بهایێ ڕاستیێ
پشتى دههقان وكوڕێ خۆ گههشتینه مال وماینه ب تنێ د گهل ئێك، وى ڤیا ڕاستیا گیرۆبوونا وى بزانت، وكانێ ئهو كیڤه چووبوو؟ وبۆچى وى ئهو كار ب جهـ نهئینا یێ وى هێلایه ب هیڤیێ ڤه؟
كوڕكى درهو ل بابێ خۆ نهكر، ومهسهله وهكى چێبووى بۆ وى ڤهگێڕا، و ژ بیر نهكر دویماهیێ بێژت:
- یا ژ من ڤه دینێ وان ژ دینێ مه چێتره..
ڤێ تهعلیقا وى یا دویماهیێ تهزینكهك ب سهر لهشێ بابێ وى دا ئینا خوارێ؛ چونكى وى نیشانێن خرابیێ تێ ئینانهدهر، وترسیا ڕۆژهك بێت كوڕێ وى یێ خۆشتڤى، ئهوێ ههمى هیڤیا وى ئهوه دهمهكى شوینا وى بگرت، د سهردا بچت، ودینێ باب وباپیرێن خۆ بهێلت، و ب دویڤ ڤى دینێ غهریب بكهڤت ئهوێ ل وهلاتێ رۆمێ دهسههلاتدار بووى، وهندهك سهرپهشكێن وى ب لایێ وهلاتێ وان ژى ڤه هاتین، هنگى كوڕێ وى دێ ژ دهستان دهركهڤت، وئهو ههمى هـیـڤـیـێـن وى د سـهرێ خــۆ دا ئاڤاكـریـن دێ ب سهرێك دا ئێنه خوار، لهو وى ب مجدى ڤه گۆته كوڕێ خۆ:
- كوڕێ من! چو خێر د وى دینى دا نینه.. ودینێ ته ویێ باب وباپیرێن ته هزار جاران ژ وى دینى چێتره.
ودهركهفت، ههر وهكى دڤیا ب ڤێ چهندێ ئاخفتنێ ب دویماهى بینت!
بــهلــێ ئــهڤ حــوكـمـێ عاگفى وسهرپێ ل دلێ كوڕى نههات، ئهوێ ههست ب تێنكاتیێ بۆ ڕاســتــیــێ دكــر، لهو هـێـشـتـا بابێ وى ژێ دویر نهكهفتى، وى ب دهنگهكێ وهسا یێ بابێ وى گوهـ لێ ببت گۆت:
- نه ب خودێ.. دینێ مه ژ یێ وان چێتر نینه!!
دههقانى وهسا د خۆ ئینا دهر كو وى گوهـ ل كوڕێ خۆ نهبوو، بهلێ ڤێ ئصرارا وى ل سهر هندێ كو دینێ قهشهى ژ دینێ باب وباپیرێن وى چێتره ترسهكا ڤهشارتى یا مهزن د دلى دا پـهیــدا كــر، لــهو وێ شــهڤـێ ههمیێ وى هزرێن خۆ د هندێ دا دكر كانێ ئهو چ بكهت دا بشێت بهرێ كوڕێ خۆ ژ ڤى دینى وهرگێڕت ئهگهر هات وهزرا چوونا د ڤى دینى دا خۆ ل سهرى دا، گهلهك بۆچوون دانانه بهر سنگێ خۆ وپشتى وى ئهو بۆچوون ژ ههمى لایان ڤه هلسهنگاندین، ههمى دانه لایهكى، ودهمێ ههست ب وهستیانا هزرى كرى، وبهرى خۆ ب دهست خهوێ ڤه بهردهت د گهل خۆ گۆت:
- ب چى ڕهنگێ ههبت، دڤێت نههێلم ئهو ژ دهستێن من دهركهڤت!
وڕۆژا د دویڤ دا دهمێ دیتى كوڕێ وى یێ هندهك هێجهتێن سست گرت دا نهچته نۆبا خۆ د هلكرنا ئاگرێ پیرۆز دا، وئهو ئهو بوو یێ چو جاران سستى د ڤێ چهندێ دا نهكرى، ئهو د مهسهلا وى دا كهفته شكێ، وئهو شك ههرزوى ل نك وى بوو تشتهكێ مسۆگهر دهمێ وى دیتى كوڕێ وى جارهكا دى ل مهدحێن وى زڤڕى ڤه یێ وى دوهى ل دێرێ دیتى، وكو ئهو دینهكێ چێتره ژ دینێ مزدهكى ئهوێ ئمبراتووریهتا فارسان یا مهزن ل سهر دچت، لهو وى ب عێجزى وگهفكرن ڤه گۆته كوڕێ خۆ:
- دا بۆ ته بێژم، جارهكا دى من گوهـ ل ته ببت تو ڤێ ئاخفتنێ بێژى، یان تو قهستا دێرێ بكهى، مهزهلا ته بۆ ته دێ بته ئهو قهبر یێ تو حهتا حهتایێ ژێ دهرنهكهڤى!
وچوو ژ مال دهركهفت، پشتى ئیشارهت دایه هندهك خزمهتكارێن قهسرێ كو چاڤێ خۆ بدهنێ كانێ ئهو دێ چ كهت.. وكهربا وى زێده یا مهزن بوو دهمێ هندهك زهلامێن وى جاب گههاندیێ كو كوڕێ وى ل شوینا بچته پهرستگههێ؛ دا نۆبا خۆ د هلكرنا ئاگرێ پیرۆز دا بكهت، ئهو ژ باژێڕێ دهركهفت وچوو قهستا دێرێ كر، وڕۆژا خۆ ههمى ل نك قهشهى بۆراند، لهو ب غهزهب ڤه ئهو زڤڕى مال وبڕیارهكا خهگهر د گهل دا بوو.
ل مال داخوازكر كوڕێ وى د گهل خزمهتكارێ وى یێ تایبهت ئاماده ببن، وپشتى ئهو ههردو بهرههڤ بووین، وى بهرێ خۆ ب نك (پهرڤینى) ڤه دا، ودهستێ خۆ ب نك كوڕێ خۆ ڤه درێژكر، و ب دهنگهكێ ڤهلهرزیاى ڤه گۆت:
- زنجیرێ دێ ئێخیه ههردو پیێن وى، ودێ وى د مهزلا وى ڤه گرێدهى، نه ب شهڤ ونه ب ڕۆژ ئهو ژێ دهرناكهڤت، حهتا ئهو ڤێ هزرێ ژ سهرێ خۆ دئینته دهر، یان ژى دمرت!
پهرڤینى چو ڕێ ل بهر نهبوون ژبلى هندێ كو سهرێ خۆ بۆ بچهمینت، وبێژتێ:
- بهلێ ئهز بهنى، ئهمرێ تهیه.
پاشى ل كوڕكى زڤڕى وچنگلێ وى گرت و ب لایێ مهزهلا وى ڤه بر.
پشتى وى خۆ دیتى یێ ب تنێ وگرێداى د مهزهلا خۆ ڤه ئهوا حهتا دوهى بۆ وى جهێ تهناهى ورحهتیێ بوو، وئهڤرۆ بۆ وى بوویه گرتیخانهیهكا تهنگ وتارى، دهرگههێ هزركرنێ ل بهر عهقلێ وى پتر ڤهبوو، ووى ئهڤ گرتنه بۆ خۆ ب دهلیڤه زانى كو حیساباتێن خۆ ههمیان دوباره بكهته ڤه، بابێ وى ئهگهر بشێت لهشێ وى د نـاڤــبــهرا ڤــان هــهر چــار دیواران دا گرێدهت ژى ئهو قهت نهشێت دلێ وى ژ وێ ڕاستیێ گرێدهت یا ئهو ل نك قهشهى ب سهر هلبووى، ئهگهر بابێ وى بشێت ههردو پیێن وى زنجیر بكهت دا ئهو قهستا دێرێ نهكهت و ل وێرێ گوهداریا شیرهتێن ئنجیلێ نهكهت، ئهو قهت نهشێت عهقلێ وى زنجیر بكهت كو ئهو هزرا خۆ د كیتابا خودێ یا ڤهكرى دا بكهت، كو عهرد وعهسمانن.. پشتى هنگى ما چیه ئهگهر ئهو ژى ببته ئێك ژ وان شههیدێن رحا خۆ ل سهر دهپێ خۆگۆریكرنێ پێشكێشى ڕێكا مسیحى كرى، یان د خهندهكێن زۆرداران دا هاتینه سۆتن وبووینه چرایێن ڕێكا ڕاستیێ وهكى قهشهى بهحس بۆ كرى؟! نه.. بلا بابێ وى هزر نهكهت ئهو ب ڤێ زنجیركرنێ دێ شێت دلێ وى ژ وێ ڕاستیێ سار كهت یا ل بهر چـاڤــان ئاشـكـهرا بووى، ئهڤه پشكهكا بچویكه ژ بهایێ ڕاستیێ ئهو ددهت.
