ئهى بیلال ما تو سهرا مه نادهى؟!
ودهمێ بیلال ل شامێ.. شهڤهكێ وى پێغهمبهر -سلاڤ لێ بـن- د خهونێ دا دیت، پێغهمبهرى گۆتێ:
- ئهى بیلال! ته پشتا خۆ یا دایه مه، ما تو سهرا مه نادهى؟
گاڤا بیلال ژ خهو ڕابووى چاڤێن وى تژى ڕۆندك بوون، وى گۆته مالا خۆ:
- كارێ من بكهن، ئهز دێ چمه مهدینێ.
وبیلالى ڕێ دا بهر خۆ، د گازیا خۆشتڤیێ خۆ هات، وقهستا جهێ بیرهاتنان كر، وهنگى ڕاوهستیا حهتا قویناغ ل مهدینێ داناى.. ودهمێ بیلال گههشتیه مهدینێ شهڤ بهر ب درهنگیێ ڤه دچوو، بهرى ههر جههكى وى قهستا مزگهفتا پێغهمبهرى -سلاڤ لێ بن- كر، هێلینا بیرهاتنێن عهمرێ بۆرى.. ل بهرانبهر (رهوضا شهریف) ڕاوهستیا وسلاڤ كره خۆشتڤیێ خۆ:
- ئهى پێغهمبهرێ خودێ! ئهى خۆشتڤیێ دلى! ئهڤه ئهز هاتم، ئهز هاتم ودلهكێ تژى ژ ئاگرێ خهریبیێ د گهل من، ئهز هاتم دا پهیمانا ڤیانا خۆ د گهل ته نوى بكهمهڤه.. ئهى پێغهمبهر سلاڤ ل ته بن..
و ل بهرانبهر مهرقهدێ پیرۆز، و ل (رهوضا شهریف) ئهوا دكهفته ناڤبهرا قهبرى ومینبهرێ، دهمهكى بیلالى دهستویریا چاڤێن خۆ دا كو ڕۆندكان ببارینن.. وگاڤا بوویه دهمێ بانگێ سپێدێ خودێ وهسا حهزكر (موئهذذنێ) مزگهفتێ حازر نهبوو، بیلالى بهرێ خۆ دایێ دێ ب سهر دهمێ بانگى ڤه چت، لهو وی خۆ نهچار دیت ب سهر (میئذهنێ) بكهڤت، وبانگێ سپێدێ بدهت..
د گهل بایێ سهرێ سحارێ یێ نهرم، وشرینیا (موناجاتا) بهرى سپێدێ، وپشتى خهریبیهكا درێژ یا چهند سالان ڤهكێشاى، دهنگێ بیلالى وهكى جاران خهلكێ مهدینێ ژ خهوێ هشیاركرن.. ئهڤه چ دهنگه دئێته وان؟ خهونه؟ هشیاریه؟ ئێك ژ وان چاڤێن خۆ باش پهرخاندن، گوهێ خۆ دا سهر دنیایێ.. وهى! دهنگێ بیلالیه دئێته من! ههر ئێك ما د ههڤالێ خۆ فوكرى.. تو بێژى ئهڤه ئهو بت یا عومهرى گۆتى، پێغهمبهر جارهكا دى زڤڕیبته ڤه؟ بیلال وێ هه ل شامێ، ودهنگێ وى ڤێ سحارێ دئێته مه؟
وگاڤا بیلال گههشتیه: (أشهد أن محمدا رسول الله) مهدینه پێكڤه د گهل بیلالى تێك هژیا، ودهنگێ گریێ ژ ههمى لایان ڤه بلندبوو، ڤى دهنگى وڤێ گازیێ برینهكا كهڤن د دلێ خهلكى دا ههوداڤه، بیرهاتنهكا شرین ل نك وان ساخ كرهڤه، ئهو برنه وى وهختى دهمێ ڕۆناهیا خودێ ب سهر وان دا دهاته خوارێ، لهو وان چو پێ نهما ههمیان پێكڤه قهستا مزگهفتێ كر؛ دا بزانن كانێ چ بوویه، وگاڤا وان بیلال دیتى وان ب گرى ڤه خۆ تێ وهركر..
دبێژن: وێ سحارێ گهلهك ژنك ژى ژ مالێن خۆ دهركهفتن وقهستا مزگهفتێ كر، گۆتن: دیاره پێغهمبهرێ زێندى بوویهڤه!!
وپشتى چهند ڕۆژهكان بیلالى سهرهدانا خۆ ب دویماهى ئینا، وزڤڕى مالا خۆ ل شامێ.. وما حهتا ڕۆژا سهرهدانا دویماهیێ هاتى..
