( 26 )
چەرمێ مرۆڤی وهەستكرنا ب سۆتنێ
د قورئانێ دا ئایەتەك هەیە بەحسێ كافران دكەت دەمێ ڕۆژا قیامەتێ ئەو دچنە ئاگری ، وكانێ چاوا ئەو دێ ئێنە عەزابدان ، ئایەت دبێژت : [ إِنَّ الّذِينَ كَفَرُوا بِآيَاتِنَا سَوْفَ نُصْلِيهِمْ نَارًا كُلّمَا نَضِجَتْ جُلُودُهُمْ بَدَّلْنَاهُمْ جُلُوداً غَيْرَهَا لِيَذُوقُوا الْعَذَابَ إِنَّ اللّهَ كَانَ عَزِيزاً حَكِيما ـ هندی ئەون یێن كافری ب ئایەتێن مە كری ، پاشی ئەم دێ وان كەینە د ئاگرەكی دا ، دا ئەو تام بكەنە گەرما وی ، هەر جارەكا چەرمێ وان هاتە سۆتن ئەم چەرمەكێ دی دێ بـۆ وان گوهۆڕین ، دا عەزاب وئێشا وان یا بەردەوام بت . هندی خودێ یە یێ زال بوویە تشتەك ل بەر وی ئاسێ نابت ، وئەو د ڕێـڤەبرن وقەدەرا خـۆ دا یێ كاربنەجهــ بوویە ] ( النساء : 56 ) .
ژ ڤـێ ئایەتێ دئێتە زانین كو هەر جارەكا چەرمێ جەهنەمیان ب ئاگری هاتە سۆتن خودێ چەرمەكێ دی ب سەر لەشێ وان دا دگرت .. بۆچی ؟
ئایەت دبێژت : [ لِيَذُوقُوا الْعَذَابَ ـ دا تام بكەنە عەزابێ ] مـەعـنــا : ئـەگەر چەرمێ وان هاتە سـۆتـن وچـەرمـەكـێ نوی ل شوینێ نەهات ئەو تام ناكەنە عەزابێ ..
چ ژ ڤێ دئێتە زانین ؟
ژێ دئـێـتــە زانـیـن كـو مـرۆڤ ب ڕێكا چەرمی هەست ب نەخۆشیێ دكەت ، ب تایبەتی نەخۆشیا سۆتنێ .. وئەڤە مەسەلەك بوو مرۆڤی ل دەمێ هاتنەخوارا قورئانێ نەدزانی ، چونكی دختۆری وەسا پێش نەكەفت بوو كو ب سەر ڤێ ڕاستیا علمی هل ببت .
بەلكی بەروڤاژیا ڤێ چەندی مرۆڤی هزر دكر گۆشت ژی وەكی چەرمی یان پـتـر هەست ب ئێشێ دكەت ، بەلـێ پشتی زانینا تەشریحێ پێشكەفتی بۆ زانایان دیار بوو كو چەرم ب تنێ هــەسـت ب ئێشێ دكەت ، مەعنا : ئەگەر تو دەرزینەكێ بكەیە د لەشێ مرۆڤەكی ڕا پشتی سەرێ دەرزیكێ چەرمی كون دكەت گۆشت هەست ب ئێشێ ناكەت ، و د شرۆڤەكرنا ڤێ چەندێ دا ئەو دبێژن :
پشتی مە ب مكرسكۆبێ بەرێ خۆ دایە لەشی بۆ مە دیار بوو كو گەلەك ئەعصابێن هەست پێكرنێ د لەشێ مرۆڤی دا هەنە ، وتشتێ غەریب ئەوە ئەڤ ئەعصابە هەمی د لەشی دانـە ، لەو ئـەگـەر ئـەم فـەرز بكەین مرۆڤەكی چەرم د سەر لەشی دا بێت تو گۆشتێ وی بسوژی یان ب كێركێ پرت پرت بكەی ئەو هەست ب ئێشانێ ناكەت ، چونكی ئەعصابێن ( ئحساسێ ) وی نابن !
لەو پشتی چەرمێ كافری د جەهنەمێ دا دسوژت چەرمەكێ دی یێ نوی ب سەر لەشی دا دئێت ، دا ئەو پتـر تام بكەتە عەزابێ .
وبەرانبەر ڤێ دەمێ ئایەت بەحسێ ڤەخوارنا جەهنەمیان ژ ئاڤا زێدە كەلاندی دكەت ، دبێژت : [ وَلَهُمْ فِيهَا مِنْ كُلِّ الثَّمَرَاتِ وَمَغْفِرَةٌ مِنْ رَبِّهِمْ كَمَنْ هُوَ خَالِدٌ فِي النَّارِ وَسُقُوا مَاءً حَمِيماً فَقَطّعَ أَمْعَاءَهُمْ ـ وبۆ تەقواداران د بەحەشتێ دا ژ هەمی ڕەنگێن فـێـقـی هـەنـە ، ویا ژ ڤێ مەزنتـر لێبورینا ژ گونەهێن وانە ، ئەرێ ئەوێ د ڤـێ بەحەشتێ دا ما وەكی ویە یێ هەر وهەر د ئاگری دا دمینت ، وئاڤەكا زێدە كەلاندی بۆ وان دئێتە دان ڕویڤیكێن وان پێ پرت پرت دبن ؟ ] ( محمد : 15 ) .
ل ڤێرێ ئایەتێ نەگۆت : گاڤا ڕویڤیكێن وان ب ئاڤا كەلاندی هاتـنـە سۆتن دێ هندەك ڕویڤیكێن دی دەینە وان ، وەكی چەرمی . بەلكی گۆت : ڕویڤیكێن وان دێ پرت پرت بن .. مەعنا : ئەو ئاڤا كەل وخوارنا نەخۆش ئەوا د ڕویڤیكێن وان دا هەی دێ ڕژتە د ناڤ هناڤێن وان دا !
بۆچی ؟
دیسا زانایێن بسپۆر ب ڕێكا تەشریحێ زانیە كو د ڕویڤیكان دا چو ئەعصابێن حەسساس نینن خودان پێ ب تشتێ كەل ویێ سار بـحەسیێت ، لەو مانا ئاڤا كەل د ڕویڤیكان دا چو نەخۆشیێ ناگەهینتە خودانی ، كەنگی ئەو دێ هەست ب نەخۆشیێ كەت ؟
زانا دبێژن : گاڤا ئەڤ خوارنە ڕژتە د ناڤ هناڤان دا هنگی خودان دێ هەست كەت هەر وەكی كێر وخەنجەر یێن ب هناڤێن وی دكەڤن .
ژ بەر ڤێ چەندێ ئەم دبێژین : ئەڤ دیاركرنا قورئانێ بۆ سالۆخەتێن چەرمی وڕویڤیكان تشتەكێ د شیانا مرۆڤی دا نینە ، وئەوێ ل دەمێ هاتنا قورئانێ بشێت پێشوەخت ڤان ڕاستیان بـزانـت دڤێت ئـەو بت یێ ئەڤ مرۆڤە ئافراندی ونهێنیێن وی زانین .
