پێشگۆتن
ل زهمانهكێ دل تێدا بهیار بووى، وهشكاتى گههشتییه رحێ ژى.. ل دهمهكێ ڕۆندكێ ژ چاڤان باركرى، وپهلا باوهرییێ تێن تێ نهماى، وچرایێ تهقوایێ كز بووى، وئێدى گۆتنێن دلسۆزان كارى ل كهسێ نهكهن، زهنگلا ترسێ ژ گهلهك لایان ڤه دئێته لێدان، ومرۆڤێن كارێ وان پهروهرده نالینێن وان دگههنه بهر عهسمانى، وگهلهك كهسێن خهما جڤاكێ هل دگرن گازندهیان دكهن، وپسیار ژ گهلهك لایان دئێنهكرن:
- بۆچى تهربیهتا مه ڕۆژ بۆ ڕۆژێ بهر ب خرابییێ ڤه دچت؟ ئهگهر چنه؟
- وچاوا ئهم دێ شێین یا مایى خلاص كهین؟
- ئهرێ دهلیڤه مایه مرۆڤێن دلسۆز كارى بۆ دهرمانكرنا دهردى بكهن؟ یان ژى دهستێ خالى بداننه سهر یێ چو تێدا نه، وخۆ ب دهست بێ هیڤییێ ڤه بهردهن، وبێژن: مانێ كون یا ژ پاتهى مهزنتر لێ هاتى!
ومرۆڤێن زانا ب دهرد ودهرمانێن جڤاكى، باش دزانن كو ب تنێ ئهو پهروهردهیا ل سهر بناخهیێ باوهرییێ دئێته ئاڤاكرن، دشێت نهفسێن نساخ چاره بكهت، ودلێن ڕهق دهرمان بكهت، رحێ زهلال بكهت.. بهلێ، پهروهردهیا ئیمانى، ئهوا دلى ب عهسمانى ڤه گرێ ددهت، ورحێ بلند دكهت، وحهز وڤیانان پاقژ دكهت، تشتێ دبته ئهگهرا هندێ نهفس ورهفتار ڕاست ودورست ببن.
وپهروهردهیا ئیمانى ئهوا ئهم بهحس ژێ دكهین نه علمهكه ب دهرسینى دئێته وهرگرتن، هندى ئهو كارهكه ب چاڤلێكرن دئێته ستاندن، وئهوێن ڕێكا خودێ گرتى وهیڤییا خۆ كرییه ڕزگاركرنا نقۆبوویێن دهریایا سهرداچوونێ ژ ههر كهسهكێ دى فهرترن ل نموونهیێن بلند بگهڕیێن و ب ڕهنگهكێ عهمهلى ئێكهمین جار ل سهر خۆ ب كاربینن، وخۆ بۆ خهلكێ دى بكهنه جهێ چاڤلێكرنێ، یان چوننه چوننه وان نموونهیێن هلبژارتى ب ڕهنگهكێ جوان بۆ خهلكى ڤهگێڕن، وبۆ چاڤلێكرنا ڤان نموونهیان وان داخواز بكهن، وبیرا وان لێ بیننه ڤه، ودل ئهگهر وهسا هاتبته چێكرن كو ئهو زوى بێته وهرگێڕان، وزوى خۆ ژ بیرڤه بكهت، وزوى نازك ژى ببت وڕۆناهییێ وهرگرت.. بیرئینان باشترین دهرمانه بۆ وى كو وى نهرم بكهت وتارییێ ژێ دویر بێخت، وكهس بلا نهبێژت: ما ئاخفتنێ چ پێڤه دئێت؟ هنده هندى ئهم دبێژین وچو پێڤه نائێت!
دندكهكا تۆڤى با د گهل خۆ دبهت، خهلك ههمى هزر دكهن ئهو چوو زهعێ بوو، بهلێ ل جههكێ دویر ئهو دندك بن ئاخ دبت، ودهمهكێ دویر دارهكا ب خهمل وبهژن بلند ژێ چێ دبت، ڤێجا بێ هیڤى نهبن.
ودهولهمهندترین دهم بۆ هلبژارتنا نموونهیێن بلند یێن پهروهردهیا پاك دهمێ صهحابى وتابعییانه، صهحابى ئهوێن ل سهر دهستێ سهیدایێ ئێكێ پێغهمبهرێ خودێ -سلاڤ لێ بن- هاتینه پهروهردهكرن، وتابعى ئهوێن پشتى هنگى ل سهر دهستێ وان هاتینه پهروهردهكرن، صهحابى وتابعى ئهوێن ژ ناڤبهرا ههمى مرۆڤێن دیرۆكێ خودێ ئهو هلبژارتین دا ڕۆناهییا دینێ وى ل ڤێ دنیایا بهرفرههـ بهلاڤ بكهن.. ڤێجا هوین هزر بكهن ئهو دێ دچاوا بن؟!
د ڤێ زنجیرا دهرسێن خۆ دا ئهوێن مه ل بن ڤى ناڤێ كۆمكرین: (چاوا خۆ پهروهرده بكهین؟) مه ل بهره گۆتنێن خۆ ل سهر بناخهیێ گۆتن وبۆچوونێن صهحابى وتابعییان ئاڤا بكهین، ل بهر ڕۆناهییا مهنههجێ وان یێ (تهربهوى) بیرا خۆ ل وان ڕێكان بینینهڤه یێن پێتڤییه ئهم خۆ، پاشى ئێك ودو ل سهر پهروهرده بكهین.. وههژى گۆتنێیه كو د ئامادهكرنا ڤى بابهتى دا مه ب ڕهنگهكێ سهرهكى مفا ژ ڤان ههردو كتێبان وهرگرتییه:
1- لمحات تربویة من حیاة التابعین، یا د. أشرف حسن طبل.
2- منجد الخطیب، یا أحمد بن صقر السویدى.
3- صور ومواقف من حیاة التابعین، یا سعد یوسف أبو عزیز.
هیڤییا مه ژ خودایێ مهزن ئهوه گۆتنێن مه د مفادار وبهرههمدار بن، وئهو وان بۆ مه ب خێر بنڤیست.
