ئهو كاسێتا ژین ل من كریه ژههر
ئهز كچهك بووم ل بهارا ژیێ خۆ دژیام.. د خواندنا خۆ دا ئهز یا سهركهفتى بووم، و د ناڤ ههڤـالێـن خۆ ههمیان دا ئهز ب تۆره ورهوشتێ پاك وزیرهكیێ دهاتمه ناسین، ههمى ههڤالێن من حهز ژ من دكر، و ژ بهر سهركهفتنێن من یێن بهردهوام ههمیان حهز دكر خۆ نێزیكى من بكهن..
ژینا من ب ڕهنگهكێ خۆش وتهنا ب ڕێڤه دچوو، خێزانا مه یا بچویك ئهوا ژ دهیك وبابهكێن دلۆڤان وسێ خویشكان پێك دهات یا دویر بوو ژ وان ههمى خهم وكۆڤانان یێن مه گوه لـێ دبوو د ناڤ جڤاكێ دا ههین.. بابێ من سپێدێ حهتا ئێڤارى ب كهدا خۆ ڤه یێ موژیل بوو، وههمى خهما وى ئهو بوو مالا خۆ ب ڕهنگهكێ پاقژ وبژوین ب خودان بكهت، ودهیكا من ل ههمى ئێڤاران ب گڕنژینا خۆ یا بهردهوام پێشوازى لـێ دكر ورحهتى ب سهر مالـێ دا بهرددا، ووان ههردووان پشتهڤانیا من وههردو خویشكێن من دكر دا ئهم خواندنا خۆ ببهینه سهرى ووجهكێ ژ خۆ ووان بگرین، و ب ڤى ڕهنگى ژینا مه دبۆرى وههڤالینیا مه د گهل خۆشیێ بهردهوام ب ڕێڤه دچوو حهتا ئهو ڕۆژا ڕهش ب سهر من دا هاتى یا سهر وبهرێ مالا مه ههمى تێدا دهرنشیف بووى، وژینا شرین ل بهر مه بوویه ژههرهمار !
ل وێ ڕۆژێ پشتى نیڤرۆ.. دهمێ ئهز ژ زانكۆیێ دهردكهفتم پشتى دهرسێن مه ب دویماهى هاتین، ئهو ل بهر دهرێ كولیژێ ب بهرچاڤێن من كهفت، سهر وبهرێ وى یێ لێكداى وڕێك وپێك بوو، بهرێ وى ڕك وڕك ما ل من تو دا بێژى ئهو من دنیاست، من بهرێ خۆ ژێ وهرگێڕا وچو پویته پێ نهكر، ئهو ب دویڤ من كهفت وهێدى هندهك پـهیـڤ گۆتن دا بهرێ من ب نك خۆ ڤه بكێشت، وهكى: تو چهندا جوانى ! پیێن من تێك هلنگفتن، وئهنیا من خوه دا، ئهڤه ئێكهمین جاره ئهز دكهڤمه دهلیڤهیهكا ب ڤى ڕهنگى.. من پیێن خۆ سڤك كرن، حهتا زوى من خۆ ب مال ڕا گههاندى.. ووێ شهڤێ ههمیێ خهو نههاته چاڤێن من، ژ ترس ودودلى وحێبهتیان دا.
پشتى چهند ڕۆژهكان جارهكا دى من ئهو دیت دیسا ل بهر دهرێ زانكۆیێ ل هیڤیا من بوو، گاڤا ئـهز دیتیم گڕنژى ودوباره د دویڤ من دا هات.. ووهكى جارا بۆرى هندهك ئاخفتن د من وهركرن ! وگاڤا ئهز نـێـزیكى بهر دهرێ مال بوویم وبهرى ئهز ب ژۆركهڤم كاغهزهكا پێچاى هاڤێته بهر پیێن من، ل سهرى من نهڤیا ئـهز وێ كاغهزێ هلگرم، پاشى من هند دیت دهستێ من ب ڤهلهرزین ڤه ب نك كاغهزێ ڤه چوو، ومن ب لهز كاغهز هلگرت وئهز چوومه ژۆر بهرى كهس من ببینت، وپشتى ئهز چـوویـمـه د ژۆرا خۆ ڤه من كاغهز ڤهكر وخواند.. یا تژى بوو ژ پهیڤێن عشق وئهڤینداریێ، ومن نهزانى كانێ من پتـر پێ خۆش بوو یان پێ نهخۆش بوو ! پاشى من هند دیت من ئهو كاغهز دڕاند وهاڤێته د سهلكا گلێشى دا.
وههر وێ ڕۆژێ ب شهڤ زهنگلا تهلهفوونا مه لێدا، گاڤا من بهرسڤ داى.. ههر ئهو جحێل بوو ب گۆتنێن خۆ یێن شرین ئهز ئاخافتم، وگۆته من: ته كاغهزا من خواند.
من گۆتێ: ئهگهر تو خۆ ب ئهدهب نهئێخى ئهز دێ بێژمه بابێ خۆ.. ومن تهلهفوون گرت.
جارهكا دى تهلهفوونێ لێدا.. وبهرى ئهز باخڤم وى گۆت: قـهصـدا مـن یا شهریفه ! ژ بهر ئهخلاقێ ته من گهلهك كهیف ب ته دئێت، ومن ل بهره ئهز ته بۆ خۆ بخوازم، وچونكى ئهز كوڕێ مرۆڤهكێ زهنگینم وئێكانهیێ ویـمـه ههچیا مه دڤێت ئهو دێ بۆ مه كهت.
ڤان گۆتنێن وى هزرا من چهندهكێ تێكدا..
ودلـێ من د دهر حــهقـا وى دا گـوهـاڕت، وپشتى هنگى ئهز ب شهوق دمامه ل هیڤیا تهلهفوونا وى یان دیتنا وى ل بهر دهرێ زانكۆیێ.. وحهتا ئهو ڕۆژ هاتى یا ئهز تێدا د گهل وى دهركهفتیم ب تورمبێلا وى، من ههست دكر دهمێ ئهز دگهل وى دهردكهڤم ههر وهكى ئهز نه یا ب خۆمه، ومن هند هێز نینه ئهز هزرا خۆ د ڤى كارێ خۆ دا بكهم كانێ ئهز یا دورستم یان نه، دا بێژى وى دلـێ من یێ ژ من ستاندى وعهقلێ من یێ دهستهسهر كرى، من باوهریهكا مهزن ددایێ، ههر گۆتنهكا وى دگۆته من كو ئهو دێ من كهته (مهلكه) د مالا خۆ دا، وناهێلت تشتهك یێ ژ من كێم بت، یا ژ من ڤه ڕاستیهكا بێ گومانه، گاڤا وى دگۆته من: تویى ئهمیرا من ! نێزیك بوو ئهز ژ كهیفان دا بفڕم، ویا ژ من ڤه ئهزا خهونهكا شـریـن دبینم، لهو ترسا من ئهو بوو ڕۆژهك بێت وئهز ژ ڤێ خهونێ هشیار ببم.
ڕۆژهكێ وهكى گهلهك ڕۆژان دهمێ ئهز ژ زانكۆیێ خلاس بوویم، ئهز دهركهفتمه بهر دهرى ئهو ل سهرێ ڕێكێ ل هیڤیا من بوو، پشتى ئهز د گهل وى سویار بوویم وى قهستا ڕێكهكا نوى كر، پاشى ئهز ب نك (شوققهكێ) ڤه برم، وگۆته من: كهرهم كه !
گاڤا ئـهم ب ژۆر كهفـتـیـن ومن دیتى ژ من ووى پێڤهتر كهسێ دى ل وێ شوققێ نینه، دلـێ من ب ترس كهفت، بهلـێ وى ئهز پشت ڕاست كرم وگۆت: نهترسه.. تو ژنا منى !
ـ ژن !! چاوا وته هێشتا ئهز ماره نهكریمه؟!
ـ نێزیك دێ ته مارهكهم..
و.. ئهو چێبوو یا دڤیا قهت وقهت چێ نهبت ! وهى خودێ ئهڤ چ بوو من كرى، ئهز دین بوویمه؟ یان ژى عهقل د سهرێ من دا نهبوویه؟!
چهند ڕۆژان ئهز وهكى مرۆڤهكا سهودا سهر مام، ژ قههر وترسان دا ئهز نهچوومه زانكۆیێ، ب تنێ هیڤیهك ما د دهستێن من دا كو ئهو سۆزا خۆ ب جـه بینت و ل نێزیك من ماره بكهت هێشتا مهسهله د دهستێن من دا روهن نهبووى وههتكبهریا من ئاشكهرا نهبووى..
بهلـێ ژ نشكهكێ ڤه ئهو تشت چێبوو یێ ژینا من ومالا من ژى ب سهرێك دا ئیناى، وخۆشیا مه ههمى كریه نهخۆشى.. تهلهفوونێ لێدا، ئـهو بـوو، دهنـگـێ وى ژ دویر ڤه دهات، گۆت: دڤێت ئهز ته ببینم تشتهكێ گرنگێ ههى دێ بێژمه ته. كهیفا من گهلهك هات، من هزركر ئهو تشتێ گرنگ دێ سوحبهتا خواستن وڤهگوهاستنێ بت وهكى وى سۆز داى، گاڤا ئهز چوویمه نك، ناڤچاڤێن وى دگرێ بوون، و ب توندى ڤه گۆته من: قهت ل وێ هزرێ نهبه ئهز ته بۆ خۆ بینم، من دڤێت ئهز پێكڤه بژین دۆست بێ قهید.. بێى من ئاگهه ژ خۆ ههبت من دهستێ خۆ ڕاكره ڤه وشهقهك ل بن گوهى دا، ومن گۆتێ: یا ژ من ڤه تو دێ خهلهتیا خۆ ڕاست كهیهڤه، بهلـێ وهسا دیاره تو زهلامهكێ بێ ئهخلاق وبێ وژدانى، و ب گرى ڤه ئهز ژ تورمبێلا وى دهركهفتم، بهلـێ وى گازى كره من: كانێ پیچهكێ ڕاوهستێ.. ئهز لـێ زڤڕیم، وى كاسێتهكا ڤیدیوویێ ڕاكره ڤه وهژاند و ب ڕكدارى ڤه گۆت: تو دبینى، ب ڤێ كاسێتێ ئهز دێ پهلخینم !
وهێشتا هشێن من نههاتینه سهرێ من گۆت: ڤێ كاسێتێ ههمى تشت یێن تێدا ههین، كا مه چ كریه چ نهكریه !!
وهندى من هیڤى ژێ كرن ئهو كاسێتێ بدهته من یان ژێ ببهت، وهندى من ڕۆندكێن گهرم باراندن، وى ب دلهكێ ڕهق ڤه گۆت: موستهحیله.. دڤێت تو وێ بكهى یا من دڤێت، ئهگهر نه.. كاسێت ل باژێڕى ههمیێ دێ بهلاڤ بت !!
ئهز حێبهتى مام، چ بكهم د گهل ڤى زهلامێ هۆڤ، داخوازا وى ب جـه بینم، وهـهمـى تشتان ل سـهر خۆ قهبویل بكهم، دا (سومعهتا) دهیبابێن خۆ ل ههڕیێ نـهدهم؟ یان ژى شهقهكا دى ل بن گوهان بدهم وخێزانا خۆ بێخمه بهرانبهر گرفتاریهكا مهزن یا ئهو خۆ ل بهر نهگرن؟
چهند ڕۆژهكان ئهز د گهل خۆ كهفتمه ههڤڕكیهكا دژوار، ودهم بۆ دهمى وى پهیوهندى ب من ڤه دكر كانێ ئهز گههشتمه چ بڕیارێ.. ودویماهیێ ئهز نهچاربووم من خۆ ب دهست وى ڤه بهردا، یا ژ من ڤه ئهز ب ڤێ چهندێ دێ شێم موصیبهتێ ژ سهر سهرێ بابێ خۆ یێ ئهختیار دویركهم !
وههڤالـێ منێ بێ دل وبێ وژدان ژ زهلامهكى ئهز دامه ف ئێكێ دى وپاره بهرانبهر نامـویـسـا من وهرگرتن، حهتا وى ئهز ب بێ ئهخلاقێن باژێڕى ههمیان دایمه نیاسین.. ئهڤه ههمى چێ دبوو بێى خێزانا من تشتهكى ژ من بزانت، بهلـێ چو تشت ڤهشارتى نامینت، وئهو ڕۆژ هات یا من هزار جاران مرن تێدا خواستى ومرن ب دهست من نهكهفتى..
پسمامهكێ من ڕۆژهكێ ل جههكى كاسێت دیت، ومهسهلـێ دهست پێ كر.. زهلامێن مالا مه تێك هاتن وتێك چوون، وبهرى ئهو بڕیارا خۆ بدهن، من خۆ ڤهشارت دا رحا خۆ بپارێزم، كیڤه بچم؟ ئهز نهچاربووم قهستا وى (قهصابى) بكهم بكهم یێ جارا ئێكێ ئهز ڤهكوشتیم، ومن بنهمالا خۆ ههمى هێلا د شهرمزاریا وان دا وئهز ڕهڤیم، وپشتى هنگى من زانى كو بابێ منێ ههژار دهیكا من وخویشكێن من یێن برین وباژێڕ یێ هێلاى وقهستا جههكێ دى یێ كرى كو كهس وى لـێ نهنیاست.. و ب ڤى ڕهنگى كاسێتا من بوو ئهو دیاریا خۆش یا ژ دهستێ بێ ئهخلاقهكى بۆ دهستێ بێ ئهخلاقهكێ دى دئێته ڤهگوهاستن، وپشتى من مالا خۆ ژى هێلاى ئێكجار ئهو وهكى گوستیركهكێ لـێ هاتم د دهستێ دۆستێ خۆ یێ بێ وژدان دا.
ودویماهیێ من بڕیاڕ دا ئهز خۆ وگهلهكێن دى یێن وهكى خۆ ژى ژ دهستێن ڤى زالمى ڕزگار بكهم.. ڕۆژهكێ ل درهنگى شهڤ دهمێ هاتى قهستا سهر جهێ من كرى، من دیت ب ڕهنگهكێ وهسا یێ سهرخۆشه ئاگههــ ژ خۆ نینه، ئینا من ب دهلیڤه زانى بچم ساتۆرهكا خـۆش بینم و د سنگێ وى بچكلینم، دا باژێڕى ژ پیساتیا وى خلاس بكهم.. و د ئهنجام دا ئهزا كهفتیمه پشت شفشێن زیندانێ، د گهل خهم وشهرمزارى وكۆڤانێن خۆ دژیم، بێى كهسهك ههبت ڕۆژهكێ پسیارا من بكهت، یان ڕۆندكهكێ بۆ من ببارینت.
