ل كهنیسا دیمهشقێ
ئوسقوفێ مهزن یێ كهنیسا دیمهشقێ ههر ژ سهرى جحێلێ فارسى نێزیكى خۆ كر، وتهعامولهكا جودا ژ یا ههر كهسهكێ دى د گهل وى كر، ووى ژى ل سهرى گهلهك كهیف پێ هات، و ب علمێ وى یێ زێده وشارهزاییا وى د تهوراتێ وئنجیلێ دا مهندههووش بوو، بهرێ وى دما لێ دهمێ وى ئایهتێن تهوراتێ وئنجیلێ بۆ شاگردهیان شرۆڤه دكرن، وبهحسێ بیر وبۆچوونێن مهزههبێن جودا جودا یێن مهسیحییهتێ بۆ وان دكر، وژێ حێبهتى دما، وشانازیهكا زێده پێ دبر.. بهلێ نێزیكیا وى ژ سهیدایێ وى ئهوا ڕۆژ بۆ ڕۆژێ زێدهتر لێ دهات، ئهڤ گهرمیا وى پتر سار دكر، حهتا دویماهیێ (صهدمهیهكا) مهزن ڤێ كهفتى، نێزیك بوو باوهریا وى ب ڤى دینى ژى لهقینت!
ڕۆژهكێ ب خافلهتى ڤه ڕاستیا ئوسقوفێ مهزن ئهوێ خهلكى ب چاڤێ پیرۆزیێ بهرێ خۆ ددایێ، وڕۆندكێن بۆش د بهر وهعز ونصیحهتێن وى ڕا دباراندن، بۆ وى ئاشكهرا بوو.. ئهڤ ههمى علمێ بهرفرههێ وى ههى، وئهڤ زانـیـنــا كــویــرا وى ب ئنجیلێ وتـهوراتــێ، ههر وهكى چو كارتێكرن ل ئهخلاق وڕهفـتـارێ وى نـهكـریـه؛ چـونكى ل وى دهمێ ئهو ژ خهلكى دخوازت مهردینیێ ب مال وملكێ خۆ د ڕێكا خودێ دا بكهن، ودهستێ هاریكاریێ بۆ ههژاران درێژ بكهن، وپشتى ئهو پێ ل بهخیلیا نهفسا خۆ ددانن وخێران پێشكێش دكهن ودئیننه كهنیسێ ودداننه بهر دهستێ وى، و ل شوینا ئهو وى مالى بگههینته جهێ وى یێ دورست، وخهمێن ههژارێن خودان باوهر پێ سڤك بكهت، ئهو ڕادبت وى مالى هـهمـیـێ دبـهت ودویر ژ چاڤان ل جههكى ژ كهنیسێ بۆ خۆ ڤهدشێرت، گاڤا ئهو ب ڤى كارێ سهیدایێ خۆ ئوسقوفێ مهزن حهسیاى، وزانى كو ئهڤ جوانیا وى یا سهرڤه سهرڤه د چاڤێن خهلكى دا وهكـى جـوانـیـا وى پهیكهرێ خوشكۆكه ئهوێ ب دهسـتـهكـێ ژێـهـاتى هاتیه دورستكرن، گهلهك ڕهنگ وڕویێن جوانى ومهزنیێ ل سهر دێمێ وى ئاشكهرا دبن، بهلێ پا ما بۆچیه؟! هات وچوو پهیكهرهكێ بێ رحه!
ئهڤ ئنحرافا وى ل نك ئوسقوفێ مهزن دیتى دلێ وى گهلهك ئێشاند، وپشتـى خــۆ وهسـتانـدنـهكـا مهزن ئهو شیا -ب ڕێكا عهقلێ خۆ- باوهریا خۆ ب حهقیێ بپارێزت ونههێلت بلهقیێت.. وى دا عهقلێ خۆ وزانى كو گهلهك تشتهكێ پێتڤیه مرۆڤ فهرقێ بێخته ناڤبهرا مرۆڤان وحهقیێ، وئهو یێ پشت ڕاست بوو كو (تهعالیمێن مهسیحییهتێ) ئهوێن خهلكى ب لایێ خێرێ ڤه دبهن نابت ڤێ (ئهزئهزى) و(خاپاندنێ) قهبویل بكهن یا ئوسقوف پێ ڕادبت، وئهڤ كارێ خرابێ ئهو دكهت ههما نیشانا ڤهمرینا چرایێ باوهریێیه د دلێ وى دا وچو ددى نه.. وئهو ب ڤێ ئنحرافا خۆ ئهگهر چ دیمهنێ حهقیێ یێ گهش د چاڤێن خهلكى دا چهندهكێ شێلى دكهت ژى، بهلێ ئهو چو كارى د ئهصلێ حهقیێ ب خۆ دا نـاكــهت؛ چـونكى هـێـزا خـودایـىیـه حهقیێ دپارێزت، وما چهند جارا ئنجیلێ ب خۆ خودان باوهر ژ پێغهمبهرێن ژ درهو داینه پاش، وگۆتیه: ئهو بهرێ خهلكى ددهنه باشیێ وئهو ب خـۆ خـرابـیـێ دكهن؟ ئهرێ ما ئهڤ ئوسقوفه ب خۆ نه ئێك ژ وانه؟ ل پێش چاڤێن خهلكى جلكێ پیرۆزێ پێغهمبهران دكهته بهر خۆ، ونهفسهكا شهیطانى یا پیس د ناڤ وان جلكان دا ڤهدشێرت؟ ئنجیل بهحسێ وان دكهت ودبێژت: (ژ فێقیێ وان هوین دێ وان نیاسن..) وئهڤه فێقیێ ئوسقوفى كێم كێم ل بهر وى یێ ئاشكهرایه، وههر چهنده ڤێ ئنحرافا ئوسقوفى چو لاوازى نهگههانده باوهریا وى، بهلێ تشتێ ئهو دئێشاند ئهو بوو خهلك ب ڤى ئوسقوفى دهاتنه خاپاندن وخێرێن خۆ ددانانه بهر دهستێ وى؛ دا ئهو بگههنه مرۆڤێن پێتڤى، بهلێ وى ئهو بۆ خۆ ڕادكرن وههژار ژێ بێ بار دكرن..
بهلێ ئهو چ بكهت؟ وئهو مرۆڤهكێ بیانى وغهریبه؟ ڕاستیا ئوسقوفى بۆ خودان باوهران ئاشكهرا بكهت ووان خزینهیێن وى د كونجێن ڤهشارتى یێن كهنیسێ دا داناین نیشا وان بدهت، وبێژتێ: ئهها ئهڤهیه زهلامێ ههوه یێ پیرۆز ئهوێ ههوه باوهریا خۆ پێ ئیناى، ومالێ خۆ دانایه بهر دهستان؟ بهلێ كى دێ باوهر ژ وى كهت، وچاوا ئهو دێ شێت خهلكى ب گۆتنا خۆ قانع كهت؟ بلا پیچهكا دى ئهو بێنا خۆ فرههـ بكهت كانێ خودێ چاوا دێ چێكهت؟
وتهنگاڤى یا دۆم درێژ نهبوو.. ڕۆژهكى ل كهنیسێ بوو دهنگ كو ئوسقوفێ مهزن یێ نهخۆشه، وئێشا وى بهر بهره یا لێ دژوار دبت، ودویر نینه ل دهمهكێ نـێـزیـك ئـهو ژ ڤــێ دنـیـایـێ بار بكهت.. خودان باوهر قۆل قۆله هاتن وقهستا وێ ژۆرا (موتهواضع) كــرن یــا ئــوسقوف لێ درێژكرى، ومهسهله گههشته هندێ د دهمهكێ كێم دا ڕێ وڕێبارێن كهنیسێ ژى ههمى تژى مرۆڤ بوون، وهێشتا ئوسقوفێ ساخ نیشانێن بههیداریێ ل سهر دێمێ خهلكێ ئامادهبووى دئاشكهرا بوون، وان ب ڤێ چهندێ دڤیا پشكهكێ ژ وهفاداریا خۆ بۆ ڤى (زهلامێ پیرۆز) ئاشكهرا بكهن، ئهوێ گهلهك جاران ب وهعز ونصیحهت وگۆتنێن خۆ ڕۆندكێن گهرم ژ ترسا خودێ دا ژ چاڤێن وان باراندین!
وچهند خهما (جحێلێ فارسى) یا مهزن بوو دهمێ وى دیتى خاپاندنا خهلكى ب ئوسقوفى یا ڤهدكێشته پشتى نهمانا وى ژى، وبۆ دهمهكى ئهو د گهل خۆ كهفته ههڤڕكیهكا دژوار، ئهرێ ئهو چ بكهت؟ ڤى دیمهنێ جوان یێ ڤى خهلكێ دلسۆز بۆ ئوسقوفى د سهرێن خۆ دا نهخشاندى، وهسا بهێلت، یان ژى ئهو ب وێ ڕاستیێ كرێت بكهت یا ئهو ب تنێ پێ دزانت؟ وپشتى وى چهند پێگاڤ بۆ پێش هاڤێتین وچهند بۆ پاش، وى بڕیار دا وژدانا خۆ رحهت بكهت وڕاستیێ ئاشكهرا بكهت، دا بهرانبهر خودێ ئهو ژى شریكێ گونهها وى نهبت..
وچهند مهندههووشیا خهلكى یا مهزن بوو دهمێ وان ب چاڤێن خۆ ئهو ههر حهفت جهڕكێن تژى زێڕ دیتین یێن وى زهلامى ب ناڤێ خودێ ژ بهریكێن وان دزین، و د ڕێكا مهسیحى دا بۆ فهقیر وژاران كۆم كرین، پاشى گوهداریا گازیا شهیتانى كرى وئهو بۆ خۆ د كونجهكا كهنیسێ ڕا ڤهشارتین.. پاشى چووى وتشتهك ژێ د گهل خۆ نهبرى.. ودهمهكێ درێژ پێڤه نهچوو كهلهخێ ئوسقوفى وهكى یێ مهزنترین تاوانبارى ل بهر دهرێ كهنیسێ ب دهستێن وان كهسان هاته هلاویستن ئهوێن هاتین خاترخواستنێ لێ بكهن!!
