بهرههڤیا ڕوى ب ڕویبوونێ
پشتى نڤێژا سپێدێ ل موعهسكهرێ حهججاجى هاتیهكرن، ههر ئێك ژ جهێ خۆ ڕابووڤه و ل كارێ خۆ زڤڕى.. ئاخرى ڕۆژهكا گران ل بهرا وان ههیه، ب تنێ حهججاج تێ نهبت، دهمهكى ئهو ما ل جهێ خۆ، ودوباره هزرا وى ئهو كویر بر.. وهـاتـه بـیـرێ دهمـێ جـارا ئـێـكـێ نـاڤـێ عهبدللاهێ كوڕێ زوبهیرى وههڤڕكیا وى د گهل بنهمالا ئهمهوییان هاتیه گوهان، هنگى ئهو مرۆڤهكێ نهنیاس بوو د ناڤ خهلكى دا، د كۆپێ چیایهكێ ئاسێ ڕا ل طائفێ دژیا، سپێدێ وئێڤارى كارێ وى ئهو بوو زارۆك فێرى خواندن ونڤیسینێ وقورئانێ دكرن، كهسێ چو هزر بۆ وى نهدكرن، ههر ژ هنگى وهره هیڤیهكا مهزن د دلێ وى دا ههبوو، ل سهرى یا بچویك بوو، دهمێ وى هزرا خۆ تێدا دكر ب خۆ دكره كهنى، پاشى وى گۆته خۆ: بۆچى؟ ما ئهوێن گههشتینێ ژ من ب عهقلترن؟ یان شیانێن وان پترن؟ ئهو پێ دحهسیا كو ئهو بۆ كارێ فێركرنا زارۆكان د ڤێ گۆشهیا بهرزه دا ژ دنیایێ نههاتیه دان، ئێكێ وهكى وى دڤێت چوننه چوننه ملێ وى ب ملێ خهلیفهى ڤه بت، یان حهتا خهلیفهى ب خۆ ژى بت!! ڤـێ هـیـڤـیـا هــه یــا وى د سهرێ خۆ دا حهواندى و د دلێ خۆ دا چاندى، ئێكا هند ژ وى چێ كر ئهو شهڤهكێ خۆ ڤهدزت شیرێ خۆ د بهر خۆ بدانت و ب دویڤ سهرێ خۆ بكهڤت..
مزگهفتێ، وزارۆكێن طائفێ، وحیجازێ ههمیێ ل پاش خۆ بهێلت، و ب دویڤ هیڤیا خۆ یا مهزن بكهڤت.. كارهكێ ب ساناهى نهبوو، وقویناغهكا كورت ژى نهبوو، وچهند كهیفا وى یا زێده بوو ڕۆژا ئهو ژ مالا (موستهشارێ دهولهتێ) ل شامێ رووحێ كوڕێ زهنباعى دهركهفتى وخیتهكا شورطهیێ ب ملى ڤه، وێ ڕۆژێ ئهو خیت ل بهر دلێ وى گهلهك ژ (مهنصبێ خهلیفاتیێ) ژى مهزنتر بوو، حهججاجێ دهربهدهر وبێ خودان، ئهوێ وهلاتێ خۆ هێلاى و ب تنێ دهركهفتى وقهستا پایتهختێ دهولهتێ ل شامێ كـرى ب وێ ئـنـیـهتـێ كـو ل وێرێ دهرگههێ ناڤداریێ ل بهر وى ڤهببت، وئهو ژى د ڤـێ دنـیـایـا بـهرفـرههـ دا ببته تشتهك.. تشتهكێ مهزنتر ژ سهیدایهتیا زارۆكان ل گوندهكى ژ گوندێن طائفێ، نوكه ئهو (شورطهیهك) د ناڤ شورطێن دهولهتێ دا، مهعنا ئهو دورست یێ پێگاڤێن خۆ دهاڤێت، هنگى ناڤ ودهنگێن كوڕێ زوبهیرى دنیا ههمى ڤهگرتبوو، وسێ چارێكێن وهلاتێ موسلمانان د بن دهستى دا بوون، (كولهیب) وئهو ناڤێ حهججاجى بوو هنگى، ژ هندێ كێمتر بوو خۆ هزرا ههڤڕكیا د گهل كوڕێ زوبهیرى ژى د سهرێ خۆ دا ئاماده بكهت.. دهاته گوهان ووى ب چاڤ ژى ددیت كو سهروبهر ل شامێ وحیجازێ نه یێ دورسته ژ بهر وێ دوبهرهكیێ یا د ناڤبهرا بنهمالا ئومهییهى وكوڕێ زوبهیرى دا ههى، وى ژى وهكى ههر كهسهكێ دى ب ڤى حالى خۆش نهبوو، وڤێ دوبهرهكیا د ناڤبهرا موسلمانان دا ههى دلێ وى ژى دگڤاشت، وهیڤیا وى ئهو بوو ڕۆژهك بێت وموسلمان جارهكا دى ببنه ئێك..
وچهرخا ڕۆژان ل بهر وى زوى زڤڕى، كانێ (كولهیب) سهیدایێ زارۆكێن طائفێ، ئهوێ بێ ناڤ ودهنگ دژیا.. پاشى كولهیبێ شورگه یێ ب شهڤ وڕۆژ كۆلان وجادهیێن شامێ دپیڤان بێى كهس هزرهكێ بۆ بكهت، یان تێر بهرێ خۆ بدهتێ، وكانێ حهججاجێ ئهڤرۆ سهرلهشكهرێ خهلیفهیێ ئهمهوى عهبدلمهلكى ئهوێ ب هزاران جندى ل بن دهستى، یێ نوكه كوڕێ زوبهیرى د حهرهمێ دا ئاسێ كرى وههمى ڕێ لێ گرتین؟
- وهى بۆ ته كوڕێ یووسفێ ثهقهفى! شۆلا ته شۆله.. تشتێ تو بكهیه دلێ خۆ هنگى تو ڕادوهستى حهتا ب جهـ دئینى!!
هۆسا حهججاجى د دل دا گۆته خۆ.. وگڕنژینهك ل سهر دێمێ وى هاته نهخشاندن، پاشى ئهو گڕنژین ههر زوى بهرزه بوو ونیشانێن مجدیێ وهندهك تـرسـێ ژى ل سـهر دیـار بـوون دهمـێ بـیـرا وى ل وان برویسیان هاتیه ڤه یێن كو ژ عهسمانى هاتین و ب موعهسكهرێ وى كهفتین وهژمارهكا زهلامێن وى سۆتین.. هنگى نێزیك بوو لهشكهرێ وى سست ببن وخۆ ژ مهیدانێ ڤهكێشن، وان هزر كر ئهڤه غهزهبهكه خودێ ل وان كرى ژ بهر كو وان كهعبه یا موحاصرهكرى، هندى حهججاجى دگۆته وان: خۆ نهترسینن، مهسهله نه مهسهلا غهزهبێیه، ئهز خهلكێ تیهامێمه وئهڤه عهورێن وێنه، ئهز وان دنیاسم، پاشڤه نهچن، و ل ئارمانجا خۆ یا پیرۆز لێڤه نهبن! بهلێ لهشكهرێ وى باوهر ژ وى نهكر حهتا ڕۆژا دى هندهك برویسیێن دى هاتین و ب هندهك ههڤالێن كوڕێ زوبهیرى كهفتین.. هنگى ژ نوى وان باوهر ژێ كر ودوباره دهست ب هاڤێتنا مهنجهنیقان بۆ سهر كهعبێ كر.. وگاڤا ئهو گههشتیه ڤى جهى ژ هزركرنێ دوباره وى د گهل خۆ گۆت:
- وهى بۆ ته كوڕێ یووسفێ ثهقهفى! شۆلا ته شۆله.. تشتێ تو بكهیه دلێ خۆ هنگى تو ڕادوهستى حهتا ب جهـ دئینى!!
پـاشـى ڕابووڤه و ل هـهڤـالـێـن خـۆ كـره دهنگ، وڕێزێن وان ڕێكخستن، وئهو ل سهر چهند كۆمهكان لێكڤهكرن، وفهرمان ل وان كـر ئـهو بـهرهـهڤـیـا خۆ بۆ ڕوى ب ڕویبوونێ بكهن؛ چونكى كارهكێ مهزن ل بهرا وان ههیه، وبهرێ ههر كۆمهكێ دا دهرگهههكى ژ دهرگههێن حهرهمێ وگۆته وان:
- ئێك ژ دووان ئهڤرۆ دڤێت ههر بكهن، بێن وسهرێ كوڕێ زوبهیرى د گهل ههوه، یان نهئێن!!
