كۆتركا عهمرى
پشتى موسلمانان ب سهركێشیا عهمرى ئهو سهركهفتنا مهزن ب دهست خۆ ڤه ئیناى ئهوا ل بهر دهرازینكا مصرێ، ل باژێڕێ بولبیسێ گههشتیێ.. هێزێن رۆمێ و د گهل دا ئهو هێزا قبتى ژى ئهوا موقهوقسى ژ ئهسكهندهریێ هنارتى شكهستن و ب ڕهنگهكێ كرێت خۆ ژ باژێڕێ بولبیسێ ودهور وڕهخان ڤهكێشا، و ب لهز بهر ب پایتهختا موقهوقسى ڤه چوون..
ودهمێ ئوسقفێ مصرێ یێ مهزن ئهبوو مهریهمى ئهڤ شكهستنه دیتى یا گههشتیه ههڤالێن وى، وزانى كو هژمارهكا نه یا كێم ژ وان ب ئێخسیرى كهفتنه دهستێ موسلمانان، ژ نوى ئهوى خۆ ئاشكهرا كر، وهات قهستا دیوانا عهمرى كر، وخۆ ب كراسێ بێ گونههیێ نیشا وى دا، وداخواز ژێ كر ئهو ئێخسیران بهردهت، و د گهل وى بهنێرت.. بهلێ عهمرى ڕێ نهدایێ ئهو بچته دیوانا وى وگۆته زهلامێن خۆ: دهربێخن، پشتى وى ئهو كرى یا كرى، من نهڤێت وى ببینم!!
وگاڤا مهسهلا وان گههشتیه ئیمامێ عومهر ل مهدینێ، وى فهرمان ل عهمرى كر كو ههر كهسهكێ د وان پێنج ڕۆژان دا هاتیهگرتن یێن وى كرینه موهلهت، دڤێت بێته بهردان، وئهوێن پشتى هنگى هاتینهگرتن، بلا هلبژارتنێ بدهنێ: یێ بڤێت موسلمان بت بلا بمینته د گهل موسلمانان، ویێ بڤێت بمینته ل سهر دینێ خۆ بلا بزڤڕته نك مرۆڤێن خۆ ب شهرتهكى ئهو ل سهر دانا جزیێ رازى ببت.
وپشتى عهمر وخهلكێ مصرێ ل سهر ڤێ صولحێ پێك هاتین، عهمرى ههڤالێن خۆ كۆمكرن، ودان وستاندن د گهل كر كانێ ئهو چ بكهن؟
- هندى باژێڕێ موقهوقسى نهكهفته دهستێ مه، دوژمن دێ لێ كۆم بن، وئهم ژ هێڕشێن وان رحهت نابین..
هۆسا ئێك ژ سهرلهشكهرێن عهمرى گۆت.. وئێكى دى گۆت:
- ئهو هێزێن ڕۆمێ یێن كو مه شكاندین نوكه ههمى ل وێرێ كۆمبووینه، وئهو ل وێرێ بێ دهنگ نامینن، ویا دورست ئهوه بهرى ئهو هێڕشێ بیننه سهر مه ئهم بچین ووان ل وێرێ موحاصره بكهین..
وپشتى دان وستاندهنهكا درێژ عهمرى گۆت:
- ما دهم هۆیه، سوباهى ب ئانههیا خودێ بهرێ مه دێ كهفته ئهسكهندهریێ..
وگاڤا ئهمیرى فهرمان داى لهشكهر كارێ چوونێ بكهت، وخیڤهتگهها خۆ ڕاكهن، وان ههمى خیڤهت ل عهردى دان، ودهمێ دۆر گههشتیه خیڤهتا عهمرى، لهشكهرى بهرێ خۆ دایێ كۆتركهكا هاتى وهێلینا خۆ ل سهر بانێ خیڤهتێ یا ئاڤاكرى.. هنگى ئهو ڕاوهستیان، چ بكهن؟ وان ل بهره ژێلهل بهر ب باژێڕێ ئهسكهندهریێ ڤه بچن ژینێ ل سهر كاڤلێ مرنێ چێكهن، وئهڤ كۆتركهكا تهنا یا هاتى دادایه سهر خیڤهتا ئهمیرى، وههردو چهنگێن خۆ یێن ل دۆر هێكێن خۆ ئالاندین ب ئنیهتا چێكرنا ژینهكا نوى.. چ بكهن؟ بهێلن ئهو ژینێ دورست بكهت وئهو بچن مرنێ چێ كـهن؟ كـۆتـركـا مـاك د گــهل خـهونێن وێ یێن شرین بهێلنه ل سهر هێكێن وێ وئهمیرێ خۆ بهێلنه بێ خیڤهت، یان ژى چ؟
ئێك ژ لهشكهرى چو نك عهمرى، وگۆتێ:
- ئـهى ئـهمـیـر! دهمـێ مه ڤیاى خیڤهتا ته هلوهشینین، هێلینا كۆتركهكێ مه ل ســهر دیــت، ماك تــێــدا یــا كـوركـه ل سهر هێكێن خۆ، تو چ بڕیار ددهى ئهم چ بكهین؟ هێلینا وێ خراب بكهین، یان خیڤهتا ته بهێلین؟
عهمرى ئهوێ ل فێرگهها موحهممهدى دهرسێن دلۆڤانیێ وهرگرتین، ئهو قههرهمانێ شیر هلگرتى، دا ئێكهمین جار نیشا دیرۆكێ بدهت كانێ چاوایه دهمێ ل بهر سیبهرا هێزێ دلۆڤانى دئێته بهلاڤكرن، گۆته وان:
- ئهوێ كۆتركێ یا خۆ هاڤێتیه سهر بهختێ مه، ڤێجا دڤێت ئهم بهختێ خۆ لێ خراب نهكهین.. خیڤهتێ بۆ وێ بهێلن، و(تهوهكوللا) خۆ بدهنه سهر خودێ، وڕابن دا بچین..
ولهشكهرى دا ڕێ.. پشتى خیڤهتگهها خۆ یا مهزن ب ڕهخ باژێڕى ڤه ل پاش خۆ هێلاى مهیدانهكا فرههـ وڤالا ژ ههمى تشتان، ژ خیڤهتا عهمرى تێ نهبت، ئـهوا خــودانــێ وێ بــۆ كــۆتـرهكـا كورك هێلاى حهتا هێكێن خۆ بینته دهر، وئهو ب لایێ ئهڤرازى ڤه كهفته ڕێكێ دا بهرێ پێلا ڕۆناهیێ بدهته پایتهختا موقهوقسى..
