دهمێ نامویس هاتیه پێلێدان
ههمى تشت ب ڕهنگهكێ رۆتـیـنـى ل مـالا وان یا بـچـویك ب ڕێـڤـه دچوون.. دهمێ دبوو سپێده وبهرى ئهو قهستا سهر كارێ خۆ بكهت د ڕێكا خۆ دا ژنكا خۆ یا جحێل دگههانده زانكۆیێ..
ئـهو سالهك بوو وى ژن ئیناى وهێشتا باوهر نهدكر كو ئهو ب ههمى ڤه یا گههشتیه وى ! ڕۆژا وى بۆ جارا ئێكێ ئهو دیتى جوانیا وێ ئهو سهودا سهر كر، ل نك وى یا گرنگ نهبوو تشتهكى ژ وێ وبۆریێ وى بزانت، یان ئهخلاقێ مالا وێ یێ جـڤـاكـى هلسهنگینت، تشتێ وى دڤیا ب تنێ ئهو بوو ئهو ڤێ (جهوههرا ب بها) و (شاها جوانان) بكهته خاتوین د مالا خۆ دا، لهو دهمێ ئهڤ كچه ل بهر هاتى شوى پێ بكهت ئهو یێ ئاماده بوو خـولامینیا وێ ژى بكهت بـهس ئهو یا ژ وى رازى بت !! ژ بهر ڤێ چهندێ ژنكێ ڤیانا وى یا زێده بۆ خۆ ئستغلال دكر وچى تشتێ ڤیابا ب نازداریا خۆ ژێ چێ دكر.
وێ ڕۆژێ سپێدێ وهكى ههر ڕۆژ ژنكا خۆ گههانده زانكۆیێ پاشى زڤڕى سهر كارێ خۆ.. وپشتى سهعهتهكێ دووان جهرهسا تهلهفوونا وى لێدا:
ـ بهلـێ..
ـ تو فلانى؟
ـ بهلـێ كهرهم كه..
ـ ئهرێ فلان كهس مرۆڤا تهیه؟
ب ترس ڤه بهرسڤ دا:
ـ بهلـێ.. ئهو ژنكا منه، خێره تشتهك لـێ هاتییه؟
پۆلیسێ تهناهییێ گۆتێ:
ـ ئهگهر زهحـمـهت نـهبـت وهره فـلان خهستهخانێ ئهم یێ ل هیڤییا ته..
نێزیك بوو دلـێ وى ژ سنگى دهركهڤت، تو بـێـژى تشتهك ل ژنكا وى هات بت؟ نه.. نه، ئهگهر تشتهك ل وێ هات بت ئهو دێ خۆ كوژت، ما پشتى وێ ئهو بۆچیه؟
ئهڤ هزره ههمى د سهرێ وى دا حازر بوون دهمێ ناڤێ خهستهخانێ ب بهر گوهان كهفتى، بهلـێ تشتێ دلـێ وى رحهت كرى ئهو بوو ههر زوى پۆلیسى لـێ ڤهگێڕا وگۆت:
ـ نه چو نینه نهترسه، ڕویدانهكا تورمبیلێ یا سڤكه.
ب ڕیكێ ڤه ههمییێ هزرا وى ل نك ژنكا وى بوو، وتشتێ ئهو ئالۆز دكر ئهڤه بوو: ترۆمبێلا چ؟ وڕویدانا چ؟ ئاخرى من بهرى سهعهتهكێ ئهو یا برییه زانكۆیێ، وسێ چار سهعهتێن دى دهواما وێ ب دویماهى نائێت، ئهڤه چ ڕویدانه ئهو بهحس ژێ دكهن؟
وگاڤا گههشتییه بهر دهرێ خهستهخانێ وهكى مرۆڤهكێ دین ژ ترومبێلێ هاته خوار وبهر ب پشكا تهنگاڤییان ڤه چوو، وگاڤا وى هژمارهكا پۆلیسان ل بهر دهرێ ژۆرا ئنعاشێ دیتى حێبهتى ڕاوهستیا، بهلـێ ترسا وى ل سهر ژنكا وى یا جوان وجحێل.. قۆتابییا زانكۆیێ.. هند عهقل د سهرێ وى نههێلا بوو ئهو بـێـژتـه خۆ: ئهڤ پۆلیسه ل ڤێرێ چ دكهن؟ ئێكسهر ب ژۆر كهفت، دیت خۆشتڤییا وى ل سهر تهختهكى یا درێژ كرییه وسهر وچاڤێن وێ ب خوینێ دسۆرن، ووان ههمى لفافه وپاتهیێن نۆژداران تێ ئالاندین نهشیاینه نیشانێن برینان ڤهشێرن، گاڤا نێزیكى تهختى بووى دهنگێ نال نالێن ژنكێ هاتنه گوهان، دهمێ چاڤێن وى ب چاڤێن وێ كهڤتین، وێ چاڤێن خۆ یێن حلى دانانه سهرێك، ههر وهكى نهدڤیا چاڤێن وان ڤێك بكهڤن.. دلـێ وى هزار ئاواز لێدان، ووى هند ئاگههـــ ژ خۆ ههبوو ئهفسهرێ پۆلیسان دهستێ وى كێشا وخهلهوه كر وگۆتێ:
ـ ل فلان جهى ل لایێ باژێڕى ئهم ب سهر ڕویدانێ هلبووین، وئهو دۆستهكێ خۆ ب تنێ د ترومبێلێ دا بوون، گاڤا ئهم گههشتینێ زهلام تمام بووبوو، وئهڤ ژنكه یا تهنگاڤ بوو، پشتى مه گههاندیه خهستهخانێ وێ ژمارا تهلهفوونا ته دا مه..
ل ڤێرێ زهلام هشك بوو.. دنیا د چاڤان دا زڤڕى، ههمى تشت هاتنه سهر هزرا وى ب تنێ ئهو نهبت كو ژنكا وى یا خائین بت، دیناتییا وى زێـدهتـر لـێ هـات، بێى هاى ژ خۆ ههبت ب نك تهختێ ژنكێ ڤه چوو، دختۆر وسستـر ترسیان ئهو دربهكى ل ژنكێ بدهت لهو هاتنه د ڕێ دا ونههێلا ئهو نێزیكى ژنكێ ببت، بهلـێ وى خۆ ژ ناڤ دهستێن وان ئینادهر وچوو هنداڤ سهرى وهندى ژێ هاتى تفكرێ وكۆمهكا خهبهران گـۆتـێ، پاشى خۆ ژێ دویر كر وگۆت:
ـ ئێك، دو، سێ.. ب ههر سێ طەلاقان تو یا ژ من چوویى بى !!
و ژ وێ ژۆرێ دهر كهفت.. وچوو، پشتى لهعنهت ل وێ ڕۆژێ كرین یا ئهو تێدا نیاسى.
وژن ما د گهل ئێش وبرین وشهرمزارى وقههرا خۆ.. وتشتێ قههرا وێ گرانـتـر لـێ كرى ئهو بوو دهمێ دهیبابێن وێ ژى هاتینه نهخۆشخانێ و ب چیرۆكا وێ حهسـیایـن ههلویستێ وان ژ یێ زهلامێ وێ خرابتـر بوو، وما چ ژ وێ مهزنتـره سهرێ وان ئێدى د ناڤ خهلكى دا ڕانهبت؟
وان ژى ژ كهرب وشهرمزارییێن خۆ دا بهرائهتا خۆ ژ كچا خۆ دا، وزڤڕینه مال وئهو هێلا ل خهستهخانێ..
وهى خودێ !! ئهڤه چ بوو ب سهرى هاتى، دۆست چوو، وزهلامى ئهو بهردا، وخۆ دهیكا وێ پشت دایێ وخۆ لـێ نهكره خودان.. ویا ژ ههمییێ مهزنتـر ئهو بوو پشتى ئهنجامێن فهحصێن وێ دهركهفتین دختۆرى ب كهسهر ڤه گۆتێ:
ـ ببۆره.. ئهز یێ نهچارم ڤى ئهنجامێ نهخۆش بگههینمه ته، مۆرییێن پشتا ته یێن شكهستین وشهلهلهكا بهردهوام دێ ته ههبت، وحهتا مرنێ تو دێ ل سهر پشتێ بى.
هنگى ب دورستى هیڤییا وێ ئهو بوو ئهو مربا، بهلـێ مهزنتـرین گرفتارى ئهوه هیڤییا مرۆڤى مرن بت ومرن ب دهست نهكهڤت..
ودویماهییا جهێ وێ بۆ مهزهلهكا بچویك ل (دار العجزه) جهێ پهككهفتییێن بێ خودان !
