كوڕێ صهحرائێ..
ڕزگاركهر وپشتهڤانێ ههژاران!
ڕۆژ بهر ب ئاڤابوونێ ڤه دچوو.. وئێڤارى زهراتیا خۆ ب لێڤا عهسمانى دا ئینابوو خوارێ، دهمێ سهلمانى ڕێكا زڤڕینا بهر ب حصنێ جوهیان ڤه گرتى، سروودا داوودێ مهلك ئـهوا بهحسێ (كوڕێ صـهحرائێ) دكهت ب خۆشى ڤه ل سهر ئهزمانێ وى دگهڕیا..
((سروودان بۆ خودێ بێژن، ناڤێ وى ڤهلۆرینن
ڕێكێ بۆ خۆش بكهن، بۆ وى یێ ل صهحرائێ سویار ناڤێ وى یێ خودێیه، ل بهراهیا وى گازى بكهن، بابێ ئێتیمانه، وپشتهڤانێ بیژنانه
یێ دهربهدهر ل مالهكێ ئاكنجى دكهت،
وئێخسیران ژ تهنگاڤیێ دهرتێخت..
وهكى خوناڤێ ل سهر بهلگان دبارت،
ووهكى بارانێ عهردى ئاڤ ددهت،
ل زهمانێ وى كهیفا ڕاستگۆیان دئێت،
وهندى ههیڤا گهش بت ئاشتى بهلاڤ دبت،
ژ بهحرێ حهتا بهحرێ دكهفته بن دهستى،
و ژ ڕویبارى حهتا ڕهخێن عهردى یێن دویر،
ل بهرانبهر وى خهلكێ صهحرائێ دچنه سوجوودێ،
ونهیارێن وى ئاخێ دئالیسن!
بهختڕهشان ڕزگار دكهت، ووان ههژاران یێن بێ پشتهڤان،
بهڕهڤانیێ ژ ڕهزیل وبێڕێیان دكهت،
ونهفسێن فهقیر وژاران ژ نهخۆشى وتوندیێ دپارێزت..)).
بهلێ.. ئهڤهیه یێ ئیبراهیمى ومووساى وعیساى وگهلهك پێغهمبهرێن دى مزگینى ب هاتنا وى داى، ئهڤهیه یێ ئوسقوفێ عهمووریێ و(ئبن ههیبانى) وگهلهك خودێناسان خوزیا دیتنا وى ڕادهێلا.. ئهڤهیه ئهو ڕۆناهیا (رووزبه)ى نهنیاسى یا دڤێت بێت و ب سهركهڤت؛ دا وێ زۆرداریێ ژ عهردى ڕاكهت یا كیسراى وقهیصهرى وخوداوهندێن بچویكێن (موزهییهف) ل عهردى بهلاڤكرى، موحهممهده ئهو سروودا داوود پێغهمبهرى دبسترى، ئهو هیڤیه یا ئهڤه ژ بیست سالان پتره سهلمان لێ دگهڕیێت.. بهلێ ئهو چ ل ڤێ عهبدینیێ بكهت دا دهست وپێ لێ گرێداین؟ چاوا دێ شێت خۆ ژێ ڕزگار كهت، ووهكى گهیرهكێ سهربهست ب ئازادى خۆ گههینته ڕهفا خۆ.. خۆ نێزیكى ژێدهرێ ڕۆناهیێ كهت، ل شوینا ئهو د ڤى حصنێ دلڕهشان ڤه گرێدایێ حهز وگێولێ جوهیهكێ طهمهع وچاڤ برسى بت؟
ڤێ چهندێ هزرا وى گهلهك وهستاند.. ئهڤه پتره ژ دو سالان پێغهمبهرێ خودێ -سلاڤ لێ بن- گههشتیه مهدینێ، ووى باوهرى پێ ئیناى، بهلێ سهییدێ وى یێ جوهى ڕێكێ نادهتێ ئهو چاڤێن خۆ ب دیتنا پێغهمبهرى تێر بكهت، وتێنكا خۆ ب گوهدانا وان پهیڤێن عهسمانى بشكێنت یێن ژ دهڤێ وى دهردكهڤن، هندهك جارێن كێم تێ نـهبــن یـێـن ئـهو بــۆ خــۆ ئستغلال دكهت، دهمێ بهرێ وى ب كارى دكهفته مهدینێ..
وپێغهمبهرى -سلاڤ لێ بن-، وصهحابیێن وى ژى، پێ خۆش نهبوو ئهو ههڤالهكێ خۆ د داڤێن ڕهشێن جوهیهكى دا ببینن، لهو جارهكێ دهمێ پێغهمبهرى سهلمان دیتى وتێ ئینایه دهر كانێ چهند ئهو ب ڤى حالى یێ نهخۆشه یێ ئهو تێدا دژیت: حالێ عهبدینیێ، وحالێ دویركهفتنا ژ خۆشتڤیان، پێغهمبهرى -سلاڤ لێ بن- پێشنیار كر ئهو داخوازا خۆكڕینێ ژ سهییدێ خۆ بكهت.. بهلێ بهایێ خۆكڕینێ ئهو ژ كیڤه بینت، وئهو مرۆڤهكێ بیانى وعهبدهكێ بێ خودانه؟
بهلێ هیڤیا ب خودێ، پاشى ب (ڕزگاركهرێ ههژار وبێڕێیان) گهلهك بوو.. لهو وى داخواز ژ سهییدێ خۆ یێ جوهى كر ئهو ئازادیا وى بفرۆشتێ، وجوهیێ فێلباز ئێكسهر تێ ئینادهر كو هندهك د پشت ڤێ پێشنارێ ڕا ههنه، وسهلمان ئهوێ موسلمانهتیا خۆ ههر ژ ڕۆژا ئێكێ ل بهر سهییدێ خۆ نهڤهشارتى، ژ هندێ كێمتره بشێت خۆ بكڕت، مهعنا ئهڤ ڕێكه موحهممهدى وههڤالێن وى یا دانایه بهر، ڤێجا بۆچى ئهو مهسهلێ بۆ خۆ ئستغلال ناكهت، وهندى ژێ بێت بهایێ سهلمانى ل سهر وان گران بكهت؟!
سهییدێ وى (ئبن ئهشههلى) گۆتێ: باشه، دڤێت تو سێ سهد بنێن دارقسپان بۆ من بچینى، ب شهرتهكى ئهو خۆ بگرن، د گهل چل وهقیێن زێڕى.. ئهگهر ته وه كر ئهز دێ ته ئازا كهم!
ب دیتنا سهلمانى بهایهكێ (موستهحیل) بوو سهییدێ وى ئازادیا وى پێڤهگرێداى.. ڤێجا ئهو چ بكهت؟ مهسهلا خوكڕینێ ژ سهرێ خۆ بینتهدهر، یان ژى خۆ بهێلته ب هیڤیا خودێ ڤه وكارى بۆ بكهت؟ ب ڕاستى ئهو بۆ دهمهكێ نه یـێ كـێـم د ڤـهكرنا ڤێ ئالۆزیێ دا حێبهتى ما، حهتا ڕۆژهكێ وى دیتى قاصدهك ژ مهدینێ بهر ب حصنێ (بهنوو قورهیڤه) ڤه هات، و ژ سهلمانى خواست ئهو بێته مهدینێ دا پێغهمبهر وى ببینت! و ژ بهر كو سهییدێ وى یێ چاڤبرسى (تهوهقعا) هندێ كر ڤێ دیتنێ پهیوهندى ب كڕینا سهلمانى ڤه ههبت، وى ههر زوى دهستویرى دایێ.. و ل مهدینێ گاڤا پێغهمبهرى -سلاڤ لێ بن- ئهو دیتى، د ڕویێ وى دا گڕنژى وپسیار ژێ كر:
- ته چ كر؟
سهلمانى داخوازا سهییدێ خۆ بۆ پێغهمبهرى -سلاڤ لێ بن- ڤهگوهاست، ئهو داخوازا ژ تاقهتا سهلمانى زێدهتر.. ئینا پێغهمبهر -سلاڤ لێ بن- ل صهحابیێن خۆ زڤڕى وگۆت:
- هاریكاریا برایێ خۆ بكهن..
وهێشتا گۆتن د دهڤى دا، صهحابیان ژ ههمى لایان ڤه ب شهوق وڤیانهكا زێده ڤه شتلێن دارقهسپان كۆمكرن، ودهمهكێ درێژ پێڤه نهچوو سێ سهد شتل بهرههڤ بوون.. ودهمێ سهلمان زڤڕیه نك سهییدێ خۆ وژێ خواستى جهێ چاندنا وان بۆ وى دهسنیشان بكهت، سهلمان زڤڕى مهدینێ و ب هاریكاریا برایێن خۆ یێن نوى ژ ئهنصاریان وى ئهو شتل ڤهگوهاستنه جهێ چاندنێ.. وپێغهمبهر ب خۆ -سلاڤ لێ بن- د گهل سهلمانى چوو و ب دهستێ خۆ شتل هارى وى چاندن.. وچهند ڕۆژك ب سهر چاندنێ ڤه چوون، ودهمێ سهییدێ وى یێ جوهى دیتى ههمى بنێن دارقهسپان خۆ گرت، گۆتێ: چل وهقیێن زێڕى دمینن.
ئهوان ژ كیڤه بینت؟ مهسهلێ گهلهك ڤهنهكێشا، جارهكا دى قاصدێ پێغهمبهرى گههشته سهلمانى وداخواز ژێ كر بێته مهدینێ.. و ل مهدینێ پێغهمبهرى دهست دا پارچهیهكا زێڕى یا هندى هێكهكێ وگۆتێ:
- سهلمان، ڤێ ببه بده سهییدێ خۆ پێش پارێن وى ڤه..
سهلمانى گاڤا ئهو پارچه دیتى، ل بهر چاڤێن وى یا بچویك بوو، چاوا ئهڤه دێ چل وهقى ژێ دهركهڤت.. گۆت:
- ئهى پێغهمبهرێ خودێ.. ما ئهڤه دێ هند دهركهڤت هندى وى ژ من خواستى؟
پێغهمبهرى گۆتێ:
- ببه خودێ دهینێ ته دێ ڕاكهت..
و ل حـصـنـێ جـوهیان كانێ چهند كهیفا (ئبن ئهشههلى) ب وى زێڕى هات یـێ عــهبــدێ وى یێ فارسى كریه د دهستێ وى دا، پتر كهیفا سهلمانى هات كو ژ ئهڤرۆ وێ ڤه ئهو دێ یێ ئازاد بت بچته مهدینێ، ونێزیك ژ خۆشتڤیێ خۆ بژیت.
