(18) د ناڤبهرا زاناى وزاهدى دا
مرۆڤێ زانا فهرمانێ ل خهلكى ناكهت ئهو پشت بدهنه دنیایێ وئێكجار دهستان ژێ بكێشن؛ چونكى ئهو باش دزانت كو ئهو نهشێن ڤێ چهندێ بـكـهن، بـهلێ ئـهو فـهرمـانـێ ل وان دكهت كو ئهو د گهل دنیاداریا خۆ، خۆ ژ كرنا گونههان بدهنه پاش، چونكى ب دیتنا زاناى هێلانا دنیایێ تشتهكێ باشه، وهێلانا گونههان تشتهكێ فهرزه، وئهوێ فهرزێ ب جهـ نهئینت یا بهرعهقل نینه فهرمانا ب كرنا باشیێ لێ بێتهكرن، وهكى ڤێیه كهسهك ئهگهر واجبى نهكهت تو بچى فهرمانێ ب كرنا سوننهتێ لێ بكهى!
وزاناى ئهگهر دیت یا ب زهحمهته خهلك خۆ ژ گونههێ ژى بدهنه پاش، ئهو خهما خۆ ههمیێ دكهته ئهو ئهوخودێ ل بهر وان شرین بكهت ب ڕێكا بیرئینانا وان ل قهنجیێن خودێ، وبهحسكرنا مهزنیا وى بۆ وان، چونكى دلهك نینه ئهگهر ڤیانا وى تێدا نههاتبته چاندن، ئهگهر خۆ هندهك جاران ئـهو ڤـیـان ل بـن خـولیـا ژبـیـركـرنێ هاتبته ڤهشارتن ژى، وههر جارهكا دل ب ڤیانا وى ڤه هاته گرێدان، ل بهر خودانى دێ یا ب ساناهى بت ئهو خۆ ژ بێ ئهمریا وى بدهته پاش.
ومرۆڤێ زاهد داخوازێ ژ خهلكى دكهت ئهو دنیایێ بهێلن، وقهستا خودێ بكهن، وئهڤه كارهكه ب پتریا وان ڤه نائێت، تو دبینى شیرڤهكرنا زارۆكى چهند یا ب زهحمهته؟ بۆچى؟ چونكى ڕۆژا وى د دنیایێ دا فامكرى، وى خۆ یێ دیتى ئهو شیرى ڤهدخوت، وگاڤا وى ژ نشكهكێ ڤه دیت تو هاتى وته دڤێت وى شیرى ژێ ببڕى، ئهو ب گۆتنا ته ناكهت، زاهدى دڤێت ب ڕێكا شیرڤهكرنا خهلكى ژ دنیایێ بهرێ وان بدهته خودێ، وئهڤه كارهكێ ب ساناهى نینه، لهو كێم مرۆڤ ب زهحمهت گوهداریا وى دكهن.
مهعنا: مرۆڤێ زانا بهرێ خهلكى ددهته خودێ، ب دانهنیاسینا خودێ بۆ وان، لـهو خـهلك ب سـانـاهـى د بهرسڤا وى دئێن.. وزاهد بهرێ خهلكى ددهتـه خــودێ ب ڕێــكــا هــێــلانــا وان بــۆ دنیایێ، لهو خهلك ب زهحمهت د بهرسڤا وى دئێن.
