(2)
بۆچى ڕۆژى؟
بێ گومان ههر عیبادهتهكێ خودێ ل سهر مه فهر كربت، حیكمهتهك تێدا ههیه، چ ئهم پێ دزانا بین یان نه، وئهو حیكمهت مهصلحهتهكا مرۆڤى یا دنیایێ یان یا ئاخرهتێ ب جهـ دئینت، وههر جارهكا ئهم شیاین حیكمهتا وى عیبادهتى بزانین هنگى ئهو عیبادهت -وهكى زانایێن ئوصوولێ دبێژن- دێ عیبادهتهكێ (موعهللهل) بت، یهعنى: عللهتا وى دێ یا ئاشكهرا بت، وئهگهر ئهم ب عهقل وتێگههشتنا خۆ نهشیاین حیكمهتا وى عیبادهتى دهسنیشان بكهین، هنگى ئهو عیبادهت یێ (موعهللهل) نابت، وحیكمهت ژێ دێ (تهعهببود) بت وهند! بهلێ مهعنا ڤێ چهندێ ئهو نینه كو ههر وههر كهسهك نهشێت ب زانینا خۆ بگههته وێ حیكمهتێ یا ل بهر هندهك كهسان یان گهلهكان ڤهشارتى ماى.
وڕۆژى -ئهگهر ئهم هزرا خۆ تێدا بكهین- دێ بینین ئێك ژ وان عیبادهتانه یێن (موعهللهل) چونكى حیكمهت ژێ بۆ ههر كهسهكێ تێ بگههت یا ئاشكهرایه، وكارتێكرنا ڤى عیبادهتى یا ئاشكهرایه ل سهر ههمى ئاستان، چ ئاستێ (فهردى) بت، چ یێ (جهماعى)، وئهڤ كارتـێـكـرنــه، یان حیكمهتا ڤى عیبادهتى خودێ وپێغهمبهرێ وى ب خۆ -سلاڤ لێ بن- بۆ مه ئاشكهرا ودهسنیشان كرىیه..
وئێكهمین پسیار مرۆڤ ژ خۆ دكهت، دهمێ دهست ب گرتنا ڕۆژیێن ڤێ ههیڤێ دكهت ئهوه: ئهرێ بۆچى ئهز یێ ب ڕۆژى بم؟
یان: ئهرێ چ فایده ژ ڕۆژىیێ دگههته من حهتا ئهز ڤێ زهحمهتێ ووهستیانێ بدهمه بهر خۆ؟
ژبلى كو ئهم دهمێ ڕۆژىیێ دگرین، ئهم ئهمرێ خودێ ب جهـ دئینین، وعهبدینىیا خۆ بۆ وى بهرچاڤ دكهین، هژمارهكا مفایان د ڕۆژىیێ دا ههنه، قهناعهتێ بۆ مه چێ دكهن كو ئهڤ عیبادهته ژ بهر هندهك حیكمهتێن مهزن یێ ل سهر مه هاتىیه فهرزكرن، ومرۆڤێ ڕۆژیگر ئهگهر ڤان مفایان ژ ڕۆژىیا خۆ ب ڕهنگهكێ عهمهلى نهبینت، هنگى حهقێ وىیه د گهل مرۆڤێن نهزان سهرێ خۆ بهژینت وبێژت: ما چ فایده د ڤان ڕۆژىیان دا ههیه ئهم دگرین؟! ژ خۆ ئهگهر وى ئـهڤ بــهرهـهمێ ڕۆژىیێ ب ڕهنگهكێ عهمهلى د ژیانا خۆ دا دیت، هنگى دێ زانت كانێ بۆچى ئهو ڕۆژىیێ دگرت..
* ڕۆژى ئهگهر ب دورستى ڕۆژى بت، دێ خودانێ خۆ فێرى تهقوایێ كهت، دهمێ ئهو برسى وتێنى دبت، ودمینته ب تنێ وكهس وى نابینت، وخوارن وڤهخوارن یا ل بهر سنگى وى، وئهو دهست ناكهتێ، دبێژت: چونكى خودێ یێ من دبینت، ئهڤه تهقوایه.. بهلێ خوزى ئهڤ تهقوایا وى نه ب تنێ بۆ خوارن وڤهخوارنێ بت، بهلكى بۆ ههر تشتهكێ دى بت یێ خودێ ل سهر وى حهرام كرى، وگۆتىیێ نێزیك نهبه.
* دهمێ ئهو ههست ب برسێ دكهت، وپشت ددهته وان نعمهتێن حهلال یێن خودێ داینه وى، ووهكى وى كهسى لێ دئێت یێ ئهڤ نعمهته د گهل نههاتینه كرن، ئهو قهدرێ وێ قهنجىیێ دێ زانت یا خودێ د گل كرى، وئهڤ زانینه پێتڤىیه بهرێ وى بدهته شوكرا خودێ، وشوكر بهس ئهو نینه ئهو ب دهڤى بێژت: شوكر بۆ خودێ! بهلكى شوكرا دورست ئهوه ئهو وان نعمهتێن خودێ د گهل وى كرین د بێ ئهمرىیا خودێ دا ب كار نهئینت.
* مرۆڤ ئهگهر ڕۆژیگرهكێ دورست بت، دڤێت ڕۆژىیا وى وى فێرى صهبر وتهحهموللا ل سهر نهخۆشىیێ بكهت، ودهمێ د حهدیسێ دا هاتى: ئهگهر ئێك ژ ههوه یێ ب ڕۆژى بوو وكهسهك هات وسهقهت د گهل ئاخت بلا بهرسڤا وى نهدهت وبێژتێ: ئهزێ ب ڕۆژیمه.. مهعنا وێ ئهوه بلا ڕۆژىیا وى وى فێرى صهبرا ل سهر نهخۆشىیان بكهت.
* ڕۆژىیا دورست وتمم ئهوه یا بهرێ خودانى ژ ههمى ڕهنگێن خـرابىیێ ددهته پاش، ئهزمانێ وى، دهستێ وى، دلێ وى، وچاڤێ وى، ژ حهرامىیێ وهردگێڕت، لهو ڕۆژى باشترین مهدرهسهیه بۆ پاقژكرنا نهفسێ، وچاندنا ئهخلاقێ باش ل نك خودانى..
* ڕۆژى -ئهگهر ڕۆژى بت- دبـتـه ئـهگـهرا ئاڤاكرنا جڤاكهكا ئێكگرتى و ب رهحم، وئهو ئێكهتىیهكا شعوورى د ناڤبهرا كوڕێن جڤاكێ دا پهیدا دكهت، ههمى پێكڤه خۆ برسى دكهن، وههمى پێكڤه خۆ تێر دكهن، ڤێجا بۆچى ئهو ههمى د كاروبارێن مهزن ومهصیرى دا پێكڤه نهبن، یان بۆچى گاڤا هندهك ژ وان دهمێ تێر دبن یێن برسى ژبیر دكهن؟
خوزى ڕۆژىیێن مه ب دورستى ڕۆژى بان، نه كو چاڤلێكرن وعهدهتهكێ هشك وڤالا بان ژ مهعنایێن خۆ یێن دورست.
