سهلمان ژ مهیه..
ل مهدینێ ئهوا سهلمانى خۆ ڤهگوهاستیێ ولێ ئاكنجى بووى، جڤاكهكا گهلهكا جودا ههبوو ژ وێ جڤاكێ یا سهلمانى ل حصنێ (بهنوو قورهیظیان) دیتى، بهلكى ل (عهمووریێ) و(مویسل) و (دیمهشقێ) ژى، وبهرى هنگى ل وهلاتێ وى ب خۆ ژى ل ئهصفهان ودهور وبهرێن وێ ژ وهلاتێ فورسێ.. ل مهدینێ جڤاكهكا ژ ڕهنگهكێ تایبهت ههبوو، پهیوهندیێن وان ل سهر بناخهیێ ئهڤینێ وهاریكاریێ دئاڤاكرى بوون، ئهڤ جڤاكا بهرى هنگى ئهوسى وخهزرهجى ل ئێك ڕێز نهددیت، وخۆچێتر دیتنا وان ژ ئێك ودو گهلهك جاران بهرێ وان ددا شهڕ وپێكدادانێ، نوكه ئهوسى وخهزهرجى وقورهیشى وگهلهك ئویجاخێن دى یێن عهرهبان، بهلكى گهلهك مللهتێن نه عهرهب ژى وهكى حهبهشى ورۆمى وفارسان، وهكى برایێن دهیبابى پێكڤه دژین، بێى ئێك ژ وان خۆ ژ یێ دى چێتر ببینت، جڤاكهك بوو نه فارس ونه رۆمى ونه عهرهبان ژى بهرى هنگى نهنیاسى بوو، جڤاكهكا ئاڤاكرى بوو ل سهر بناخهیێن عهسمانى، و ب دهستێن پێغهمبهرى، ڤێجا چاوا ئهو جڤاكهكا نموونهیى نهبت؟!
پشتى خودێ وپێغهمبهرێ وى قهنجى ل سهلمانى كرى، وئازادیا وى یا كو ئـهو چــهنــد سـال بــوو ژێ هـاتــه ستاندن جارهكا دى بۆ زڤڕاندیهڤه، ئهو بوو ئێك ژ ئهندامێن جڤاكا مهدینێ یا نموونهیى، ئهو جڤاكا مرۆڤ تێدا ههست ب هندێ دكهت كو ئهو یێ ب تنێ نینه بلا چهند ئهو یێ بێ خودان ژى بت.. ل مهدینێ ههر ئێكى دڤیا سهلمان ژ وى بت، ئهنصاریان گۆت: سهلمان ژ مهیه، ئهو خهلكێ مهدینێیه، وموهاجران گۆت: نهخێر ئهو ژ مهیه، ئهو د ڕێكا خودێ دا یێ مشهخت بووى، ئهو دێ ژ مه بت. وهنگى پێغهمبهرى -سلاڤ لێ بن- ب ئهمرێ خودێ حوكم د ناڤبهرا وان دا كر وگۆت: ((سهلمان ژ مهیه، ژ بنهمالا مهیه)).. مهزنترین نیشانا سهربلندیێ یا سهلمانى ل ژیێ خۆ ههمیێ شاناى پێ دبر، مهزنترین مرۆڤ د جڤاكا مهدینێ دا، و ب قهدرترین كهس ل بهر خهلكێ عهسمانى سهلمان ژ خۆ وبنهمالا خۆ هژمارت، سهلمان ئهو مرۆڤێ بیانى وبێ خودان، یێ ب هزاران قویناغ بڕین، و ب سهدان نهخۆشى دیتین؛ دا ل حهقیێ بگهڕیێت، نوكه ب سهر ڕۆناهیێ هلبوو، هیڤیا خۆ یا مهزن ب دهست خۆ ڤه ئینا، ونه بهس هنده.. بهلكى ئهڤه ئهو پێغهمبهرێ سهیدایێ وى مزگینیا هاتنا وى یا نـێـزیـك دایـێ، ونیشانێن وى بۆ ئاشكهرا كرین، یێ دبێژتێ: تو ژ منى! ما وى چ ددى دڤێت؟
وفهرمان ژ خۆشتڤى هاتهدان كو سهلمان وعوهیمرێ ئهنصارى ئهوێ دبێژنێ: بابێ دهردائى، ببنه برایێن ئێك وپێكڤه بژین.. وگاڤا سهلمانى دیتى برایێ وى ههر شهڤ حهتا سپێدێ یێ هشیاره ونڤێژان دكهت، وههر ڕۆژ یێ ب ڕۆژیه، گۆتێ:
- وه نهكه!!
وى گۆتێ: تو مهنعا من دكهى ئهز عیبادهتێ خودایێ خۆ بكهم؟
سهلمانى گۆتێ: نه.. بهلێ چاڤێن ته حهقێ ل سهر ته ههى، وعهیالێ ته ژى حهقێ ل سهر ته ههى، ڕۆژیێ بگره وبخۆ، و ب شهڤێ عیبادهتى بكه وبنڤه ژى!
وگاڤا بابێ دهردائى سوحبهتا خۆ وبرایێ خـۆ یێ فارسى گههاندیه پێغهمبهرى -سلاڤ لێ بن-، پێغهمبهرى گۆتێ:
- عوهیمر، سهلمان ژ ته چێتر دزانت.. سهلمان یێ تژى زانینه!
ویا غهریب نینه ئهو سهلمانێ علمێ فورس ورۆمێ كۆمكرى، وتهورات وئنجیل خواندى، و ب سالان خزمهتا خودێناس وئوسقوفێن مهسیحییهتێ كرى دهمێ دئێته د ئیسلامێ دا مرۆڤهكێ تژى زانین بت..
