ئەو تشتێن دورست د نڤێژێ دا بێنەكرن
هندەك تشت هەنە دورستە بۆ نڤێژكەری ئەو د نڤێژێ دا وان بكەت ، ودبت هندەك كەس هەبن هزر بكەن ئەو تشت چێ نابن ، بەلـێ یا دورست ئەوە ئەو تشت چێ دبن ، ژ وان تشتان :
1 ـ بۆ هەوجەیییێ دورستە بۆ نڤێژكەری ئەو ل سەر ملێ خۆ بزڤڕت، یان ب دەستی ئیشارەتێ بدەتە تشتەكی ، بەلـێ ب وی شەرتی ئەو لەشێ خۆ هەمییێ نەزڤڕینت ئـەگـەر دێ نڤێژا وی بەطال بت ، یەعنی ـ بۆ نموونە ـ ئەگەر نڤێژكەر ب خەطەرەكێ حەسیا وكەسەك ل نك وی هەبت پێ نەحەسیێت دورستە ئەو لـێ بزڤڕت و ب دەستی ئیشارەتێ ب لایێ خەطەرێ ڤە بكەت دا ئەو كەسێ دی پێ بحەسیێت .
2 ـ گـری د نـڤـێـژێ دا دورستە ، چ ئەو گری ژ ترسێن خودێ دا بت ، یان ژ بەر تشتەكێ دی بت وەكی هاتنا موصیبەتەكێ یان ئێشەكێ .
3 ـ ڕێـڤەچوونا كێم بۆ كارەكێ پێتڤی ب وی شەرتی بەرێ وی ژ قیبلێ نەئێتە وەرگێڕان ، ( نەسائی ) ژ عائیشایێ ڤەدگوهێزت ، دبێژت : جارەكێ پێغەمبەری ـ سلاڤ لـێ بن ـ د مال دا نڤێژ دكر ودەرگەهێ گرتی بوو ، من دەرگەهـ قوتا ئەو هات دەرگەهــ بۆ من ڤەكر وزڤڕی نڤێژا خۆ تمام كر ، وعائیشایێ ئاشكەرا كر كو دەرگەهــ ل لایێ قبلێ بوو .
4 ـ كوشتنا ماری ودویپشكی وتشتێ ب زەرەر د نڤێژێ دورستە .
5 ـ هلگرتنا بچویكی د نڤێژێ دا دورستە ، وپێغەمبەری ـ سلاڤ لـێ بن ـ جارەكێ د نڤێژێ دا نەڤیا خۆ ( ئومامە ) كچا زەینەبێ دانابوو سەر ملێ خۆ ، گاڤا دچوو ركووعێ وسوجوودێ وی ئەو ددانا وگاڤا ڕابوو هلدگرت .
6 ـ ڤەگەڕاندنا سلاڤێ ب ئیشارەتا دەستی دورستە .
7 ـ پاقژكرنا جهێ ئەنیا خۆ ددانتێ دورستە .
8 ـ ب كارئینانا كلینسێ یان پرتەكا پاتەی بۆ پێتڤییەكێ دورستە .
9 ـ گرتنا تەلەفوونێ ئەگەر هات و ژبیـر كربت بەری هنگی قفل بكەت دورستە .
وهەر كارەكێ دی یێ هەبت ئەگەر یێ كێم بت ویێ فەر بت ، وەكی خوراندنێ یان دورستكرنا جلكی .. وهتد .
