سوجوودێن سوننەت
سێ ڕەنگێن سوجوودێ هەنە سوننەتە مرۆڤ بكەت ، ئەو ژی ئەڤەنە :
1 ـ سوجوودێ سەهوێ :
وئەڤە بەری نوكە مە بەحسێ وێ یێ كری .
2 ـ سوجوودێ خواندنا قورئانێ :
وئەڤ سوجوودە وەكی گەلەك زانا دبێژن سوننەتە ، وهندەك دبێژن ئەو واجبە ، وچونكی ئەڤ سوجوودە نە نڤێژە شەرتێن نڤێژێ پێ نەڤێن ، هەر چەندە یا باش ئەوە ئەو شەرت تێدا هەبن ، وەكی دەسنڤێژ شویشتنێ بۆ نموونە .
وئەڤ سوجدە هنگی دئێتەكرن دەمێ مرۆڤ دخواندنا قورئانێ دا دگەهتە وان ئایەتان یێن سوجدە تێدا هەی ، ویا سوننەت ئەوە دەمێ مرۆڤ دچتە سوجوودێ مرۆڤ ڕابتەڤە وبێژت : ( الله أكبر ) ودەستێن خۆ بلند نەكەت، وبچتە سوجوودێ ، ووێ بێژت یا ئەو د سوجوودا نڤێژا دبێژت و پاشی وان دوعایان ژی بێژت یێن ژ پێغەمبەری ـ سلاڤ لـێ بن ـ هاتینە ریوایەتكرن ، وەكی : [ سَجَدَ وَجْهِي لِلّذِي خَلَقَهُ وَشَقَّ سَمْعَهُ وَبَصَرَهُ بِحَوْلِهِ وَقُوَّتِهِ ] ، پاشی دێ سـەرێ خــۆ ڕاكەت ، و ل دەمێ ئەو سەرێ خۆ ڕادكەت ژی دێ بێژت : ( الله أكبر ) بەلـێ ئەو سلاڤا ملان ڤەنادەت .
وئەگەر مرۆڤ د نڤێژێ ژی دا بت وئایەتەكا سوجوودێ خواند یا باش ئەوە ئەو بچتە سوجوودێ .
3 ـ سوجوودا شوكرێ :
وئەڤە ژی سوننەتە ، وئەو ئێك سەجدەیە ، هنگی دئێتەكرن دەمێ مزگینییەكا خـۆش دگەهـتـێ ، صەحابییەكێ پێغەمبەری ـ سلاڤ لـێ بن ـ دبێژت : دەمێ خەبەرەكێ خۆش گەهشتبا پێغەمبەری ـ سلاڤ لـێ بن ـ دا چتە سوجوودێ شوكر بۆ خودێ .
