ژ ڤی كەڤری دەربێخە ، ومللەتێ مووسای دەمێ گۆتیێ : ئەگەر ڕاستە تو پێغەمبەری كانێ خودێ نیشا چاڤێن مە بدە ، ودەمێ گۆتینە عیسای : ڤی بەری بۆ مە بكە پرتەكا نانی .. ئێك ڕێبازە ونائێتە گوهاڕتن !
بەلـێ خودێ ئەوێ چو ل بەر ئاسێ نەبت هەردەم د هەوارا پێغەمبەرێن خۆ دهات ، ودا چو هێجەتان بۆ ڤان كافران نەهێلت حەزكرنا وی ل سەر هندێ هاتیە كو هندەك موعجزەیێن پەردەدڕ ونەعەدەتی ل سەر دەستێن پێغەمبەرێن خۆ پەیدا بكەت دا پێغەمبەرینیا وان پێ ژ درەوا درەوینان جودا ببت .. ل سەر ڤی بناخــەیـی خــودێ ئــەو داخوازا كافرێن مەكەهێ ژ پێغەمبەری ـ سلاڤ لـێ بن ـ كری بۆ ب جـهــ ئینا ، و ل پێش چاڤێن كافرێن مەكەهێ هەیڤ هاتەكەلاشتـن وبوو دو پرت پرتەك هاتە ڤی لایی وپـرتا دی چوو لایێ دی ..
عەبدللاهێ كوڕێ مەسعوودی دبێژت : گاڤا كافران ئەڤ چەندە دیتی گۆتن : ئەڤە سێرەبەندیەكە موحەممەدی ل مە كری ، پشتی دەمەكی گۆتن : باشە ئەگەر موحەممەد شیا بت سێرەبەندیێ ل مە بكەت ژی ما دێ شێت سێرەبەندیێ ل خەلكی هەمیێ كەت ؟ پسیارا وان كەسان بكەن ئەوێن ژ دەرڤەیی مەكەهێ دئێن كانێ وان ژی ئەو دیتیە یا مە دیتی یان نە ، ودەمێ وان پسیاراخەلكێ ژ دەرڤەیی مەكەهێ ژی كری وان گۆت : بەلـێ ئەوا هەوە دیتی مە ژی دیت .
و ل شوینا ئەو باوەریێ بینن وان گۆت : مەعنا موحەمـمـەدی سێرەبەندی نە ل مە كریە بەلكی وی یا ل هەیڤێ كری لەو ل بەر چاڤێن خەلكی ئەو یا بوویە دوكەر ، ئینا هنگی ئەڤ ئایەتە هاتنە خوارێ : [ اقْتَرَبَتْ السَّاعَةُ وَانْشَقَّ الْقَمَرُ . وَإِنْ يَرَوْا آيَةً يُعْرِضُوا وَيَقُولُوا سِحْرٌ مُسْتَمِرٌّ . وَكَذَّبُوا وَاتَّبَعُوا أَهْوَاءَهُمْ وَكُلُّ أَمْرٍ مُسْتَقِرٌّ . وَلَــقَـدْ جَاءَهُمْ مِنْ الأَنْبَاءِ مَا فِيهِ مُزْدَجَرٌ . حِكْمَةٌ بَالِغَةٌ فَمَا تُغْنِ النُّذُرُ ] ( القمر : 1-5 ) .
د ڤان ئایەتان دا خودایێ مەزن دبێژت : قیامەت نێزیك بوو ، و ل دویڤ دوعایا پـێـغـەمبەری سلاڤ لـێ بن دەمێ كافران ژێ خواستی هەیڤ بوو دووكەر ، وئەگەر بوتپەرێس نیشان ودەلیلەكی ل سەر ڕاستگۆییا پێغەمبەری سلاڤ لـێ بن ببینن ، دێ پشت دەنێ وباوەریێ پێ نائینن ، وپشتی دەلیل ئاشكەرا دبت ئەو دێ بێژن : ئەڤە سێرەبەندیەكا پویچە ودێ چت ونامینت .
و وان پێغەمبەر سلاڤ لـێ بن درەوین دەرێخست ، ودویكەفتنا دلچوونێن خۆ كر یێن بەرێ وان دایە درەوپێكرنێ ، و ل ڕۆژا قیامەتێ هەر كارەكێ هەبت چ یێ باش بت چ یێ خراب دێ گەهتە خودانێ خۆ دەمێ جزا دئێتەدان .
و ب ڕاستی هـنـد بەحسێ وان ئومـمـەتان یـێـن درەو ب پێغەمبەران كری وكانێ چ عەزاب ب سەر وان دا هاتبوو بۆ كافرێن قورەیشی یێ هاتیەكرن كو تێرا وان هەبت ئەو خۆ ژ كوفر وسەرداچوونا خۆ بدەنە پاش .
وئەڤ قورئانە یا كو بۆ وان هاتی حكمەتەكا گەلەكا مەزنە ، ڤێجا ما ترساندن دێ چ مفای گەهیننە وی مللەتێ پشت دایێ ودرەو پێ كری ؟
وئەڤ موعجزە ژی وەكی گەلەك موعجزەیێن دی یێن ل سەر دەستێ پێغەمبەی ـ سلاڤ لـێ بن ـ پەیدا بووین ، د گەل دەمێ خۆ چوو ، یێ دیتی وباوەری پێ ئینای باوەری پێ ئینا ، ویێ باەری پێ نەئینای پـتـر ل كافریا خۆ مجد بوو ، ویێ ئەڤ موعجزە گوهــ لـێ بووی ونەدیتی ژ وان جیلێن پشتی صەحابیان هاتی ئەو ژی بوونە دو پشك : خودان باوەران ئەوێن باوەری هەی كو هەر تشتەكێ قورئانێ گۆتی یێ دورستە بلا عەقلێ وان ب ڕێك ودەلیلێن ماددی تێ نەچت ژی باوەری پێ ئینا ، وئەوێن شكێ دلـێ وان دەستەسەر كری ب دەڤ یان د دل دا گۆت : ئەڤە درەوەكا مەزنە موسلمان باوەریێ پێ دئینن !
وڕۆژ بۆرین وسال چوون .. وحەزكرنا خودێ ل سەر هندێ هات علمێ مرۆڤی پێش بكەڤت ، و ل دویماهیێن سالێن شێستان ژ سـەدسالا بیستێ مرۆڤ شیا بۆ جارا ئێكێ دادەتە سەر بانێ هیڤێ .. وڤێ وەغەرا عەجێب بۆ هەیڤی یا مرۆڤ پێ ڕابووی گەلەك گوهۆڕینێن مەزن ئێخستنە مەیدانا علمی وگەلەك ڕاستیێن ڤەشارتی ژی ل بەر مرۆڤی ئاشكەراكرن ، وپێخەمەت بەردەوامیا ڤان ڕەنگە وەغـەرێـن عەسمانی میزانیەكا زێدە مەزن ژ لایێ دەولەتێن مەزن ڤە هاتە تەرخانكرن ، و د بەرنامەیەكێ تەلەفزیوونی دا یێ كو ل سەر شاشا ( B.B.C. ) هاتیە بەلاڤكرن پێشكێشكەرێ بـەرنـامـەی ( جـیـمس بـیـرك ) ی سێ ژ زانایێن ئەمریكی یێن ( فەضائی ) مێڤان كرن ، دا دان وستاندنەكێ ل دۆر ڤان گەشتێن عەسمانی بكەن یێن ئاژانسا ئەمریكی یا عــەسـمـانـی ( سانا ) پێ ڕادبت ، كانێ مفایێ وان چیە ، وبۆچی هندە مەصرەف لـێ دئێتەكرن ، ل دەمەكی كو برسێ گەلەك وەلات ڤەگرتینە ، وكولپ وخەلایێ گەفێن دژوار ل مرۆڤینیێ كرینە ، وپێشكێشكەرێ بەرنامەی گـۆتـە وان : ئێك ژ وان گازندەیێن خەلك دكەن ئەڤەیە : ئەرێ ئەڤە چ ئیسرافەكا زێدەیە دەولەتەكا وەكی ئەمریكا دكەت كو هندە مالی ل ڤان گەشتێن عەسمانی دكەت ؟ ئەرێ ما ئەگەر ئەڤ مالە ل سەر خەلكێ هەژار وبرسی بێتە خەرجكرن وبەرگریا كولپ وخەلایێ پێ بێتەگرتن باشتـر نینە ژ ڤان هندە گەشتێن عەسمانی یێن هوین پێ ڕادبن ؟
ڤان هەر سێ زانایان بەڕەڤانی ژ كارێ خۆ کر ، ودیاركر كو ئەڤ كارێ ئەو پێ ڕادبن ب بەر هندێ دكەڤت كو هندە مال لـێ بێتە خەرجكرن ، چونكی ئەو مفایێن ب ڤان ڕەنگە گەشتان دگەهنە مرۆڤی ومرۆڤینیێ گەلەك ژ هندێ مەزنتـرن كو ب پارەی بێن بهاكرن ..
و د ناڤ دان وستاندنا وان دا بەحسێ وی زەلامی هاتەكرن یێ ل سەر بانێ هەیڤێ هاتیە دانان ، وپێشكێشكەرێ بەرنامەی گۆتێ : ب دەهان ملیار دۆلار هەوە ل ڤێ گەشتێ خەرجكرن ، ئەرێ مفایێ وێ بەس ئەو بوو زەلامەك ژ هەوە دادەتە سەر هەیڤێ دا ئالایێ ئەمریكی ل وێرێ بچكلینت ؟
د بەرسڤێ دا وان گۆت : نەخێر ! سوحبەت چكلاندنا ئالای نینە ، ڤێ گەشتێ ئەوا هندە ملیار دۆلار لـێ هاتینە خەرجكرن ئەم گەهاندینە هندەك ڕاستیێن علمی یێن وەسا ئەگەر مە ئەو مال هەمی ل خەلكی خەرج كربا دا ئەو باوەریێ ب ڤان ڕاستیان بینن وان باوەری پێ نەدئینا .
ودەمـێ پێشكێشكەرێ بەرنامەی گۆتیێ : ئەو ڕاستیا علمی چ بوو ؟ وان گۆت : پشتی مە دادایە سەر بانێ هەیڤێ ومە ڤەكۆلینێن علمی ل سەر ڕویێ هەیڤێ كرین بۆ مە دیار بوو كو ڕۆژەكێ ئەڤ هەیڤە یا هاتیە كەلاشتن وبوویە دوكەر ، ونیشانێن ڤـێ كـەلاشـتـنێ هێشتا ل سەر هەیڤێ ددیار وئاشكەرانە ، ونوكە ل سەر پشتا هەیڤێ هندەك شەقێن مەزن هەنە كویراتیا وان ژ نەهــ كیلۆمتـران پتـرە ، وقوطرێ وان ژ هزار كیلۆمتـران پتـرە ، وپشتی چەند ڤەكۆلینێن علمی بۆ مە ئاشكەرا بوو كو ئەڤ شەقە نیشانا هندێنە كو هەیڤ جارەكێ یا ژێكڤە بووی پاشی یا پێكڤە مایەڤە ، ما ئەڤە نە ڕاستیەكا مەزنە ئەم گەهشتینێ !
وئەم دبێژین : بەلـێ ڕاستیەكا مەزنە ، ومەزنیا وێ د هندێ دایە ئەو زانایێن گەهشتینە ڤێ ڕاستیێ هەمی نە ئەون یێن جارەكا ب تـنـێ ژی قـورئان خواندی ، یان باوەری پێ ئینای ، یان گوهــ ل موعجزەیێن پێغەمبەری بووی ، دا چو قائیشكێش نەبێژن : ئەڤە دیعایەتەكە ئەڤ كەسە بۆ قورئانا خۆ دكەن !!
