دویماهییا رهمهزانێ
و ب ڤی ڕهنگی رهمهزان ب دویماهی هات.. كارێ خۆ كر و ژ ناڤ مه بار كر، ب وێ ئنیهتێ كو پشتی یازده ههیڤێن دی جارهكا دی قهستا مه بكهت، بهلێ جارا بێت دهمێ ئهو دئێت ئهو دێ كێ ژ مه بینت ل هیڤییێ، و دێ ل كێ ژ مه گهڕیێت و نابینت؟ علمێ ڤێ چهندێ یێ ل نك خودێ ب تنێ.. چونكی بهس مرنه جودا ژ ههر تشتهكێ دی نه چو ژڤانان دزانت و نه خۆ ل چو توخویبان دگرت، دێ ل ته بته سپێده تو یێ كهیفخۆش و هێشتا ئێڤار نههاتی كهس و كارێن ته دێ ل سهر ته كهنه گری، گورزێ كۆرهیه، ژ كهسێ شهرم ناكهت، و خۆ ل كهسێ ناگرت، و ژ كهسێ ژی ناترست..
رهمهزان چوو خاتر خواست، و هندی من هزرا خۆ كری د نهخۆشییێن ڤێ دنیایێ دا من نهدیتییه ژ خاترخواستنێ پێڤهتر نهخۆشییهك ههبت.. غهریبی خــــاتــرخـــواســتـنا ژ وهلاتییه، فهقیری خاتر خواستنا ژ زهنگینییێیه، نساخی خاترخوستنا ژ ساخلهمییێیه، و مرن خاترخوستنا ژ دنیایێیه، بهرێ خۆ بدێ ههر نهخۆشییهكا ههبت ڕهنگهكێ خاترخواستنێیه، رهمهزان یا خاترا خۆ ژ مه دخوازت، ئهو رهمهزانا ئهڤه ههیڤهك بوو مه بۆ خۆ كرییه شاهد كو ئهم -ئهگهر مه بڤێت- ئهم دشێین ئیرادا خۆ وه لێ بكهین وهكی مه دڤێت، ڤێجا نه وه بت ئهم ههیڤا بێت ل سهر خۆ بكهینه شاهد كو ئهم نه ئهو كهسین یێن دشێنه خۆ، ئهڤه ههیڤه بوو مه رهمهزان كرییه شاهد ل سهر تۆبهدارییا خۆ، ڤێجا بلا ئهم یازده ههیڤێن پشتی رهمهزانێ نهكهینه شاهد ل سهر گونههكارییا خۆ، چونكی ههر ئێك ژ مه باش دزانت ئێك ب یازده خوسارهتییهكا مهزنه!
ئهڤ ساله ژی رهمهزانێ وهكی ههر سال كارێ خۆ كر و خاترا خۆ خواست، هندهك د ناڤ مه دا ههبوون حهز دكر ئهو مابا و نه چووبا، و هندهك ههبوون حهز دكر ئهو ههر نههاتبا، بهلێ ههر چاوا بت ئهو ب هاتن و چوونا خۆ ئهڤ ههردو جینێن مرۆڤان ل وێ ڕاستییێ هشیاركرن یا گهلهك جاران ئهو ژ بیرا خۆ دبهن: ئهڤه ههیڤهك ل عهمرێ ته زێده بوو.. قهصدا من: ژ عهمرێ ته كێم بوو!
د ڤێ ههیڤێ دا وهكی یا بهری وێ، و یا بهری وێ، و یا بهری وێ.. ته چ كر؟ چهند ژ وێ ئارمانجێ ته ب دهست خۆ ڤه ئینا یا تو د ژییێ خۆ ل دویڤ دبهزی؟ رهمهزان پارچهیهك بوو ژ عهمرێ ته، هندهك ڕۆژێن دهسنیشانكری بوون ژ ژییێ ته نـــوكـــه چوون، سیهـ ڕۆژ ژ وێ دهلیڤهیێ هاتنه خوارێ یا بۆ ته هاتییهدان، زوی چوون، ژ ناڤ تبلێن ته دهركهفتن، ههوجه ناكهت بگری، یان ل سهر بگری! چوو.. وهكی سكری گاڤا ل جههكی پــهقـــی و تو ڤێڕا نهگههشتی ئێدی تو نهشێی زهبــتــكـــهی، رهمــــهزان ب ڕۆژێن خۆ یێن هژمارتی ڤه دبێژته ته: خۆ ب درێژییا عهمری نهخاپینه، عهمرێ ته چهند بت وهكی ڕۆژێن من دێ چت، چاڤێن خۆ ڤهكه بهری تهمارا خهوێ دیتنێ ل بهر چاڤێن ته شێلی بكهت، ڕۆژێن بۆرین بهژمێره خۆ ژ نوقطا ئێكێ.. ژ قێژییا ئێكێ یا ته ڕاهێلای دهمێ چاڤێن ته ب ڤێ دنیایێ كهفتین و حهتا ئهڤرۆ، چهند ڕۆژ و شهڤ ته بۆراندینه؟ سال و زهمان ته دیتینه؟ هزر بكه نوكه تو ژی وهكی رهمهزانا مه یا ئهڤ ساله یێ كارێ خۆ دكهی و چانتكێ خۆ لێكددهی دا وهغهرا خۆ یا دویر و درێژ دهست پێ بكهی، ئهرێ ما نه تو دێ بێژی: وهی چ زوی عهمرێ من خلاس؟ ما نه تو دێ عهجێبگرتی بی ژ ڤان سالان چ زوی بۆرین بێی تو پێ بحهسیێی؟
هندهك ڕۆژێن هژمارتی بوون بۆرین و چوون.. و ههر ئێك ژ مه ژی هندهك ڕۆژێن هژمارتی یێن بۆ ههین دێ هند بینین چوون و خلاس بوون.. ئاشـــهكێ خۆش یێ ل كاره مه ههمییان دێ د ناڤ خۆ دا هێرت، ل دهمێ خاترخواستنێ ئهم دێ ب خهم كهڤین، و.. چهند دهلیڤهیهكن دێ ژبیر كهین، و پاشی نه ئهز دمینم و نه تو، ل بن ئاخا ژبیركرنێ دێ ئێینه هێلان، بهلێ تو بێژی مهسهله ههما ل ڤێرێ ب دویماهی بێت؟
نه.. ئهم د ڤێ دنیایێ دا غاردانێ د گهل دهمی یێن كهین، مه دڤێت بهرێ ڕاكهین، د شهڕێ خۆ دا د گهل ب سهركهڤین، ڕاسته مه نهدیتییه كهسێ بهری مه د سهر دهمــــی ڕا بازدای، یان زهمان ئێخستییه بن دهستێ خۆ، بهلێ د گهل هــنــــدێ ژی ئهم د غاردانا خۆ دا د گهل دێ دبهردهوام بین، بهلكی بشێین د ڤان ڕۆژێن هژمارتی دا یێن بۆ مه هاتینه دان تۆڤهكێ وهسا بچینین ئهوێن هێشتا نهبووین و د گهل زهمانی نهكهفتینه غاردانێ بهرههمهكێ باش ژێ بچنن، هنگی ئهم دێ شێین بێژین: ئهم سهركهفتین!
و بهری ئهم خاترا خۆ ژ رهمهزانێ بخوازین.. یان بهری رهمهزان ژ ناڤ مه باركهت ئهو ب حوكمهكێ خۆ یێ شهرعی دهرسهكێ نیشا مه ددهت پشتی ئهو دچت ژی ئهم مفای بۆ خۆ ژێ ببینین.. ئهڤ حوكمێ شهرعی دانا زهكاتا فترێیه.
فتره وهكی ئهم ههمی دزانین زكاتهكه خودێ ل سهر خوارنا مه دانای، حهقهكه مرۆڤێ فهقیر د وی قویتی دا ههی یێ تو ژێ دخۆی.. و ئهگهر شهرتێ دانا زهكاتێ ئهو بت مرۆڤێ مالدار بت حهتا بدهت فترێ ئهڤ شهرته تێدا نینه، بهس ته هند قویت ههبت ژ ڕۆژا جهژنێ زێده بكهت دڤێت تو زكاتێ ژێ بدهی، و ئهگهر (كهممییهتا) زهكاتێ ب نصاب و قهدهرێ مالی ڤه یا گرێدای بت، فتره یا وهسا نینه ئهو ب سهران ڤه یا گرێدایه، دهمێ ڕۆژا دویماهییا رهمهزانێ ئاڤا دبت كانێ مالێ چهند مرۆڤ تێدا ههنه هند فتره دئێنه دان، بلا بهری هنگی ب بیست خهبهران ژی ئێك ل ڤێ مالێ زێده ببت ژی.. ئهرێ بوو؟
ههر سال ئهم پسیار دكهین: ئهرێ فتره چهنده و چاوایه؟ بهلێ چو سالان ئهم پسیار ناكهین: ئهرێ بۆچی ئهم فتران ددهین؟
بهلكی هندهك بێژن: فتره جهبراندنهكه بۆ وان شكهستنان یێن دبت ڕۆژیگر بێخته ڕۆژییێن خۆ، بهلكی.. بهلێ پا بۆچی ئـــهم فــتـــرێــــن وان كهسان ژی ددهین یێن ڕۆژی ل سهر نه.. وهكی زارۆكان بۆ نموونه؟!
هندهك دبێژن: فتره دهولهمهندكرنه بۆ وی كهسی ههژار بت، بهلكی.. بهلێ پا بۆچی ئهم دبێژینه ههژاری ب خۆ ژی فترێ بده؟!
ئهز دبێژم: مهعنایهكا دویرتر و ئارمانجهكا مهزنتر د پشت دانا فترێ ڕا ههیه رهمهزانێ دڤێت ل دویماهییێ بگههینته مه بهری ژ ناڤ مه بار كهت، ئهو ژی چاندنا رهحمێیه د دلێن مه، چونكی دل گاڤا ژ رهحمێ ڤالا بوو دێ بهیار بت، و گاڤا بهیار بوو زیوان دێ سهری ژ بهرههمێ وی ستینت، و گاڤا دل ما بێ بهرههم پسیارا بهخت ڕهشییا خودانێ وی نهكه!
پشتی رهمهزانێ ههیڤهكێ تو فێری ب هێزكرنا ئیرادێ كری، پشتی ههیڤهكێ تو پالدای دا پتر خۆ نێزیكی خودێ بكهی، ڤیا بێژته ته: دێ كانێ ل دۆر و رهخێن خۆ ژی سهح بكه، چاڤێن خۆ ل وان كهسان بگێڕه ئهوێن ب دو دهستێن ڤالا ڤه بهر ب ڕۆژا جهژنێ ڤه دچن، دهستێ وان تژی كه و زكێ وان تێر بكه، بلا هندهك رهحم د دهر حهقا وان دا د دلێ ته دا ههبت، وان ژبیر نهكه، دا تو بزانی چهند خۆشه دهمێ مرۆڤ گڕنژینێ ل سهر لێڤا ههژارهكی بچینت، یان كهیفێ ل سهر دێمێ فهقیرهكی بنهخشینت.
خوزی مه زانینا حكمهت ژ دانا فترێ چیه، و ئارمانج ژ تهشریعا وێ چیه، هنگی فتره ل نك مه نهدبوو (شهعیرهیهكا هشك) و بێ مهعنا، و ههڤــڕكییهكا سالانه كانێ چ بدهین و چ نهدهین.. ئهڤ ههڤڕكییا دویماهییا رهمهزانێ ههر سال كرێت دكهت!
ئــهڤــه رهمهزان چوو.. بهلێ خوزی ئهو مهعنا نهچووبان یێن رهمهزان ب هاتنا خۆ د دلێن مه دا ساخ دكهت.
یا رهببی، تو رهببێ رهمهزانێ و شهووالێ و موحهررهمێ و ههمی سالێ یی، ئهگهر ته تهوفیقا مه دا بت ئهم ل ڤێ ههیڤێ پتر خۆ نێزیكی ته بكهین، تـــو ئێكا هند ژ مه چێ نهكه پشتی رهمهزانی ئهم ته ژ بیر بكهی.. ئهگهر د ناڤ مه دا هندهك ههبن رهمهزانێ ژی تو نهنیاسی بی، تو ب كهرهما خۆ د گهل وان بكه، رهحما خۆ ب سهر وان ژی بینه دا ئهو ل ڕێكا ته بزڤڕن وقهستا دهرگههێ لوگفا ته بكهن..
یا رهبــبــی ئــهگـــهر دنیایێ ب موژیلاهییێن خۆ ڤه ئێكا هند ژ مه چێ كر ئهم ته ژ بیر بكهین، تو ب كهرهكا خۆ مه ژ بیر نهكه، ئهم مرۆڤین و ژبیركرن بابهتی مهیه، و تو ئیلاهی و لێبۆرین كارێ تهیه.
یا رهببی كانێ چاوا ته هاریكارییا مه كر ئهم ل ڤێ ههیڤێ د فهرمانا ته دا بین وهسا تو تهوفیقا مه بده كو ئهم پشتی ڤێ ههیڤێ ژی خۆ ژ ته نهكهین.. تو مه و دهیبابێن مه و ههمی خودان باوهران بكه ژ ئازابوویێن ڤێ ههیڤێ ژ ئاگری. ئامین.
