سهركهفتییێ مهيدانا جهڕباندنێ
سهعيدێ كوڕێ موسهييبى
چل سالان نڤێژهكا ب تنێ يا ب جماعهت ژ وى نهچووبوو، دبێژت: بيست سالان من پاتكا كهسێ د نڤێژێ دا نهديتییه، يهعنى ههر گاڤ ل ڕێزا ئێكێ بوو.. ئێك ژ حهفت فقهزانێن مهدينێ يێن مهزن بوو، ودگۆتنێ: سهرۆكێ زانايێن مهدينێ، سيهـ وتشتهك هزار زێڕ دانێ، دا گۆتنهكا ب تنێ بێژت كو مفايێ زۆردارهكى تێدا بت، ئهو ل بهر نههات، وههر گاڤ وى شيرهت ل ههڤالێن خۆ دكر ودگۆت: ((نه وه بت هوين چاڤێن خۆ ب ديتنا ههڤالێن زالمان ژى تژى بكهن ئهگهر نهڤيانا وان د دلێن ههوه دا نهبت، دا ئهو باشییێن ههوه كرين پويچ نهبن)).
ئهڤ چيايێ زانينێ (سهعيدێ كوڕێ موسهييبى)يه، ڤێ جارێ مه ڤيا ههوه ل ديوانا وى ئاماده بكهين دا بزانين كو خودێ هندهك مرۆڤ ههنه چهنگێ ڕاستییهكا ب تنێ نـادهنـه ب مالێ دنيايێ ههمییێ..
❖سهعيدێ كوڕێ موسهييبى كى بوو؟
بابێ موحهممهدى، سهعيدێ كوڕێ موسهييبێ كوڕێ حهزنێ قورهيشییه، بابێ وى وباپيرێ وى ژى ههردو ژ صهحابییان بوون، ل ڕۆژا (فهتحا مهكههێ) موسلمان بووبوون.
( ل سالا دووێ ژ خيلافهتا عومهرى -خودێ ژێ ڕازى بت- كو دبته سالا (15) مشهختى، هاتبوو سهر دنيايێ.
( ههر ژ زارۆكينییا خۆ داخوازا زانينێ كربوو، وحهديس ژ گهلهك صهحابییان وهرگرتبوو وهكى: عوثمانى وعهلى وسهعدێ كوڕێ ئهبوو وهققاصى وكوڕێ عهبباسى وئهبوو هورهيرهى وموعاويهى وعائشايێ.. وگهلهكێن دى.
( دبێژن: عهبدللاهێ كوڕێ عومهرى گهلهك كهيف پێ دهات ودگۆت: ئهگهر پێغهمبهرى -سلاڤ لێ بن- ئهڤه ديتبا دا كهيف پێ ئێت.
( هندى ئهو يێ ساخ سهرۆكاتییا زانايێن مهدينێ يا وى بوو، وگهلهك زانايێن تابعییان يێن مهزن وهكى: (عهطائى وموحهممهد ئهلباقرى وزوهرى) ل بهر دهستێ وى هاتبوونه پهروهردهكرن.
( ل دۆرێن سالا (73) مشهختى، دهمێ خيلافهت د ناڤبهرا (عهبدللاهێ كوڕێ زوبهيرى) -ل مهكههێ- و (عهبدلمهلكێ كوڕێ مهروانى) -ل شامێ- هاتییه لێكڤهكرن وفتنه د ناڤ موسلمانان دا پهيدابووى، سهعيدى خۆ نهدا د گهل كهس ژ ههردووان وبهيعه نهدا، لهو وى ژ دهستێ ههردو لايان نهخۆشى ديت.
( سهعيد مرۆڤهكێ زێده زاهد بوو، مالێ دنيايێ ئهو نهدخاپاند وچهند جاران مهزنێن دنيايێ ڤيايه وى ب تێڕك وديارییان بكڕن بهلێ ئهو نهدشيانێ، وحهتا وى ژ دنيايێ باركرى ژى وى ژ كهدا دهستێ خۆ دخوار وپاره ژ مهزنان وهرنهدگرتن.
( ژنكا وى كچا صهحابییێ پێغهمبهرى يێ ب ناڤ ودهنگ (ئهبوو هورهيرهى) بوو، لهو بارا پتر ژ حهديسێن وى ژ ريوايهتا وينه.
( ل سالا (93) مشهختى چووبوو بهر دلۆڤانییا خودێ.
❖كوڕێ موسهييبى ل دهمێ فتنێ:
مه گۆت: ل دۆرێن سالا (73) مشهختى دوبهرهكى كهفته ناڤ ڕێزێن ئوممهتێ پشتى بهيعه بۆ دو كهسان هاتییه دان: (عهبدللاهێ كوڕێ زوبهيرى) ل مهكههێ و (عهبدلمهلكێ كــوڕێ مـــهروانــى) ل شــامـێ، گـهلهك صهحابى وزانايـێـن تـابـعـییـان ژى بـهيـعـه نـهدا چـو ژ ههردووان وگۆتن: پێغهمبهرى -سلاڤ لێ بن- نههیا مه كرییه كو ئهم د ئێك دهمى دا بهيعێ بدهینه دو كهسان، ودهمێ فتنه ڕوى ددهت دڤێت مرۆڤ خۆ بدهته پاش، وسهرۆكێ زانايێن تابعییان سهعيدێ كوڕێ موسهييبى ئێك ژ خودانێن ڤێ بۆچوونێ بوو.
گاڤا عهبدللاهێ كوڕێ زوبهيرى -خودێ ژێ ڕازى بت- ل مهكههێ بوويه خهليفه وگهلهك صهحابى وتابعییان بهيعه دايێ، وى (جابر ئهلئهسوهد) كره والى وهنارته مهدينێ.. جابرى ڤيا داخوازێ ژ زانايێن مهدينێ بكهت كو ههمى بهيعێ بدهنه كوڕێ زوبهيرى، و ژ بۆ ڤێ ئهگهرێ وى هنارته ب دويڤ سهعيدێ كوڕێ موسهييبى ژى ڕا، وبهيعه بۆ كوڕێ زوبهيرى ژێ خواست، بهلێ سهعيد ل بهر نههات وداخوازا وى ب جهـ نهئينا، وگۆت: حهتا ئوممهت ههمى ل سهر مرۆڤهكى كۆم نهبت ئهز بهيعێ نادهمه كهسێ؛ چونكى چێ نابت بهيعه بۆ دو كهسان د ئێك دهمى دا بێتهدان.
جابرى ب ڤێ گۆتنا وى نهخۆش بوو، ودهست دا گهفان، بهلێ سهعيد ههر لێڤه نهبوو، ئينا والییێ مهدينێ گهفا خۆ ب جهـ ئينا وشێست جهلده دانانه ئيمامى، وهنگى ژییێ ئيمامى نێزيكى شێست سالان بوو، پشتى ئيمام هاتییه جهلدهدان گۆته والى: ههچییا ته دڤێت بكه ههما چهند رۆژهكن.. ووهسا چێبوو، دهمهكێ درێژ پێڤه نهچوو عهبدللاهێ كوڕێ زوبهيرى ب دهستێن حهججاجى هاته كوشتن، ووالییێ وى (جابر) ب دهستێن ههڤالێن عهبدلمهلكى گههشته دويماهییهكا ڕهش.
بهلێ بۆ ديرۆك دڤێت بێژين: دهمێ عهبدللاهى ب كارى جابرى زانى كاغهزهك بۆ هنارت وگهفێن مهزن ل والییێ خۆ كرن وگۆتێ: نه وه بت جارهكا دى خۆ نێزيكى سهعيدێ كوڕێ موسهييبى بكهى.
كوڕێ زوبهيرى ژ مهيدانێ دهركهفت، وعهبدلمهلك ب تنێ ما، خهلكى ههمییێ -يان پترییا خهلكى- بهيعه دايێ، ودا ئهو پتر شۆلا خۆ موكم بكهت ڕابوو بهيعه بۆ كوڕێ خۆ وهليدى ژى ژ خهلكى ستاند، كو پشتى وى ببته خهليفه، سهعيد ل بهر ڤێ چهندێ نههات وبهيعه نهدا وهليدى، عهبدلمهلكى ب ڤێ چهندێ نهخۆش بوو؛ چونكى وى دزانى بۆچوونا سهعيدى سهنگا خۆ يا گران د تهرازییا ئوممهتێ دا ههيه.
دهمهكى عهبدلمهلك -پشتى بوويه خهليفه- هاته مهدينى، گهلهك كهس چوونه نك وپيرۆزى لێ كر وههڤالينى د گهل گرێدا.. ل وى دهمى سهعيد ل كيڤه بوو؟
وهكى ههر جار بنگههێ سهعيدى يێ نڤێژكرن ودهرس گـۆتنێ مـزگـهفـتـا پێغهمبهرى بوو -سلاڤ لێ بن-، نيڤرۆيیهكێ خهليفه ژ خهو ڕابوو گۆته زێرهڤانهكێ خۆ: ههڕه مزگهفتێ بهرێ خۆ بدێ كانێ كى ل وێرییه بێژێ بلا بێته ديوانا من دا بۆ خۆ سوحبهتێ بكهين.. حهرهسێ خــهلـيـفــهى داخوازا وى ب جهـ ئينا وچوو مزگهفتێ، دهمێ ب ژۆركـهفـتى ديت پيرهمێرهك ب تنێ یێ ڕوينشتییه عيبادهتى بـۆ خـۆ دكـهت، چــوو هنداڤ سهرێ وى و ب ئيشارهتان گۆتێ: ڕابه د گهل من وهره.. پيرهمێرى خـۆ تێ نهگههاند، ئينا ئهو ب كهرب ڤه چوو نك وگۆتێ: ما تو من نابينى ئهزێ ئيشارهتێ ددهمه ته؟ گۆتێ: ته خێره؟ حهرهسێ خهليفهى گۆت: ڕابه د گهل من وهره (أمير المؤمنین)ى دڤێت ئێك بێته نك سوحبهتێ بۆ بكهت.. پيـرهمێرى گۆتێ: ههڕه.. ئهز نه ژ وانم يێن سوحبهتێ بۆ (أمير المؤمنین)ى دكهن!
زهلام حێبهتى بوو.. ئهڤه كییه؟ زڤڕى نك خهليفهى وگۆتێ: حال ومهسهلێن من وپيـرهمێرهكى ل مزگهفتێ ئهڤهبوون، عهبدلمهلكى گۆتێ: ئهو سهعيدێ كوڕێ موسهييبییه، بهلا خۆ ژێ ڤهكه.
عهبدلمهلكى باش دزانى ئهگهر ئێك ل مهدينێ ههبت نهڤێت د گهل وى باخڤت دێ سهعيد بت وكهسێ دى نه، لهو ب ههمى ڕێكان هاتێ كو خۆ ل بهر وى شرين بكهت وچو فايده نهدا، ڤيا وى بكهته ههڤالێ خۆ.. نهشيا، ڕابوو ب ڕێكا مالى هاتێ، سيهـ وتشتهك هزار زێڕ بۆ وى هنارتن، بهلێ وى زێڕهكێ ب تنێ ژى وهرنهگرت وگۆته قاصدى: من چو پێتڤى ب وان وبنهمالا مهروانى نينه، حهتا ئهز وئهو بهرانبهرى خودێ ڕادوهستين، وئهو حوكمى د ناڤبهرا من ووان دا دكهت.
ئهڤێ ژى فايده نهدا..
❖جهڕباندنهكا ژ ڕهنگهكێ تايبهت:
ئـيـنـا خـهليـفـهى ڕێكهكا دى ب كــارئـيـنا: سهعيدى كچهكا نهشويكرى ههبوو، گهلهك د قورئانێ وحهديسێ دا يا زانا بوو، وئهڤه نه عهجێبه، ما ئهو نه كچا سهعيدییه ونهڤییا ئهبوو هورهيرهيه؟
عهبدلمهلك ڕابوو هندهك هنارتنه نك سهعيدى دا كچا وى بۆ (ولي العهد)ى بخوازن، بۆ وهليدێ كوڕێ عهبدلمهلكى ئهوێ پشتى بابێ خۆ دێ بته خهليفه، وى هزركر ئهگهر كچا سهعيدى هاته د مالا وى دا وكوڕێ وى بوو زاڤايێ سهعيدى، سهعيد دێ كهفته داڤان!
بهلێ ڤێ جارێ ژى يا وى ڤياى چێ نهبوو، ئيمامى خوازگينى دهست ڤالا زڤڕاندن، ودهرسهك نه ب تنێ دا خهليفهى، بهلكى دهرسهكا مهزن دا ههر دهيك وبابهكێ كچهكا شوییان ههبت، كو ئهو ئێمانهتێ د ستويێ وان دا (مهسئوليهتهكا) د مهزنییا چيايان دايه، دهمێ ژ ته دئێته خواستـن كو تو گۆتنهكێ د دهر حهقا دانهشوییا كچهكا خۆ دا بدهى دڤێت باش هزرا خۆ د پاشهڕۆژا وێ دا بكهى، ومهخسهدا من ب پاشهڕۆژێ نه ئهو بيست سيهـ سالن يێن كو ئهو د ڤێ دنيايێ دا دبهته سهرى.. نه، ڕۆژهك دێ ئێت تو ب تنێ، ڕويس ورسوا ژ ههر مال ومهنصبهكێ ههبت، دێ ئێيه ئينان، بهرانبهر خودێ تو دێ ڕاوهستى.. هزر بكه ئهگهر وێ ڕۆژێ كچا ته ئهوا ته د دنيايێ دا فرۆتییه جههنهمێ دا هندهك قڕێژا دهستان ل خۆ زێده كهى، ئهگهر ئهو هات و ل نك خودێ دهعوه ل ته كر وگۆت: ئهى خودا ئهڤه بوو بهرێ من دايه ڤێ ڕێكێ.. ئهڤرۆ تو حهقێ من ژێ چێكه.
ئهڤهيه پاشهڕۆژا دورست، هنگى دێ چ كهى؟ وێ ڕۆژێ قائيشا كچا ته يا زێڕى د گهل نابت خۆ پێ ژ ئاگرى بكڕى، مال مهزنى وقهسر ومهنصبێ زاڤايێ ته ژى، هنگى نامينت فايدهكى بگههينته ته، ب تنێ هوين وكول وكهسهر دێ پێكڤه مينن..
خهليفهى، ئهوێ حوكم ل نێزيكى پازده دهولهتێن مه يێن نوكه دكر، كچا سهعيدێ كوڕێ موسهييبى بۆ كوڕێ خۆ خواست، ئهوێ دێ پشتى بابێ خۆ بته خهليفه، ئيمام ل بهر نههات؛ چونكى وى نهدڤيا كچا خۆ بكهته د قهسرا زالمهكى ڤه دا سوباهى -ل پاشهڕۆژێ- حهشرا وێ د گهل زالمان نهئێتهكرن!
ب ڤێ چهندێ سهرهاتى ب دويماهى نائێت.. ئيمامى طهلهبهك ههبوو دگۆتنێ: (ئهبوو وهداعه)، مرۆڤهكێ خودێناس بوو، ههر جار ل مزگهفتێ ئاماده دبوو، چهند ڕۆژهكا ديار نهبوو، پشتى هاتییه دهرسێ ئيمامى گۆتێ: ته خێر بوو؟
وى گـۆت: ژنكا من ئهمرێ خودێ كربوو، ڤێجا ئهز ژ بهر هندێ يێ موژيل بووم.
ئيمامى گـۆتێ: بۆچى ته نهدگۆته مه، دا ئهم ژى د گهل ته ئێينه سهر زيارهتان؟
وپشتى دهرس ب دويماهى هاتى، ئيمامى گۆتێ: ته چو ژنكێن دى بۆ خۆ نهخواستينه؟
ئهبوو وهداعهى گۆت: ما كى دێ ژنكهكێ دهته من ومالا من ههمییێ ژ دوسێ دهرههمان پێڤهتر تشتهك تێدا نينه؟
ئيمامى گۆتێ: ئهز!
پاشى وى كچا خۆ، ئهوا نهدايه كوڕێ خهليفهى، دا خودانێ دوسێ دهرههمان.
❖كچا ئيمامى ل مالا ئهبوو وهداعهى:
ئيمامى هۆسا ب ساناهى كچا خۆ دا ئهبوو وهداعـهى، وهــويـن دزانــن داوهتـا وان يا ب چ ڕهنگ بوو؟ ئهبوو وهداعه دبێژت: مهغرهبییا وێ ڕۆژا ئيمامى گۆتییه من: ئهز دێ كچا خۆ دهمه ته، ئهز د مهزهلكا خۆ ڤه يێ ڕوينشتى بووم، من كارێ فتارا خۆ دكر.
فتارا وى چ بوو؟
دبێژت: پرتهكا نانێ ڕهق بوو، د گهل سێنيكهكا هندهك زهيت تێدا.. گۆت: من هند ديت ئێكى دهرگههێ مالا من قوتا، من گۆتێ: تو كییى؟ وى گۆت: ئهز سهعيدم.
سهعيد! ئهڤه كيژ سهعيده ڤێ مهغرهبێ دێ ئێته نك من؟ گۆت: من هزرا ههمى سهعيدان كر ب تنێ ئيمام تێ نهبت؛ چونكى ئهو چل سال بوو ئيمام ل جههكى نههاتبوو ديتن ژبلى مالا وى ومزگهفتێ، گاڤا من دهرگههـ ڤهكرى ومن ئهو ديتى، من د دلێ خۆ دا هزر كر وگۆت: دياره ئيمام يێ لێڤهبووى لهو يێ هاتى داخوازا لێبۆرينێ دكهت، من گۆتێ: سهيدا! بلا ته هنارتبا ب دويڤ من ڕا ئهز دا ئێمه نك ته، وى گۆت: تو حهقترى ئهم بێينه نك ته.
گۆت: پاشى ئيمامى خۆ دا ڕهخهكى من ديت تشتهكێ ڕهش ل پشت وى دياركر من زانى ژنكهكه، گۆت: ئهڤه ژنكا ته.. گۆت: ژنك ب ژۆركهت وئيمام زڤڕى، من شهرم كر ئهو شيڤا من ببينت، ئينا من شيڤا خۆ ژ چرايى دويركر دا ئهو نهبينت.
ب ڤى ڕهنگى كچا سهعيدێ كوڕێ موسهييبى هاته ڤهگوهاستـن، وئهگهر وێ وبابێ وێ ڤــيــابــا ل ڕۆژا ڤــهگــوهـاستنا وێ ژ ديمهشقێ وحهتا مهدينێ دا ئێته خهملاندن، و ل پــتــر ژ باژێڕهكى شاهى دا ئێته گێڕان، بهلێ.. نه! سهعيدى كچا خۆ وهسا ب خودان كربوو وێ ئهو باوهرى هــهبــت كـــو پــرتــهكــا نــانــێ ڕهق وهــنــدهك زهيـت د گهل دوسێ دهرههمهكان چێتره ژ مهلكاتییهكا ل سهر زۆردارییێ وكوتهكییێ هاتییه دانان..
❖تۆلڤهكرنا خهليفهى:
گاڤا خهليفهى زانى سهعيدى ئهڤ كاره يێ كرى، ڤيا تۆلا خۆ ل ئيمامى ڤهكهت.. هوين دزانن چاوا؟
وى كاغهزهك بۆ والییێ خۆ ل مهدينێ هنارت وتێدا گۆتێ: سهعيدى بگره، وبێژێ بلا بهيعێ بدهته كوڕێ من وهليدى، وئهگهر ئهو ڕازى نهبوو گهفێن كوشتنێ لێ بكه، ئهگهر ههر لێڤه نهبوو پێنجى جهلدان لێ بده و ل سويكا باژێڕى بگێڕه.. والى مهسهله بۆ هندهك هــهڤـالێن خۆ ئاشكهرا كر، ئهو هاتنه نك سهعيدى ل مـزگـهفتێ وگـۆتـنـێ: والى سێ ڕێك ل بهر ته داناينه دڤێت تو بۆ خۆ ئێكێ هلبژێرى ئهگهر نه خهليفهى بڕيارا داى ئهو ته بكوژت، يا ئێكێ: دهمێ والى كاغهزا خهليفهى بۆ ته دخوينت تو خۆ بێ دهنگ بكه، نهبێژه: ئه، ونهبێژه: نه، والى يێ قانعه.. ئيمامى گۆت: ئهز ڤێ ناكهم خهلك دێ بێژن: سهعيدى بهيعه دا.
وان گۆت: پا چهند ڕۆژهكان بمينه ل مالا خۆ ونهئێ مزگهفتێ دا والى بێژته خهليفهى: من ئهو نهديتییه.. ئيمامى گۆت: ئهز ڤێ ژى ناكهم، چاوا دهنگێ: (حي على الصلاة، حي على الفلاح) بێته من وئهز نهئێمه مزگهفتێ؟ ئهڤه چێ نابت. وان گۆت: پا دێ ژ جهێ خۆ هــهڕه جــهـــهكــێ دى گــاڤــا هــاتـنـه ته دێ بێژن: مه ئهو نهديت، وى گۆت: ههوه دڤێت ئهز ژ مرۆڤهكى بترسم؟ بهۆستهكا ب تنێ ئهز ژ جهێ خۆ ناچم..
ئينا ئهو زڤڕينه نك والى وبهرسڤا ئيمامى بۆ بر، والى بڕيار دا ئيمامى ببهنه نك وى، ب ڕێڤه وان گۆتێ: ئهگهر مه تو برییه نك والى د ڤى دهرگههى ڕا ههڕه و د يێ دى ڕا وهره وخۆ بێ دهنگ بكه، والى چو ددى ژ ته نهڤێت، ئيمامى گۆت: نه.. خهلك دێ بێژن: سهعيدى بهيعه دا، ئهز وه ناكهم.
والى گۆتێ: پا (أمير المؤمنین)ى ئهمرێ من يێ كرى ئهز سهرێ ته ببـڕم ئهگهر تو بهيعێ نهدهيه كوڕێ وى..
ئيمامى گۆتێ: پا پێغهمبهرى -سلاڤ لێ بن- ئهمرێ مه يێ كرى ئهم دو بهيعان پێكڤه نهدهين، پاشى وى ستويێ خۆ بۆ شيـرى درێژكر!
والى بهرێ خۆ دايێ.. زانى كوشتـن ڤى مرۆڤى لێڤه ناكهت، ئينا وى بڕيار دا جلكێن ئيمامى ژ بهر بكهن وكراسهكێ كورت بهێلنه د بهر، وببهنه بهر حهتاڤێ و ل وێرێ وى ڕاوهستينن و ل بهر چاڤێن خهلكى پێنجى جهلدان لێ بدهن. وهنگى ژییێ وى نێزيكى شێست سالان بوو.
زانايێ ناڤدار (قهتاده) دبێژت: گاڤا وان سهعيد ل بهر حهتاڤێ ڕاوهستاندى من گۆته وى يێ دهستێ من دگرت -وبۆ زانين قهتاده يێ كۆره بوو-: من نێزيكى وى بكه، گۆت: وى ئهز نێزيكى ئيمامى كرم، ومن پسيارێن حهديسێ وشريعهتى ژێ كرن ووى بهرسڤا من ددا، وخهلكى ئهم دديتين و ژ مه حێبهتى دبوون، ترسا من ئهو بوو ئهو تشتهكى ل سهعيدى بكهن وئهز ژ علمێ وى بێ بار ببم.
وگاڤا ئهو هاتين دا ئيمامى جهلده بدهن، ژنكهكێ گۆت: وهى بۆ ڤێ شهرمزارییێ! ئيمامى گۆت: ژ شهرمزارییێ ئهم يێن ڕهڤين.. وپشتى سهعيد ب ڤى كراسى ل كۆلانێن مهدينێ گێڕاى، ڕێ دايێ ئهو بچته مالا خۆ، بهلێ پشتى وان بڕيار داى و د ناڤ خهلكى دا بهلاڤ كرى، كو چێ نابت ژ ئهڤرۆ وێڤه كهس ل ديوانا سهعيدى ڕوينت، يان ل دهرسێن وى ئاماده ببت.
پشتى هنگى دهمێ سهعيد ل مزگهفتێ دڕوينشت كهس نهدوێريا خۆ نێزيكى وى بكهت، وئهگهر مرۆڤهكێ بيانى جارهكێ هاتبا مهدينێ وچووبا نك وى ئهو دا بێژتێ: ئهرێ ته زانییه ئهو ناهێلن كهس ل نك من ڕوينت؟ ومهخسهدا وى ئهو بوو كهس سهرا وى نهئێته ئێشاندن.
(عهبدللاهێ هوذهلى) دبێژت: گاڤا وان سهعيد گرتى ئهز چوومه نك ل گرتيخانهيێ، من ديت وان پيستێ پهزهكا سهرژێكرى دانابوو سهر پشتا ئيمامى، وههر جارهكا وى بهرێ خۆ ددا زهندكێن خۆ دا بێژت: يا ڕهببى تو من ب سهر هشامى بێخه، وهشام والییێ عهبدلمهلكى بوو ل مهدينێ.
عهبدلمهلك چوو.. هشام ژى چوو.. وبهرى وان جابر ژى چووبوو.. وپشتى وان سهعيد ژى چوو، وژڤان ل نك خودێیه! (وَعَنَتِ الْوُجُوهُ لِلْحَيِّ الْقَيُّومِ ۖ وَقَدْ خَابَ مَنْ حَمَلَ ظُلْمًا)(111).
