ب خێر بێت .. رەمەزان
ب خێر بێت رەمەزان ، هەیڤا تۆبەكرنا گونەهكاران ، ئەو هەیڤا گونەه تێدا دئێنە ژێـبـرن ، وبـۆ تـۆبەداران بەحەشت دئێنە خەملاندن ، هەیڤا زێدەبوونا باوەری وچاكییێ ، وبەلاڤبوونا خێر وقەنجییێ ، یا بۆ قەنجیكاری تێدا دئێنە گۆتن : وەرە پێش ، وبۆ خرابكاری دئێتە گۆتن : هەڕە پاش ، دل تێدا ژ داڤێن شەهوەتێ دئێنە ئازادكرن ، چونكی شەیتان تێدا دئێنە زنـجـیـركرن :
بـۆ وە مزگـینی گـەلـی یار وبران
بۆ مە جارەك دی ڤەگەڕیا رەمەزان
یا كـو تـێـدا هاتـی قـورئانا بلنـد
بـۆ شەڤا ڤێ عالەمێ بوویە ئەلنـد
عاشـقـێ ڕۆناهـییێ كەیفە وسەما
تارییا بـێ فامـییـێ ئـێـدی نـەما
ب خێر بێت هەیڤا قورئانێ ، ئەو قورئانا هاتی دا بۆ دلان ببتە دەرمان ، وبۆ مـرۆڤـیـنـییا حێبەتی وڕێ بەرزە ببتە دەلیل وڕێنیشان ، ئەو كیتابا تەقواداران ب شـەڤـێ صەبرا خۆ ب خواندنا وێ دئینا ، و ب ڕۆژی ئەو بۆ خۆ دكرە ڕێبەر و د هەمی سەروبەرێ ژینا خۆ دا ب كاردئینا ، لەو د ناڤ مێرگێن بەحەشتا دنیایێ دا بـەرێ وان دا گەشتێ بەری كو ل ئاخرەتێ سەركێشییا وان بكەت بۆ بەحەشتێ .. ئەڤ قورئانا هندی مە كار پێ دكری د ناڤ خـەلكـی دا ئەم بووین پـێـشـەوا ، وڕۆژا مـە ئـەو ب كۆرە ڕێكان گوهاڕتی ل دویماهییا كاروانی ئەم هاتینە هێلان لەوا !
گازییـە ئـیـرۆكـە قـورئانا مـەزن
كا چ لـێ هاتـن ئەڤیندارێ د مـن
بـۆ د دەستی دا نەمایە صەولەجان
تاج وتـەخت وناڤ وئالایێ د وان
ب خـێـر بێت هەیڤا ڕۆژیگرتنێ ، وەرزێ لێبۆرین وگونەه ژێبرن ولێنەگرتنێ ، ئەو هەیڤا دەسپێكا وێ دلۆڤانی ورەحمەت ، ونیڤا وێ گونەه ژێبرن ومەغفرەت ، ودویماهییا وێ بوو ڕۆژیگری ئازاكرنە ژ ئاگری .. ب خێر بێت ئەو هەیڤا خێرخواز وقەنجیكار تێدا دكەڤتە كاری ، وتەقوادار دبتە هەڤالـێ شەڤێن وێ یێن تاری ، تـۆبـەدار تێدا ڕۆندكێن گەرم ل سەر بۆرییێ خۆ دباریـنـن ، وخودان باوەرێن ڕاست بازارا ل سەرێك زێدەكرنا خێران دشارینن ، ل سەرێن سحاران .. ل سپێدە وئێڤاران .. هەوارێن خۆ دگەهیننە وی خودایێ یێ ب ڕۆژی زك د ڕێكا وی دا دئێنە برسیكرن ، و ب شەڤێ ژ ترسێن وی دا چاڤ ژ ڕۆندكان دئێنە تژیكرن .
دل ژ شـەوقا هاتـنـێ وچاڤــی ژ بـەر
خـۆشـییا ڤـێ دیـتـنـێ لادا كـەسەر
دەڤ ب مەدحا تەی موژیلە بەردەوام
بـرس وتـێـنـێ لەو نزانـیـتـن مـودام
ب خـێـر بێت ئەو هەیڤا شەڤەك تێدا هەی د قەدر وقیمەتێ خۆ دا ب خێرتر ژ هزار هەیڤا ، یا كو ملیاكەتێن عەسمانی هەمی تێدا دكەڤنە شاهی وكەیفا ، جبریل ب ئانەهییا خودایێ خۆ دئێتە خوار ، وئاشتی وتەناهی لـێ دبتە كار ، دەرگەهێن عەسمانی ل بەر دوعایێن دوعاكەران ڤەدبن ، وهیڤییێن هیڤیخوازان تێدا گەش دبن ..
ئەی خودایێ ( لەیلەتـولقەدرا ) مەزن
یـێ هـەوار وهیڤی بـۆ نك وی دچـن
هـیـڤـیـكارم ئـەز ژ رەحما تە خـودێ
ئـومـمـەتا ئـێـتـیـمـە ئیرۆ تان بـدێ
بـێ ڕوییە وێ ناڤ نەمایە ل چو درا
داجـڕیـنـە لـێ ژ تـەڤ لایان خـورا
كـۆم بـكـە وانا ل دۆرا سـونـنـەتـێ
دا بـزڤـڕیـتـەڤـە ڕۆژا عـــززەتـــێ
ل رەمەزانێ ئالایێن مە ل مەیدانا جیهادێ بلند دبوون ، وپـێـشـییـێـن مە بـەردەوام ل سەر ڕێكا سەركەفتنێ دچوون .. هێشتا ل بـیـرا رەمەزانێیە دەمێ ل مەیدانا بەدرێ ئالایێ شركێ ب عەردی كەفتی ، وكۆما كـوفـرێ پاشدا شكەستی ، وڕۆژا مالا خودێ ل مەكەهێ ب دەستێن پێغەمبەری ـ سلاڤ لـێ بن ـ ژ صەنەم پەرێسییێ هاتییە پاقژكرن ، وجارەكا دی ئالایێ تەوحیدێ لـێ هاتـییـە بـلـنـدكـرن ، ورەمەزان چ ژ بـیـر بكەت وێ ژ بـیـر ناكەت ڕۆژا ل ( حطین ) ێ صەلاحەددینی كۆما زۆردارییێ ژ ناڤ بری ، وئالایێ خاچپەرێسییێ ل ئاخێ دای وستوینا وێ خواركری ..
ب خێر بێت هەیڤا جیهادێ وڤەكرنێ .. هەیڤا صەبرێ وسەركەفتنێ .
