دیتنا سهرێ داڤێ
بـۆچـى عـهدهتـێ ڤـێ دنـیـایـێ یێ بهردهوام ئهوه ئهو ناهێلت پهرداغێ خۆشیێ د دهستێ ئهڤینداران دا ب دویماهى بێت بێى ئهو چهرخهكا وهسا لێ بدهت، دلێن وان وهسا هویر هویر بكهت كو ئێدى قهت وقهت ئهو خۆ لێك نهدهن؟
بۆچى گاڤا ئێك ژ وان هزر كر كو هنده ئێدى د ناڤبهرا وى وگههشتنا ئارمانجێ دا بهوستهكا ب تنێ مایه، ئێغبال ڕویێ خۆ دێ ل وى وهرگێڕت، وجارهكا دى دربێ دویراتیهكا دویر وهشینته دلێ وى، وهێلته ب تنێ؟
ئهڤه هندهك ژ وان پسیار وگازهندهیێن تهعل بوون یێن هاتینه سهر هزرا وى دهمێ وى سیبهرا مرنێ د ناڤ چاڤێن سهیدایێ خۆ یێ نوى ڕا دیتین، سهیدایێ وى ئهو ئوسقوفێ تازه ل كهنیسێ هاتیه دانان یێ كو شیاى ب پاكى ودلساخیا خۆ وێ ئنطباعا ڕهش یا بۆ وى ژ ئوسقوفان چێبووى جارهكا دى سپى كهتهڤه.. ئهو سالهك تێ نهبوو شڤانیا خهلكى كهفتیه د دهستان دا، بهلێ ئهو ڤیانا ئهو شیاى د ڤى دهمێ كورت دا بكهته د دلێ (جحێلێ فارسى) دا ئهوێ ژیانا خۆ بۆ خزمهتا كهنیسێ تهرخان كرى تێرا عهمرهكێ تمام ههبوو، بهرى ئهو بهرپهڕێن پهرتۆكا پیرۆز بۆ وى بخوینت، وپهیڤێن خودایى وشیرهتێن بلند بگههینته وى، وى ب ئهخلاق وڕهفتارێ خۆ یێ پاقژ ئهو مهعنا دگههاندنێ یێن نڤیسهرێن پهرتۆكا پیرۆز دڤیان د پهیڤێن خۆ دا (تهجسید) بكهن، هندهك جاران ل سهر زهمانێ ئوسقوفێ بهرێ، دهمێ وى (تهعالیمێن مهسیحى) د ئنجیلێ دا دخواندن، یان ژ زانایێن دینى گوهـ لێ دبوون، گومان بۆ وى چێ دبوو كو كهسهك ل سهر ڕویێ عهردى ههبت بشێت ڤان (تهعلیمان) ل سهر عهردێ واقعى ب جهـ بینت، وهندهك جاران وى ب دزى ڤه د گهل خۆ دگۆت: ههما ئهڤه هندهك گۆتنێن (مثالینه) ئهم خهلكێ خۆ پێ بهنج دكهین، ئهگهر نه.. پا كانێ ئهو كهسێ ههبت ڤان (تهعالیمان) د ژیانا خۆ دا بكهته ڕهفتار؟
بهلێ گاڤا وى سهیدایێ خۆ یێ نوى دیتى، و ژ نێزیك نیاسى ئهو شیا (ئنقلابهكا سهرانسهرى) د هزر وبیرێن وى دا بكهت، بهرێخۆدانا وى ب تمامى بگوهۆڕت، ئێدى باوهرى بۆ وى پهیدا بوو كو د شیان دایه ئهو (تهعالیمێن) پێغهمبهر پێ هاتین ببنه ڕهفتارهكێ واقعى خهلك ل سهر ب ڕێڤه بچن، وئهخلاقهكێ عهمهلى ڕۆژانه ئهو تهعامولێ پێ د گهل ئێك ودو بكهن.. تشتێ پـتـر ژ هـهمـیـان ئـهو ب ئوسقوفێ نوى ڤه گرێداى ئهو باوهریا مهزن نهبوو یا وى ل نك دیتى، وئهو زانینا بهرفرههـ ژى نهبوو یا وى ههى، بهلكى ب جهئینانا وى یا تمام بوو بۆ وان شیرهتان یێن وى د وهعزێن خۆ دا ل خهلكى دكرن..
بهلێ دیاره سهعادهت هێشتا د گهل دلێ وى ئاشت نهبوویه؛ چونكى ئهو ههر زوى ل بهر چاڤێن وى غهواره بوو.. ل ئێڤاریهكا زهراتیا وێ ب لێڤا عهسمانى دا دهاته خوار، دا ڕێكێ بۆ شهڤهكا تارى خۆش بكهت، سهیدایێ وى یێ خۆشتڤى كـهت! گـاڤـا ئـهو هـویـر د دێمێ وى فوكرى، وى سهرپهشكێن مرنێ یێن ب ترس د پشت وان پرسكان ڕا دیتن یێن ل سهر دێمێ وى دبهلاڤ، دهنگهك ژ كویراتیا دلى هاتێ كو دهمێ خاترخواستنێ چو نهمایه، لهو ب هندهك پێگاڤێن ب خهمێ دگران ئهو ب نك وى تهختى ڤه چوو یێ ئوسقوف ل سهر هاتیه رازاندن، ترارهكێ تژى ئاڤا تهزى د دهستان دا بوو، گاڤا گههشتیه ب ڕهخ تهختى ڤه، دهستێ پیرهمێرێ ل بهر سهكهراتێ گرت و ب دو چاڤێن گرى ڤه ماچى كر، پاشى پاتهك د وى تـرارى هـلانــد و ب ئـهنـى ودێـمـێ وى دا ئینا خــوار، ههر وهكى وى دڤیا ب وێ ئاڤا تهزى هندهكێ ژ گهرماتیا مرنێ ل سهر وى سار بكهت، وگاڤا وى دیتى سهیدایێ وى ههردو چاڤێن خۆ ب گرانى ڤه ڤهكرن، كهیفهكا زێده بۆ وى چێبوو، وههر چهنده وى دزانى كو چو مهعنایێن ڕابوونێ د ڤێ چاڤ ڤهكرنێ دا نینن ژى، بهلێ گهلهك جاران مرۆڤى دڤێت خۆ ب كوریا هیڤیهكێ ڤه بگرت، ئهگهر خۆ یا ژ درهو ژى بت!
هـنـدى هـاتـه خـۆ نهشیا وێ ڕۆندكێ بگرت ئهوا ژ چاڤێن وى هاتیه خوارێ، ب ڕهخ تهختى ڤه كهته سهر چۆكێن خۆ، و ب ههردو دهستێن خۆ دهستێ وى گرت وشداند، وهكى وى زارۆكى یێ دترست تشتهكێ وى یێ عهزیز ژ دهستان دهركهڤت ڤێجا حشكێ بگرت وبهرنهدهت، پاشى ب دهنگهكێ نزم ڤه گۆتێ:
- ئهى باب! تو چاوا خۆ دبینى؟
و ب دهنگهكێ هێشتا نزمتر ڤه ئوسقوفى گۆتێ:
- وهكى تو دبینى.. خێرا خودێ ل سهر من گهلهكه..
پشتى دهلیڤهیهكا كورت ژ بێ دهنگیێ وى ب خهمهكا زێده ڤه گۆتێ:
- سهیدا.. تو باش دزانى ئهڤه نێزیكى سالهكێیه ئهزێ د گهل ته، وخودێ شاهده كو من ب ڕهنگهكێ وهسا حهز ژ ته كریه یێ بهرى ته من پێ حهز ژ كهسێ نهكرى، وتو یێ دبینى ئهڤه تو یێ د چ حالى دا، ڤێجا ئهز حهز دكهم تو بێژیه من كانێ پشتى ته ئهز قهستا كێ بكهم، وئێكێ وهكى ته ئهز دێ ل كیڤه بینم خۆ بگههینمێ؟
پشتى سهیداى بێنهكێ چاڤێن خۆ داناینه سهرێك وچوویه هزران، ل شاگردهیێ خۆ زڤڕى ڤه وگۆتێ:
- كوڕێ من! هندى ئهزێ هزرێن خۆ د وان كهسان دا دكهم یێن وهكى مه كهسهك نائێته بیرا من، مانێ تو یێ دبینى خهلك چاوا یێن هاتینه گوهاڕتن، وڕێكا خودێ یا ل بهر خۆ بهرزهكرى.. بهس ههڤالهكێ من ل مویسلێ یێ ههى، ئهو ژى وهكى مهیه، یێ ل فلان كهنیسێ، ههڕه نك سلاڤێن من بگههینێ وبمینه د گهل وى تو ژێ خوسارهت نابى.
و د گهل ب دویماهى هاتنا ڤێ گۆتنا وى، ئهو پیچكا مایى ژى ژ ژیانا وى ب دویـمـاهـى هات، ووهكى وى مرۆڤى یێ ههمى تشتێن خۆ ژ دهست داین ئهو ب گرى وشكهستن ڤه ژ مهزهلا ئوسقوفى دهركهفت؛ دا وى خهبهرێ نهخۆش بگههینته خهلكێ كهنیسێ..
و د گهل ههلاتنا ڕۆژا دى، جحێلێ فارسى مێدهكا جلكێن خۆ پێچا ودهست دایێ، وزوى خۆ ب وى كاروانى ڕا گههاند ئهوێ ب لایێ مویسل ڤه چووى.
