ڕۆژا لیقائێ
دهمێ ئهسمائێ دهستویرى دایه كوڕێ خۆ كو ئهو بمرت سهرفهراز، وهكى ژیاى سهرفهراز، وبۆ جارا دویماهیێ ئهو دایه بهر سنگێ خۆ پشتى ئێكا هند ژێ چێكرى ئهو كومزریێ خۆ یێ ئاسـنـى ژ بـهر خـۆ بـكـهت، و ب سنگهكێ ڤهكرى پێشوازیێ ل خۆگۆریكرنێ بكهت، ئهسمائێ ههست كر ههر وهكى ئهو ما بێ دل، وما پشتى عهبدللاهى دلێ چ دێ وێ ههبت پێ بژیت؟ ئهى ژیانا پشتى خۆشتڤیان نه تو بى ونه ئهو منهتا تو ل مرۆڤى دكهى!
وعهبدللاهى سهرێ خۆ ژ سنگێ پیره دهیكا خۆ ڤهكر، وپشت دا خانیكێ وێ یێ خر وخالى، وبهر ب مهیدانا مرنێ ڤه چوو.. شهڤێ هێشتا لهشكهرێ خۆ یێ تارى ژ دۆل ونهالێن مهكههێ ڤهنهكێشا بوو، وسحارێ داڤه سپیێن خۆ ل بهر بهژنا عهسمانى نه نهخشاندبوون، بێ دهنگى هێشتا وهكى بهرێ یا دهسههلات بوو ل ههر جههكى، دا بێژى شهڤ شاعرهكه كهفتیه هزران، یان عابدهكه د خهلوێ دا دژیت..
ل بهر سیبهرا تارى وبێ دهنگیا شهڤێ عهبدللاهـ ب تنێ دچوو، قهستا وێ كتا مایى ژ ههڤالێن خۆ یێن دلسۆز كر، بهرێ وى ل كهعبێ بوو، ب خاترخواستنا وى بـۆ دهیكا وى دنیا هـهمـى د چــاڤــان دا مــر، و ژ مـرنـێ پێڤهتر تشتهك وى ل بــهرا خـۆ نهددیت، تیشكێن تاڤه ههیڤێ ئهوێن عهسمان دخهملاند وژۆردا بهر ب عهردى ڤه دهاتنه خوارێ ونهالێن مهكههێ ب زهراتیا خۆ زهلال دكرن، چاڤێن وى ب نك خۆ ڤه نهدكێشـان، ودلێ وى دهستهسهر نهدكر، وما مرۆڤێ حـوكـم ب قنارهكرنێ ل سهر هاتبته دان دێ چ جوانیێ د گڕنژینا گولێ وخواندنا بلبلى دا بینت وئهو دزانت پشتى دهمهكێ كورت قهبرێ تهنگ وتارى دێ وى د ناڤ خۆ دا ڤهشێرت؟ هنگى نه بلبل ئاوازێن خۆ بهس دكهت، ونه گول بهلگێن خۆ دوهرینت، ونه كانیك شڕشڕا ئاڤا خۆ ڕادوهستینت، ههر تشتهك وهكى خۆ دێ مینت، ڕۆژ ههر دێ ههلێت ودنیایێ ڕوهن كهت، ههیڤ ژ شهڤێ دویر ناكهڤت، بهار ژ سالێ ڤهناقهتیێت.. ب تنێ یێ كێم دبت دێ ئهو بت، ویێ كۆڤاندار دبت دێ ئهو دل بت یێ ڤیانا وى د ناڤ خۆ دا حهواندى!
وعهبدللاهـ وهكى وى مرۆڤێ بێى هاى ژ خۆ ههبت ب ڕێڤه دچت گههشته بهر دهرێ حهرهمێ، ههڤالێ وى یێ نێزیك عهبدللاهێ كوڕێ صهفوانى ئهوێ ژ دوهى وهره چهكێ خۆ نهداناى، هاته بهراهیێ.. ههر چهنده بهرێ عهبدللاهى لێ بوو ژى، بهلێ ههر وهكى وى ئهو نهددیت، هزرا وى ل نك دهیكا وى یا ههژار بوو، ئهوا ئێغبالا وێ ئهو هند هێلاى حهتا ببینت دهمێ دهستێ فهنابوونێ دگههته باغچهیێ شینێ كوڕێ وێ، ئهوێ نوكه ب دلێ خۆ و ب دلێ وێ ژى ب پیێن خۆ قهستا مرنێ دكهت..
- ئهى (أمیر المؤمنین)..
و.. (أمیر المؤمنین) د بهر وى ڕا بۆرى دا بێژى وى نابینت..
- د شیانا زهلامێن مه دا ههیه، ئهگهر تو حهز بكهى، ڕێكێ بۆ ته ڤهكهن، حهتا تو ژ مهكههێ دهردكهڤى..
ودیسا (أمیر المؤمنین)ى بهرسڤا وى نهدا، ههر وهكى ئهو نه ل نك ههڤالێ خۆ، بهلێ وى د دل دا هزرێن خۆ د ڤێ چارهیێ دا كر یا كوڕێ صهفوانى دانایه بهر سنگێ وى.. ڕهڤ ژ مهیدانا شهڕى؟! وبۆچى دا نهمرت؟ وئهو تشتێ وى ودهیكا خۆ ئتتفاق ل سهر كرى چ لێ هات؟ ڕۆژ دهمێ ئاڤا دبت دنیا ههمى بێتێ نهشێت ڕێكێ ل تاریێ بگرت، ههر ڕۆژهكێ شهڤهكا د دویڤ دا ههى.. ڕاسته ههر شهڤهكێ ژى سپێدهیهكا دى یا د دویڤ دا ههى، بهلێ چ خێر د وێ سپێدهیێ دا ههیه یا ب سهر مرۆڤى دا دئێت ومرۆڤ ل بن سیبهرا ئالایێ زۆرداران بت؟
جوداهیا وێ ژیانێ ژ مرنێ چیه یا مرۆڤ تێدا وهكى كوریێ لێ دئێت بۆ زالمهكى، وێ بێژت یا وى دڤێت، وێ بكهت یا ئهو بێژت؟ نه.. ئێكێ وهكى كوڕێ زوبهیرى ونهڤیێ ئهبوو بهكرى یێ سهرفهرازى وڤیانا خۆگۆریكرنێ ژ ههمى لایـان ڤــه گــههـشتیێ ڕهڤێ ناهلبژێرت.. وكهنگى؟ پشتى ب دههان ههڤالێن خۆ د ڤێ ڕێكێ دا پێشكێش كرین..
- ته چ گۆت ئهى (أمیر المؤمنین)؟
- كوڕێ صهفوانى! باش گوهێ خۆ بده من..
عهبدللاهێ كوڕێ صهفوانى زانى بهرسڤا نه ب دلێ وى دێ ئێته گوهان، ما وگوهێن خۆ ڤهچنین..
- بهلێ (أمیر المؤمنین)..
- خرابترین زهلام د ئیسلامێ دا دێ ئهز بم، ئهگهر ئهز ژ وێ دویماهیێ ڕهڤیم یا من بهرێ گهلهك مرۆڤان بهرى خۆ دایێ.
پاشى كوڕێ زوبهیرى ههڤالێ خۆ یێ خۆشتڤى دا بهر سنگێ خۆ وگۆتێ:
- تو دزانى وان ئێك ژ سێ ڕێكان یا دانایه بهر من: بچم ل عهردێ خودێ یێ بهرفرههـ ل بهر رهحما وان بژیم، یان دهستێن من گرێدهن و ب ئێخسیرى بهرێ من بدهنه شامێ، یان كوشتن، ومن ووێ پیرهژنا ئهز نوكه ژ نك دئێم، ڕێكهكا ب تـنـێ هـلـبـژارت.. بهلێ من ئێك داخواز ب تنێ یا ژ ته ههى، تو دێ بۆ من ب جهـ ئینى؟
كوڕێ صهفوانى ب كزگریۆك ڤه گۆتێ:
- ئهگهر خۆ مرنا من ژى بت!
- نه.. ئهگهر خودێ حهز بكهت ژینا ته یا تێدا.. ئهڤرۆ ڕۆژا (لیقائێ)یه، وهێشتا ڕۆژ نهههلاتى ودنیا زهلال نهبووى، ههڕه خۆ خلاس بكه، تو یێ دهستویردایى ژ لایێ من ڤه..
- ئهز؟ بچم وته بهێلمه ب تنێ؟!
- بهلێ.. چاڤ ڕوهنیا من وخۆشیا من پشتى مرنێ ژى دێ د هندێ دا بت دهمێ ئهز بزانم تو یێ خلاس بووى.
عهبدللاهێ كوڕێ صهفوانى ب ڕهنگهكێ بنبڕ گۆتێ:
- تشتێ تو پێ رازى نهبى، ئهز ژى پێ رازى نابم.. ئهز ب وى خودایى كهمه یێ دلێن مـه گـههـاندینه ئێك، كانێ چاوا ژینا مه د گهل ئێك بوو مرنا مه ژى دێ د گهل ئێك بت!!
