پێشگۆتن
چیرۆك هۆنهره، ودیرۆك زانینه.. وهۆنهر وزانین د ڕێك وئارمانجێن خۆ دا
دژێك جودانه، ڕێكا زانینێ عهقله، ویا هۆنهرى دله، وئارمانجا هۆنهرى
جوانیه، ویا زانینێ ڕاستیه، وچیرۆكا دیرۆكى كارهكێ ئهدهبى یێ
دهولهمهنده، ژ بهر كو ئهو ڕههێن ژینێ بۆ وێ ڤهدگوهێزن د ئاخا
سهرهاتى وڕویدانێن واقعى ڕا كویر دادهێلاینه.. ئهگهر گیانێ هۆنهرى وێ
بهر ب عهسمانێ خهیالێ ڤه بلند بكهت ژى، ڕاستیێن دیرۆكى ناهێلن ئهو ژ
عهردێ واقعى دویركهڤت.
چیرۆكا دیرۆكى -وهكى ئهم دزانین- تێكهلكرنهكا جوان وهشیاره بۆ
ڕویدانێن دیرۆكى، د گهل پاراستنا بناخهیێن هۆنهرى.. لهو نابت ههر
تشتهكێ د ڤان ڕهگه چیرۆكان ههى خواندهڤان وهك ڕاستیهكا دیرۆكى
وهرگرت، ههر وهسا نابت ئهو وان وهك خهیالهكا چیرۆكى ژى وهرگرت،
وئهگهر ئهو ڤێ چهندێ نهكهت، ئهو یان دێ بته كتێبهكا دیرۆكى یا
هشك، یان ژى دێ بته كارهكێ ئهدهبى یێ دویر ژ ڕاستیێ.. ب ڤى ڕهنگى مه
دڤێت خواندهڤانێ ڤێ كتێبێ ڤان چیرۆكێن دیرۆكى یێ هلبژارتى بخوینت، دا
خهلهت تێ نهگههت، وشاش نهبت.
وپشتى هنگى مه دڤێت خواندهڤانێ هێژا ئاگههدار بكهین كو كارێ مه د
بهرههڤكرنا ڤان چیرۆكان دا گهلهك جاران وهرگێڕان بوویه، وهندهك
جاران ژى دانان بوویه، و ل دویماهیا ههر چیرۆكهكێ ژى مه ئهو ژێدهر
بهرچاڤ كرینه یێن بۆ مه بووینه چاڤكانیێن سهرهكى بۆ بهرههڤكرنا ڤان
سهرهاتیان.. وبهلكى ئهڤ كتێبه د پاشهڕۆژێ دا ببته خهلهكا ئێكێ ژ
زنجیركا درێژ، ئهگهر دهستویریا خودێ پاشى دهلیڤهیا عهمرى
ههبت.
و ل دیماهیێ هیڤیا مه ئهوه خودێ ڤیانا پێغهمبهرێ خۆ سلاڤ لێ بن، ویا
صهحابیێن وى د دلێن مه زێده بكهت، و ل ئاخرهتێ چاڤێن مه ب دیتنا وان
روهن بكهت، ودلێن مه ب ههڤالینیا وان خۆش بكهت.
تهحسین ئیبراهیم دۆسكى
دهسپێكا صهفهرا سالا 1432
