پێشگوتن
ب ناڤێ خودایێ مهزن و دلۆڤان حهمد و سوپاسى بۆ وى خودایى بن یێ قهنجییێن ئاشكهرا و ڤهشارتى د گهل مه كرین، و صهلات و سهلام ل پێغهمبهرێ وى بن یێ ئهم بهر ب ڕاستهڕێیا خودێ ڤه برین، و ههر كهسهكێ قهستا ڕێكا وى كرى ژ صهحابى و تابعى و دویكهفتییێن وان، ئهوێن وهكى ڕۆژا ل عهسمانێ ساهى بۆ ڤێ جیهانێ بووینه ڕۆناهى.
دهمێ من ڤیاى ئهز مهتنهكێ فقهى هلبژێرم، دا وهرگێڕمه سهر زمانێ كوردى، و شهرحهكا كورت ل سهر بدانم، بۆ هندێ دا خواندهڤانێ كورد تشتهكى -ئهگهر یێ كێم ژى بت- ژ فقها دینێ خۆ بزانت، و پشتى لێگهڕیان و پسیاركرنێ من دیت كو مهتنێ (الدرر البهیة في المسائل الفقهیة) یێ زانایێ ناڤدار ئیمام موحهممهدێ كوڕێ عهلى یێ شهوكانى (ئهوێ ل سالا 1255 چوویه بهر دلۆڤانییا خودێ) ئـێـك ژ باشترین مهتنانه، ژ بهر كو ئهو مهتنهكێ كورت و تێر مفایه ژ لایهكى ڤه، و ژ لایهكێ دى ڤه ئهو مـهتــنــهكێ ئاڤاكرییه ل ســهر دهلیلى، یـهعـنى ل سهر فقهێ كیتاب و سوننهتێ دویر ژ (تهعهصصوبا مهزههبى) ئهوا ل سالێن درێژ زیان گههاندییه ئوممهتێ. و ههر ئێكێ ئاگههدار بت ب مهتنێن فقهى دزانت كو ئهڤ مهتنه ئێك ژ وان مهتنانه یێن جههكێ بلند بۆ خۆ د پهرتووكخانهیا فقهێ ئیسلامى دا كرى، ههر چهنده خودانێ وێ ژ لایێ دهمى ڤه درهنگ هاتبوو ژى، و گهلهك زانایان ژ بهر كهیفهاتنا وان ب ڤى مهتنى، ههر وهسا ژ بهر گرنگییا وى، ئهو شهرحكرییه و پویتهیهكێ زێده پێ دایه، و دهمێ مه ڤیاى ڤى مهتنى وهرگێڕینه زمانێ كوردى، و شرۆڤه بكهین، مه دیت شهرحا زانایێ مهزن صهدیق حهسهن خانێ قهننۆچى یێ بوخارى ئهوا ب ناڤێ (الروضة الندیة) هاتییه نیاسین ژ باشترین شهرحێن ڤى مهتنییه، لهو مه ئهو كره بناخه بۆ ڤێ شهرحا خۆ یا كورت. هیڤییا مه ژ خودایێ مهزن ئهوه مفا ژ ڤێ كتێبێ بێته وهرگرتن، و ببته هاریكار بۆ خـوانـدهڤایێ كورد كو د فقها دینێ خۆ دا شارهزا ببت، دا ببته ژ وان یێن پێغهمبهرى -سلاڤ لێ بن- د دهر حهقێ دا گۆتى: (ههچییێ خودێ خێرا وى بڤێت دێ تێگههشتنا دینى دهتێ).
