ودیماهیێ.. ئهڤهیه ڕۆناهى!!
ل ڕێكێ ههمیێ ئهو د گهل خۆ كهفتبوو هزران.. ئهڤه دو نیشان وى ل نك موحهممهدى دیتن وهسا دهركهفتن وهكى سهیدایێ وى ئوسقوفێ عهمووریێ گۆتین، دلێ وى دگۆتێ: د ناڤبهرا ته وڕۆناهیێ دا چو نهمایه، ئهو ڕۆناهیا بهرى چهند سالان (رووزبه) ل هیڤیێ، بهلێ.. ئهڤهیه خودانێ وێ ڕۆناهیێ، نهكو (مانى) ئهوێ (رووزبه)ى وههڤالێن خۆ باوهریا خۆ ددایێ.. بیرا وى ل مزگینیا ئشعیایێ پێغهمبهر هاتهڤه: ((ئهو مللهتێ ل تاریێ دایه ڕێ، ڕۆناهیهكا گهش دیت، وئهو كهسێن ل سهر عهردێ مرنێ و ل بهر سیبهرا وێ ڕوینشتین ڕۆناهى ب سهر وان دا ههلات.. چونكى كوڕهك دێ مه بت، ئهو دێ بۆ مه ئێتهدان، سهرۆكاتى وسهوهرى دێ ب ناڤ ملێن وى ڤه بت، وناڤێ وى دێ یێ عهجێب بت..))، سهرۆكاتى وسهروهرى دێ ب ناڤ ملێن وى ڤه بت، ئهڤه ب تنێ یا ماى ئهو ببینت؛ دا بۆ وى مسۆگهر ببت سهدا سهد كو موحهممهد ئهو پێغهمبهره یێ مزگینى پێ هاتیهدان، ومهسیحى ژى وهكى یووحهننایێ پیرۆز ژێ ڤهدگوهێزت ههر وه گۆت بوو، دهمێ گۆتیه شاگردهیێن خۆ: ((نه بۆ خوارنا نهمینت كارى بكهن، هوین بۆ وێ خوارنێ كار بكهن یا ههروههر بمینت، بۆ ژینا بێ دویماهى ئهوا كوڕێ مرۆڤى ددهته ههوه؛ چونكى خودایێ باب ئهو یێ خهتمكرى..))، (خهتم) مۆرا پێغهمبهرینیێ ئهوا ب ناڤ ملان ڤه، دڤێت ئهو وێ ژى ببینت بهرى بڕیارا خۆ بدهت..
ڕاسته دهمێ سهلمانێ فارسى وان جهێن (پهرتووكا پیرۆز) ل بیرا خۆ دئینتهڤه یێن بهحسێ سالۆخهتێ پێغهمبهرێ دوماهیا زهمانى تێدا هاتین ئهو سهدا سهد ل سهر موحهممهدى ب جهـ دئێن، بهلێ تشتێ ئهو ژێ عهجێبگرتى دما ئهو ڕكدارى ونهیارهتیا دژوار بوو یا وى ل نك زانایێن جوهیان ددیت ل حصنى بهرانبهر موحهممهدى ودینێ وى، ئاخرى ئهو ب خۆ د كتێبا خۆ دا ژ پێغهبهرێ خۆ ئشعیاى ڤهدگوهێزن كو وى گۆتبوو: ((كتێب دێ بۆ وى ئێتهدان یێ نهخواندهڤا، ودێ بێژنێ: بخوینه.. ئهو دێ بێژت: ئهز نهشێم ئهو یا خهتمكریه، پاشى جارهكا دێ دهنهڤێ ودێ بێژنێ: بخوینه.. ئهو دێ بهرسڤێ دهت: ئهز خواندنێ نزانم)) مهعنا: ئهوێ كیتاب دێ بۆ ئێتهدان كهسهكێ نهخواندهڤایه، خواندن ونڤیسینێ نزانت، وموحهممهد یێ وهسایه، وهكى ئشعیاى مزگینى پێ داى، ئهرێ پا بۆچى ئهو هنده ژ حهقیێ دڕهڤن؟ پاشى دهمێ وى بیرا خۆ ل تبیعهتێ خوار وڤیچ یێ مللهتێ ئـسـرائیلى ئینایه ڤه عهجێبیا وى نهما، ما ئهڤه نه ههر نهڤیێن وانه یێن ب دههان پێغهمهر كوشتین، وئهو گونههـ كرین یێن بووینه ئهگهرا هندێ غهزهبا خودێ ب سهر دا بێت؟ مانه نهڤیێن وانه یێن خۆ داینه د گهل صهنهمپهڕێسان دژى یهسووعێ مهسیح، وبهرگهڕیانا كوشتنا وى كرى، و ب هزاران خودان باوهر ب دهستێن كافران داینه كوشتن؛ دا كهربا دلێ خۆ هوین بكهن؟
وچهند ڕۆژهكێن دى ژى چوون.. دهمهكى سهییدێ وى ئهو ب كارهكى هنارته یهپربێ، ووى ئهڤ چهندا هه بۆ خۆ ب دهلیڤه زانى كو بچت مهسهلا (مۆرا پێغهمبهرینیێ) ژى تهئكید بكهت، بهلێ چاوا و ب چ هێجهت ئهو دێ شێت ناڤ ملێن موحهممهدى بینت؟ گاڤا گههشتیه باژێڕى وى دیت زهلام ههمى ب نك موغبهرا بهقیعێ ڤه یێن دچووین، ل ڕۆژههلاتا باژێڕى؛ دا مریهكێ خۆ ڤهشێرن، وگاڤا ئهو گههشتیه ناڤ موغبهرى وى دیت موحهممهد وههڤالێن خۆ ژ ڤهشارتنا مرى یێن خلاس بووین، و ل بهر سیبهرا دارقهسپهكێ یێن ڕوینشتین، ودهمێ ئهو ب نك وان ڤه چووى وسلاڤ كرى، وى ڤیا خۆ بدهته پشت موحهممهدى بهلكى بشـێـت هندهكێ ژ ناڤ ملێن وى ببینت.. بهلێ چاوا ئهو دێ بینت وكراس یێ ل سهر ملان؟!
خوههكێ ئهو دا وئێكێ بهردا.. یا ژ وى ڤه بهرێ ههمیان یێ لێ ونوكه دێ دهستێ وى گرن وێ بێژنێ: ته چ دڤێت؟ بهلێ ژ باشیا ئێغبالا وى خهما ههمیان ل سهر مرنا ههڤالێ وان ئهو ژ بهرێخۆدانا وى موژیل كربوون.. ودهمهكى ڕزگارى ڤێڕا گههشت، موحهممهدى خۆ چهماند، كراسێ وى ژ سهر ملان كهفت، باش بهرێ خۆ دایێ د كراسێ سپى یێ وى یێ مایى ڕا نیشانهكا ڕهشا ئاشكهرا ل ناڤ ملێن وى دیار دكر.. چ بكهت؟!
هیڤیهكا مهزن ئهگهر مرۆڤى ههبت، ڤیانهكا تو مال وحال ووار وكهس وكاران هـهمـیـان گـۆرى بكهى و ب دویڤ بكهڤى، وگهلهك سالان ئهو ژ ته دویر كهڤت و ل تـه بــهرزه بــبــت.. پـاشـى ژ خافلهتى ڤه تو ل بهر سنگێ خۆ ببینى، تو دێ چ كهى؟ تو بێژى مرۆڤ هنگى بشێت خۆ زهبت كهت وخۆ تێوهر نهكهت؟ ئهڤه نیشانا سیێ ژى وى ل بهر چاڤێن خۆ دیت، وئێدى هیچ گومانهك بۆ وى نهما كو ئهڤه ئهو مزگینى بوو یا ههڤالێ وى ئوسقوفێ عهمووریێ دایێ، ئهڤه ئهو هیڤیه یا ههر چار سهیدایێن وى یێن ئوسقوف خوزیێن دیتنا وى ڕادهێلان، ئهڤه ئهو ڕۆناهیه یا دنیا ههمى چاڤهڕێیى وى ماى.. ئهڤهیه ئهوێ مۆرا سهروهیێ ب ناڤ ملێن وى ڤه، بێى سهلمانى هاى ژ خۆ ههبت، یان بێى بشێته خۆ ڕۆندكێن كهیفێ ژ چاڤێن وى پهشین، ههوه دیتیه دهمێ زهلامهك ژ كهیفان دا دكهته گرى؟! و.. د گاڤێدا سهلمانى خۆ تێوهركر وناڤ ملێن وى ماچى كرن، ومرۆڤێن حازر ههمى مان ب حێبهتى ڤه تێ فوكرین بێى بزانن كانێ چیرۆكا ڤى زهلامێ بیانى چیه؟ پێغهمبهرى -سلاڤ لێ بن- ب هێمنى وڕویگهشیا خۆ یا ژێ هاتیه نیاسین ڤه لێ زڤڕى، و د ڕویێ وى دا گڕنژى، و ب ههستا خۆ یا نازك ڤه تێ ئینادهر كو ڤى مرۆڤى چیرۆكهكا خۆ یا تایبهتا ههى، ب گۆتنهكا نهرم ڤه گۆتێ:
- وهره ڤى لایى..
وهێشتا ڕۆندكێن كهیفێ دتژى چاڤێن وى بوون، و ب دهنگهكێ ژ كویراتیا دل وهناڤێن وى دئێت، وى گۆت:
- ئهز شاهدهیێ ددهم كو تو پێغهمبهرێ خودێ یى.. ئهز شاهدهیێ ددهم كو تو پێغهمبهرێ خودێ یى!
پاشى كا چاوا ئهو ب دلهكێ پڕ ههیبهت ڤه، ل كهنیسێ، ل بهر دهستێ سهیدایێن خۆ دڕوینشته خوارێ، وسهرێ خۆ دچهماند وگوهداریا وان دكر، وهسا ئهو ل بهر دهستێ پێغهمبهرێ خودێ ڕوینشت، پێغهمبهرى -سلاڤ لێ بن- گۆتێ:
- مهسهلا ته چیه؟
وسهلمانى سهرهاتیا خۆ وگهڕیانا ل ڕۆناهیێ ب كورتى بۆ پێغهمبهرى -سلاڤ لێ بن- ڤهگێڕا، ل وى دهمێ صهحابیان ب مهندههووشى ڤه گوهدارى لێ دكر..
