6- تۆرە و رەفتارێ مرۆڤێ موسلمان
كوڕێ من: دینێ مە یێ پیـرۆز هەردەم بەرگەڕیانێ دكەت كو كەسینییەكا تەمام وپێكهاتی بۆ مە ئاڤا بكەت، وحەتا كو ئەم موسلمان بـشـێـیـن ڤێ كەسینییێ بۆ خۆ پەیدا بكەین هندەك تـۆرە ورەفتار هەنە ئیسلام فەرمان پێ ل مە كرییە، و ل ڤێرێ ئەم دێ بەحسێ هندەك ژ وان تۆرە ورەفتارێن گرنگ كەین دا كاری پێ بكەین:
1 ـ ڕاستگۆیی:
گۆتنا ڕاستییێ ئێك ژ وان تۆرەیانە یێن خودێ وپێغەمبەرێ وی ـ سلاڤ لـێ بن ـ فـەرمان پـێ ل مـە كـری، د گۆتنەكا خۆ یا پیـرۆز دا پێغەمبەرێ مە ـ سلاڤ لـێ بن ـ دبێژت:
[ علیكم بالصدق، فإن الصدق یهدي إلی البر، وإن البر یهدي إلی الجنة ـ ئانكۆ: ڕاستییێ بێژن، وهندی ڕاستییە بەرێ مرۆڤی ددەتە قەنجییێ، وهندی قەنجییە سەری دكێشتە بەحەشتێ ].
ومرۆڤێ ڕاستگۆ ل نك خودێ، و ل نك مرۆڤان ژی یێ خۆشتڤییە، ودبتە جهێ باوەرییا خەلكی.
2 ـ ئەمانەت ودەستپاكی:
ئەڤە ژی ژ وان تۆرەیانە یێن ئیسلامێ فەرمان پێ ل مە كری، خودایێ مەزن دبێژت:
[ إنّ الله یأمُرُكُمْ أنْ تُۆَدّوا الأماناتِ إلـی أهْلِهَا ـ هندی خودییە فـەرمانـێ ل هەوە دكەت كو هوین ئێمانەتان ل خودانێن وان بزڤڕیننە ڤە ]
وهندی هند پێغەمبەرێ مە ـ سلاڤ لـێ بن ـ مرۆڤەكێ ئەمین ودەستپاك بوو خۆ دوژمنێن وی ژی ناسناڤێ وی كربوو: (الصادق الأمین) ئانكۆ: مرۆڤێ ڕاستگۆ ودەستپاك.
3 ـ ب جهئینانا سۆز وپەیمانان:
ئەگەر مرۆڤی سۆز وپەیمانەك دا دڤێت ب جه بینت، دا گۆتنا وی دەرنەكەڤت درەو، وپێغەمبەرێ مە ـ سلاڤ لـێ بن ـ د گۆتنەكا خۆ دا ئاشكەرا دكەت كو ب جه نەئینانا سۆز وپەیمانان نیشانا منافقانە.
4 ـ دلۆڤانی وقەنجییا د گەل دەیبابان:
مرۆڤێ موسلمان دڤێت یێ دلۆڤان بت، رەحمێ ب خەلكی ببەت وقەدرێ وان بگرت، و ب تایبەتێ قەدرێ دەیك وبابان، چـونكی قـەنـجـییا دەیبابان ل سەر مرۆڤی گەلەكە، ئەوان مرۆڤ یێ پەروەردە كری ومەزن كری، لەو دەمێ مرۆڤ مەزن دبت دڤێت مرۆڤ ژی قەرێ وان ل سەر خۆ ڕاكەت وقەنجییێ د گەل وان بكەت، وئەو كەسێ د گەل دەیبابێن خۆ یێ باش نەبت ودلۆڤانییێ پێ نەبەت خودێ ژی دلۆڤانییێ پێ نابەت.
5 ـ مەردینی ودلفرەهی:
مرۆڤێ موسلمان دڤێت مرۆڤەكێ مەرد ودلفرەه بت، چونكی مرۆڤێ مەرد ئەوێ دەستێ هاریكارییێ بۆ خەلكی درێژ دكەت ژ وان مرۆڤانە یێن خودێ ل دنیایێ وئاخرەتێ قەنجییێن مەزن ددەتێ، خودایێ مەزن دبێژت:
[ الذینَ یُنْفِقونَ أموالهُمْ فب سبیلِ اللهِ ثمَّ لا یُتْبِعونَ ما أنْفَقُوا منّاً ولا أذی لهُمْ أجْرُهُمْ عندَ رَبِّهِمْ ولا خَوْفٌ عَلیْمْ ولا هُمْ يحْزَنونَ ]
ئانكۆ: ئەوێن ب مەردینی ودلفرەهی مالـێ خۆ د ڕێكا خودێ دا خەرج دكەن، ونەخۆشیناگەهیینە وی یێ ئەو قەنجییێ د گەل دكەن، وقەنجییا خۆ ناكەتە منەت ل سەر وی، خێرەكا مەزن بۆ وان ل نك خودایێ وان هەیە، نە ئەو دترسن ونە ب خەم دكەڤن.
ڤێجا یا فەرە ئەم د گەل مرۆڤێن پێتڤی وهەژار د مەرد بین ودەستێ هاریكارییێ بۆ وان درێژ بكەین.
پسیار وچالاكی
(1)
بۆچی دگۆتنە پێغەمبەرێ مە ـ سلاڤ لـێ بن ـ (الصادق الأمین) ڕاستگۆیێ دەستپاك؟
(2)
مفایێ گـۆتـنا ڕاستییێ چیە؟ تو دشێی گۆتنەكا پێغەمبەری ـ سلاڤ لـێ بن ـ ل دۆر ڤێ چەندێ بێژی؟
(3)
هندەك ژ وان تۆرەیان بێژە یێن ئیسلامێ فەرمان پێ ل مە كری.
(4)
بۆچی دڤێت مرۆڤ قەنجییێ د گەل دەیبابان بكەت؟
