ناڤبرا پازدێ
نهبیلا ژ كریارێت عهطوهى حێبهتى دما، ئهو نموونهكێ عنتیكهیه ژ زهلامان، وێ د ژیانا خۆ دا زهلام ژ ڤى ڕهنگى نهدیتینه.. ب نیشانان ڤه ئهو ژ هندێ مهزنتره وهكى وێ هزر دكر، ئهگهر نه چاوا ئهو دا ب جهێ وێ كهڤت؟ یان چاوا دا وێ ژ ناڤ پهنجێت زۆرداریێ ئینته دهر ڕۆژا ئهو هاتیه گرتن؟ پشتى هنگى كى هنده پارهیان ددهتێ؟ وێ ڕۆژێ جزدانكا وى یا تژى پاره بوو.. وئهو پێحهسیا كو وى بیست جــونـهیه پێش وێ ڤه دابوونه ئۆتێلێ.. ڕاسته ل سهرى ئهو د مهسهلا وى دا حێبهتى مابوو، حهز ژێ دكر ودڤیا شوى پێ بكهت، بهلێ ئهڤرۆ وێ ههر نهڤێت وى ببینت، نهدویره ژێ دترست، ئهڤ چهنده نیشانا باشیێ نهدگههاند، بهربهره یا بۆ وى ئاشكهرا دبت كو ژین د گهل وى ناچته سهرى، بهلێ چاوا دێ شێت خۆ ژ دهستێت وى خلاس كهت؟ وى منهتهكا مهزن لێ كر ڕۆژا ئهو دایه بهردان، نهشێت ڤێ قهنجیێ ژ بیر بكهت، و د سهر هندێ ژى ڕا ههر دهمهكێ دلێ وى بچتێ ههچیا وى دڤێت دێ د گهل وێ ومرۆڤێت وێ كهت، ژ بهر دهسههلاتا وى ودۆستینیا وى د گهل مهزنان، دیسا ژ بهر دلڕهقى وبێ رهحمیا وى، مهسهلێ پتر شارهزایى وبێنفرههى پێ دڤێت، چونكى ئاسن ب ئاسنى دئێته چهماندن.
ئهو خۆشیا نهبیلا پێ دحهسیا دهمێ ژ نوى هاتیه ئهسكهندهریێ نهما.. ئهڤ ئۆتێله ب دلێ وێ نینه، لازم بۆ خۆ ل جههكێ تهنا بگهڕیێت، چونكى چى گاڤا عهطوهى بڤێت دێ ئێتێ، لهو وێ ل نیڤا شهڤهكێ ئۆتێل هێلا پشتى پارێت خۆ یێت مایى ژێ وهگرتین وچوو نك ههڤالهكا خۆ ل تاخێ (محرم بهگێ) دا ئیجازا خۆ لێ ببۆرینت.. ب ڕاستى بێنا وێ ل نك ههڤالا وێ پتر دهات، دهمهكێ خۆش د گهل بۆراند، چو ئالۆزى ونهخۆشى نهدیتن، بیرهاتنێت كهڤن نهبن دیسا ترسا ژ پاشهڕۆژێ.
دهمێ زڤڕینێ بۆ قاهیره نێزیك بوو، چ ڕۆژهك بوو! دیت عهطوه ل وێرێ یێ ڕوینشتى بوو.. دهیكا وێ ب دلۆڤانى ڤه ئهو دا بهر سنگێ خۆ، تژى ماچ دانانه ڕویێ وێ، بابێ وێ ژى ئهو ئهنیا وێ ماچى كر ودوعا بۆ كرن، بچویك وخهلكێ مالێ ههمى پێ وهرهاتن وكهیفخۆشیا خۆ ب هاتنا وێ دیاركر، دلێ وێ تژى ڤیانا ژ ڕاستى بوو، ئهوا ژ دلى دزێت.
عهطوه حێبهتى ما، تهماشهكره ڤى دیمهنى،نهبیلا ب ك وى ڤه چوو وگۆت:
ــ تویێ چاوانى عهطوه؟
وى ههردو لهپێت خۆ كرنه دناڤێك دا ودانانه بن ئهرزنكا خۆ وگۆت:
ــ وهكى تو دبینى.. ئهز ل هیڤیا ته شڕ بووم، نهخاسم دهمێ ئهز چوویمه ئهسكهندهریێ ومن تو ل ئۆتێلێ نهدیتى.
ــ تو چوویه وێرێ؟
ــ بهلێ، مانێ یا دورست نهبوو ڤى دهمى ههمیێ ئهز ته بهێلم وپسیارا حالێ ته نهكهم..
وێ سهرێ خۆ هژاند وگۆت:
ــ ل من نهگره..
ــ ههردهم تو ژ من دڕهڤى.. نزا بۆچى؟
ــ عهطوه ڤێ هزرێ نهكه.. من نهدزانى كو تو دێ ئێیه وێرێ، ئهگهر من زانیبا دا مینمه ل وێرێ.
ب كهرب ڤه بهرێ خۆ دایێ وگۆت:
ــ ته دزانى..
ــ تو یێ دلخرابى.. من ژ كیڤه دزانى؟
ــ ب زیرهكیا خۆ..
دا كو باوهریا وى ب خۆ بینتهڤه نهبیلایێ بۆ خۆ گۆت:
ــ دڤێت تشتهكى بكهم دا شۆلا خۆ ب بێ دهنگى ببهمه سهرى..
ب نك ڤه چوو دهستێ خۆ دانا سهر ملێ وى، ژ پیان ڤه ڕاوهستیا ب ڕهخ ڤه وگۆت:
ــ ئهڤ شهڤه كیڤه بچین؟
گڕنژى و ب كهیف ڤه گۆت:
ــ مسۆگهر ئهم ناچینه سینهمایێ..
ــ ئهز دزانم.
وى گۆت:
ــ ڕوینشتنا ل ئۆتێلا (میناهاوس) زێده یا خۆشه.
وێ گهلهك ب حهز ژ ئۆتێلان نهدكر ووێ ب سهروبهرێ وان نهخۆش وو، جلكێت شهڤبێریان، پهرداغ وڕۆناهیێت نزم، زهنگینێت پاران بهرددهنه سهر مێزان.. نزانت بۆچى، بهلێ ئهو پێ دحهسیێت كو وژدانا وێ قهبویل ناكهت وپێ نهخۆشه، بهلێ چو چاره نینه، دڤێت هندهك جاران ل دویڤ وى بچت دا باوهریا وى پێ بێت بهلكى پشتى هنگى ئهو ڕێكهكا قورتالبوونێ بۆ خۆ ببینت..
عهطوه ڕاست ڕابووڤه وگۆت:
ــ ما بۆچى ئهم ڤێ گاڤێ ناچین؟
دهیكا وێ گۆت:
ــ ئهو ژ بهر سهفهرێ یا وهستیایه، بلا بێهنا خۆ ڤهدهت، هوین دشێن ئێڤارى بچن.
دهیك حێبهتى ما دهمێ كچا وێ لێ ڤهگێڕاى:
ــ نه دادێ من دڤێت ڤێ گاڤێ بچم.. ئهزا ژ عهطوهى خهریبم بوویم.
عهطوه گڕنژى، ودهیكێ گۆت:
ــ بهلێ..
عهطوهى ئاخفتنا وێ بڕى وگۆت:
ــ بهلێ چ؟؟ خهسیا من!
دهیكێ سهرێ خۆ هژاند:
ــ چوننه..
نهبیلایێ ل سهر ئاخفتنا وان گۆت:
ــ سوباهى دێ چمه خواندنگههێ.. ودێ كهڤمه بهر كارى دا ڤێ حهفتیا بۆرى بهدهل ڤهكهم، لهو دڤێت ئهڤ شهڤه بچم.
عهطوهى گۆت:
ــ ئهڤ خواندنگههه وهكى گرێیهكێ یه د حهفكێ ڕا، ما بۆچى و ناهێلى؟
ــ هێشتا زویه بۆ ڤێ چهندێ..
د تورمبێلا وى یا كهشخه دا ل بهر تهنشتا وى ڕوینشت بوو، پشتى دایه ڕێ ب چهند دهقیقهیهكان گۆتێ:
ــ عهطوه.
ــ چاڤێت عهطوهى.
ــ من داخوازهكا ههى دێ سۆزێ دهیه من بۆ من ب جهــ بینى؟
ــ ما ئهز دشێم داخوازا ته ب جهــ نهئینم؟
ــ دێ سویند خۆى؟
ــ ئهز ب ژین وقهدرێ تهكهمه ل نك من.
دهستێ خۆ ل دۆر ستویێ وى ئالاند وگۆتێ:
ــ من دڤێت سهرا سهلوایێ بدهم.
ــ سهلوا؟ سهلوا كیه؟
ــ ئهوا گرتى د گهل من..
ب حێبهتى ڤه لێ زڤڕى وگۆت:
ــ بۆچى هزرا وێ ته د ڤێ گاڤێ دا كر؟
ڤیا سهرێ وى مهزن كهت.. لهو گۆت:
ــ من سۆزا دایێ، من دگۆتێ دهزگرێ من مرۆڤهكێ مهزنه وێ باوهر نهدكر.
عهطوه كهنى وگۆت:
ــ ئهز دزانم ئهڤه ژى ڕهنگهكێ خۆمهزنكرنێ یه.. ئهز ژنكان باش دنیاسم، باشه.. جارێ دێ چینه گرتیخانهیا حهربى.
نهبیلایێ گۆتێ:
ــ ما ئهو ل وێرێ یه؟
ــ حهتا ئهم نهچینه وێرێ ئهم نهشێین ڤێ بكهڤین..
ــ مانێ ئهو یا ل موخابهراتا گشتى..
ــ وێرێ جههكێ وهختیه، دهمهكێ كێم گرتى لێ دمینن.
ب تورمبێل ڤه ژ دهرگههێ گرتیخانهیێ دهرباس بوو، لهشكهرى پستالا خۆ ل عهردى دا ودهستێت خۆ بۆ تهمهنێ بـلـنـدكــرن.. دهرگــههـێـت گــرتــى د گاڤـێ دا ڤهبوون، نهبیلا ب حێبهتى د ڤان تشتان دفوكرى، دلێ وێ خۆ دقوتا، ئهرێ حالێ سهلوایێ نوكه چیه؟ وێ ژ دل حهز ژ وێ كچێ كر.. ودلێ وێ دما پێڤه، دبت ڕۆژهك د سهر ڕا نهبۆرت ئهگهر ئهو هزرا وێ نهكهت.
گاڤا تورمبێل گههشتیه مهیدانا گرتیخانهیێ جـنـیـقـهك ب نهبیلایێ كــهفــت ژ بــهر وى تـشتێ وێ دیتى.. وێ باوهر ژ چاڤێت خۆ نهكر، ئهڤه زهلامهكه ب پیان ڤه یێ هلاویستیه وسهرێ وى یێ سهرنشیڤه، ب وهریسهكى ڤه یێ گرێدایه، گاڤا لهشكهرى وهریس كێشابا ئهو ههژار دا بلند بت، وگاڤا وهریس بهردابا ئــهو دا شـــۆڕ بـــت حـهتـا سهرێ وى دكهفته د ناڤ گهڕا ئاڤێ دا ولاڤ لاڤ دكر، پهقیشكێت باى ب سهر ئاڤێ كهفتن ونێزیك بوو ئهو بخهندقت.. نهبیلایێ ژ بنێ پیان كره ههوار وگۆت:
ــ ئهڤه چیه؟ ئهڤ زهلامه دێ مرت..
عهطوهى ب دهنگهكێ زڤر ڤه گۆت:
ــ هش!! شهرما مه نهبه، ئهو یێ كهفتیه ڕكێ وئعترافێ ناكهت..
ــ ئهڤه هۆڤاتیه.. عهطوه تو یێ ب ڤێ چهندێ رازى یى؟
ــ ئهڤه فهرمانا منه..
ــ نابیت..
ــ مهسهله ب تهناهیا وهلاتى ڤه یا گرێدایه.. دۆرێت مصرێ ههمى دوژمن ونهیارن.
ل سهر ملێ خۆ زڤڕى بهرێ خۆ دا مهیدانا مهزن، دیت قهصابخانهیه، چهند قامچى نزم دبن قێڕى ونالین وههوار بلند دبن وجهى تژى دكهن، خوینا سۆر ژ لهشێت ڕویس دهردكهفت، بێنهكێ باش تێ فوكرى.. پاشى دلێ وێ هاته گرتن وكهفت.
دلێ عهطوهى ژ كهنیێ خراب بوو، ڕاكر وبره د مهزهلا خۆ ڤه وگۆت:
ــ ژنك د دل نازكن!
د گاڤێ دا هنارته د دویڤ دختۆرى ڕا، صه دڕهوین ولهش ددڕاندن، عهطوهى فهرمان ب ڕاوهستاندنێ دا.. ههمى بێ دهنگ بوون، لهشكهرى دهست ژ تهعزیبێ كێشان، و (موحهقق) مانه ل جهێ خۆ.. دختۆرى شرانقهك بۆ دانا ههر زوى هشیار بوو، بهرێ خۆ دا دهور وبهرێت خۆ دیت ههمى چاڤن.. خوڕى:
ــ ئهڤه چیه هوین دكهن؟
عهطوهى گۆت:
ــ ئهڤه ههردهم چێ دبت.. ل ههمى جهــ وههمى دهمان..
ــ وهى بۆ خولى سهریا مرۆڤى!
عهطوه كهنى وگۆت:
ــ ئهڤ گۆتنه ته ژ كیژ فلمى وهرگرتیه؟ بێ گومان ته ئهو یا ژ زارڤهكهرێ مهزن (یوسف وههبى) گوهـــ لێ بووى..
وێ دهست دا زهندكا عهطوهى وگۆتێ:
ــ عهطوه، بۆچى تو ل ڤى جهى دژى؟ ئهرێ ئهڤهیه كارێ وى لهشكهرى یێ تو ئێك ژ ئهفسهرێت وى؟
عهطوهى جگارهك هلكرێ وگۆت:
ــ بــهلـێ.. مــانــێ لهشكهره ئهڤرۆ شهڕى دكهت، ودادیێ ب كار دئینت، وتهناهیێ دپارێزت، وشڤانیێ ل ههمى لایێت ژیانێ ل مصرێ دكهت.. ما ته گوه ل شۆڕهشێ نهبوویه؟
وێ ب حێبهتى ڤه گۆت:
ــ شۆڕهش؟
ــ بهلێ شۆڕهش گوهۆڕینه د ههمى تشتان دا.. یێت بهرى مه سهرنخوین بوون وئهم یێ ڕێكێ ڕاست دكهین.
دهستێ خۆ درێژ كره كۆمێت ڕاوهستیاى ل مهیدانا سۆر وگۆت:
ــ ئهوێت هه نه حاكمێت بهرى ههوه بوون..
ــ ڕاسته.. بهلێ ئهو یێ ل بهر سنگێ مه ڕادوهستن.
ــ ڤێجا چ تێدا ههیه؟
ــ خیانهت وغهدر وتێچوونا وهلاتى تێدا ههیه..
ــ كێ وه گۆتیه عهطوه؟
ــ مه..
ــ هوین كینه؟
ــ كوڕێت مللهتى، ئهوێت بارێ پاراستنا وى هلگرتى.
ــ ئهو ههش پێ وهرێت هه ژى كوڕێت مللهتینه..
دهستێ وێ گرت و ب نهرمى ڤه گڤاشت وگۆتێ:
ــ ئهگهر تو نهباى ئێكێ دى با ئهڤ گۆتنه كرى دا وى ڤهكوژم، ڤێ گۆتنێ ل بهرانبهر كهسێ دى نهبێژه، ژ باشیا تالعێ ته چو ههڤال نهماینه ل ڤێرێ، هشیار بى ڤان هزرێت خرابكهر بهلاڤه نهكهى.
چاڤێت خۆ دانانه سهرێك وخۆ بێ دهنگ كر.. دهنگێ وى هاتێ:
ــ دێ تشتهكى ڤهخۆى؟
ــ سوباس.. دلێ من یێ دهلاڤێت، دا بچین.
ــ چ؟ ما ته نهڤێت سهلوایێ ببینى؟
ــ كانێ یه؟
ــ بێنهكێ خۆ بگره..
عهطوه ل دویڤ وى كارى دهركهفت.. د دهرگههێ مهزلێ یێ ڤهكرى ڕا وێ سهحكر، زهلام ڕهزیل وسهرشۆڕ وكهسیره دڕاوهستیاى بوون، خهمێ ب سهر وان دا گرتبوو، هندهك ژى ل عهردى ددرێژكرى بوون نهدلڤین.. هێدى گۆت:
ــ خودێ! ئهرێ دبت ئهڤه ڕێكا خۆشى وڤیان وئازادیێ بت؟ ئهو كیژ دینه ڤێ گۆتنێ دبێژت؟ چاوا مرۆڤهكێ عهقلدار دێ ڤێ باوهر كهت؟ من هزره داڤێت پیلانهكا مهزن ل ڤى جهى یێت هاتینه ڤههاندن، وئارمانجا وێ ئهوه گیانێ مللهتى هلوهشینت، وبهرێ وى بدهته هندێ كو وى باوهریێ ب بهایێت بلند نهئینت.. وهى بۆ ڤێ بهلایێ! من چو ژ ڤێ ههمیێ نهدزانى، ئهز ئهوا دیرۆكێ بۆ جیلێ نوى دبێژم ووان فێرى قارهمانى وئازادى ودادیێ دكهم، وبۆ وان ب چاكى بهحسێ شۆڕهشگێڕان دكهم ودیرۆكا وان یا وان جوان بۆ ڤهدگێڕم؟ ئهو چ گونههبارى بوو من دكر؟ ئهرێ ژ ئهڤرۆ وێڤه ما دێ شێم ل بهرانبهر قوتابیان ڕاوهستم و ب ڤى كارى ڕابم؟ ئهز د ناڤ درهوهكا مهزن دا دژیام.. خهو ژ چاڤێت من ڕهڤى، ما دێ چاوا پشتى ئهڤرۆ نڤم؟ ڕۆژنامه درهوان دكهن، هۆنهرمهند درهوان دكهن، ئێزگه خهلكى د سهردا دبهن، حاكم درهوان دكهن، وپـتـرین مرۆڤ دحێبهتینه پشتى وان ڕێ ل بهر خۆ بهرزه كرى ونیشان ل بهر چاڤان وندا بووین وئارمانج ژ دهست داى..
عهطوه ب ژۆر كهفت وگۆت:
ــ تو سهلوایێ نابینى..
ب ترس ڕابووڤه وگۆت:
ــ مریه؟
ــ نه.. یا هاتیه بهردان، وئهڤه ناڤ ونیشانێت وێنه..
كاغهزهكا بچوك هاڤێته بهر.. دهمێ وێ كاغهز ڕاكرى وئهو تشتێ لێ نڤیسى خواندى.. وى گۆتێ:
ــ هشیار بى سهرا وێ نهدهى..
سهرێ خۆ ڕاكر وگۆت:
ــ بۆچى؟
ــ چونكى زێرهڤانى لێ دئێتهكرن؟
ــ ڤێجا ئهو چیه؟
ــ ئهو ئهڤهیه.. دا ههر كهسێ ڤیا خۆ بگههینتێ بێته نیاسین كو مرۆڤهكێ خهگهره، ونهدویره بێته گرتن.
سهرێ خۆ هژاند وكهفته هزران.. پاشى چانتێ خۆ ڤهكر وكاغهز بهردا تێدا وگۆت:
ــ بهلێ كهسهك نهشێت نهخۆشیێ بگههینته من هندى ئهز دهزگرا عهطوهى بم..
وى ب ڤێ گۆتنێ خۆش بوو، وگۆت:
ــ بهلێ.. ئهز دێ بێژمه وان كو تو ژى یا مهیى.
ــ یهعنى چ؟
ــ یهعنى تو جاسویسا مهیى..
ــ ته چ دڤێت بێژى؟
دهستێ خۆ دانا سهر ملێ وێ وگۆت:
ــ مهسهله نه هند یا ب ساناهیه.. لازمه تو بهایى بدهى، كارهكێ مهزن دێ كهفته سهر ملێت ته..
ــ بارێ چ؟
ــ دڤێت تو ڕاپۆرتهكا بهرفرهه بنڤیسى كانێ چ د ناڤبهرا ته وسهلوایێ دا چێبوو، ب ڤێ چهندێ دێ بییه ئێك ژ وێ موخابهراتێ یا خلمهتا سهرۆكى دكهت.
بهرێ خۆ دایێ باوهر ژ گوهێت خۆ نهكر:
ــ ته پێ خۆشه ژنا ته جاسووس بت؟
عهطوه كهنى وگۆت:
ــ تو ب ڤێ چهندێ ب ئهركهكێ پیرۆز یێ وهلاتى دێ ڕابى.
وێ د دهرگههێ ڤهكرى ڕا بهرێ خۆ دا مهیدانا سۆر، زهلام نیڤ ڕویس ل بهر ڕۆژێ دڕاوهستاى بوون، ئهڤه پهڕهكێ خوینهلۆیه ژ پهڕێن دیرۆكێ، پـهڕهكـه پهیڤێت وى ب خوینێ وبیبیكا چاڤان ودلان یێت هاتینه نڤیسین.. وێ گو ل عهطوهى دبوو وى دگۆت:
ــ ل سهرى مهسهله عنتیكه وغهریب دئێته پێش چاڤ، بێ گومان دێ زهحمهتێ كێشى، چونكى تو فێرى ڤى كارى نهبووى، وچونكى ئهڤ كاره د هزرا ته دا ب هندهك ئهخلاقێت خراب وبێ بها ڤه دئێته گرێدان، دێ باشه.. ل سهرى ئهم ههمى ب ڤى ڕهنگى بووین، بهلێ ڕۆژ بۆ ڕۆژێ گوهۆڕین دێ ب سهر بیر وباوهرێت ته دا ئێن، وتو دێ ب كهیفهكا زێده حهسیێى دهمێ بۆ ته مسۆگهر دبت كو تو یا ب كارهكێ گرنگ ڕادبى پێخهمهت پاراستنا سهرۆكى ووهلاتى..
نهبیلایێ دهست دا چانتێ خۆ.. ڕۆندكهكێ موژیلانكێت وێ تهڕكرن، بهلێ وێ ئهو ڤهشارت، وگۆت:
ــ دا بچین.. من دڤێت بنڤم.
ــ ومینا هاۆس؟
ــ بلا بۆ سوباهى بت.
ــ ههمى گاڤان تو دودلى و ل سهر چو گۆتنان تو ڕاناوهستى، وئهڤه كهربێت من ڤهدكهت.
ــ من هیڤیه تو ل من ببۆرى..
ــ بلا من قهبویله، نه ژ بهر ته، بهلكى چونكى ئهڤ شهڤه كۆنگرهیهكا گرنگ ههیه وپێتڤیه ئهز بچمێ.
بارانهكا هویر یا وهكى ڕۆندكان ژ عهسمانى دهاته خوار، ل عهوران خوڕین بوو خهم ودویراتى وخاترخواستن ژێ دهاته زانین.. خهلكى دكره غار ههر وهكى وان دڤیا ژ وێ سهرما وبارانێ بڕهڤن ئهوا دایه دویڤ وان.. سهلوا د دلێ وێ دا بوو، دگرى و ب ههردو چاڤێت تژى ترس ڤه تهماشه دكر.. دیسا ئهو زهلامێ ژ پیان ڤه هلاویستى، دهمێ وهكى قهلهندهران شۆڕ دبوو ومرن ب چاڤێت خۆ یێت وهرمتى ددیت، ل وێرێ صهیان ژى وهكى لهشكهر وئهفسهران ب لهز دبهزین وفهرمان ب جهــ دئینان، نهبیلایێ د پهرنجهركا تهڕ ڕا سهح كره عهسمانى.. بهلێ دیمهن یێ ئاشكهرا نهبوو، نه تشتهكێ دیار بهرچاڤ دبوو ونه هیڤیهكا گڕنژى.
