ئهگهر تۆبه نهكهین
1. مه گۆت: ئهو كهسێ باوهرى د گهل ههبت ویێ دویر بت ژ مهقامێ تۆبێ، مه تهلا وى وهكى مهتهلا ڕۆژێیه دهمێ دغهییرت، وڕۆناهیا وێ دئێته پهچنین، ومفا ژێ نائێته دیتن، وباوهرى ئهگهر ب دورستى دهورێ خۆ ببینت دێ خودانێ خۆ ژ گونههكاریێ دهته پاش، ودێ وى ژ سێ مهزنترین دوژمنان پارێزت: نهفس، وشهیطان، ودلچوون.. هندى نهفسه هێشتا زوییه بۆ لێڤهبوونێ، وهندى شهیتانه لهزێ بكه هێشتا خۆشى ژ دهست ته دهرنهكهفتى، ودلچوون (ههوایێ نهفسێ) لێڤهبوونێ ل بهر وى گران دكهت، وگونههكاریێ ل بهر وى خۆش وسڤك دكهت.
2. وههر جارهكا مرۆڤى خۆ ب دهست ڤان ههر سێ دوژمنان ڤه بهردا، هێدى هێدى ئهو دێ ژ مهلهكووتا خودێ دویر كهڤت، وئهو دهردێ مهزن دێ گههتێ یێ ژ ههمیان پتر (مهدهدا ئیلاهى) ژ وى دبڕت، دهردێ (كبر) وخۆمهزنكرنێ، وبلا نهئێته هزركرن خۆمهزنكرن ئهوه مرۆڤ حهز بكهت جلكێ مرۆڤى یێ باش بت یان مالا مرۆڤى، خۆمهزنكرن ئهوه مرۆڤ وه لێ بێته حهقیێ قهبویل نهكهت، یهعنى: نهفسهكا وهسا وى هــهبـت هزر بكهت خهلك ههمى ژ هندێ كێمترن حهقیهكا نه ل نـك وى هــهى بــزانــن، رهحــم دهمــێ ژ عهسمانى دبارت، ل كیڤه بنهجهـ دبت؟ ل كلۆڤانكا چیاى، یان ل عهردێ نزم؟ رهحما خودێ ژى یا ب وى ڕهنگیه، دهمێ دبارت ژ دلێن (موتهكهبران) دهرباس دبت، ودكهفته دلێن (موتهواضع).. ووه نــهبــت بـێـتــه هزركرن كو ئهڤ ڕهنگێ خۆمهزنكرنێ بهس ل نك وهزیر ومالداران پهیدا دبت، نه.. هندهك جاران خۆ ئهو ل نك وان ژى پهیدا دبت یێن شیڤا شهڤێ د مالێ دا نهههى!
3. ومرۆڤێ ئهڤ ڕهنگه خۆمهزنكرنه ل نك پهیدا بت، كو ئهو خۆ د سهر حهقیێ ڕا ببینت، دێ ب گونههێ ئێته گرتن، وهزر نهكهن گرتى بهس ئهون یێن دكهڤنه سجنێ، ئێخسیرێ مهزن ئهوه یێ مهملهكهتا خودێ یا پاقژ ب پیساتیا گونههێ قڕێژى بكهت.
4. ومن گهلهك هزرا خۆ د وى كهسى دا كریه یێ چو جارا خۆ ب مهقامێ تۆبێ ڕا نهگههاندى، كانێ مهزنترین عقووبه ل دنیایێ گههشتیه وى چیه؟ وئهنجام ئهڤه بوو: مهزنترین عقووبه ئهوه ئهو ژ ڤێ دنیایێ دهردكهڤت بێى تام بكهته شرینیا ڤیانا خودێ، شرینیا باوهرێ، بێى پیێ خۆ بهر ب (حهضرهتا قودسى) ڤه بهاڤێژت، چونكى ئهو مهملهكهتهكا پاقژه، ئهوێن ب قڕێژا گونههێ هاتینه بهقهمكرن دهرگههـ بۆ نائێتهڤهكرن.
5. ب نك دهرگههێ تۆبێ ڤه ههڕه، ودهرگههى بقوته، پتر ژ جارهكێ، ئهو بۆ ته دێ ئێته ڤهكرن، وما كهنگى ئهو جارهكێ هاتیه گرتن حهتا بێته ڤهكرن؟! قهستا وى دهرگههى بكه یێ ههردهم ڤهكرى، ئهو دێ ته نێزیكى وى كهت، وتو بزانه موحهققهق دهمێ تو ژ دهرازینكا وى دهرى دهرباز دبى، دێ عهجێبیان بینى! دێ بینى ئهو یێ ب نك ته ڤه دئێت، ههر چهنده تو یێ ههوجهى وى یى ژى، ما نه تشتهكێ عهجێبه ئهو -بۆ فایدێ ته- كهرهمێ ل ته بكهت كو بهرێ ته بدهته بك خۆ ڤه، ووى كهیف ب ته بێت؟
6. سهییدێ تۆبهكهران -سلاڤ لێ بن- بۆ مه دیار دكهت كو خودێ پتر كهیف ب عهبدێ خۆ دئێت دهمێ ئهو تۆبه دكهت، ژ كهیفا ئێك ژ مه دهمێ ل بنێ بهڕیێ بت، حێشترا وى د گهل دا، ئاڤ وخوارنا وى ل سهر پشتێ، پاشى حێشترا وى لێ بهرزه ببت، ڤێجا ئهو ژ خۆ بێ هیڤى ببت، وچاڤهڕێی مرنا خۆ بمینت، پاشى ژ نشكهكێ ڤه ببینت حێشترا وى یا ل هنداڤى سهرى، وخوارن وڤهخوارنا وى یا ل سهر پشتێ.. هند كهیفا وى بێت، ئهزمانێ وى تێك بئالزیێت، وشوینا بێژت: یا رهببى ئهز عهبدێ تهمه وتو رهببێ منى، بێژت: یا رهببى تو عهبدێ منى وئهز رهببێ تهمه!! هنده كهیفا وى ب ته دئێت دهمێ تو قهستا دهرگههێ وى دكهى.. ویا غهریب ئهوه تو فایدهى ژ ڤێ نێزیكیێ دكهى نه ئهو!
7. وئهگهر ته بڤێت قهستا دهرگههێ وى بكهى، ئهو دهرگههـ یێ نێزیكى تهیه.. ههوجه ناكهت تو بچى عهبدهكێ وهكى خۆ بۆ خۆ بكهیه (واسطه) دا ته بگههینتێ، دهسنڤێژا خۆ بشۆ، وبهر قیبله ڕاوهسته وبێژه: (الله أكبر) و ژ دنیایێ دهركهڤه.. ته دیتیه مرۆڤهكێ ب عهقل، خۆشتڤیێ وى بێژتێ: وهره دیدارا من، ئهزێ ل هیڤیا ته، وئهڤه دهرگههـ بۆ ته یێ ڤهكریه. ئهو بێژتێ: كانێ ڕاوهسته دا ئهز قهستا فلان كهسى بكهم پاشى! نهفسا خۆ ب ڤێژێ بكێشه وبپیڤه، گاڤا ته دیت وێ نڤێژێ نهفسا ته گوهاڕت، وتو ژ خهلكێ دى جوداكرى، هنگى تو بزانه كو تو ژ بهختهوهرانى، ئهگهر نه.. بزانه وێ نڤێژێ بهوستهكا ب تنێ ژى ل ته زێده نهكریه.
8. ههچیێ بڤێت ڕاستیا خۆ ل نك خودایێ خۆ بزانت بلا بهرێ خۆ بدهته حالێ خۆ د گهل نڤێژێ، ئهوێ بچت ل دكانا مسك فرۆشى ڕوینته خوارێ، پاشى ژێ دهركهڤت بێى بێنا مسكێ سهح بكهت، دڤێت بزانت نهخۆشیهكا ل نك وى ههى، وئهو یێ پێتڤى چارهسهریێیه.. ( سَأَصْرِفُ عَنْ آيَاتِيَ الَّذِينَ يَتَكَبَّرُونَ فِي الْأَرْضِ بِغَيْرِ الْحَقِّ )ئهزێ بهرێ وان دێ ژ ئایهتێن خۆ وهرگێڕم یێن د عهردى دا بێ حهق خۆ مهزن دكهن، نڤێژ ته دبهته دیوانا خودێ، وئهوێ بچته دیوانا خۆشتڤیێ خۆ وحهز بكهت زوى ڤهگهڕیێت، ئهو د ڤیانا خۆ دا یێ ڕاستگۆ نینه، ڤێجا پا هوین چ دبێژن بۆ وى یێ نهڤێت ئێكجار بچته دیوانا خۆشتڤیێ خۆ؟
