ناڤبرا دەهێ
عهطوه هێشتا یێ بچویك بوو دهمێ ئهو سهرهاتى چێبووى، چو جاران ئهو ژ بیر ناكهت.. ههردهم یا ل بیرێ، ڕۆژا دهیكا وى تورمبێلكهكا بچویك وجوان بۆ ئیناى، گاڤا وى تـبـلا خـۆ ل وێ دوكـمـا ڕهش شـدانـدبـا تورمبێل دا چت و ل دۆر خۆ زڤڕت ودهنگهك دا ژێ بلند بت.. زهنگلهكا بچویك پێڤه ههبوو دهنگ ژێ دهات، شۆفێرێ تورمبێلا بچویك سهرێ خۆ ب جوانى دهژاند ودهستێت خۆ باددان.. عهطوه ــ بهرى ژیێ وى ببته پێنج سال ــ دا ڕوینته بهر ڤێ تورمبێلكا هه.. دڤیا بزانت كانێ چاوا ئهو ڤى تشتى دكهت، پسیارا مهزنان دكر بهلێ د بهرسڤا وان نهدگههشت.. دویماهیێ وى تورمبێلكا خۆ بره جههكێ دویر ودا بهر بهران حهتا هویرهویر كرى وهندهك تێله وئاسنك ژ نیڤێ ئیناینه دهر.. هندى سهحكرێ چو ژێ نهزانى.. پرتێت وێ لێكدان وڤــیــا وێ دورســت بكهتهڤه، بهلێ نهشیا.. لهو وى كره گرى و ب نك دهیكا خۆ ڤه چوو، خویشك وبرایێت وى گۆتێ: ئهو چێ نابتهڤه، چونكى چو تێ نهمایه، بهلێ وى دڤێت ئهو وهكى بهرێ لێ بێت.. دهیكا وى گۆتێ:
ــ كوڕێ من ئهو مر.. وئێدى ئهم نهشێین وێ ساخ كهین.
وێ ڕۆژێ وى گهلهك كره گرى.. ئهڤـ سهرهاتیه د هزرا وى دا یا هاتیه نهخشاندن، وئهو هزر ههردهم وهكى وێ ماسیا دمرت و ب سهر ئاڤێ دكهڤت ئهو ژى ب سهر هزرێت وى دكهڤت.. نزانت كانێ چ پهیوهندى د ناڤبهرا نهبیلایێ وتورمبێلكا ههڕشى دا ههیه.. بهلێ ههردو دئێنه بیرا وى، ڕاستى نهبیلایێ بێنا وى یا ئینایه سهرێ دفنا وى، ئهو نزانت كانێ چ د سهرێ وێ یێ جوان دا ههیه.. چاڤێت وێ مرۆڤى دكێشن دێ بێژى ئهو د پڕى نهێنى وگلسمن.. ئهرێ سهرێ وێ بههڕشینت؟ وهكى وى د گهل دههان گرتیان كرى ســهرێ وێ ل بــن پـێــلاڤــا خــۆ هـویر بكهت؟ یان وێ بگرت و ب (عهرووسێ) ڤه بهلاویست ولهشێ وێ یێ تهڕ ب قامچیان سۆر بكهت حهتا ئهو خۆ بهاڤێته بهر پیێت وى..
بهلێ ما بۆچى ئهو هنده حهز ژ وێ دكهت مادهم ئهو خۆ ب دهســت وى ڤــه بـهرنادهت؟ ژنكێت جوان تژى دنیایێ نه، ژ ههمى ڕهنگان یێن ههین، وگوهێ خۆ ددهنه وى ویا وى دڤێت بۆ ب جه دئینن، ما بۆچى ههما وێ ژ بیر ناكهت ههر وهكى چو جاران نهدیتى؟
ب ڕاستى ئهو نهشێت ڤێ چهندێ بكهت.. ى ئهو دڤێت، ئهگهر ههمى ژنكان بۆ وى بینن تێنكا وى پێ ناشكێت ورازى نابت، وى ئو دڤێت ولازم ب دهست خۆ بێخت.. بلا نهبته كابانیا مالا وى ههما بهسى ویه ئهو ببته یارا وى.. چونكى ئهو یێ گههشتیه وێ باوهرێ كو ژنئینان خهلهتیهكا مهزنه، ئهگهر ب حهرامى بت دێ ب تامتر بت.. بهلێ ب حهلالى ــ یا ژ وى ڤه ــ یا بێ تام وبێ بێنه، لهو دلێ وى ناچتێ.. یێ ل وێ باوهرێ كو پشتى نهبیلایێ ئهو دیتى یا دوهى دیتى دێ ل بهر وى دانت، نهخاسم پشتى تهنا دبت وبێنا خۆ ڤهددهت، دهمێ هزرێت خۆ بكهت دێ زانت ئهزم یێ هارى وێ دكهم ووێ پشت ڕاست دكهم..
عهطوه د مهزهلا خۆ ڤه ل گرتیخانێ یێ ڕوینشتى بوو، بـهرێ وى ل وێ قهسابخانێ بوو ئهوا ب ڕهنگهكێ دورست ب ڕێــڤــه دچـــت.. تــهحـقـیـق، تهعزیب، تۆماركرنا ئعـتـرافان ل ســـهر كـــاغــهز وكاسێتان، وهرگرتنا هندهك گرتیێت نوى ب ڕهنگهكێ غهریب.. ب قامچى وخهبهر وپێنان.. پێلێت گرتیان ڕاناوهستن..
لهشكهرهكێ گرتیخانێ ب ژۆر كهفت.. تهمهنهكا لهشكهرى ڤهدا.. عهطوهى لێ نهڤهگێڕا وگۆت:
ــ ها !
وى لهشكهرى گۆت:
ــ ئهفهندم! تۆسكا یا نساخه..
جرفهك ب عهطوهى كهفت زوى ژ سهر كورسیكا خۆ ڕابووڤه وگۆت:
ــ تو چ دبێژى؟ تۆسكا.. خودێ مالا ته وێران كهت.. كهنگى ئهڤه چێبوویه؟
لهشكهرى ب ترس ڤه گۆت:
ــ ههمى صه چهرین ئهو تێ نهبت..
ــ ئهڤه ژ سپێدێ وهره ته بۆچى نهدگۆته من؟!
عهطوهى خۆ نێزیكى وى كر شهقهكا حێل دانایێ، وى خۆ مویهك ژ خۆ شاش نهكر.. عهطوهى گۆتێ:
ــ كهرۆ باخڤه..
ــ ئهز بهنى تو یێ حازر نهبووى..
ــ بۆچى ته لهلهفوون نهدكر؟
ــ من ژمارا تهلهفوونا ته نهدزانى..
ــ چـونـكـى تــو كــهرى.. دا بــێـژیـه ئهفسهرێ نۆبهدار، تو وئهو دهوارێت ته ل گوندى ئالف ددایێ وهكى ئێكن، تۆسكا د سهر ته وسهدێت وهكى ته دكهڤت.. ته زانى؟
وى لهشكهرى ب موكمى ڤه گۆت:
ــ بهلێ ئهز بهنى..
عهطوهى كره غار وچوو ژ دهرڤه.. هندهك ئهفسهر ولهشكهرى دا ب دویڤ وى ڤه، ووى ب لهز هنارته د دویڤ دخـتـۆرێ گـرتـیـخـانـهیـێ ڕا، ههمى بێ دهنگ بوون.. عهطوه د ناڤـ صهیێت خۆ یێت تهعلیمداى دا ڕاوهستیا وئهو ههمى ل دۆر وى دهاتن ودچوون.. پێلاڤا وى دئالیست، تۆسكا تێ نهبت.. ئهو یا درێژكرى بوو، بێهنا وێ ب لهز دهات ودچوو وچاڤێت وێ دڤهكرى بوون..
عهطوه ب ترس ڤه گۆت:
ــ ها دختۆر! چ لێ قهومیه؟
دختۆر بێنهكێ ما.. تێ فوكرى، پاشى گۆت:
ــ ئهز نزانم.. یا باش ئهوه گازى دختۆرهكێ بهیطەرى بكهین، ئهز چو ژ صهیان نزانم.
عهطوهى ب خهم ڤه بهرێ خۆ دا دێهلێ، دهستێ ب سهر دا ئینا خوارێ، دێهل وهكى مرۆڤهكێ نساخ دنالى، بێى عهطوهى ڕۆندكهك ژ چڤان پهشى.. گاڤا دختۆرى ئهڤه ژ وى دیتى خۆ نێزیكى وى كر وگۆتێ:
ــ نهترسه عهطوه بهگ.. ئهڤه ئێكهمین جاره ئهز دبینم تو دكهیه گرى..
كزگریۆك كهته گهریا عهطوهى وگۆت:
ــ ئهڤه ل بهر دلێ من ژ ههمى مرۆڤان عهزیزتره..
ــ حهتا ڤێ دهرهجێ؟
عهطوه ل ئهفسهرێ نۆبهدار زڤڕى وگۆت:
ــ سهح كهنه دختۆرهكێ بهیطەرى ل گرتخانهیێ.. وئهگهر ههوه كهس نهدیت ههڕن ڤێ گاڤێ ئێكى بگرن!
ئومباشى عهبدلمهقصوودى خۆ نێزیكى وى كر، تهمهنه بۆڤهدا وگۆت:
ــ ئهز بهنى! مه گرتیهكێ ههى دختۆرێ بهیطەریه ناڤێ وى حامد ئهلعهجمیه یێ ل گرتیخانهیا چارێ..
ــ گامێش! پا تو ل هیڤیا چ یى؟
ــ ئـهو ژ وانـــه یــێــت ب تــنـــێ د گـرتـیـخـانـهیێ ڤه، ژ یێت خهطەره، ڤێ گاڤێ پسیار یێ ژێ دئێنهكرن..
عهطوهى كولمهك ل سنگى دا وگۆت:
ــ پسیاران ڕاوهستینن وبلا رحهت ببت.. ل نك من تۆسكا ژ ههمى تشتان مهزنتره..
ــ بهلێ ئهز بهنى..
ههر د گاڤێ دا وان دختۆر حامد ئهلعهجمى ئینا، دێمێ وى یێ زهر بوو، ویێ ب ڕیه بوو، هندهك جلكێت كورت وپیس دبهر بوون.. دهست وپیێت وى د تژى برین بوون، چریسك ژ ناڤـ چاڤان دچوون.. عهطوه لێ خوڕى:
ــ تو دختۆرى؟
ــ ئهفهندم.. ئهز بهیطەریمه..
عهطوهى دهستێ خۆ ب نك دێهلێ ڤه درێژ كر.. حـامـد ب نك ڤه چوو.. ناڤێ خودێ ئینا، ودهستێ خۆ دانا سهر زكى.. بهرێ خۆ دا دفنێ ودهڤى، دهڤێ وێ هێدى ڤهكر.. بهرێ خۆ دایێ وگۆت:
ــ ئهرێ دهرمانێ دژى ئێشا صهیان دابوویێ؟
عهطوهى گۆت:
ــ بهلێ.. مسۆگهره، ل پێش چاڤێت من دهرمان دابوو ههمى صهیان..
حامد بێنهكێ بێ دهنگ بوو.. عهطوهى گۆت:
ــ باخڤه.. ته ئێشا وێ زانى؟
ــ ئهفهندم پشت ڕاست به.
ــ سماعا بهر گوهى یان ترمۆمترێ بینین؟
ــ نهخێر.. پێتڤى ناكهت ئهفهندم، تایهكه هاتیێ، وهكى گهلهك جاران تا دئێته صهیان، ههمى ههمى چار پێنج ڕۆژهكن دهرمانان بدهنێ دێ چێ بت، قهلهمهكى وكاغزهكێ بۆ من بینن..
عهطوه بهگێ قهلهمێ خۆ یێ پاركهر ئینا دهر.. لهشكهرهكى ب غار دهستهكێ كاغزێت سپى ژ مهزهلكا سهردارى ئینا، حامدى ژێ وهرگرت و ب دهستهكێ لهرزى ڤه هندهك دهرمان نڤیسین دا ئهو بۆ بینن.. عهطوهى ژێ وهرگرت، ودا ف ئهفسهرهكى دا زوى بچت بكڕت.. عهطوهى بهرێ خۆ دا دختۆرێ گرتى وگۆت:
ــ ههما تشتهك ل دێهلێ هات دێ ستویێ ته بڕم..
حامد ئهلعهجمى گڕنژى وگۆت:
ــ پشت ڕاست به ئهفهندم!
عهطوهى ملێ وى یێ زراڤـ گرت وگۆتێ:
ــ حامد..
ــ بهلێ ئهفهندم..
ــ مــن دڤـێــت تشتهكى بۆ ته بكهم هندى تو یێ ساخ بى ژ بیر نهكهى.
ــ سوپاس ئهفهندم.
عهطوهى گۆتنا وى ڤهبڕى وگۆتێ:
ــ ئهز دێ فهرمانهكێ دهرێخم كو پشتى ئهڤرۆ تو نهئێیه تهعزیبدان.. ودێ تـه ژ وێ بــهلایـا وێ قهزیێ دهرێخم یا ته ب دهستێت خۆ ئینایه سهرێ خۆ..
ــ قهزیا چ ئهفهندم.. ب خودێ من تشتهك نهكریه..
ــ بێ ئاقل گوهێ خۆ بده من.. ئهز دێ ته دهمه د گهل گرتیێت عادى، ڕاسته ئهز نهشێم ته دهربێخم.. بهلێ تێرا ته ههیه تو ژ قهزیێ ودادگههێ خلاس ببى.
ــ سوپاسئهفهندم.
عهطوهى بهردهوامى دا ئاخفتنا خۆ:
ــ ئهز دێ ته دانمه زیندانهكا تایبهت.. د گهل صهیان.. دا تو وان ب خودان بكهى، وسهخبێریا وان بكهى.. خوارنهكا باش یا وهكى خوارنا سهیان دێ بۆ ته ئینین.. گۆشت وبرنج وخهزرهواتى، ئهز دبێژم چو جارا د خهونێ ژى دا ته ئهڤه نهددیت.
دهمهكێ درێژ دختۆر حامد ئهلعهجمى د گهل صهیان ژیا.. د ڤى دهمى دا خوارنهكا باش ب دهست وى كهفت، ووى خۆشى دیت.. هندهك جاران د گهل صهیان ئهو دهردكهفته گهڕیانێ، ئهڤه ل وى دهمێ ههڤالێت وى یێت گرتى ل پشت شفشه ودهرگههان نێزیكه ههما ڕۆناهیێ نهبینن هندهك دهمێت كورت تێ نهبت.. گرتیهكى گۆته ههڤالێ خۆ حامدى:
ــ خوزیێت ته حامد! خودێ ژ لایهكى ڤه دا ته ته چو هزر بۆ نهدكر، نهخش ل سهرێ مه ههمیان.
حامدى سوپاسیا خودێ كر كو وى سلامهتى دایه تۆسكایێ..
پتر كهیفا عهطوهى هات.. دێهل ددا بهر سنگێ خۆ وماچى دكر.. دێهلێ كوریا خۆ دهژاند، دیاره سوپاسیا وى دكر بۆ ڤێ چاڤدێریا زێده یا وى لێ دكر!
عهطوهى یارى پێ كرن وگۆتێ:
ــ مالا ته تۆسكا ته دلێ من قهتاند ژ ترسان دا، تو دزانى ئهز چهند حهز ژ ته دكهم، ئهزێ ئامادهمه مالێ خۆ ههمیێ گۆرى ته بكهم، ل نك من چو مرۆڤـ وهكى ته دعهزیز نینن.. وتو ژ چو مرۆڤان كێمتر نینى ئهگهر زێدهتر نهبى.. تو ڤیانى وپشتهڤانى تۆسكا.. تویى گوهدارا ڕاست.. دهمێ ئهز ته دبینم تو بۆ من ڕادبیه سهمایێ، وتو ب دیتنا من كهیفخۆش دبى، ئهز ههست پێ دكهم كو تو ژ ههمى مرۆڤان شارهزاتر وڕاستگۆترى.. حهتا بۆ تهناهیا دهولهتێ ژى تو گۆشتێ نهگوهدار خائینان لهقددهى ولهشێ وان ددڕینى وهكى من دڤێت، بهلكى پتر ژى، ئهگهر ئهز ل شوینا كاربدهستان بام دا دهرهجا (لیوا) دهمه ته، نه ب خودێ دا دهرهجا (موشیر) دهمه ته، مانێ تو یا ژ ههژى و ب كێرهاتى یى..
ڕۆژا تۆسكا ژ ئێشا خۆ ڕابوویهڤه.. عهطوه بهگێ فهرمان دا ببته شاهى، لهو وى شاعر وهۆنهمهند ژ ناڤـ گرتیان ئینانه دهر وكۆم كرن وداخواز ژێ كر كو ههر د وێ گاڤێ دا ئهو شعران ب ڤێ بیرهاتنێ ڤههینن، ههر وهسا وى داخواز كر ئهو سترانان بنڤیسن وئاوازان بۆ بدانن دا ههمى پێكڤه وان سترانان ڤهگێڕن.. ووى سۆز دا گرتیان كو ڕۆژهكێ بكهته بێنڤهدان، وێ تهعزیبێ تێدا ڕاوهستینت ئهوا ل نیڤا مهیدانا سۆر ههرگاڤـ یا بهردهوام مهیدان تهحقیقێ ومرنێ یا ههردهم ئهو لاواز دكرن..
شاعرهكێ مهزن ژ گرتیان ڕاكرڤه دا شعرهكێ ڤههینت.. هندى ئهو هاتێ نهزانى دێ چ بێژت، دهڤێ وى تێك ئالیا.. عهگوهى ب ڤێ چهندێ نهخۆش بوو، لهو قامچى ژ ئێكى وهرگرت ودانا شاعرى وگۆتێ:
ــ كوڕێ صهى شعرهكێ بێژه.. ته ب سهدان مالكێت شعرێ دژى من وحوكمهتێ یێت ڤههاندین.. ئهز دزانم، ما ته بهحسێ مه نهكریه دهمێ ته گۆتى:
بــێ فــامــن هــهمــى عهقلێ د دهستان دا
دهستێت وان گهلهك حهژ پیسیێ دكهن!
وڤێ گاڤێ ته نهڤێت ب ساخلهمیا تۆسكایێ چو بێژى، ب شهرهفا من ئهگهر تو ڤێ گاڤێ شعرهكێ ب تۆسكایێ نهبێژى دێ قهزیهكێ ب دویڤ ته ڤهنم وته پێشكێشى دادگههێ كهم.. یان دێ بۆ ته قهزیهكێ دورست كهم..؟ ههما ئهو شعرا ته ڤههاندى وتێدا گۆتى.. گۆتى.. ژ بیرا من چوو..
ل ئهفسهرهكى زڤڕى وگۆتێ:
ــ ئهفسهرێ هێژا! ڤى شاعرى چ گۆت بوو؟ تو دزانى كانێ وى چ گوتبوو..
ــ ئهز بهنى ئهو د شعرهكا درێژ دا دبێژت:
ل شــهڤـــهكـــا تـــارى ل چـــریــا دووێ
ب تـــرس ڕابــــووم ڤــــه ژ بـهر ڕهوینێ
من دیت صه هاتن ژ ڕاست و ژ چهپ
هـــێــــڕش كـــرنــه مـــن د گهل ڕهوینێ
عهطوه كهنى وگۆت:
ــ جوانه ئهڤـ (ڕاست وچهپه)، گوهێ خۆ بدێ ئهگهر ڤێ گاڤێ تو شعرهكێ نهبێژى ئهز دێ لهشێ ته ب قامچیان پرت پرت كهم..
شاعرێ گرتى گۆت:
ــ ئهفهندى، بۆ نڤیسینا شعرێ وهخت پێ دڤێت..
ــ تو ب سهرێ دهیكا خۆ! تو یاریان ب من دكهى؟
ــ وئهو ههوجهى قهلهم وكاغهز وبێ دهنگیێ یه..
ــ ئهزێ دبێژمه ته شعرهكێ ب تۆسكایێ ڤههینه، ئهگهر ته وه كر دێ بهخشیشهكى دهمه ته..
چاویش ئهمین ئهوێ ب دلڕهقى وخرابكاریێ ناڤدار گۆت:
ــ یهعنى ته پهرتال ههیه وخهلكێ برسیه.. حهیوان دێ باخڤه..
شاعرێ ههژار بیرا خۆ ل شعرهكا میرێ شاعران (شهوقى) ئیناڤه ئهوا وى دشانۆگهریا خۆ یا ناڤدار دا ب كهفتنا (كلیۆباترا) یێ ڤههاندى.. ئهو شعر ب خاتر خواستنا (رۆما) ڤه هاتبوو ڤههاندن.. شاعرى ڤیا هندهك پهیڤان بگوهۆڕت وناڤێ تۆسكایێ بكهته دناڤـ ڕا.. سهرێ خۆ هژاند وگۆت:
ــ باشه ئهز دێ بێژم..
عهطوهى ژ كهیفان دا دهست قوتان، و ل گرتیان خوڕى:
ــ دهستان بقوتن.. ههمى دهستان بقوتن.
دهنگێ دهست قوتانێ بلند بو.. گرتیهكێ ب دهنگهكێ بلند ڤه گۆت:
ــ بژیت تۆسكا..
ئهو گۆتنا هه بلند بوو.. وهكى یارى پێكرنهكێ دهنگێ وان بلند بوو:
ــ تۆسكا تۆسكا.. بژیت تۆسكا..
عهطوهى سهرێ خۆ هژاند.. زێده كهیفا وى هات، كهنى وگۆت:
ــ ب خودێ ئهڤـ دهنگه هزار جاران مـهزنـتـر و ب هێزتره ژ دهنگێ وهلاتیان وهكى ل مهیدانا (عابدین) بلند دبت دهمێ سهرۆك دئێته هنداڤى وان.. تو چهندا عهزیزى ل بهر من تۆسكا!
بێ دهنگى جارهكا دى بهلاڤـ بوو، شاعرێ ههژار پێشكهفت ودهنگێ خۆ بلند كر، ئهو دهنگێ تژى كزگریۆك، وگۆت:
دلــــۆڤــــانـــیـــا تــــه ئــــهى تـــۆسـكـا ل گــهنـجـێ خۆ ببۆرینه
تــــو بـــــۆ یــــا دلـــــڕهقــــى ئـــهڤـــرۆ خــهما تو ژ وى بڕهڤینه
ســــــلاڤـــــهك بـــــۆ تــــه ئـــهى تــۆسكا ژ دهربهدهرهكێ بهرزه
ل سهر عهردێ وهلاتى وهى عهجهب پا ئهڤ نهخۆش تهرزه
ئـــــهڤــــیــــنـــدار وهــــهمـــــى دلــــدار دلــێـت وانن گهلهك نازك
نـــــزانـــــم بـــــۆ دلــــێ تــــه بـــهس د گهل گهنجێ تهیه گازك؟
پـــهنـجـــه سۆرێت ته یێت بهخشن ڕهقى ونهڤین وپڕ كهربه
د گــــهل هــنـــدێ دڤێـتـن ئهم ههر وههر بێین تو دل بهر به!
نــــه تـــاوانــــبـــــارى ئــهى یــارێ هـــهڤــالـێ نه گونههكارى
گــــونــــههــ هـــهر یا خـــودانییه كو تو هێلاى وى غهددارى
بێ گومان عهطوه بهگ د چو پهیڤان نهگههشت، مۆسیقا وكێشا شعرێ دل ژێ ستاند، ههر وهسا لهشكهرى ژى پویته نهددا گۆتنێن وى، ههر چهنده ئهو گڕنژین دهمێ دیتى مهزنێ وان كهیفخۆش بوو ودهست قوتان وتۆسكا بلند كره سهر دهست وسهرێ خۆ ودگۆت:
ــ تۆسكا تۆسكا بژیت تۆسكا..
گرتیان ولهشكهرى ژى پێكڤه ئهڤـ گۆتنه د گهل وى دوباره كر.. ئهفسهرهكى د گوهێ ههڤالێ خۆ دا گۆت:
ــ بهگێ مه ئهڤرۆ زێده یا ڤهخوارى..
ــ بهلێ، من دیت دهمێ وى د ژۆرا خۆ ڤه پهرداغ فڕ دكرن.
ــ ههى ههى!! كهسهك چویێ ژ دنیایێ د گهل خۆ نابهت.
ئهفسهر كهنى وهێدى گۆته ههڤالێ خۆ:
ــ بهلێ.. هندهك پهمپى دێ د گهل خۆ بهت.
ئینا ههر دووان ل پشت عهطوهى بهردا كهنیێ.. پشتى ههمى بووین، عهطوهى گۆت:
ــ هشیار بن!
ههمى ڕاوهستیان (هشیار) ئهفسهر ولهشهر وگرتى.. خۆ صه ژى، عهطوه بهگێ كورت ڤهبڕى وگۆت:
ــ حهتا دو سهعهتێت دى دورسته بۆ گرتیان ب كهیفا خۆ ل حهوشێ بێن وبچن، بچنه دهستاڤێ، سهرێ خۆ یان جلكێت خۆ بشوون، وههر گرتیهكى صابوینهكێ بدهنێ..
گرتیهكى گۆت:
ــ وجهێ دهسنڤێژێ بهگێ مه..
عهدهت بوو ئهدهبێت گرتیخانێ نهدهاتنه ڤهكرن دهمهكێ كورت تێ نهبت.. وههر گرتیهك دڤیا ژ دو سێ دهقیقان زێدهتر نهمابا تێڤه، لهو گهلهك ئالۆزى وتهنگاڤى بۆ گرتیان چێ دبوون، نهخاسمه بۆ وان یێت قهبز.. وئهو ژى گهلهك بوون، كهیفا ههمى گرتیان ب ڤێ گۆتنێ هات وپشتهڤانیا وێ كر..
عهطوه بهگ گڕنژى وگۆت:
ــ ئهدهبان ژى دێ ڤهكهین.. بهلێ ب شهرتهكى.
ههمى بێ دهنگ بوون.. عهطوه د ناڤـ ڕێزێت وان دا چوو وگۆت:
ــ من نهڤێت دهنگهك بێته من.. هوین ههمى من دنیاسن.. ههما دهنگهك هاته من دێ ل ڤان ههمى بڕیاران لێڤه بم.. ههوه زانى؟
ههمیان ب ئێك دهنگى گۆت:
ــ بهلێ ئهفهندى..
ــ كانێ جۆقێ سترانان.. دا ئم ئاههنگا خۆ ب دویماهى بینین؟
كۆمهكا گرتیان پێشڤه چوون.. سهرێت وان دتراشى بوون.. ههمى دزهرپهتخى بوون.. چاڤێت وان یێت ڕهش وساده د تژى مهعنا بوون، ملێت خۆ دانه ئێك، سێنیكێت خۆ یێت فافۆنى د گهل پهرداغ وكاچكان.. چونكى ئهو ئامیرهتێت وان یێت مۆسیقى بوون، ژبلى دهنگێ دهڤى ودهستان..
سهرۆكێ جۆقى ڕاوهستیا ودهست ب سترانێ كر:
تۆسكا تۆسكا ڕوهنیا چاڤى
نێ تـه خـهو یا دزى ژ چاڤى
خــێــــر ئیشهللا
پشتى ته وهللا
ولــلا پــشتى ته
پشتى ته وهللا
ل سهر چاڤا بوو ل سهر چاڤى..
عهطوه بهگ گهرم بوو، تۆسكا وێڤه لێدا وڕابوو رهقاصێ دهست قوتان وستران گۆتنێ زێده بوو.. هندى گرتى هاتنێ نهشیان كهنیا خۆ ڤهشێرن.. ئهفسهرهكى د دلێ خۆ دا گۆت:
ــ بهگى زێده كر.. خودێ ستاره كهت!!
عهطوه بهگێ گۆت:
ــ گرتیخانه ههمى.. نهلڤن.
ستران ڕاوهستیا.. ههمى بێ دهنگ بوون.. چاڤێت ههمیان مانه ل وى تیاترۆیێ بهرى نوكه ڕابوویه رهقاصێ كانێ دێ چ بێژت.. مانه ل هیڤیا فهرمانا وى، تو بێژى ئهو ل گۆتنا خۆ لێڤه ببت؟
عهطوه بهگێ گۆت:
ــ هوین ههمى حهیوانن.. دبێ ئهدهبن.. ههر صهیهك بچته زیندانا خۆ..
د گاڤێ دا قامچى ل پشتێت گرتیان بارین.. خۆ پشتا ئهندامێت جۆقێ ستران ومۆسیقێ وشاعرێ مهزن ژى.. پشتى بیست خهبهران مهیدان ڤالا بوو.. بهس عهطوه بهگ وزهلام وصهیێت وى مان، دهرگههێت زیندانان هاتنه گرتن، یووسفێ شاعر ل قورنهتێ زیندانێ ڕوینشت وكهفته هزران، رزق ئیبراهیمێ سوودانى یێ گرتى گۆتێ:
ــ خودانێ شعرا بهركهفتى هزرا چ دكهت؟
یووسفێ شاعر سهرێ خۆ هژاند وگۆت:
ــ رۆما یا دسوژت ونیرۆن یێ سترانان دبێژت..
رزقى مهخسهدا برایێ خۆ یێ موسلمان زانى، وپێ حهسیا كانێ ئهو چهند كول وكۆڤانانیێ دادكـهت، لـهو وى ب یارى ڤه گۆت:
ــ ل مصرێ میرێ شاعران شهوقیه، ویێ نیل حافزه، یێ گهنجان ڕامیه، ویێ گوندیان عهبدلموتتهلبه، و ل لوبنانێ مهتران خهلیل مهترانه، و ل حهربیێ شاعرێ تۆسكایێ مهلا یووسفه..
ههمى كهنین خۆ یوسف ژى.. یووسفى گۆت:
ــ ئهو داستانا من ل سهر نهخۆشیێت مه ل حهربیێ دیتین نڤیسى، ڕۆژهكێ ل جیهانا عهرهبان دێ كهفته سهر ههمى ئهزمانان.. ئهزێ پڕ باورم كو ئهم دێ دهركهڤین، وخهلك دێ ڕاستیێ زانن.. دێ زانن كو سهرۆك یێ ب دو ڕویانه، ڕویهك ئهوه یێ ئهم دبینین ودنیاسین ونهخۆشیێ ژێ دادكهین.. وئهوه ڕویێ وى یێ دورست یێ وى ددهته نیاسن.. وڕویێ دى ئهوه یێ خهلك وى پێ دنیاست دهمێ ئهو گۆتاران دخوینت.. جڤینان ددهته سهرۆكێت جیهانێ، وئازادیێ دخوازت.. ئازادیێ بۆ كێ؟ مه ئازادیا وى دیت ئهو ئازادیا وى دڤێت.. ئازادیا وه ل ته دكهت تو ب كوتهكى باخڤى.. شعرێ ب فهرمان ڤههینى.. سترانان ب فهرمان بێژى.. ئهو شعرا من گۆتى ژى من ژ بهر ههوه گۆت، ئهز ترسیام ئهو نهخشیێ بگههیننه ههوه ئهگهر ئهز نهبێژم.. لهو چى تشتێ هاتیه بهر دهڤێ من من گۆت..
برادهر عهبدلحهمید ئهلنهجار یێ فلسطینــى گۆت:
ــ دكهفته عهقلى كو ل دهمێ رۆما دسوژت نیرۆن سترانان بێژت.. بهلێ كوڕێت رۆمایێ ب خۆ سترانان بێژن دهمێ ئاگر لهش ومالێت وان دسوژت ئهڤه تشتهكێ غهریبه..
یووسفێ شاعر سهرێ خۆ هژاند وگۆت:
ــ وهرن دوعایێت پێغهمبهرى خوینین..
یووسفى ناڤێ خودێ ئینا، و د گهل ههر حهفت ههڤالێت ڕوینشتى دهست ب خواندنا قورئانێ ودوعایان ب دهنگهكێ نهرم كر، هندهك ڕۆندك هاتنه خوارێ.. سهر هژیان ودل چوونه عهسمانى.. سهر ل بهر خودایێ زێندى یێ چو جاران خهو نهئێتێ چهمیان، بێنهكا خۆش وپاك ژ جان ودلان دهركهفت، پشتى بێنهكێ یووسفى ب ڕویهكێ گهش گۆت:
ــ ئهم نوكه د گهشتهكێ داینه بۆ نك خودێ..
ڕێك یا دویــر ونــهخــۆشـه، بیرهاتن د تهعلن، سهرهاتى ب تــرســـن.. زهلام ب ســێــپـێـكان ڤه دئێنه هلاویســتــن، رح ب ساناهى ل پشت شویرهه وسیاجێت ستریكرى دئێنه هلكێشان بێى ئێك ل جیهانا مهزن پێ بحهسیێت.. شهڤێت ڕهش وسۆر وهكى كهڤرانه ب ڕێڤه ناچن، و د تژى ترس ورهزیلینه..
فێرسێ مللهتى ژى ب دهڤى یێ شهڕێ نهیاران دكهت، ئهو ب هزاران كوڕێت مللهتى دهاڤێته ناڤـ ئێتوینا شهڕێ دینان شهڕێ شكهستن وخوسارهتیێ.. و ژ دهرڤه د گرتیخانا مهزن دا ب هزاران مرۆڤێت شهریف وماقویل دئێنه ڤهشارتن.. كۆرهماران سهرێت خۆ ژ كونان یێت ئیناینه دهرێ دا سترانا مرنێ بێژن، د بنێ نهالێت كهسك دا ڕهوینا گورگانه ژ برسان دا.. ترى دئێته دزین.. بچویك دئێنه خندقاندن.. ئهڤ بهحهشتا خودێ دانایه سهر عهردى یا بوویه دهشتهك قانوینا دێوان لێ دئێته ب كارئینان..
یووسفێ شاعر گۆت:
ــ ئهگهر خودێ عهبدهك ڤیا دێ بهلایێ ئینته سهرى..
