(27)
چاوا خاترخواستنا رهمهزانێ بكهين؟
عهدهتێ دلێن (موشتاقه) ل دهمێ خاترخواستنێ پتـر ژ ههر دهمهكێ دى ههست ب كهسهرێ دكهن، وخوزيا خۆ يا مهزن دبته ئهو كو وان دهستهكێ هندێ ب هێز ههبا ئهو شيابان دهورا زهمانى ڕاوهستينن وڕۆژێ ل جهێ وێ بهێلن بهرى ئهو دهم ب سهر وان دا بێت يێ چاڤێن وان تێدا ب (ويصالـێ) روهن نهبن!
جارهكێ خهونهكا خۆش ته ديتيه.. خهونهكا وهسا يا ته حهز دكر كو چو دويماهى بۆ نهبن، پاشى ژ نشكهكێ ڤه تو ژێ هشيار بووى وئهو خهونا ته هزر دكر گهلهك يا درێژه، يان گهلهك دێ يا درێژ بت ل بهر چاڤێت ته غهواره بوو و ب تنێ بيرهاتنهكا شرين د گهل كهسهرهكا تهعل ل ســهر نــهمــانــا وێ بــۆ تـــه ل پاش خۆ هێلا بت؟ ما نه هنگى تشتێ ژ ههميان زويتـر دئێته سهر ئهزمانێ ته دێ ئهو بت تو بێژى: چ زوى خلاس بوو، خوزى درێژتر با؟
ئهڤ پسيارا ب كهسهرێ تامداى ههر ئهوه يا بهرى ههر تشتهكى دئێته سهر هزرا ئهڤيندارێ رهمهزانێ ژى دهمێ دههكێن وێ يێن دويماهيێ بهر ب خلاسيێ ڤه دچن.. بهلـێ قهدهرا خودێ ب ڤى ڕهنگى گهڕيايه، ههر تشتهكێ بهراهى بوو ههى دويماهى بۆ ههيه، ويێ دويماهى بۆ نهبت بهس خودێ يه.
ئهو كهسێن غاردانێ دكهن دهمێ نێزيكى دويماهيێ دبن ههر ئێك هێزا خۆ ههميێ ل هندێ خهرج دكهت كو بهرى ههڤالـێ خۆ خالا دويماهيێ دا سهركهفتيێ ئێكێ ئهو بت، وتشتێ ژ ههميان پتـر خهما خاترخواستنێ ل بهر مرۆڤى سڤك دكهت ئهوه ئهو ههست ب هندێ بكهت كو وى بهرانبهر يێ وهغهركهرێ خاتر خواستى چو ل سهر خۆ نههێلايه.. موسلم ژ دهيكا موسلمانان عائيشايێ ڤهدگوهێزت، دبێژت: "ل رهمهزانێ پتـر ژ ههر دهمهكێ دى پێغهمبهرى -سلاڤ لـێ بن- خۆ ب كرنا عيبادهتى ڤه دوهستاند، و ل دههێن دويماهيێ ژ رهمهزانێ وى پتـر ژ ڕۆژێن دى خۆ دوهستاند".
بهلـێ وى نڤينێن خۆ دپێچان، وشهڤ وڕۆژێن خۆ دكرنه ئێك، وعيبادهتێ خۆ زێده دكر.. ما دهم نــه دهمێ گههشتنا خالا دويماهيێ يه د غاردانێ دا، ڤێجا سستى چاوا چێ دبت؟
ئهڤه ڕۆژێن رهمهزانێ يێن بهر ب دويماهيێ ڤه دچن، وبهرى رهمهزان ئێكجار بچت ووى (جهووێ ئيمانى) د گهل خۆ ببهت يێ نوكه ئهم تێدا يا فهره ل سهر ههر ئێك ژ مه پيچهكێ د گهل خۆ ڕاوهستت، وپسيار بكهت: ئهرێ دويماهيا رهمهزانێ چ ژ من دخوازت؟ ب ڕهنگ وكارى ئهز خاترخواستنا ڤــێ هــهيــڤـێ بكهم دا ببمه ژ وان كهسان يێن ب سهركهفتن ژ رهمهزانێ دهردكهڤن؟
وئهگهر ته بهرسڤهكا دورست بۆ ڤێ پسيارێ بڤێت ته بزانه كو پێنج كارێن گرنگ ههنه دڤێت تو ل دويماهيا ههيڤێ پێ ڕاببى دا سهركهفتنا خۆ مسۆگهر بكهى، ئهگهر نه ژ خۆ بتـرسه كو تو ژ وان بى يێن رهمهزانێ چــو لـێ زێـــده نــهكــرى ژبلى برسێ ووهستيانێ، ژ خۆ بتـرسه زهحمهتا ته د بـــهر ئاڤێ دا چـــو بـــت، وتـــو ژ يێن زڕبار بێيه هژمارتن.. خودێ مه ژ وان بپارێزت.
كارێ ئێكێ: حسێبا نهفسێ:
ڤان ڕۆژێن مايى ژ رهمهزانێ بۆ خۆ ئستغلال كه، چهند دهقيقهيهكێن كـــورت خــۆ ژ خــهلكى ڤـهدهر كه، دهرگههى ل خۆ بگره وبمينه ب تنێ، ل دويماهيا شهڤێ دهمێ تاريا شهڤێ ههيبهتا خۆ ب سهر عهردى دا دئينته خوارێ، يان ب ڕۆژ دهمێ رووحانيهتا ڕۆژيێ چهنگێ خۆ ب سهر نهفسا ته دا دئينته خوارێ، دهليڤهكێ ئهگهر خۆ يا كورت ژى بت د گهل نهفسا خۆ ڕاوهسته، دوير ژ وێ (تهصهننوع) وخۆ خهملاندنا ئهم پێ نيشا خهلكى ددهين، دوير ژ وى ميكياجێ ژ درهو ووان رتووشاتێن دهستكرد يێن ئهم ل سهر دێمێ خۆ ددانين دا خۆ پێ جوان نيشا خهلكى بدهين، بمينه د گهل خۆ ب تنێ و ژ ڤان پسياران ژ خۆ بكه، وبۆ ههر پسياره (ئه) يان (نه) بدانه، يان ژى وهكى د پسيارێن مهدرهسان دا دئێته گۆتن (دورسته) يان (خهلهته) بدانه، پاشى بهرێ خۆ بدێ كانێ بهرسڤێت پتـر ب لايێ (ئه) يان (نه) ڤه دچن، وئهو پسيار ژى ئهڤهنه:
- ئهڤه رهمهزان چوو ئهرێ ئهو عيبادهتێ من بۆ خودێ تێدا كرى يێ دورست و ب ڕێك وپێك بوو يان نه؟
- ئهرێ د ڤێ ههيڤێ دا ئـهز وهسا ژيـام وهكـى خودێ ڤياى يان وهكى من ڤياى؟ دلـێ من.. ئهزمانێ من.. دهست وچاڤێن من.. جلك وسهروبهرێ من يێ وهسا بوو وهكى خودێ پێ خۆش ووهكى وى ئهمر پێ كرى؟
- ئـهرێ دهمـێ ئــهزێ ب ڕۆژى بـهس دهڤـێ من ژ خوارن وڤهخوارنێ يــێ ب ڕۆژى بـوو، يان هــهمى ئهندامێن لهشێ من ژ بێ ئهمريا خودێ ب ڕۆژى بوون؟
- د ڤێ ههيڤێ دا دهمێ من ئهو عيبادهت بۆ خودێ دكر يێ من هزر دكر ئهو دێ من نێزيكى خودێ كهت شرينيهك د دلـێ من دا پهيدا كر يان دهمێ من ئهو دكـر مـن هـهسـت ب هندێ دكر كو ئهز يێ كارهكێ رووتينى و ب مهلهل دكهم؟
- ئهرێ رهمهزانێ گوهۆڕينهكا وهسا ل نك من پهيدا كر كو پشتى رهمهزانێ ژى ئهو گوهۆڕين ل نك من بمينت، يان من ل بهره پشتى رهمهزانێ جارهكا دى ههر ببمه زهلامێ بهرێ؟
- ودويماهيێ: ئهرێ تو بێژى ئهڤ كارێ باش يێ ل ڤێ ههيڤێ من كرى خودێ ژ من قهبويل بكهت، يان هندهك ئنيهت ورهفتارێ خراب من تێكهل كرى كو ببته ئهگهرا نهقهبويلكرنا وى كارى؟
ڤان ههر شهش پسيارێن كورت ژ خۆ بكه، وبهرسڤا وان بده، و ژ بير نهكه كو بهرسڤ بۆ ته ب تنێ يه كهسێ -ژبلى خودێ- هاى ژێ نينه، ڤــێــجــا يـــێ ڕاســتــگــۆ بــه وپێ نهڤێت (موجامهلێ) يان (وهربادانێ) د بهرسڤدانێ دا بكهى، ما دێ خۆ ژ كێ ڤهشێرى يان ل بهر كێ ڤهشێرى؟
ئهگهر پتـر ژ سێ بهرسڤێن ته (نه) بوو، ئهو ئهنجامێ ته يێ خرابه وناجحى يا ب زهحمهته.. بهلـێ بێ هيڤى نهبه هێشتا چار پێنج ڕۆژهك د دهستێ ته دا يێن ماين وتو دشێى -ئهگهر ته بڤێت- ئهنجامى بگوهۆڕى وخۆ ژ كهفتنێ ڕزگار بكهى، لهزێ بكه ونـهبـێـژه: ژ نــوى فـأيـده ناكهت، هندهكان بهرى مرنێ ب گاڤهكێ ژ دل يا تۆبهكرى سهعادهتا ئهبهدى يا ب دهست خۆ ڤه ئيناى، يا گرنگ ئهوه تو ئنيهتێ بينى و ژ دل قهستا كارى بكهى.. ژ وێرێ وێڤه خهما خودێ يه.
