(25)
و پشتى رهمهزانێ چ؟
گاڤا هندهك صهحابيان ڤياى عهبدينيا خۆ بۆ خودێ ب ساخيا موحـهمـمــهدى ڤــه -سـلاڤ لـێ بن- گرێدهن، زهلامێ باوهريێ ئهبوو بهكر د ناڤ وان دا ڕابووڤه و ب دهنگهكێ مزگهفت ژ بهر هژياى وڕۆندك ژ بهر ڕژياين گۆت: "گهلى مرۆڤان! ههچيێ عهبدينيا موحهممهدى دكر موحهممهد مر، وههچيێ عهبدينيا خودێ دكر خودێ يێ ساخه ونامرت".
ئــهگــهر حــهتــا ڤــێ گـاڤێ ههوه خودێ نياسى بت چونكى موحهممهد د ناڤ ههوه دا بـوويـه، ئهڤه ئهو چوو، ووهكى ههر تشتهكێ خودێ دويماهيهك بۆ داناى مرن ب سهر وى دا هات ووى قهستا وهغهرا خۆ يا دويـمـاهــيـێ كر ( أفإن مات أو قتل انقلبتم على أعقابكم ) ئهرێ ڤێجا ئهگهر ئهو د ناڤ ههوه دا نهما جارهكا دى هوين دێ ل پاشپانيێن خۆ زڤڕنهڤه ؟
ئهگهر ههوه حهتا ڤێ گاڤێ عهبدينيا وى دكر بلا هوين وێ چهندێ بكهن، بهلـێ ئهگهر ههوه عهبدينيا خودايێ وى دكر خودايێ وى پشتى وى ژى ههر دێ مينت.. وهوين ژى ئهى عيبادهتكهرێن رهمهزانێ! ئهگهر ههوه حهتا ڤێ گاڤێ عهبدينيا رهمهزانێ دكر رهمهزان چو نهمايه دێ چت، ئهگهر نڤێژ وڕۆژى وعيبادهتێ ههوه بۆ رهمهزانێ بوويه.. ئهگهر خـۆدويـركـرنـا ههوه ژ خرابى وگونههێ ژ بهر رهمهزانێ بوويه، وههوه ئنيهت بت پشتى رهمهزانێ خۆ كراسگوهۆڕ بكهن، ئهڤه رهمهزان چوو، وئهگهر ههوه ئهڤ چــهنــدا هــه ژ بــهر خــودايێ رهمهزانێ وبۆ وى كربت، خودايێ رهمهزانێ ل شهووالێ و ل ههمى دهمێن دى يێن سالـێ ژى خوداينيێ دكهت!
گاڤا صهحابيێ پێغهمبهرى (حذيفه بن اليمان) كهفتيه بهر مرنێ ههڤالـێ وى يێ صهحابى عهبدللاهێ كوڕێ مهسعوودى ل بهر سهرێ وى ڕوينشت وگۆتێ: شيرهتهكێ ل من بكه، حوژهيـفـهى گـۆتـێ: ما باوهرى نهگههشتيه ته ؟ وى گۆت: بهلـێ ئهز ب مهزنيا خودێ كهمه، حوذهيفهى گۆتێ: پا هشيارى گهلهك ڕهنگى وخۆگوهۆڕينێ به، چونكى دينێ خودێ ئێكه. خوزيا وى يێ رهمهزانێ ئهو فێرى هندێ كربت كو ئهو وهكى كێڤليلهى هـهڕۆ يـێ ب ڕهنـگـهكى نـهبـت.. ل رهمهزانێ (ما شاء الله) وپشتى رهمهزانێ (نعوذ بالله)!
رهمهزان هات وچوو.. بازارهكا ل كار بوو پشتى خهلك لـێ كۆمبووى ژێ ڤهڕهڤين، ژ وان ههيه يێ سهرفايده ژێ دهركهفتى، وههيه يێ خوسارهت ودهست ڤالا ژێ زڤڕيهڤه، هندهك دێ ههبت خهريبى ڕۆژ وشهڤێن وێ بن، وهندهك دێ ههبن كهيفا وان دێ ب چوونا وێ ئێت، چونكى ئهو قهيدهكا گران بوو د دهستێن گونههكاران دا كانێ چاوا ئهو مـهوســمـهك بوو بۆ تهقواداران، رهمهزان چوو.. وئهگهر تو ژ وان بى يێن ل دهمێ ئهو هێشتا نهچووى ته باش كار بۆ نهكرى وپشتى چووى ژ نوى دلـێ خۆ دايه دويڤ دێ بێژينه ته:
دهما هاتى ته پشت دايێ و.. دهما چوو
ب ناليـن ڤــه دپـڕســـى كــا.. نــهما چوو
ژ شــهوقـا عـشـق وگــــهرمـــــا دووريا وى
تـه گـريـانــه و.. كــــهتــــى داڤا خهما نوو
ژ شــويـنـواران دپـــــڕســــى: خـۆشـتـڤـى كا
وهكى ل نك تـه ته پڕسا وى نــهكــر بۆ؟
نـهبـێـژه چـــهرخ ودهوران وفـــــهلهك بوون
ب دهسـتێ خۆ ته ڕهش كر تـالعــێ خــۆ!
ئهبوو بهكرێ كوڕێ عياشى دبێژت: ئێك ژ ههوه ئهگهر دهرههمهكێ وى ژێ بكهڤت وێ ڕۆژێ ههميێ دێ كهت وبێژت: دهرههمهكێ من بهرزه بوو، وئهو عهمرێ خۆ زهعێ دكهت وجارهكێ نابێژت عهمرێ من چوو، وخودێ هندهك كهس دابوون لهز ل دهمى دكر، ووهختێ خۆ دپاراست وزهعێ نهدكر، وئهو ب عيبادهتى تژى دكر..
گــۆتــنـــه زاهـــدێ مـهزن (بشر الحافي): هندهك مرۆڤێن ههين بهس ل رهمهزانێ عيبادهتهكێ زێده بۆ خودێ دكهن، وى گۆت: نه چو مرۆڤن ئهو هزر دكهن بهس ل رهمهزانێ خودێ حهقێ ل سهر وان ههى!
حهسهنێ بهصرى دگۆت: كوڕێ ئادهمى، كێر يا دئێته هوسين، وتهنوير يا دئــێــتــه خـــۆشكرن، وبهران يێ دئێته ربيتهكرن.. ئهزێ عهجێبگرتيمه ژ وان مرۆڤان يێن فهرمان لـێ هاتيهكرن زادێ خۆ حازر بكهن وكارێ خۆ بـــۆ وهغـــهرێ بــكــهن، د گــهل هندێ ژى ئهو كۆم ڤه دبنه سهرێك وخۆ ب ياريان ڤه موژيل دكهن.
وئهبوو حازمى دگۆت: پهرتالـێ ئاخرهتێ ئهڤرۆ ل بازارێ يێ بێ بها بووى ڤێجا هوين گهلهكێ بۆ خۆ كۆم بكهن، چونكى ئهگهر ڕۆژهكێ هات وئهو نهما هوين نهشێن چويێ ژێ ب دهست خۆ بێخن.
رهمــهزان ب دويماهى هات.. ومزگهفتێن مه جارهكا دى دێ ڤالا بن ژ وان مرۆڤان نهبت يێن (ئههلێ مزگهفتێ) بن، ئهوێن ل ههمى دهمێن سالـێ خودێ دنياسن نه ل رهمهزانێ ب تنێ.
رهمهزان ب دويماهى هات.. وچرا جارهكا دى دێ ئێنه ڤهمراندن، وتهڤن دێ بنهڤه ڕيس يان هرى، قورئان دێ ئێنه پێچان، وتهههجود دێ ئێنه هێلان، وتهقوادارى يازده ههيڤان دێ ئيجازێ وهرگرت! هـهر وهكى رهمـهزانـێ تشتهك ل مه نهگوهاڕتى.
