ل معهسكهرێ حهججاجى
ل بهتهنا ژۆرى یا چیایێ ئهبوو قوبهیسى ئهوا دكهفته هنداڤى گركێ صهفایێ، ل وى جهێ -دبێژن- شـهیتانى ڕۆژهكێ خۆ لێ ئاشكهرا كربوو! لهشكهرێ شامێ ب سهركێشیا والیێ ئهمهویان یێ دلڕهق حهججاجێ كوڕێ یووسفێ ثهقهفى معهسكهرێ خۆ دانابوو، ئهو لهشكهرێ بۆش یێ ب هزاران، ئهوێ شام ب ههمى باغ وبیستانێن وێ ڤه هێلاى وهاتى ل سهر كهڤرێن مهكههێ یێن ڕهق وشاریاى داناى؛ دا سهركهفتنهكا وهسا ب دهست خۆ ڤه بینن ئهگهر خۆ ل سهر حسێبا ههڕفاندنا دیوارێ كهعبێ ب خۆ بت!
د ناڤ ڤى لهشكهرى دا جحێلهكێ بیست وحهفت سالى ههبوو خهوێ ڕێكا خۆ بۆ چاڤێن وى نهدیت، هندى خۆ قهلدا، ژ ڤێ تهنشتێ بۆ سهر تهنشتا دى، نهشیا بنڤت، لهو ژ نیڤا شهڤێ پێدا وى هێدى خۆ ژ بن خیڤهتێ ڤهدزى وچو ل بهر دهرى ڕوینشت، عهسمان یێ زهلال بوو، ههیڤا گهش دێمێ خۆ ئینابوو دهرێ وتیشكێن تاڤا خۆ یێن زهر ب سهر دۆل ونهالێن مهكههێ دا بهرددان.. سهرلهشكهرێ جحێل ل جهێ خۆ ل بهر دهرێ شكهفتێ ڕوینشت وما وكهفته هزرا.. ژۆردا د حهرهمێ فوكرى ل بهر تاڤه ههیڤێ سهربلند ئاشكهرا دبوو، گاڤا چاڤێن وى ب دیوارێ كهعبێ یێ ههڕفتى كهفتین ڤهجنقى، دلێ وى یێ چو جاران ترس نهنیاسى ڤهلهرزى، ئهڤه چ بوو چێبووى؟ وبـۆچـى؟
وگـونـههـا كێ بوو؟ ترسا ژ خودێ وههستكرنا ب كرێتیا ڤێ گونهها مهزن یا وى كرى نێزیك بوو دلێ وى بگڤێشت، ئهرێ مرۆڤهك ئهگهر خۆ ئێكێ ل مهزنیا عهبدلمهلكێ كوڕێ مهروانى ژى بت ب بهر هندێ دكهڤت مرۆڤ دیوارێ كهعبێ بۆ بههڕفینت؟
حهججاجى ههست ب پهشێمانیێ كر، و د دل دا خوزى ڕاهێلا كو ئهو وهكى بهرێ ل گوندهكى با د ناڤ چیایێن حیجازێ ڕا زارۆك فێرى خواندن ونڤیسینێ كربان، نه كو سهرۆكێ ڤى لهشكهرى با یێ نوكه كارێ خۆ دكهت دا هێڕشێ بكهته سهر مالا خودێ ونڤێژكهران بكوژت.. بهلێ ما نه وى ئهڤ كارێ مهزن ب ستویێ خۆ ڤه گرتیه دا دوباره ئێكبوون وسلامهتیێ بۆ دهولهتا ئیسلامێ یا گهنج بزڤڕینته ڤه، ما نه ئارمانجا وى ئهوه ئوممهتێ ههمیێ ل دۆر ئێك ئهمیرى كۆم بكهت، وخیلافێ د ناڤبهرێ دا نههێلت؛ دا ئهو بشێت جارهكا دى ب دهورێ خۆ یێ دورست ڕاببت كو بهلاڤكرنا ڕۆناهیا ئیسلامێیه ل ڕۆژههلات وڕۆژئاڤایێن دنیایێ؟ نه.. مهزنیا ئارمانجا وى كارى یێ ئهو پێ ڕادبت گونهها وان كاران بچویك دكهت یێن لهشكهرێ وى ل ڕۆژا بۆرى پێ ڕابووى، پشتى هنگى ما گونهها وى چیه ئهگهر عهبدلمهلكى فهرمان لێ كربت كوئهو كهعبێ بدهته بهر مهنجهنیقان دا ئێكبوونا ئوممهتێ ب جهـ بینت؟ ئهو سهربازهكێ دهست كورته د فهرمانا خهلیفهى دا یێ ڕاوهستایه، ئهگهر گونهههك ههبت یا وى نابت بهلكى دێ یا عهبدلمهلكى بت، وما چ گونهها عهبدلمهلكى ب خۆ ژى ههیه؟ ما نه ئهو (أمیر المؤمنین)ه وبهرپڕسیا پاراستنا دهولهتێ وبهڕهڤانیا ژ بهرژهوهندیێن ئوممهتێ د ستویێ وى دایه، وخودێ دێ پسیارا وى سهرا ڤێ چهندێ كهت؟
دیوارێ كهعبێ ئهگهر ههڕفت ژى ب ساناهیه جارهكا دى و ب ڕهنگهكێ جوانتر بێته ئاڤاكرن، بهلێ ئهگهر دیوارێ ئوممهتێ ب ڤێ دوبهرهكیێ ههڕفت چاوا دێ جارهكا دى ئێته ئاڤاكرن؟ گونههـ ههمى یا كوڕێ زوبهیریه ئهوێ ئاگرێ فتنێ د ناڤ ئوممهتێ دا هلكرى وئالایێ ئیسلامێ كریه دو پارچه، و ب ڤێ چهندێ ب تنێ ژى رازى نهبوو، ڕابوو لهشـكـهرێ خۆ كره د كهعبێ ڤه ومالا خودێ ئهوا دڤێت ههردهم یا تهنا وڤالا بت ژ جهنگ وشهڕان تژى چهك ولهشكهر كر، وگوهداریا ئێكێ وهكى عهبدللاهێ كوڕێ عومهرى نهكر ئهوێ شیرهت لێ كرى وگۆتیێ: شهڕێ خۆ ژ مالا خودێ دویر بێخه؟! گونههـ ههمى دكهفته ستویێ كوڕێ زوبهیرى، چونكى ئهو دشیا مالا خودێ ژ ڤێ وێرانكرنێ بپارێزت.. وگاڤا حهججاج د گهل خۆ گههشتیه ڤى ئهنجامى، ههست ب بێنفرههیێ كر، وخۆ ب هندێ قانع كر كو وى تشتهكێ وهسا نهكریه ئهو بهرانبهر خودێ پێ ڕوى ڕهش ببت، وى مالا خودێ نهدایه بهر ئاگرێ مهنجهنیقێن خۆ، بهلكى وى بنگهههكێ كوڕێ زوبهیرى یێ لهشكهرى یێ ب سهرێك دا ئیناى، وئهو نههاتیه مهكههێ خراب بكهت، یان مرۆڤێن ئێمن بترسینت وبكوژت، بهلكى ئـهو یـێ هـاتـى ڕێكا گهوافكـهر وحـهجـیـێـن مالا خودێ خۆش وتهنا بكهت، وما چ گونههـ د ڤێ چهندێ دا ههیه؟
و ل وى دهمێ هزرا حهججاجى ئهو گههاندیه ڤى ئهنجامێ بۆ وى خۆش، دهنگێ بانگێ سپێدێ ژ لایێ كهعبێ ڤه گههشته گوهان.. (الله أكبر، الله أكبر) ئهو سرۆدا ئهزهلى یا كو ههر جارهكا ل بهر مرۆڤى ژ ڕامانێن خۆ یێن دورست نههاته ڤالاكرن، ئهو خودانى دگوهۆڕت وئێكا هند ژێ چێ دكهت ژبلى خودێ ههر كهسهكێ دى د چاڤان دا بچویك ببت، وهسا بچویك ببت كو نێزیكه ب چاڤ نهئێته دیتن، ئهگهر خۆ ئهو كهس ئێكێ وهكى عهبدلمهلكى بت یان كوڕێ زوبهیرى!
وحهججاجى لهشكهرێ خۆ ب ڕێزكر و ل بهرا وان ڕاوهستیا بۆ كرنا نڤێژا سپێدێ ب جماعهت..
