(8)
ل ڤێ ههیڤێ.. ڕێزێ ل دینێ مه بگرن
ل ڤان سالێن دویماهىیێ، هندهك جاران ب ناڤێ ئازادىیێ، وهندهك جاران ژى ب ناڤێ دیموقراتىیێ، مـه گـوهـ لێ دبـت، ب نیڤ ڤهشارتى و ب نیڤ ئاشكهرایى ڤه گازى ل ڤێرێ ووێرا هه دئێنه بلندكرن كو بۆچى ل ههیڤا رهمهزانێ ئهم هنده ل خهلكى دشدینین، وههر جار لیستهیهكا تشتێن قهدهغهكرى بهلاڤ كهین، ودبێژین: فلان تشت چێ نابت، وبلا دكاندار هۆ نهكهنه هه، وڕۆژی شكاندنا ئاشكهرا بلا نهبت.. وحهتا دویماهىیێ، بۆچى ئهم ئازادىیێ نادهینه خهلكى ههر ئێك وى تشتى بـكـهت یــێ وى دڤـێـت، بـێـى دانـا ئـعـتـبـارێ بـۆ چـو مـهسـهلـێـن دیـنـى و (لاهووتى) وهكى ئهو دبێژن!
وئـهو كـهسـێـن ڤـێ گۆتنێ دكهن ل نك وان ئهوه پێگیرىیا ب دینى، و ب جهئینان وڕێزگرتنا ل (شهعائرێن) وى ڕهنگهكێ پاشكهفتن وهشكاتىیێ یه، وئـهو تـشـتـهكـێ دژى مــهدهنـیـیـهت وشارستانىیێ یه، و ژ خۆ هندهك ژى وه هزر دكهن ئهو ئهڤ ڕێ ورهسمێن د ناڤ مه دا حهتا حهددهكى پێگیرى پێ دئێتهكرن تشتهكێ موخالفى دیموقراتیهتێ یه، لهو دڤێت ئهم بهس بكهین، دا بۆ وى خهلكێ ل پشت (موحیطان) دژین دیار بكهین كو ئهم مللهتهكێ پێشكهفتینه!
ب ڕاستى مه نـهڤـێـت بـێژینه وى خهلكێ باوهرى ب دینێ مه (یان ب ڕۆژىیێ) نهههى: ههوه بڤێت یان نهڤێت لازمه ب ڕۆژى بت، چونكى حوكمێ قورئانا مه یێ ئاشكهرایه: ( لا إكراه فی الدین ) و ( فمن شاء فلیؤمن ومن شاء فلیكفر ) و ( أفأنت تكره الناس حتى یكونوا مؤمنین ) دیندارى ب كوتهكى نابت، بهلێ مه دڤێت بێژین: نه ژ ذهوقى وئهدهبێیه موخالهفه وتهحهددىیا (حوكمێ پترى)یێ بێتهكرن، وئستفزازا مهشاعرێن بارا پتر ژ خهلكى بێتهكرن.. ئهگهر دیموقراتیهت ئهوه بت حوكمێ پترىیێ بێته ب جهئینان، وپێشكهفتن وئازادى ئهو بت حهز وداخوازێن دهستهكا مهزنتر یا خهلكى ل بهر چاڤ بێنه وهرگرتن، دێ بێژین: بارا پتر ژ خهلكێ مه موسلمانن و ب ڕۆژینه، لهو نه د دینێ خودێ دا، ونه د دستوور وقانوینا دیموقراتیهتێ دا، ههر وهسا نه د ڕێباز وقاعیدهیا ئهدهب وزهوقى دا، چێ نابت پێخهمهت كهیف ئینانا هژمارهكا كێم یا خهلكى پێ ل دین ومهشاعر وكهرامهتا پترىیا خهلكى بێته دانان، وئـهگــهر ئــهم -ب ناڤێ دیموقراتىیێ- سـالێ هـهمىیـێ ڕیزگرتنێ ل خهلكێ نه موسلمان بگرین، حهتا هندهك جاران مهسهله دگههته ئهم ڕهنگه تهنازولێ ژ (ثهوابتێن) خۆ دكهین، ئهرێ چێ نابت ئهو ههیڤهكێ ڕێزێ ل بیر وباوهرێن مه بگرن، و ب ڕێكا ڕۆژى شكاندنا ئاشكهرا تهحهددىیا مهشاعرێن مه نهكهن؟!
بۆچى ڕێزگرتنا ل ڕێ ورهسمێن ل دینێن خهلكى ئهگهر خۆ ئهو ڕێ ورهسم بكهڤنه د بن خانهیا (میثۆلۆژیا وئهفسانهیان) دا ل بهر گهلهك ڕهوشهبیر ومهدهنیخوازێن مه ڤه نیشانا پێشكهفتن وسنگ فرههىیا جـڤـاكـێیـه، بهلێ گاڤا مهسهله بۆ ڕێزگرتنا ل (شهعائرێن دینێ) مه، دیـنـێ پـتـرىیا خهلكێ جڤاكا مه، مهسهله ب دیتنا وان دبته تهعدایىیا ل ئازادى ودیموقراتییێ؟
ب ناڤێ زانایێن دینى وههمى ڕۆژیگران ئهم داخوازێ ژ كاربدهستان دكهین كو ڕێزێ ل بیر وباوهرێن مللهتى بگرن، چوننه چوننه ههما د ڤێ ههیڤێ دا.. ما ئهڤه نه پشكهكه ژ پاراستنا مافێ مللهتى؟
