(20) كێمیا ههڤالان بلا ته سست نهكهت!
د ئایـهتـهكـا قورئانێ دا خودایێ مهزن دبێژت: (ذَٰلِكَ بِأَنَّهُمْ شَاقُّوا اللَّهَ وَرَسُولَهُ وَمَنْ يُشَاقِقِ اللَّهَ وَرَسُولَهُ فَإِنَّ اللَّهَ شَدِيدُ الْعِقَابِ)(الأنفال13)و د ئایهتهكا دى دا دبێژت:(إِنَّ الَّذِينَ يُحَادُّونَ اللَّهَ وَرَسُولَهُ أُولَٰئِكَ فِي الْأَذَلِّينَ)(المجادلة 20) د ڤان ههردو ئـایـهتـان دا خـودایـێ مــهزن ئـاشـكـهرا دكـهت كــو كـارهك هــهیـه ئـێـكـا هند ژ خـودانـى چـێ دكهت ئهو د دنیایێ دا ببته ژ وان یێن ژ ههمیان رهزیلتر، و ل ئاخرهتێ ببته ژ وان یێن عهزابا خودێ یا دژوار ب سهر دا دئێت، ئهو كار چیه؟
ئایهتێ دو پهیڤ بۆ دانان: (یشاقق) و (یحادد)، وههردو ئێك مهعنایێ ددهن، یـهعـنـى: خـودێ وپـێـغـهمـبـهرێ وى ل لایهكى (ل شققهكى، یان ژى ل حهددهكى) بن، ومرۆڤ ل لایهكێ دى بت.
ومهعنایا ڤێ ئهوه ئهگهر خودێ وپێغهمبهرێ وى ل لایهكى بن، هشیار بى! تو خۆ نهدهیه د گهل لایێ دى، ئهگهر خۆ دنیا ههمى ل لایێ دى بت، دا شهرمزار نهبى، وكێمیا ههڤالان ل وى لایى بلا ته سست نهكهت؛ چونكى خودێ وپێغهمبهرێ وى تێرا ته ههنه، وخۆدانا ته د گهل لایێ وان بۆ ته چێتره، ل دنیایێ بهرى ئاخرهتێ..
ڕاسته تو دێ پتریا خهلكى ل لایێ دى بینى ، ب تایبهتى ئهگهر وان دیت خۆشیێن بهروهخت یێن ب وى لایى دا چووین، یان ئێك ههبت وان بترسینت ئهگهر ئهو ب وى لایى دا نهچوون، هنگى كێم كهسان تو دێ بینى خۆ بدهنه د گهل وى لایى یێ خودێ وپێغهمبهرێ وى دگهل، نه بهس هنده، بهلكى ئهگهر ئهو ئێكى ل وى لایى ببینین ژى دێ وى حسێب كهن مرۆڤهكێ عهقل سڤك ونهزان، ودویر نینه ئهو وى حسێب كهن مرۆڤهكێ دین ژى، وئهڤه عهدهتهكێ كهڤنێ نهیارێن خودێ وپێغهمبهرانه، یێ ل لایێ وان نهبت و ب گۆتنا وان نهكهت، ل نك وان ئهو كهسهكێ دینه، ما وان (ئتتهاما) پێغهمبهران ب خۆ ژى ب دیناتیێ نهكربوو؟!
وئـهو كـهســێ خــۆ ددهته وى لایى یێ خودێ وپێغهمبهر لێ، وى پێتڤى ب هندێ ههیه: وى علمهكێ موكم ب وى شریعهتى ههبت یێ پێغهمبهر پێ هاتى، علمهكێ وهسا بت بگههته دهرهجا یهقینێ، یا گومان د گهل دا نهبت؛ دا دورست بدهته ڕێ، پاشى دڤێت وى صهبرهكا تمام ژى ههبت؛ دا بشێت خۆ ل بهر لۆمه ونهیارهتیا ههڤڕكان بگرت، وئهو نهشێت ڤێ چهندێ بكهت ئهگهر رغبهتهكا ب هێز وى نهبت وى بهر ب خودێ وئاخرهتێ ڤه ببهت، وئێكا هند ژ وى چێ بكهت خودێ وپێغهمبهرێ وى ل نك وى خۆشتڤیتر بت ژ ههر تشتهكێ دى یێ ههى.
وتشتهك ژ ڤى ب زهحمهتر نینه ل سهرى ل بهر مرۆڤى؛ چونكى نهفسا وى، وتبیعهتێ وى، وشهیطانێ وى، وههڤال وهۆگرێن وى، ههمى دێ بهرێ وى دهنه خۆشیا بهروهخت، وهلبژارتنا دنیایێ، وههر جارهكا وى گوهداریا وان نهكر، ئهو دێ نهیارهتیا وى كهن، ڤێجا ئهگهر وى صهبر كێشا وتهحهممول كـر، هـاریكارى دێ بۆ وى ژ لایێ خودێ ڤه ئێت، وئهو كارێ ب زهحمهت دێ ل بهر وى ب ساناهى كهڤت، وئهو نهخۆشى ل بهر وى دێ بته خۆشى، وخودێ ژ هندێ مهزنتره ئێك لایێ وى بگرت، وپشتهڤانیا وى بكهت، وئهو پشتا وى بهردهت، وبهڕهڤانیێ ژێ نهكهت.
ونهیارهتیا خهلكى ل بهر خۆ ب زهحمهت نهئێخه، هندى تو د گهل خودێ وپـێـغـهمـبـهرێ وى بى، ئهگهر خۆ تو یێ ب تنێ ژى بى، چونكى هندى تو د گهل خودێ بى خودێ ژى دێ د گهل ته بت، وژبلى هاریكاریا خودێ مـهزنـتـریـن هـاریكـار بــۆ تــه ل سـهر ڤێ ڕێكێ ئهگهر ته بڤێت ئهوه تو خۆ ژ طهمهعێ وترسێ بپارێزى، طهمهعیا وى تشتى یێ د دهستێ خهلكى دا ههى؛ دا ئهو ته ب لایێ خۆ ڤه نهبهن، وترسا ژ وێ هێزێ یا وان ههى؛ دا ئهو ته ژ حهقیێ نهدهنه پاش..
وچاوا دێ شێى خۆ ژ طهمهعێ وترسێ دهیه پاش؟
ئهگهر ته باوهریهكا باوهرى ههبت كو تشتێ خودێ بۆ ته ڤیاى، یێ خۆش بت یان یێ نهخۆش بت، ههر دێ گههته ته، ئهگهر خهلك ههمى دژى وێ چهندێ ڕاوهستن ژى.
