بهایێ بهرێڕاكرنێ
وصوههیبى نه ب تنێ بهرى ڕۆمێ ڕاكر.. بهلكى وى بهرى گهلهك قورهیشیان ب خۆ ژى ڕاكر، هێشتا گازیا ئیسلامێ د مالا ئهرقهمى ڤه بوو، دهمێ صوههیبى خۆ دایه د گهل.. لهو صوههیب دئێته هژمارتن ئێك ژ دهرچوویێن مالا ئهرقهمى ئهوێن بارێ گرانێ بهلاڤكرنا ڤى دینى كهفتیه د ستویێ وان دا..
گاڤا قورهیشى ب گازیا ئیسلامێ ئاریاین.. ووان هزر كرى گرتن وتهعزیب وكوشتن، دویماهیهكێ بۆ ڤێ گازیێ دێ دانت، وچونكى جڤاكا مهكههێ جڤاكهكا عهشائرى بوو، ههر عهشیرهتهكێ یان بابكهكێ عهشیرهتێ خۆ ل مرۆڤێن خۆ كرنه خودان، ودهعیا وان قهبویل نهكر ئهو ببینن كهسهكێ بیانى ژ وان بێت وكوڕهكێ وان بگرت وبێشینت، ئهوێن خودان مرۆڤ وهكى پێغهمبهرى -سلاڤ لێ بن-، وئهبوو بهكرى، وسهعدێ كوڕێ ئهبوو وهققاصى، ب مرۆڤێن خۆ هاتنه پاراستن.. وئهوێن بێ مرۆڤ -وبارا پتر ژ خودان باوهران ل وى دهمى ژ وان بوون- هاتنه گرتن..
خهبباب، وبیلال، وصوههیب، وعهممار ودهیك وبابێن وى، وهندهكێن دى یێن وهكى وان، گرتن، وهندهك كومزریێن ئاسنى كرنه بهر، وبرن دانانه بهر چاڤێ ڕۆژا مهكههێ یا شاریاى، تێنى كرن، ئاڤا كهلاندى ب چهرمێ وان دا كر، ب شیشكێن ئاسنى داخكرن.. وههچى ڕهنگێ عهزابێ یێ جاهلییهتێ ل وى دهمى نیاسى دژى وان هاته ب كارئینان!
هندهك وهكى سومهیایا دهیكا عهممارى ب تهعزیبێ هاتنه كوشتن، وئێكێ وهكى بیلالى تهحهممولا ههمى ڕهنگێن عهزابێ كر، جار دلگرتى دبوو، وجار هشیار دبوو، جار باگوردان ددانانه سهر زكى، وجار وهریسهك دكره ستویێ وى ووهكى ههڤسارى دكره د دهستێ زارۆكان دا ودگۆتێ: ببهن ل كۆلانێن مهكههێ بگێڕن؛ دا خهلك بۆ خۆ پێ بكهنه كهنى.. وصوههیب وعهممار ژ وان بوون یێن هندهك گۆتنێن كافران پێ خۆش بت گۆتین؛ دا كوشتنێ ژ خۆ بدهنه پاش..
وسێزده سالان (فتنة وئبتلاء) درێژ بوو.. وصهبر وتهحهممول یا بهردهوام بوو، حهتا ڕۆژ هاتى خودێ دهرگهههك بۆ خودان باوهران ڤهكرى، وجههك بۆ مشهختبوونێ ل بهر وان هاتیه دهسنیشانكرن، وكاروانى بهر ب باژێڕێ یهپربێ ڤه دا ڕێ..
پشتى پێغهمبهرى -سلاڤ لێ بن- جههكێ ئهمین بۆ گازیا خۆ ل مهدینێ پهیدا كرى، وسۆز وپهیمان ژ ئهوس وخهزرهجیان وهرگرتى كو ئهو بهڕهڤانیێ ژ وى وگازیا وى بكهن، ودهرگههێ باژێڕێ خۆ بۆ ههڤالێن وى ڤهكهن، وى دهستویرى دا ههڤالێن كو ههر ئێك ژ وان، ب وى ڕهنگێ ئهو موناسب دبینت، بچت وقهستا باژێڕێ یهپربێ بكهت.. ودهمهكێ درێژ پێڤه نهچوو مهكههـ ژ موسلمانان ڤالا بوو، هژمارهكا كێم ژ وان، ژ بهر هندهك ئهگهرێن خۆ یێن تایبهت مان.. د گهل پیغهمبهرى ب خۆ -سلاڤ لێ بن- وهندهك ههڤالێن وى یین نێزیك، وهكى ئهبوو بهكرى وعهلى..
صـوهـهیـب مـرۆڤـهكـێ زیـرهك بوو شیرێ خۆ، وكێم كهسێن وهكى وى سهكڤان د ناڤ قورهیشیان دا ههبوون.. لهو پێغهمبهرى -سلاڤ لێ بن- حهز دكر ئهو وئهبوو بهكر وصوههیب پێكڤه مشهخت ببن، بهلێ كاودانهكێ نه گهبیعى چێبوو ئێكا هند كر پێغهمبهر -سلاڤ لێ بن- ب شهڤێ و ب دزى ولهز ڤه ژ مهكههێ دهركهڤن، وچهند ڕۆژهكان خۆ د شكهفتێ ڤه ڤهشێرن، پاشى ڕێكهكا ب چهپ وچویر بدهنه بهر خۆ، دا ژ دهستێن قورهیشیان ڕزگار ببن.. وپشتى خهبهرێ دهركهفتنا پێغهمبهرى وئهبوو بهكرى بهلاڤبووى، صوههیبى ل مهكههێ خۆ موحاصرهكرى دیت، بهرێ كافران ما لێ، وهاتن وچوونێن وى ل سهر حسێبكرن، و ژ بلى وێ نهخۆشیا صوههیبى ژ وان دیتى، تشتێ پتر باژێڕ د چاڤێن وى دا ڕهش وتارى كرى ئهو بوو پشتى خۆشتڤى وههڤالێن وى ههمى مشهخت بووین، ئێدى صهبرا وى ل مهكههێ ههمیێ نائێت.. دێ بێژى نه ئهو باژێڕه یێ ئهڤه هنده ساله ئهو لێ دژیت، وخۆشیا خۆ لێ دبینت..
- چ بكهت؟
ب چى ڕێكا ههبت دڤێت ئهو ژى خۆ ب ههڤالێن خۆ ڕا بگههینت، بهلێ چاوا.. وبهرێ كافران یێ لێ؟
دویماهیێ وى بڕیارا خۆ دا..
