یا رهب.. یا رهب
(1)
حـهمـد بـۆ وى خـودایی بن یـێ بـهرێ مه دایه حهمدا خۆ، وئهم كرینه ژ وان كهسان یێن ب حهمدا وى شوكرا قهنجیا وى دكهن، ئهو خودایێ دینێ خۆ بۆ مه هلبژارتى دا ببته ڕێك وبهرێ مه دایێ، حهمدهكا وهسا ئهو بگههینه رازیبوونا وى وئهو پێ ژ مه رازى ببت.
یا رهببى حهمد بۆ ته بت كو ته ههیڤا خۆ یا پیرۆز، ههیڤا قورئانێ، ههیڤا پاقژكرن وداقوتانا ژ گونههان دایه مه، وته ئهو ب سهر ههمى ههیڤێن دى ئێخستى ژ بهر وى بهایێ زێده یێ ته دایێ، وته گرتنا وێ كــریـه ڕێكهك ژ وان ڕێكێن مه دگههیننه رازیـبـوونـا تــه، یا رهبـبـى تـو ب حهقێ مهزنیا خۆ كهیه، تو تهوفیقا مه بده د ڤێ ههیڤێ دا و د ههمى هیڤێن دى یێن سالێ ژى دا كو ئهم حهرامێ ته حهرام بكهین، وحهلالێ ته حهلال بكهین، وتو هاریكاریا مه تێدا بكه كو ئهم دهست ودهڤ وچاڤ وگاڤێن خۆ ژ بێ ئهمریا ته بپارێزین، ووێ بكهین یا رازیبوونا ته تێدا ههبت، یا رهببى تو گوهێن مه ژ لهغوێ، وچاڤێن مه ژ لههوێ، ودهستێن مه زۆریێ، وئهزمانێت مه ژ زووریێ بپارێزه، وكارێ مه یێ بۆرى ویێ بێت ژ مهدح وریائێ دویر بكه، وئیخلاصێ ب رزقێ مه بكه..
یا رهببى كا چاوا ته تهوفیقا مه دا كو ئهم د ڤێ ههیڤێ دا -ههیڤا رهمهزانێ- خۆ ژ وى حهلالى بدهینه پاش یێ ته تێدا حهرام كرى، چونكى ته یێ حهرام كرى، وهسا تو هاریكاریا مه بكه ل سهر پشتدان وهێلانا وان گۆتن وكریاران ژى یێن تـه ل ڤێ هـهیڤێ وههیڤێن دى ژى حهرام كــریـــن، یـــا رهبـبــى تــو مه ژ وان بهختڕهشان حسێب نهكه یێن بارا وان ژ ڕۆژیێ ههما بهس ئهوه ئهو خۆ برسى وتێنى دكهت، ڕۆژیێ ژ حهلالى دكهن وفتارێ ل حهرامى دكهن، دهڤێن وان ژ خوارنێ ب ڕۆژینه بهلێ ئهزمانێن وان ژ غهیبهتێ وگۆتنێن سهقهت ودرهوێ دبێ ڕۆژینه..
یا رهببى تو ژ كهرهما خۆ ل ڤێ ههیڤێ مه بكه ژ وان عهبدێن خۆ یێن چاك یێن ته بۆ وێ قهنجیێ بهرههڤ كرین یا ته سۆز پێ دایه وهلیێن خۆ، ومه هێژاى وێ قهدرگرتنێ بكه یا تـه ژڤـان پـێ دایه وان یـێـن لهز د طاعهتێ ته دا كرى، یا رهببى ژ قهنجیا خۆ یا بێ بهرانبهر، و ژ كهرهما خۆ یا ب ههروه مه بده د گهل وان خودان بهختان یێن ههر شـهڤ ل ڤـێ هـهیـڤـێ تو گهردهنێن وان ژ ئاگرى ئازا دكهى، د گهل نهمان و ب دویماهى هاتنا ڕۆژێن ڤێ ههیڤێ تو گونههێن مه ژى ب دویماهى بینه ونههێله، دا ئهو دهمێ دچت قڕێژا مه د گهل خۆ ببهت، ومه ئێكجار پاقژ بكهت.. ئهگهر مه خۆ تێدا خوار كر تو مه ڕاست بكه، وئـهگـهر ئهم ژ ڕێ دهركهفتین تو مه ڤهگهڕینه ڕاستهڕێیا خۆ، وئهگهر نهفس وشهیتانى تێدا ب سهر مه دا گرت تو مه ژێ ڕزگار بكه.
یا رهبـبـى تو ڕۆژێن ڤێ ههیڤێ ب عـیـبـادهتـێ مـه بـۆ تـه تژى بكه، وشهڤێن وێ ب طاعهتێ مه بۆ ته پڕ بكه، هاریكاریا مه بكه ل سهر گرتنا رۆژێن وێ، وڕابوونا ل شهڤێن وێ، دا ل وێ ڕۆژا ئهم ل بهر دهستێ ته ڕادبینهڤه ڕۆژێن ڤێ ههیڤێ شاهدهیێ ب غهفلهتێ ل سهر مه نهدهن، وشهڤێن وێ شاهدهیێ ب تهخسیریێ ل سهر مه نهدهن.
یا رهببى مـه نـهكـه ژ عیبادهتكهرێن رهمـهزانـێ یێن سالێ ههیڤهكێ ب تنێ ته دنیاسن، یێن عهبدینیا وان بۆ ته و پێگیریا وان ب ئهمرێ ته د گهل ب دویماهى هاتنا ڕۆژێن ڤـێ هـهیـڤێ ب دویماهى دئێت، مه بكه ژ وان یێن ل ههمى دهمێن سالێ لهزێ د گوهداریا ته دا دكهن، وبهردهوامیێ د طاعهتێ ته دا دكهن، ئهى خودانێ شهڤ وڕۆژان، خودانێ سالێ ههمیێ.
••━═══✿═══━••
(2)
یا رهببى حهمد بۆ ته بت وهكى تو یێ ژ ههژى، یێ ئێكێ تویى كهس بهرى تــه نــهبـــوویـــه، ویـێ دویماهیێ تویى كهس پشتى ته نابت، چاڤ ژ هـنـدێ دكێمترن كو ته ببینن، وئهزمان ژ هندێ بێزارترن كو وهصفا ته ب تمامى بدهن.
حهمد ههمى بۆ ته بت، ههر تشتهكێ ههى ته ب شیانا خۆ یا بێ توخویب ئافراندیه، ب مهشیئهتا ته ئهو بوونه خودان ههبوون، و ب ئرادهتا ته ئهو كهفتنه سهر ڕێكێ، ب حهزكرنا ته ههر ئێكى سهمتا خۆ زانى، وئهوێ پاش كهفتى بێى ته نهشێت پێش بكهڤت، وئهوێ پێشكهفتى بێى ته نهدشیا ل پاش بمینت.
حهمد بۆ ته بت، ههر ئێكى رزقهكێ دهسنیشانكرى ته یێ بۆ داناى، نهكهس ههیه بشێت وى كێم بكهت، ونه ب كهسێ ڤه دئێت وى زێده بكهت.. ووهكى وى رزقى ئهجهلا ههر ئێكى ژ وان ته یا داناى، ب مرنێ ته ئهو ههمى بێزاركرن، ههچیێ ڕۆژا وى هات گاڤهكێ نه پێشڤه دچت نهپاشڤه، حیكمهت ههر یا تهیه، وحێبهتى بارا مهیه..
یا رهببى حهمد بۆ ته بت، ئهگهر ته بهرێ مه نهدابا هندێ كو ئهم بزانین حـهمـدا ته بكهین، ئهم -وهكى وان یێن ته نانیاسن- دا ژ رزقێ ته خۆین وشوكرا هندهكێن دى كهین، دا د ناڤ قهنجیێن ته دا ڕابین وڕوینین ومننهتا هندهكێن دى ڕاكهین، ڤێجا حهمد بۆ ته بت كو ته خۆ ب مه دایه نیاسین، وحهمد بۆ ته بت كو ته بهرێ مه دایه هندێ ئهم حهمدا ته بكهین، حهمدهكا وهسا مه هند بلند بكهت كو ئهم ههژى رازیبوونا ته بین، ئهو رازیبوونا تاریا قهبرى ل بهر مه روهن بكهت، وڕێكا بهحهشتێ ل بهر مه ب ساناهى بێخت، رۆژا دلێ ساخلهم ب تنێ مفایى دگههینته خودانى.
یا رهببى حهمد بۆ ته بت، ته هند رزقێ حهلال وپاقژ بۆ مه كره قسمهت كو ئهم دهرگههێ ههوجهییێ د ناڤبهرا خۆ وههر ئێكێ دى دا ژبلى تـــه بگرین، ئهمر ته ل مه كر.. دا طاعـهتـێ مه بجهڕبینى، ونـههـى تـه ل مه كر.. دا شوكرا مه بجهڕبینى، ودهمێ ئهمرێ ته مه ب جهـ نهئیناى ومه خۆ ژ نههیا ته نهدایه پاش ته لهز د عقووبا مه دا نهكر، وته غهزهبا خـۆ زوى ب سـهر مـه دا نـهئـینا، ب رهحما خۆ ته كهرهم د گهل مه كر، و ب دلۆڤانیا خۆ ته لێگرتنا خۆ پاش ئێخست، وته دهستێ قهنجیا خۆ بۆ مه درێژكر وڕێكا كهرهما خۆ ل بهر مه ڤهكر، ڤێجا چاوا ئهم حهمدا ته نهكهین؟ یان چاوا دێ حهمدا ته كهین؟!
حهمد بۆ ته بت، چهند مه خۆ ژ ڕێكا تۆبێ دویر دئێخست ته هند ئهم نێزیك دكرین، ئهم ب لهز ب نك گونههێ ڤه دچووین وته خۆش ئهم ب نك خێرێ ڤه دكێشاین، ڕۆژا مه قهستا بێ ئهمریا ته دكر پهردهیێ ستارهییێ ته ب سهر مه دا دئینا خوارێ، وئهگهر ته ڤیابا تو دشیاى شهرما مه د ناڤ عهبدێن خۆ دا ببهى، گونههێن مه ب نك ته ڤه بلند دبوون ورهحما ته ب سهر مه دا دهاته خوارێ، سوننهتا خۆ د ئوممهتێن بۆرى دا ته د گهل مه ب كارنهئینا، بارێ مه ته سڤك كر، وهند دهلیڤهیا لێڤهبوونێ ته دا مه كو ئێدى كهسهك ژ مه چو هێجهت نهبن ئهگهر ب لایێ هیلاكێ ڤه چوو.
حهمد بۆ ته بت، وهكى مهلائیكهتێن ته یێن نێزیك وپێغهمبهرێن ته یێن خۆشتڤى ووهلیێن ته یێن خودان قهدر حهمدا ته كرى، حهمدهكا بلندتر ژ ههر حهمدهكا هـهبـت، كا چـاوا خودایێ مه یێ بلندتره ژ ههر مهخلووقهكێ ههى.. حهمدهكا هند بت كو جهێ ههر قهنجیهكا وى د گهل مه كرى بگرت، حهمدهكا وهك قهنجیێن وى یا بێ دویماهى، حهمدهكا ببته ئهگهرا رازیبوونا وى، وڕێكا غهفراندنا وى، وڕێبهرا چوونا مه بۆ بهحهشتا وى.. حهمدهكا ئهم پێ ژ وهلێن وى یێن بهختهوهر بێینه هژمارتن، و ژ بهخت ڕهشێن سهرداچووى بێینه ڤاڤارتن.
••━═══✿═══━••
(3)
حــــهمــــد بــۆ وى خودایى بن یێ مهزنترین نعمهت ب مهزنترین مرۆڤ ل مه كرى، كو سهردارێ ههمی پێغهمبهران، وسهییدێ ههمى مرۆڤان بۆ مه هنارتى، دا ئهو بۆ مه بـبته ئیمام وپێشهوا.. ب هێزا خۆ یا تشتهك -ئهگهر چهند یێ مهزن ژى بت- نهشێت بێزار بكهت، یان ئهگهر چهند یێ هویر ژى بت نهشێت ژ دهست دهركهڤت، وى ئهم كرینه ئوممهتا دویماهیێ ب هاتنێ، یا بهراهیێ ب قهدر وبهایى ڤه، یا كو شاهدهییێ ل سهر ئوممهتێن بهرى خۆ ددهت، ب موحهممهدى -سلاڤ لێ بن- ئهم ب قهدر ئێخستین، و ب مه ئهو ب هێز ئێخستن.
یا رهببى.. رهحم ودلۆڤانیا خۆ بهردهوام داڕێژه سهر موحهمهدێ ئهمین، وصهلات وسهلامێن خۆ بێ دویماهى بهرده سهر پێغهمبهرێ خۆ یێ ڕاستگۆ، ئهوێ ژ ناڤبهرا ههمى چێكریان ته بۆ خۆ هلبژارتى، دا بكهیه ڕۆناهى بۆ عهردى كا چاوا ته ڕۆژ كره ڕۆناهى بۆ عهسمانى.. كلیلا بهرهكهتێ، وسهركێشێ خێرێ، ئهوێ د ڕێكا ته دا بهخیلى ب چو ڕهنگێن خۆگۆریكرنێ نهكرى، خۆ ئێخسته بن ئهمرێ ته، وپێخهمهت رازیبوونا ته نێزیكترین مرۆڤێ خۆ ژ خۆ كر، ومرۆڤاینیا دویرترین كهسى ژ خۆ كر، د ڕێكا ته دا دۆستینیا بیانیان ودوژمناتیا خویانیان كر، وبهرێ وى ب تنێ ما ل ته.
یا رهببى ئهم شاهدهیێ ددهین كو وى د ڕێكا گههاندنا گازیا ته دا ڕۆژهكا ب تنێ سستى نهكربوو، پێخهمهت بهلاڤكرنا دینێ ته خۆ وهستاند بوو، وبۆ بلندكرنا ناڤێ ته وى جهـ ووارێن خۆ هێلان وتهحهممولا نـهخـۆشـیـێـن غـهریـبـیـێ كـر..
ب دهستى ودهڤى شهڕێ نهیارێن ته كر، و ب دلهكێ فرههـ وڕویهكێ گهش پێشوازیا وهلیێن ته كر، وهنگى ڕاوهستیا حهتا ئالایێ تهوحیدا ته ل ڕۆژههلات وڕۆژاڤایێ بلند وبلند چكلاندى، ئهم شاهـــدهیــــێ بــۆ وى ب ڤێ چهندێ ددهین، ڤێجا بۆ خاترا وى كارێ وى د ڕێكا ته دا كرى تو دهرهجا وى ل دنیایێ وئاخرهتێ بلند بكه، وچاڤێن وى ب ئوممهتا وى روهن بكه.
یا رهببى صهلات وسهلامێن ته یێن بهردهوام ل وى بن، وبنهمال وههڤال ودویكهفتیێن وى، هندى سهرهك ههبت بۆ مهزنیا ته بچهمیێت، هندى ئهزمان ههبت ب حهمدا ته بگهڕیێت، هندى دلهك ههبت ب ڤیانا ته ئاڤا ببت.
یا رهببى تو وى د بهحهشتا خۆ دا بگههینه دهرهجهكا وهسا یا نه چو ملیاكهتێن نێزیك ژ ته ونه چو پێغهمبهرێن خودان قهدر بگهههنێ، وتو وى بۆ مه بكه مههدهرچى ل وێ ڕۆژا بێى دهستویریا ته ب كهسێ ڤه نهئێت مههدهرێ بۆ كهسێ بكهت، ڕۆژا ههر نهفسهك دئێت وملیاكهتهك د گهل دا وێ دهاژۆته مهحشهرێ، وملیاكهتهك دا شاهدهیێ ل سهر بدهت.. وێ ڕۆژێ دهستێ مه ژ یێ وى نهئێتهكرن، وئهم ل ژێرى ئالایێ وى بین، و ژ وێ كۆمێ بین یا ب وى سهرفهراز دبت، ودچته بهحهشتێ.. ئهى خودانێ قهنجیا مهزن.
••━═══✿═══━••
(4)
یا رهببى.. ئهى خودایێ چو دویماهى بۆ عهجێبیێن مهزنیا وى نهههین، خودانێ چو دویماهى بۆ ملكێ وى نهههى، ئهى خودایێ چو فهنابوون ژ خزینێن رهحما وى نهگرن، یێ چو دیتن نهگههنێ، وتشتێ ئاشكهرا وڤهشارتى ل نك وى وهكى ئێك، تو مه ژ وێ ڕوى ڕهشیێ بپارێزه یا ژ ئهگهرا كرێتیێن مه دگههته مه، ژ بهر وان گونههێن مه كرین، ووان خـرابـیـێـن ئـهم زێــــده ب نــــاڤ ڤه چـوویـن، تــو نــه ل دنیایێ ونه ل ئاخرهتێ شهرما مه د ناڤ بهنیێن خۆ دا نهبه، تویى بهنیێن خۆ یێن تۆبهكهر ب جوانى ستاره دكهى.
یا رهببى.. ژ كهرهما خۆ تو مه دهولهمهند بكه، و ب دانا خۆ یا بێ منهت وڤهبڕین تو مه ژ دانا عهبدێن خۆ بێ منهت بكه، ب نێزیكیا خۆ تو مه ژ نهخۆشى ودویراتیا ڕێكێ بپارێزه، دا چو ڕێدهركهفتى طهمهعیا خۆ نهبهنه تالانكرنا مه، ودا ئهم د گهل قهنجیا ته ههست ب غهریبیا ڕێكێ نهكهین، وژبلى ب دهستڤهئینانا رازیبوونا ته چو ئارمانجێن دى نهدانینه بهر خۆ..
یا رهببى ب رهحما خۆ تو مه ژ غهزهبا خۆ بپارێزه، و ب كهرهما خۆ تو بهرێ مه بده ڕێكا خۆ، ومه ژ شهیتانێن جنن وئنسا وڕێكێن وان دویر بێخه، وئهگهر جارهكێ -ژ لاوازیا خۆ- مه تو ژبیركرى وخۆ ژ ته دویركر تو مه ژبیر نهكه و ژ خۆ دویر نهكه، چونكى یێ ژ ته دویر كهڤت ژ ئیفلهحێ دویر دكهڤت، ویێ نێزیكى ته بت دێ یێ نێزیكى خێرێ ههمیێ بت، وسهرفهرازى دێ بارا وى بت.
یا رهببى ههما ب تهیه مرۆڤ دئێته پاراستن ژ موصیبهتێن زهمانى، وداڤێن شهیطانى، وغهزهبا سولطانى، و ب دانا ته مرۆڤ ژ دنیایێ وخهلكێ دنیایێ بێ منهت دبـت، ڤـێـجـا تـو ژ بهر خرابیا كارێ مه، مه ژ باشیا كارێ خۆ بێ بار نهكه، ئهم (عهبدین) وژبیركرن وسهرداچوون وگونههكارى بابهتى مهیه، وتو (رهببى) عهفووكرن ولێبۆرین وغهفراندن هێژاى تهیه، وههر ئێك وى كارى دكهت یێ بابهتى وى بت!
یا رهببى ب ڕۆناهیا وهجهێ ته یێ عهرد وعهسمان گهش كرین ڕێڤنگ دئێنه سهر ڕێ، وخهلك ب هیدایهت دكهڤن، تو ب رهحما خۆ كهیه مه ژ ڕۆناهیا خۆ بێ بار نهكه، یا رهببى ههچیێ تو پشتهڤانیا وى بكهى نهیارهتیا كهسێ زیانێ ناگههینتێ، ویـێ تـو دهرگـههـێ كهرهما خۆ ل بهر ڤهكهى ئهو د خهما چڕیكیا مرۆڤێن قهلس نابت، ویێ تو بهرێ وى بدهیه هیدایهتێ سهرداچوونا سهرداچوویان رێكێ ل بهر وى بهرزه ناكهت، ڤێجا تـو ب عززهتا خـۆ مـه عـهبـدێـن خـۆ بـپـارێـزه، و ب كهرهما خۆ مه ژ غهیرى خۆ بێ منهت بكه، و ب هیدایهتا خۆ بهرێ مه بده ڕێكا حهقیێ.
یا رهببى تو سلامهتیا دلێن مه بكه د بیرئینانا مهزنیا خۆ دا، ورحهتیا لهشێن مه بكه د شوكركرنا قهنجیێن خۆ دا، ورههوانیا ئهزمانێن مه بكه د وهصفكرنا مننهت وقهنجیێن خۆ دا، تو مه بكه ژ وان بهختهوهران یێن بۆ ڕێكا ته گازى دكهن، و ژ وان خودان ئێغبالان یێن بـهرێ خـهلكى ددهنـه رێـكـا تـه، و ژ وان چاك وخاسان یێن تو بۆ خۆ هل دبژێرى ونێزیكى خۆ دكهى.. (یا أرحم الراحمین).
••━═══✿═══━••
(5)
حـهمـد بـۆ وى خـودایـى بـت یـێ ب هێزا خۆ شهڤ وڕۆژ ئافراندین، و ب شیانا خۆ ئهو ژێك جودا كرین، وبۆ ههر ئێك ژ وان توخویب ودهمهكێ دهسنیشانكرى داناى، هندهكێ ژ ڕۆژێ كێم دكهت ودكهته د ناڤ شهڤێ دا، وهندهكێ ژ شهڤێ كێم دكهت ودكهته د ناڤ ڕۆژێ دا.. وى شهڤ دا، دا بهنیێ وى تێدا تهنا ورحهت ببن وتێدا بنڤن، وڕۆژ دا وبۆ وان روهن كر دا ئهو تێدا ل رزقێ خۆ بگهڕیێن، وكارى بۆ دنیا وئاخرهتا خۆ بكهن..
یا رهببى حهمد بۆ ته بت، ته بۆ مه سپێدهیێن گهش ژ ناڤ شهڤێن تارى وڕهش ئینانهدهر، خودایێ ڕۆناهیێ تویى، ئهم وههر تشتهكێ لێ بوویه سپێده ملكێ تهینه، عهرد وعهسمان، شهڤ وڕۆژ، د گهل ههر تـشـتـهكێ د نـاڤ وان دا لـڤـى یـان ڕاوهسـتـاى، ئهو ههمى ملكێ تهینه، ل سهر رزقێ ته دژین، و د بن حوكمێ ته داینه، كهس نهشێت وێ قهدهرا ته بۆ نڤیسى بگوهۆڕت، یان وێ تهدبیرا ته بۆ داناى ڤهگێڕت، یان وى كارێ ته بۆ حهزكرى وهرگێڕت.. ئهڤه ڕۆژهكا دى هات وته ئهم گههاندینێ، وته ئهو بۆ مه یان ل سهر مه كره شاهد، ئهگهر مه ب قهنجى پێشوازى لێ كر ئهو ب باشى دێ خاترێ ژ مه خوازت، وئهگهر مه خرابى تێدا كرن ئهو دێ پشت دهته مه یا ڕهخنهگر.
یا رهببى تو ب قهنجى وتهوفیق وكهرهما خۆ بهرێ مه تێدا بده باشیێ، ومه ژ هـهمـى ڕهنـگـێـن خـرابـیـان بپارێزه، ڤێ ڕۆژێ بۆ مه بكه ژ وان ڕۆژان یـێــن بــهحسێ مـــه تێدا ب باشى د ناڤ ملیاكهتێن ته دا ل عهسمانى و د ناڤ بهنیێن ته دا ل عهردى بهلاڤ دبت، یا رهببى تو بارێ مه ل سهر وان ملیاكهتان سڤك بكه یێن كارێ مه یێ خراب دهژمێرن، ومه ب خرابیان ل نك وان شهرمزار نهكه، سجلا قهنجیێن مه ئهڤرۆ تو تژى بكه، وههر گاڤهكا ب سهر مه دا دئێت تو بۆ مه بكه شاهدهكێ باش كو مه بێ ئهمریا ته تێدا نهكریه.
یا رهببى ژ ههمى لایان ڤه تو مه بپارێزه، ل پێش و ل پاش، ل چهپ و ل ڕاست، ل ژێر و ل ژۆر، مه بپارێزه پاراستنهكا مه ژ گونههـ وبێ ئهمریا ته ددهته پاش، وبهر ب هیدایهت وگوهداریا ته ڤه دبهت، یا رهببى تـو بـهرێ مه بـده وى كارى یێ ڤیانا ته پێ ب دهست مه ڤه بێت، ومه ژ وى كارى بـده پـاش یێ غـهزهب ونـهڤـیـانـا ته پێڤه دئێت، ل ئهڤرۆیا مه و ل ههمى ڕۆژ وشهڤێن مه تو تهوفیقا مه بده بۆ كرنا وى كارى یێ تو ژێ رازى، ژ دویكهفتنا سوننهتێ، وخۆ دویركرنا ژ بیدعێ، ڤیانا دینى، ونهڤیانا باطلى، پشتهڤانیا حهقیێ وخودانێن وێ، ونیشادانا ڕێكێ بۆ بهرزهبوویان، وهاریكرنا كهسێن پێتڤى ولاواز..
یا رهببى تو ئهڤرۆ بكهیه ب بهرهكهتترین ڕۆژ ژ ڕۆژێن مه، وباشترین ههڤال بۆ مه، وچێترین دهم مه بۆراندى، مه بكه ژ كۆما وان عهبدێن خۆ یێن ب رازیبوون ڤه ته شهڤ وڕۆژ د سهر دا ئیناى، ئهوێن شوكرا نعمهتا ته دكهن، و ب شریعهتێ ته داناى ڕادبن وكارى پێ دكهن، وخۆ ژ وى تشتى ددهنه پاش یێ ته نههیا وان ژێ كرى.
یا رهببى ئهز ته دكهمه شاهد، وتو بهسى بۆ من شاهد بى، وئهز ملیاكهتێن ته وهلگرێن عهرشێ ته ژى دكهمه شاهد، وههر ئێكێ ل عهرد وعهسمانان ههبت، كو من ب دلى ودهڤى باوهرى ئینایه كو خودایێ حهق تو ب تنێ یى، (لا إله إلا أنت)، وكو موحهممهد -سلاڤ لێ بن- عهبدێ تهیه وپێغهمبهرێ تهیه، یا رهببى ل سهر ڤێ شاهدهیێ مه بهێله ساخ هندى ڕۆژهك د ژیێ مه دا مابت، و ل سهر ڤێ شاهدهیێ مه بمرینه دهمێ ڕۆژا مه ئاڤا دبت، و ب ڤێ شاهدهیێ بهرێ مه بده بهحهشتێ ڕۆژا ئهم تێدا قهستا لیقائا ته دكهین.
••━═══✿═══━••
(6)
ئهى خودایێ گرێكێن ئاسێ ب ته ڤهدبن، ودژواریا تهنگاڤیان ب ته دشكێن، ئهى خودایێ هیڤیا دهركهفتنا ژ گرفتاریان مه ب ته ب تنێ ههى، ههر تشتهكێ ئاسێ ل بهر شیانا ته یێ ستوخواره، وهـهر ڕێـكـهكا ب ساناهى بت ته ب كهرهما خۆ ئهگهرێن وێ ل بهر مه یێن خۆشكرین، قهدهرا ته ب ههر تشتهكێ بووى یان دێ بت گهڕیایه، لهو كهسێ چو هێز وشیانهك بهرانبهر (مهشیئهتا) ته نهبوویه ونهمایه..
تویى یێ د تهنگاڤیان دا ههوار دچنه نك، و د نهخۆشیان دا دوعا ژێ دئێنهكرن، دهمێ چو ڕێ نهمینن بهر دمیننه ل ته، وگاڤا دهرگههـ ههمى هاتنهگرتن قهستا ته دئێتهكرن، خهم نائێته لادان ونهخۆشیهك نائێته ڕاكرن ئهو نهبت یا ته حهزكرى، وبارهكێ گران بێى مهشیئهتا ته نائێته سڤككرن.. یا رهببى حالێ مه ل بـهر تـه یـێ ڤهشارتى نینه، وزانینا ته ب دخواز ومرادێن مه یا دویر نینه، بار یێ گران بووى وتو دزانى، ونهخۆشیێ دۆرا ل مه گرتى وتو ب تنێ یى دشێى وێ ڕاكهى وخۆشیهكێ پێشڤه بدانی.. یا رهببى كا چاوا ته ب قهدهرا خۆ حال ل مه تهنگ كر ب كهرهما خۆ تو وى ل مه فرههـ بكه.
یا رهببى تشتێ ته ئینا كهسهك نینه بزڤڕینت، ویێ ته زڤڕاندى كهسهك نینه بشێت وى بینت، دهرگههێ تو بگرى ب كهسێ ڤه نائێت ڤهكهت، ویێ تو ڤهكهى ب كهسهكێ ڤه نائێت بگرت، یێ تو پشتهڤانیێ بۆ بكهى كهسهك نهشێت وى شهرمزار بكهت، وكارێ تو ب ساناهى بێخى كهسهك نهشێت ب زهحمهت لێ بكهت، ههوارا مه تویى.. ب هێز وشیانا خۆ دهرگههێ فهرهجێ ل بهر مه ڤهكه، ڕێكێن خێرێ وبهختهوهریێ نیشا مه بده و ل بهر مه ب ساناهى بێخه، ب كهرهما خۆ مه نهئێخه بن بارێ خهم وكۆڤانان، ڕهحم ودلۆڤانیهكا بهرفرههـ ژ نك خۆ ب سهر مه دا بینه، وڕێكا دهركهفتنا ب ساناهى ژ ههر تهنگاڤى ونهخۆشیهكا ههبت بكه بارا مه، پشتهڤان وهاریكار به بۆ مه، مه ژ ههمى ئاتاف وبهلایان بپارێزه ئهگهر چ ئهم ژ ههژى وێ چهندێ نهبین ژى، ئهى خودانێ فهضل وقهنجیا مهزن.
یا رهببى ئهم خۆ ب ته دپارێزین ژ دژواریا قهلسیێ، وفویریانا كهربێ، و ب سهرڤههاتنا حهسویدیێ، ونهمانا صهبرێ، وكێمبوونا قهناعهتێ، وخرابیا ئهخلاقى، وئاریانا دلچوونان، ودویكهفتنا ههوایێ نهفسێ، وپشتدانا هیدایهتێ، وكهفتنا د غهفلهتێ دا، وحهژێكرنا زولمێ، و ب چوڤهنهگرتنا گونههان، وچاڤلێكرنا بهطرانان، وكێمكرنا ههژاران، وهێلانا شوكرێ سهرا وان قهنـجـیـێـن تـه داینه مه، یا رهببى تو مه نهكه ژ وان بهختڕهشان یێن پشتهڤانیا زالمان دكهن، وخهلكى بۆ ڕێكا وان گازى دكهن، ونهیارهتیا خودانێن حهقیێ دكهن ئهگهر خۆ ئهو دكێم وغهریب وبن دهست ژى بن..
یا رهببى تو مه نهكه ژ وان نهزانان یێن ب گهلهكیێ دسهردا دچن، وحهقیێ ب مهزنان دنیاسن، وبێ زانین بهر ب زانینێ ڤه دچن، یا رهببى تو مه نهكه ژ وان بێ بهختان یێن دلێن وان تژى غش وفێلبازى د دهر حهقا بهنیێن ته دا، وتو مه نهكهیه ژ وان یێن ئیعجابا وان ب كارێ وان هیڤییا ل بـهر سـنـگـێ وان پان وفرههـ دكهت، ئهم خۆ ب ته دپارێزین كو ئهم ژ وان كهسان بین یێن ئهگهر مانه ب تنێ د گهل وى تشتێ ته حهرام كرى پێ لێ بدانن، یان ئهگهر شهیطانى یان سولطانى ئـهو بـۆ خــۆشـیـێـن ئـهرزان گـــازى كـــرن ب نك ڤه بچن وخۆ ب دهست ڤه بهردهن.
••━═══✿═══━••
(7)
یا رهببى.. مالكێ ڤێ عالهمێ، خودانێ دنیایێ وئاخرهتێ، تویى هیڤى وئـومـێـد ل ڕۆژا مـهزن، دهمــێ ڕۆژ دئێته هنداڤى سهران، ومرۆڤ د خوهێ ڕا دمینن، دهمێ تهنگاڤى دگههته دویماهیێ، و ژ بهر ترس وسههمێ دل ژ جهێ خۆ دئێنهدهر، ورح دگههته گهرویێ، یا رهببى ئهم خۆ ب ته دپارێزین كو وێ ڕۆژێ كهیفا نهیاران ب مه بێت، یان دهستێن مه ژ خۆشتڤیان بێنه ڤهقهتاندن..
یا رهبـبـى تـو مـه ژ ژیـارا دژوار بپارێزه، ومرنا بهرى خۆكاركرنێ نهكه بارا مه، مــــه ژ خـــــــهم وحـهســـرهتـا مهزن، و ژ موصیبهتا بێ دویماهى ل ئاخرهتێ بپارێزه، ب رهحما خۆ یا بهرفرههـ تو مه نهكه ژ وان بێ ئێغبالان یـێـن وێ ڕۆژێ خـوزیـان ڕادهـێـلـن كو ببنه ئاخ، یان جارهكا دى ل دنیایێ زڤڕیبانه ڤه دا ببانه ژ مرۆڤێن چاك.
خودایێ كهرهمێ.. حهمد ومننهت ههر بۆ تهنه، وقهنجى ودان ههر كارێ تهیه، یا رهببى ئهگهر هیڤیا رهحما ته نهبت مه چو ڕێ نینن، لهش یێ لهغهره.. چهرم یێ نازكه.. ب ئێك نقۆبوونا د ئاگرى دا گههـ وئهوصال دێ بژكن، لهش دێ پرت پرت بت وحهلیێت، هنگى كهسهك نابت د ههوارا من بێت ومن ڕزگار بكهت، یا ڕهببى ئهگهر هنگى ئهز تهحهممولا عهزابا جههنهمێ بكهم ژى، دێ چاوا صهبرێ ل سهر دویركهفتنا ژ ته كهم، ئهگهر شیانا دیتنا ڕویێ زهبانیان من ههبت ژى، چاوا ههدارا من دێ ئێت كو ڕویێ ته نهبینم..
یا رهببى داخوازا من ژ ته ئهوه وێ ڕۆژێ چاڤ ڕوهنی بارا مه بت، یا رهببى ل وێ ڕۆژا ڕوى ڕهش دبن تو مه ڕوى سپى بكه، ل وێ ڕۆژا سههما مهزن ب سهر خهلكى دا دئێت تو مزگینیا مهزن بده مه، حهمد بۆ ته بت.. چو جاران ته ئهم ژ خۆ بێ هیڤى نهكرینه، دوعایێن مه ته ل ناڤ چاڤێن مه نهداینه، ودهرگههێ خۆ ته ل بهر نهگرتیه..
یا رهببى خوشووعا ئیمانێ تۆ ب رزقێ مه بكه، نهكو خوشووعا شهرمزاریێ د ئاگرى دا، ئهى خودایێ ئێكانه، یێ نه ژ كهسێ بووى ونه كهس ژێ بووى، ونه وهكى كهسێ، ئهگهر تو نهبی كیه دێ شێت د ههوارا مه ئێت؟ ئهگهر رهحما ته نهبت ب چ ڕێ ئهم دێ گههینه خێرا دنیایێ وئاخرهتێ؟
یا رهببى ئهم داخوازا لێبۆرینا ژ وان گونههان دكهین یێن مه تۆبه ژێ كرى، پاشى ئهم لێ زڤڕینه ڤه، وئهم داخوازا لێبۆرنا ژ ههر خێرهكێ دكهین یا مه بـۆ تـه كـرى وتـشتهكێ دى یــــێ نه بۆ ته تێكهل بووى.
یا رهببى ب حلما خۆ تو ل زولما مه ببۆره، ئهى خودایێ چو داخوازكهران بێ هیڤى نهكهت، ئهى خودایێ هند بلند بووى كو كهس د سهردا نهبت، وهند نزم بووى كو كهس ژ وى نێزیكتر نهبت، ڕهحمێ ب مه ببه، ئهى خودایێ ئاگر بۆ ئیبراهیمى ساركرى، ودهریا بۆ مووساى كهلاشتى، و ب كهرهما خۆ نـههـنـگ بـۆ یـوونسى كریه پـارێزڤان، ب رهحما خۆ ئاگرێ فتنێن دنیایێ ل بهر مه سار بكه، ومه ژ دهریایا ب سههما ئاخرهتێ ب سلامهتى دهرباس بكه، ومه بگههینه كنارێ تهناهیێ ل بهحهشتا خۆ یا بهرین.
یا رهببى ئهڤه جهـ ودهمێ خۆپاراستنا ب تهیه ژ ئاگرى، ئهڤه ئهو عهبدێ تهیه ههوارێن خۆ دگهینته ته، یێ ئعترافێ بۆ ته ب گونهها خۆ دكهت، و ب تۆبهكرن ڤه ب نك تهڤه دئێت، عهبدێ ته ئهوێ ژ ته پێڤهتر كهسهكێ نابینت گونهها وى ژێ ببهت، وشكهستنا وى ڤهگرت، ولاوازیا وى ب هێز بكهت، وخهما وى ڕاكهت..
(یا الله) تو ئهوى ڕویێ وى بۆ ته ب سوجده داناى ب ئاگرى نهسوژه، و ب شـهرمـزاریـێ ڕهش نهكه، ئهوى د دنیایێ دا سهرێ خۆ د ناڤ عهبدان دا بۆ ته یێ نزم كرى، ڤێجا تو ب كهرهما خۆ وی ل ئاخرهتێ سهربلند بكه.
••━═══✿═══━••
(8)
حهمد بۆ وى خودایێ بن یێ ئهز ژێ ب هیڤى، و ژ وى پێڤهتر ئهزێ ژ كهسێ دى ب هیڤى نینم، چونكى ههر كهسێ ههبت ژبلى وى هیڤیا من ب جهـ نائینت.. حهمد بۆ وى خودایى بن یێ قهنجیێن وى ژینا من ههمى ڤهگرتى، ئهوه خودانێ قهنجی ونعمهتان..
یا رهببى ههر جارهكا ئهم د ناڤبهرا دو كێماسیان دا ڕاوهستیاین، ئێك بگههته دینێ مه ویا دی بگههته دنیایا مه، تو وێ كێماسیێ بگههینه وێ یا فهنا ژێ دگرت، وتمامیێ بده وێ یا بهردهوام دمینت.. وئهگهر بهرێ مه كهته ئێك ژ دو ڕێكان: ڕێكهكێ رازیبوونا ته تێدا بت ویا غهزهبا ته تێدا بت، تو مهیلا مه بده سهر وێ ڕێكێ یا تو پێ ژ مه رازى دبى، ومه ژ وێ ڕیكێ سست بكه یا تو پێ ل سهر مه ب غهزهب دئێى، وتو مه نههێله ب هیڤیا نهفسا مه وهلبژارتنا وێ ڤه، چونكى ئهگهر تهوفیقا ته نهبت ئهو خرابى ونهحهقیێ هل دبژێرت..
یا رهببى ته ژ لاوازیێ ئهم ئافراندینه، وئهگهر ب ته نهبت مه چو هێز نابن، ڤێجا تو ب تهوفیقا خۆ پشتهڤانیا مه بكه، و ب هاریكاریا خۆ بهرێ مه بده رێكا ڕاست، وڕویێ مه ژ وى كارى وهرگێڕه یێ دژبهرى ڤیانا ته بت، وتو شیانێ نهده ئهندامهكێ لهشێ مه كو بێ ئهمریا ته بكهت.
یا رهببى تو نهێنیێن دلێن مه، ولڤینێن ئهندامێن مه، وسڤكه دیتنێن چاڤێن مه، وگۆتنێن ئهزمانێن مه، بكه د وان كاران دا یێن خێرا ته پێ دگههته مه، دا ئهم ژ دانا خهلاتێ ته یێ باش بێ بار نهبین، وههژى جزادانا ته یا دژوار نهبین.
یا رهببى ئهگهر تو حهز بكهى ژ قهنجیا خۆ دێ مه عهفوو كهى، وئهگهر تو حهز بكهى ب دادیا خۆ دێ مه عهزاب دهى، ڤێجا تـو مـنـهتێ ل مه بكه وعهفوا خـۆ ل بهر مه ب ساناهى بێخه، و ب لێبۆرینا خۆ مه ژ عهزابا خۆ بپارێزه، چونكى مه تاقهتا دادیا تـه نـیـنـه، وڕزگاریا كهسێ ژ مه بێى لێبۆرینا ته نابت.
ئهى دهولهمهندێ ژ ههر ئێكى دهولهمهندتر، ئهڤه ئهم عهبدێن ته ههژارێن دانا تهینه، ب دانا خۆ یا بهرفرههـ تو شكهستنا مه ڤهگره، وهیڤیا مه ژ خۆ نهبڕه، دا تو مه ئهم ئهوێن ب ته دلخۆش بووین بهختڕهش نهكهى، ویێن چاڤ ل رهحما ته بێبار نهكهى، چونكى ئهگهر ته ئــهو د گـــهل مه كر هیڤى دێ مه ب كێ مینت، یان بهرێ مه دێ مینته ل دهرگههێ كێ؟
پاكى ومهزنى ههر بۆ ته بن، ئهم ئهو موحتاجێن رهحما تهینه یێن ته سۆز داى تو د ههوارا وان بچى، ئهو تهنگاڤین یێن ته پهیمان داى تو وان ژ تهنگاڤیێ خلاس بكهى، وتشتێ ژ ههمیێ پتر هێژاى ته ئهوه تو رهحمێ ب وان ببهى یێن رهحم ژ ته خواستى، و د ههوارا وى بچى یێن ههوارێن خۆ گههاندینه ته، ڤێجا تو رهحمێ ب مه ببه دهمێ ئهمێن ههژار قهستا دهرگههێ ته دكهین، و ب قهنجیا خۆ مه دهولهمهند بكه دهمێ ئهم دئێینه بهر دهستێ ته..
••━═══✿═══━••
(9)
ئهى ئهو خودایێ زكرێ وى شهرهف بۆ وى كهسێ زكرێ وى بكهت، وشوكرا وى سهركهفتن بۆ وى كهسى یێ شوكرا وى بكهت، وطاعهتێ وى ڕزگارى بۆ وى كهسى یێ طاعـهتـێ وى بكهت، دلـێـن مـه وه لێ بكه زكرێ ته ب تنێ بكهن، وئهزمانێن مه وه لێ بكه شوكرا ته ب تنێ بكهن، وههمى ئهندامێن لهشێ مه وه لێ بكه طاعهتێ ته ب تنێ بكهن.. وئهگهر ته حهز كر دهفتهرا مانا مه ل ڤێ دنیایێ بگههته دویماهیێ، وبهلگێ مه زهر ببت، وڕۆژێن ژیێ مه بقهتیێن، وگازیا ته یا كهسهك نهشێن ڤهگهڕینت بگههته مه، بهرپهڕێ دویماهیێ یێ ملیاكهتێن ته ل سهر مه دنڤیسن بكه تۆبهیهكا ژ دل یا ههمى ڕهشه بهرپهڕێن بهرى خۆ سپى دكـهت، تـۆبـهیـهكـا وهسا یا مه ههژى هندێ بكهت كو تو ستارهیێ خۆ ب سهر مه دا بینى، وشهرما مه د ناڤ عهبدان دا نهبهى ڕۆژا تو وان ههمیان ل مهحشهرێ كۆم دكهى، ڕۆژا تو نهێنیێن خهلكى ئاشكهرا دكهى، ویا دلێن وان بهرچڤ دكهى، ئهى خودایێ تو د گازیا وان دچى یێن ههوار دكهنه ته.
یا رهببى سێ تشت ههنه ئهزمانێ من دگرن دهمێ من دڤێت خواستنێ ژ ته بكهم، وتشتهك ههیه ههر وههر من پال ددهت كو ئهز خواستنێ ژ ته بكهم، ئهو ههر سێ تشت ئهڤهنه: ته ئهمر ل من كر بوو ومن ئهمرێ ته ب جهـ نهئینا، وته نههیا من كربوو ومن خۆ نهدا پاش، وته قهنجیێن مهزن د گهل من كربوون ومن ب دورستى شوكرا وان نهكر.. وئهو تشتێ من پال ددهت ئهڤهیه: من یێ زانى كو تو ڕویێ خۆ ژ وى كهسى ناوهرگێڕى یێ قهستا ته بكهت وهزرا باشیێ ژ ته بكهت ئهگهر بارێ وى چهندێ گران ژى بت ژ گونههان..
یا رهببى، ئهڤه ئهز ب شكهستن ڤه ل بهر دهرگههێ عززهتا ته یێ ڕاوهستایمه، ب شهرم ڤه ئهزێ ههوجهییا خۆ دگههینمه ته، ئهز ئعترافێ دكهم كو تهخسیریێ ئهزمانێ منێ گرتى، ئهز ئعترافێ دكهم كو ئهمرێ ته من ب جهـ نهئینایه، وخۆ ژ نههیا ته نهدایه پاش، وشـوكـرا قـهنـجـیـا ته ب دورستى نهكریه، بهلێ من هیڤیهكا مهزن ب رهحما ته یا ههى، پاكى وپیرۆزى بۆ ته بت، چاوا ئـهز یێ ب هیڤى نهبم وته دهرگههێ رهحما خۆ ل بهر من یێ ڤهكرى؟ چاوا ئهزێ ب هیڤى نهبم وئهز دزانم كو هندى گونههێن من دمهزن ژى بن رهحما ته مهزنتره؟ چاوا ئهزێ ب هیڤى نهبم وته یێ گۆتى: (قُلْ يَا عِبَادِيَ الَّذِينَ أَسْرَفُوا عَلَىٰ أَنْفُسِهِمْ لَا تَقْنَطُوا مِنْ رَحْمَةِ اللَّهِ ۚ إِنَّ اللَّهَ يَغْفِرُ الذُّنُوبَ جَمِيعًا).
ئـهى خـودانـێ رهحمهتێ وهصفێ ته رهببێ ئهرحهمه
ئـهز گـونـههـكـارم گهلهك موحتاجى ئیحسانا تهمه
بێدهرا لوطفا ته عامه دۆست ودوژمن چوونه سهر
كـهس وهكى من هـهوجـه نینه ئـهز فهقیر وبهندهمه
ئهى خودایێ رهحما وى بهرى غهزهبا وى ڕاكرى، مه نه ژ وان پتر بێ ئهمریا ته كره یێن رهحم ته پێ برى، ومه نه پتر زولم ل خۆ كریه ژ وان یێن تو لێ بۆرى، ومه كارهكێ مهزنتر ژ وان نهكریه یێن تۆبهكرى وته تۆبا وان قهبویل كرى.. ل ڤى جهى، ل ڤى دهمى، ب دلهكێ پهشێمان ڤه ل سهر وى كارێ خرابێ ژێ چێبووى، یێ شهرمزار ژ بهر وێ بێ ئهمریا ژێ چـێـبـووى، یـێ زانـا كـو لێـبـۆریـن ژ هـهر گونهههكا ههبت ل بهر ته یا ب زهحــمــهت نینه، یێ پڕ باوهر كو ژ ته پێڤهتر كـهسـهك نینه گـونـههـان ب غهفرینت، ئهز هیڤیدارێ رهحما تهمه وكو تو تهوبا من قهبویل بكهى، وئهو گونههێن ئاشكهرا وڤهشارتى یێن من كرین تو بۆ مه ب غهفرینى.
••━═══✿═══━••
(10)
یا رهببى، ئهى خودایێ داخواز دچنه نك، وداخوازان ب جهـ دئینت، ئهى خودایێ ژ ههمى كهسان بێ منهت وكهس ژ وی بێ منهت نابت، یێ پسیارێن پسیاركهران خزینهیێن رهحما وى خلاس نهكهن، ودوعایێن دوعاكهران وى ناوهستینن، یا رهببى، تویى ئهو دهولهمهندێ خۆ ژ ههمى مهخلووقاتى بێ منهت كرى، وئهو ههمى فهقیرێن دانا خۆ كرین، ههر كهسێ مرادهك ههبت قهستا دهرگههێ ته دكهت، وههچیێ هیڤیهك ههبت بهرێ وى دمینته ل ته، ویێ بۆ قهتاندنا ههوجهییهكا خۆ بهرێ خۆ دایه ئێكێ دى ژبلى ته، یان ئێكێ دى بۆ خۆ كریه ڕێك بۆ نك ته، ئهوى خۆ ژ ته بێیار كر، وقهنجیا ته ژ دهست خۆ كر.
یا رهببى، ئهگهر جارهكێ ژ بهر ههوجهییهكێ ژ ههوجهیێن دنیایێ ڕێ ل بهر من هاتهگرتن، تو هند صهبرێ وهشیاریێ بده من كو ئهز خۆ ههوجهى ئێكێ وهسا نهكهم كو ئهو ژى وهكى من ههوجهیێن خۆ دگههینته ته، تو هند باوهریێ بده من كو ئهزێ موحتاج خۆ ههوجهى موحتاجهكێ وهكى خۆ نهكهم، تو هند هێزێ بدهمه من ئهز خۆ ل بهر تهنگاڤیان بگرم حهتا رهحما ته من ڕا دگههت..
یا رهببى، تشتێ ئهم پسیارا وى ژ ته دكهین، ئهگهر چهندێ یێ مهزن ژى بت، ل بهر شیان ومهردینیا ته یێ بچویكه، وتشتێ ئهم دانا وى ژ ته دخوازین ئهگهر چهند یێ ب زهحمهت ژى بت، ل بهر كهرهما ته یێ ب ساناهیه، یا رهببى ئهز نه ئێكهمین كهسم داخوازێ ژ ته دكهم وتو داخوازیا وى بۆ ب جهـ دئینى وئهو یێ نه ژ ههى، وئهز نه ئێكهمین كهسم پسیارا خۆ دئینته بهر دهرگههێ ته وتو قهنجیێ د گهل دكهى وئهو یێ موستهحهقى دانێ نهبت..
یا رهببى، ته فهرمانا ل مه كرى ئهم دوعایێن خۆ ژ ته بكهین، وته سۆزا دایهمه كو تو د بهرسڤا دوعایێن مه بێى، یا رهببى ئهڤه مه فهرمانا ته ب جهـ ئینا،وتو نه ئهوى یێ سـۆزا خـۆ ب جهـ نـهئـیـنـى، یا رهببى تو د گازیا مه وهره، وبهرسڤا مه بده، رهحمێ ب لاوازیا مه ببه، وهیڤیێن مه ژ خۆ نهبڕه، ههوجهیێن مه بۆ مه ب جهـ بینه، وههر ئاستهنگهكا دكهفته ڕێكا مه ل بهر مه ب ساناهى بێخه، مرادێن مه حاسل بكه، قهنجیا تهیه صهبرا مه دئینت، ودانا تهیه كهیفا مه دئینت، تو بێ مراد مه نهزڤڕینهڤه:
ســائــلــێ قــهســتـا تـه كـر شهئنێ ته نینه دهر بكهى
خــاسـمــه عـهبــدێ مـفـلـسـێ بێ مال وزێڕ ودهرههمه
ظولم وجـورم وسـهركهشى وعصیان ههمى طهبعێ منن
عهدل وفهضل وجوود ورهحمهت بۆ ته شهئنن ئهڤ ههمه
ئهى خودایێ گونههكار ب رهحما وى داخوازێ ژێ دكهن، ومرۆڤێن بێڕێ وتهنگاڤ ب قهنجیا وى دلێ خۆ خۆش دكهن، تویى صهبرا غهریبان ب ته دئێت، وهیڤیا ههژار ودهربهدهران ب ته گهش دبت، تویى یێ ههر تشتهكێ ههى ب رهحم وعلمێ خۆ ته ڤهگرتى، وههر كهسهكى ههى پشكهك ژ قهنجیا خۆ ته دایێ، تویى یێ عهفوا وى ژ عقووبهیا وى بلندتر، ورهحما وى ب غهزهبا وى ب لهزتر، ودانا وى ژ ستاندنا وى پتر، یا رهببى رهحمێ ب ڤى عهبدێ خۆ ببه یێ خۆ وهستاندى د دوعاكرنا ژ ته دا، ووى شهرمزار نهكه یێ ژ ته پێڤهتر كهسهك نهههى دانێ ژێ بخوازت، ووى بێ هیڤى نهكه یێ ژ دهگههێ ته پێڤهتر چو ههوارگههـ بۆ خۆ نهنیاسین..
••━═══✿═══━••
(11)
یا رهببى ته ب سالۆخهتێ رهحمێ خۆ یێ ب مه دایه نیاسین، وته یێ ب مه دایه زانین كو عهفووكرن كارێ تهیه، گهلهك عهیب مه ههبووینه ته ئهو ڤهشارتینه وشهرما مه پێ نهبریه، وگهلهك گونههـ مه كرینه وته پهردێ ستارهیا خۆ ب سهردا بهردایه وئهم پێ نهههتكاندینه، وشهرمزاریا وان -د ناڤ بهنیێن خۆ دا- د ستویێ مه دا دانهنایه، وكهیفا نهحهزێن مه پێ نهئینایه، وئهگهر ته ڤیابا تو دشیاى وێ چهندێ بكهى وئهو دا عهدالهت بت ژ لایێ تهڤه، یا رهببى حهمد بۆ ته بت سهرا وێ سـتـارهكـرنـێ.. یا ئهم پشتى هنگى خۆ ژ پاشڤهبرنێ نهداینه پاش، بهلێ د سهر هندێ ژى ڕا تو ژێ لێڤهنهبوونێ!
حهمد بۆ ته بت سهرا وى رزقێ ته دایه مه ومه د بێ ئهمریا ته دا خهرج كرى و د گهل هندێ ژى ته ئهو ژ مه نهبڕى، وڕێكا پهشێمانى ولێڤهبوونێ ته ل مه نهگرتى، ب شهڤ ته دهستێ خۆ بۆ مه ڤهكرى؛ دا ئهم ژ گونههێن ڕۆژێ تۆبه بكهین، و ب ڕۆژ ته دهستێ خۆ بۆ مه ڤهكرى؛ دا ئهم ژ گونههێن شهڤێ تۆبه بكهین، پاكى بۆ ته چهند تشتهكێ عهجێبه ئهم شاهدهیێ بۆ ته ل سهر نهفسا خۆ ددهین، ووان گونههكاریێن مه د دهر حهقا ته دا كرین ئێك ئێكه دهژمێرین وئعترافێ پێ دكهین، وتو ل سهر كارێ مه خۆ بێنفرههـ دكهى، ولهزێ د جزادانا مه دا ناكهى، وئهڤ چهنده نه ژ بهر قهدرهكیه كو مه ل نك ته ههى، بهلكى مننهتهك تو ل مه دكهى، ودا بهلكى ئهم ل خۆ بزڤڕین.. ل ته بزڤڕین، و ژ بهر هندێیه چونكى تو پتر حهز ژ عهفووكرنا مه دكهى ژ هندێ كو تو مه عقووبه بدهى!
یا رهببى ئهڤه گهردهنێن مهنه گونههان تۆكا خۆ یا تێ ئالاندى، ئهگهر تو ب عهفوا خۆ ئازا نهكهى، ئاگرێ جههنهمێ دێ پێ كهڤت، وئهڤه پشتێن مهنه ل بن بارێ خهلهتیان یێن خوار بووین، ئهگهر تو ب رهحما خۆ وان ڕاست نهكهى، جههنهم تێرا وان ههیه..
یا رهببى ئهگهر تو ل مه ببۆرى ومه ئازا كهى، ئهو نه ژ بهر هندێیه چونكى ژ ههژى لێبۆرینا تهینه، بهلكى چونكى تو خودانێ لێبۆرینێیى، وئهگهر تو ل مه نهبۆرى ومه عهزاب بدهى، ئهو نه ژ بهر هندێیه كو ته -حاشا- زولمهكا ل مه كرى، بهلكى چونكى ئهم موستهحهقى وێ چهندێینه.
یا رهببى، ڤێجا كو ته ب ستارهكرنێ قهنجى ل مه كرى، وشهرما مه د نـاڤ عــهبــدێـن خــۆ دا نهبرى، وكو تـه بێهنا خـۆ ل مه فرههكرى ولهز د عهزابدانا مه دا نهكرى، وكو ته رهحم ب مه برى وقهنجى ونعمهتێن خۆ ل مـه نـهگوهــاڕتـى وكهرهم ورزقێ خۆ ژ مه نهقهتعهكرى، تــو نعمهتا خۆ ل سهر مه تمام بكه، ورهحما خۆ بهردهوام بكه، شكهستنا مه ڤهگره، ودهردێ مه دهرمان بكه، و ل وێ ڕۆژا درێژ یا ئهم ل بهر دهستێ ته ڕادوهستین ههژار ودهست ڤالا شهرما مه نهبه، پهردێ ستارهیا خۆ دیسا ب سهر مه دا بهرده، وجارهكا دى ژ كهرهما خۆ قهنجیێ ل مه بكه، تو نه ئهوى یێ ل ڤێرێ مه عهفوو بكهى، و ل وێرێ لێڤه ببى.. (یا أرحم الراحمین).
••━═══✿═══━••
(12)
(یا رب، یا فارج الهم، وكاشف الغم، یا رحمن الدنیا والآخرة ورحیمهما.. یا واحد، یا أحد، یا فرد، یا صمد، یا من لم یلد ولم یولد، ولم یكن له كفواً أحد).
یا رهببى، پسیارا مه ژ ته پسیارا وى عهبدێ ههژاره یێ ههوجهیى لێ دژوار بـووى، وسـهرێـن ڕێكـان لێ بهرزهبووین، هێزا وى چــووى وچو د دهستان دا نهماى، ههمى دهرگههـ ل بهر هاتینه گرتن، و ژ ته پێڤهتر وى كهس نهماى ههوارێن خۆ بگههینتێ، وداخوازا خۆ بۆ بلند كهت، وهیڤیا خۆ پێڤه گرێدهت..
یا رهببى، ئهڤه داخوازا مه ل بهر دهستێ ته، وههوجهیا مه ل بهر دهرگههێ ته، تو چێتر پێ دزانى، چونكى تو ب حالێ مه زاناترى، یا رهببى عهردێ ته یێ هشك بووى وتو یێ دبینى.. ژ بهر كــهدا خـــرابــا دهستێن مه حهیوان ومێش ومۆر ل عهردى وطهیر وطهوال ل عهسمانى یێن كهفتینه ئیزایێ، كانیك وجۆ وجـۆبـار یـێـن زوهـا بووین، كهسێ چو د دهستان دا نهمایه ژ بلى كو چاڤهڕێى رهحما ته بن، وهیڤیدارێن كهرهما ته بن، كو تو خزینێن عهسمانى ل بهر وان ڤهكهى.
یا رهببى، ته یێ گۆتى وگۆتنا ته یا حهقه: (وَهُوَ الَّذِي يُنَزِّلُ الْغَيْثَ مِنْ بَعْدِ مَا قَنَطُوا وَيَنْشُرُ رَحْمَتَهُ ۚ وَهُوَ الْوَلِيُّ الْحَمِيدُ)
یا رهببى تو د ههوارا مه وهره، بارانهكا تێر ئاڤ وتژى بهرهكهت ب سهر عهردێ خۆ دا ببارینه، تو ژ خزینێن خۆ یێن تژى ل عهسمانى خزینێن ڤالا ل عهردى تژى بكه، عهردێ مه یێ مرى وتو یێ دبینى جارهكا دى تو ب رهحما خۆ وى زێندى بكه، رهحما خۆ ل سهر مه بهلاڤ بكه..
یا رهببى، تویى خودانێ كهرهمێ، مـنـهتـا خـۆ ب شینكرنا دهخل ودانى وفێقى ودهرامهتى ل سـهر مـه تمام بكه، ب گول وگولیلكان وارێ مه كهسك بكهڤه، ئاخا مرى ب بارانهكا ب لهزا تێر ئاڤ وبهركهت وبۆش زێندى بكهڤه، تو یێ زێندى ژ یێ مرى ددهى، وتویى یێ مرى زێــنـدى دكهیهڤه، یا رهببى ئهو خـێـر وبـهرهكـهتـا ب هشكبوونا عهردێ مه ژ دهســــت مــــه دهركــهفـتـى تـو ب رهحـمـا خـۆ ل مـه ڤهگهڕینه، عهورێن ل سهرێك، یێن تێرئاڤ، یێن بهرهكا وان عام كو عهردێ مه ههمیێ ڤهگرن، ورزقى زێده بكهن، كو بۆ مه بهنێره، یا رهببى بارانهكا عهردى شین بكهت، كانیكان بپهقینت، وجۆ وجۆباران ببهت، وئهرزانیێ ل وارى بهلاڤ بكهت تو ل مه ببارینه، بارانهكا وهسا بت جۆ ژ بهر بچن، وبیر پێ تژى ببن، وڕویبار پێ بۆش ببن، وخزینێن ڤالایێن عهردى پێ تژى ببن، وكهیفا مرۆڤ وحهیوان وداروبارى پێ بێت. یا رهببى تو ئهڤ ساله ل سهر مه نهكهیه سالهكا هشك وزوها، ئهو عهورێن ل هنداڤى مه دئێن تو بكه عهورێن رهحمێ ونهكه عهورێن عهزابێ وغهزهبێ، رزقێ مه ژ بهرهكهتێن عهسمانى وعهردى بهرفرههـ بكه، ودهرگههێن رهحما خۆ ل بهر نهگره.. تو ل سهر ههر تشتهكى یێ خودان شیانى.
یا رهببى تو ب رهحما خۆ د گهل مه بكهى نه ب كارێ مه، چونكى ئهگهر تو ب كارێ مه د گهل مه بكهى نه ب تنێ دهرگههێن عهسمانى دێ ل مه گرى، بهلكى غهزهبێ دێ ل مه ببارینى، كهرهما ته ژۆر دا ب سهر مه دا دئێت، وگونههێن مه ژێلهل ب نك ته ڤه بلند دبن.. بهلێ تو لهزێ د عهزابدانا بهنیێن خۆ دا ناكهین سهرا زولما وان، تو مهجالى ل بهر وان زێده ڤهدكهى، دا ئهوێ خۆ تێ دبهت چو هێجهت نهمینن.
یا رهببى تو هشكاتیا وارێ مه ب رهحما خۆ ببه، وكینا سنگێن مه ب كهرهما خۆ نههێله، وهند هشیاریێ بده مه كو ئهم وهسا ب تشتهكى ڤه موژیل نهبین حهتا ته ژ بیر بكهین، عهردێ مه ب بارانا خۆ ئاڤ بده، ودلێن مه ب ڤیانا خۆ شین بكه، ومهزنێن مه ب خۆشكاندنا ژ بۆ ته بلند بكه، ووهلاتێ مه ب خۆچهماندنا ژ بۆ مهزنیا ته سهرفهراز بكه، یا رهببى تهوبه وغهفراندنهكا وهسا ب رزقێ مه بكه كو خزینێن عهسمانى پێ ل بهر مه ڤهببن، وئهم پێ ههژى كهرهما ته ببین.
••━═══✿═══━••
(13)
ئهى خودایێ قنجیێ دكهت بێى داخواز ژێ بێتهكرن، و ژ باشیا خۆ لێبۆرینێ دكهت، وئهگهر عقووبێ بدهت ژى عهدله ژ نك وى، هلبژارتن یا وییه، بێ مننهت قهنجیێ ددهت، وبێى تهعدایی دستینت، شوكرا وى دكهت یێ شوكرا وى بكهت وئهوه بهرێ وى دایه شوكرێ، وجزایێ باشیێ ددهته وى یێ حهمدا وى دكهت وئهوه بهرێ وى دایه حهمدێ، گونههكارى ستاره دكهت وئهگهر وى ڤیابا دا پهردهیێ ستارێ ژ سهر ڕاكهت، ومهردینیێ د گهل (موقهصصرى) دكهت وئهگهر ڤیابا دا بێ بار كهت، كارێ وى ل سهر قهنجیێ دئێته ئاڤاكرن، وشیانا وى ب پێهێلانێ ڤه یا گرێدایه، ب حلم وبێنفرههیێ پێشوازیێ ل گونههكارى دكهت، ودهلیڤهیێ ددهته وى یێ زۆرداریێ ل خۆ دكهت..
یا رهببى تویى ته دهرگههێ عهفوێ ل بهر عهبدێن خۆ ڤهكرى وناڤێ وی كریه دهرگههێ تۆبێ، ب شهڤ دهستێن ته دڤهكرینه دا گونههكارێن ڕۆژێ تۆبه بكهن، و ب ڕۆژ دهستێن ته دڤهكرینه دا گونههكارێن شهڤێ تۆبه بكهن، ڤێجا هێجهتا وى دێ چ بت یێ قهستا ته نهكهن؟
عهبدێن خۆ ب زێدهكرنا بهایێ قهنجیێن وان ته طهمهع كرینه، خێرهكا وان ب دههان تو حسێب دكهى، وگونهههكێ ب گونهههك: ( مَنْ جَاءَ بِالْحَسَنَةِ فَلَهُ عَشْرُ أَمْثَالِهَا ۖ وَمَنْ جَاءَ بِالسَّيِّئَةِ فَلَا يُجْزَىٰ إِلَّا مِثْلَهَا) ویێ ته بڤێت تو خێرهكا وى دگههینیه حهفت سهدان وپتر ژى، دوعاكرن وخواستنا وان ژ ته، تو بۆ وان حسێب دكهى عیبادهت وخێر، ودهمێ ئهو حهمدا دكهن سهرا قهنجیهكا ته د گهل وان كرى تو بۆ وان حسێب دكهى باشى وقهنجى، حهمد بۆ ته بت ب ههر پهیڤهكا ههبت یا حهمدا ته پێ بێتهكرن، وحهمد بۆ ته بت ب ههر ئهزمانهكێ حهمدا ته پێ بێتهكرن، نعمهتا ته ل سهر مه یا ئاشكهرایه، ومنهتا ته نائێته ڤهشارتن، تویى یێ ژ ههى هندێ حهمدا ته بێتهكرن.
یا رهببى حهمد بۆ ته بت كو ته ئهڤ ههیڤا پـیـرۆز بـۆ مـه هـلـبـژارتى و ژ ناڤبهرا هــهمى ئوممهتان ته ئهو دایه مـه، وحـهمـد بـۆ تـه بـت كو ته د ڤێ ههیڤێ هاریكاریا مه كرى حهتا ئهم شیاین عهبدینیا ته بكهین، ههڤالینیا ڤێ ههیڤێ ب باشى بكهین، ب كهیفهكا زێده ڤه پێشوازیێ لێ بكهین، و ب دلـهكـێ غهمگین ڤـه خـاتـرخواستنێ لێ بكهین، پـشـتـى ته -ب ئانههیا خۆ- ئهم كرینه ژ وان سهركهفتى ژ ڤێ سهربۆڕێ دهردكهڤن..
ئهى ههیڤا پیرۆز، ههیڤا بیرهاتنێن مهزن، بهارا ههردهما وهلیێن خودێ یێن چاك، سلاڤ ل ته بن دهمێ ب خێر وبهرهكهت ڤه تو ب سهر ئوممهتێ دا دئێى، وسلاڤ ل ته بن دهمێ تو ب هاتنا خۆ چانتكێ بـیـرهـاتـنـێـن مـه ڤـهدكـهى، وهیڤیان د دلێن مــه دا زێندى دكهى، ومه ب زێدهكرنا عیبادهتى پتر نێزیكى ئارمانجێ دكهى، وسلاڤ ل ته بن دهمێ هێشتا ته خاتر نهخواستى تو مه خهریب دكهى، ب هاتنا خۆ تو دلێن مه نازك دكهى وگونههێن مه سڤك دكهى، و ب چوونا خۆ تو دلێن مه خهمبار دكهى وبهرێ مه دهێلیه ل ڕێكا زڤڕینێ..
سلاڤ ل ته بن، تو چهند یا درێژ بووى د چاڤێن بهختڕهشان دا، وتو چهندا ب ههیبهت بووى د دلێن خودان باوهران دا، بهرى تو بێى دلێن ئاڤا داخوازا هاتنا ته دكر، وهێشتا تو نهچووى ئهو ژ وهغهرا ته ب خهم وكۆڤان بوون، سلاڤ ل ته بن چهند خرابى ههبوو ب ته ژ مه هاتبوو دویركرن، وچهند باشى ههبوو ب ته گههشتبوو مه، وچهند خێر وبهرهكهت ته بۆ مه د گهل خۆ ئینا بوو! سلاڤ ل ته بن، و ل شهڤا ته یا ب قهدر، شهڤا هیدایهتێ وقورئانێ، ئهو شهڤا ژ هزار شهڤان ب خێرتر.. خودێ مه ژ ته وخێرا ته بێ بار نهكهت، ومه بكهته ژ وان یێن هاتنا هیدایهت بۆ وان ل سهر هیدایهتێ زێدهكرى، نه كو تاریاتى ل سهر تاریاتیێن وان دوقات كرى..
یا رهببى حهمد بۆ ته بت كو ته ئهم كرینه ژ خهلكێ ڤێ ههیڤێ، وحهمد بۆ ته بت كو ته تهوفیقا مه تێدا داى بۆ كرنا عیبادهتێ ته، هیڤیا مه ژ ته ئهوه تو ب كهرهما خۆ تێدا ل مه ببۆرى، و ل مه نهگرى ئهگهر هات ومه تهخسیریهك یان كێماسیهك تێدا كربت، مه ژ ڤێ ههیڤێ دهربێخه پاقژ ژ گونههان، چو تشت ل بهر ته یێ ب زهحمهت نینه، تو تێرا وى ههیی یێ خۆ بهێلته ب هیڤیا ته ڤه، و د بهرسڤا وى بچى یێ ههوارێن خۆ بگههینته ته.
••━═══✿═══━••
(14)
(یا الله) ئهى خودایێ تشتهك نه ل عهردى ونه ل عهسمانى ل بهر وى بهرزه نابت، وما چاوا دێ ئهو تشت ل بهر ته بهرزه بت یێ ته ئافراندى؟ یان چاوا ته ئاگههـ ژ وى نامینت یێ ته چێكرى؟ یان چاوا ئهو دێ ژ دهست ته دهركهڤت یێ ئهگهر تو رزقێ وى نهدهى ئهو نهشێت بژیت؟
پاكى وبلندى بۆ ته بت، یێ ژ ههمیان پتر ته بنیاست دێ پتر ژ ته ترست، ویێ پتر ژ ته بترست دێ پتر طاعهتێ ته كهت، ویێ ژ ههمیان بێ بهاتر ل نك ته ئهوه یێ تو رزقى ددهیێ وئهو عهبدینیا ئێكێ دى ژبلى ته دكهت.. مهزنى یا تهیه، شـركا موشركان ودرهوا درهوینان چـویـێ ژ سولطانێ ته كێم ناكهت، وئهوێ ب قهدهرا ته رازى نهبت نهشێت ئهمرێ ته ڤهگهڕینت، وئهوێ باوهریێ ب ته نهئینت نهشێت ژ دهست ته دهركهڤت یان ژ ته خلاس ببت.
یا رهببى پاكى وپیرۆزى بۆ ته بت، ههر قهنجیهكا سپێدێ یان ئێڤارى گههشتبته من ژ تهیه، وههر باشیهك ب سهر من دا هاتبت ژ كهرهما تهیه، ههر خێرهكا من كر بت ژ تهوفیقا تـهیـه، وهـهر گونهههكا من كربت ژ نهفسا من وشهیتانیه، ئهز ئعترافێ بۆ ته ب گونههێن خۆ دكهم، چوونا من زێده ب ناڤ گونههێ ڤه ئهزێ ستوخوار كریم بهرانبهر ته، وكارێ منێ خراب ئهزێ تێبریم، ههوایێ نهفسێ وشههوهتان ئهزێ ژ خێرێ بێ بار كریم، داخوازا من ژ ته داخوازا وى كهسیه یێ نهفسهكا غافل ههى، ژ بهر وان زێده قهنجیێن ته د گهل كرین، یێ دلهكێ موژیل ههى ژ بهر وان هیڤیێن بهرفرههێن وى ههین، ویێ كێم هزرێ د وێ پاشهڕۆژێ دا دكهت یا ئهو دێ گههتێ.. داخوازا من ژ ڕهنگێ داخوازا وى كهسیه یێ ههوایێ نهفسێ ئهو د سهر دا برى، وڤیانا دنیایێ دلێ وى گرتى، ودلچوونان ئهو ژ بیر ڤهكرى حهتا سیبهرا ئهجهلێ هاتیه هنداڤى سهرى، ژ ڕهنگێ داخوازا وى كهسى یێ گونههێن وى زێده بووین، وچو ڕێ ل بهر نهماین ژبلى هندێ كو قهستا دهرگههێ ته بكهت وداخوازا ڕزگاربوونێ ژ ته بكهت..
یا رهببى تو ب ناڤێ خۆ یێ مهزنتر كهى، ئهوێ ئهگهر كهسهك داخوازێ پێ ژ ته بكهت تو داخوازا وى بۆ ب جهـ دئینى، وپسیارهكێ پێ ژ ته بكهت تو د بهرسڤا وى دئێى، وتو ب مهزنیا وهجهێ خۆ یێ شهریف كهى، ئهوێ نه فهنا ژێ دگرت ونهگوهۆڕین، تو هند ترسێ بكه د دلێن مه دا كو ئهم پێ ژ بێ ئهمریا ته بێینه پاراستن، ودنیا د چاڤێن مه دا بێ بها ببت.. ڕهڤینا مه ژ ته بۆ نك تهیه، وخۆپاراستنا مه ژ غهزهبا ته ههر ب رهحما تهیه، دوعایا مه ژ تهیه، وباوهریا مه ب تهیه، وهیڤیا مه تهیه، تویى خودانێ عهرد وعهمسانان.
••━═══✿═══━••
(15)
یا رهببى.. گونههێن من ئهزێ بێ ئهزمان كریم، وچو هێجهت بۆ من نههێلاینه، ئهزم ئێخسیرێ خرابه كریارێن خۆ، گرێدایێ خرابیان، یێ ههردهم ل تۆبا خۆ لێڤه دبت و ل گونههێ دزڤڕت، یێ ڕێكا خۆ بهزهكرى، من یێ خۆ ئێخستیه كراسێ گونههكارێن شهرمزار، یێن بسته ل سهر بێ ئهمریا ته، وپشت ڕاست ژ گهفا ته..
یا رهببى رهحمێ ب مه ببه دهمێ ئهم دتهحسین ودكهڤین، ب حلما خۆ جههلا مه ڤهگره، و ب قهنجیا خۆ خرابیا مه ژێ ببه، مه نه ژ بهر هندێ بێ ئهمریا ته كریه كو دێ ژ ته خلاس بین یان ل ته ئێینه ڤهشارتن، ئهڤێ ئهمرێ مه ل بهر چاڤێن یێ ئاشكهرایه، ومـهصـیـرێ مـه د دهستێن دایه، ئهم ئعترافێ ب قهنجیا ته ل سهر خۆ دكهین، وئعترافێ ب گونهها خۆ د گهل ته دكهین، مه بوو جزادانێ خۆ تهسلیمى ته كریه، ڤێجا ئهگهر تو مه عقووبه بدهى مه چو هێجهت نابن، بـهلـێ هـیـڤـیـا مه ب هندێ كو تو دێ ل مه بۆرى ورهحمێ ب لاوازیا مه بهى گهلهك مهزنتره..
یا رهببى رهحمێ ب مه ببه دهمێ شوینوارێ مه ژ دنیایێ قهتعه دبت، وناڤێ ژ دهفتهرا خهلكى دئێته دهر وئهو مه ژ بیر دكهن.. رهحمێ ب مه ببه دهمێ ئهم د قهبرى دا دمینینه ب تنێ د گهل عهمهلێ خۆ، دهمێ ڕهنگێ وڕویێ مه دئێته گوهاڕتن، لهش دحهلیێت، وگههـ وئهوصال ل بن ئاخێ پرت پرت دبن، وسهرهدان ژ مه دئێنه بڕین، وخۆشتڤى پشت ددهنه مه، ونهما ئێدى خۆ كێلیێن مه ژى كهسهك بنیاست.. صهبرا مه ب رهحما خۆ بینه، ودلێ مه ب بهحهشتا خۆ خۆش بكه.
یا رهببى ل ڕۆژا حهشر ونهشرێ تو رهحما خۆ ب مه دا بینه، مه بده د گهل ئهولیائێن خۆ، مه پاقژ بكه ژ گونههان، چو حهقان نهئێخه د ستویێ مه دا كو ئهم پێ بێینه گرێدان، چاڤێن مه ب دیتنا وهجهێ خۆ یێ شهریف روهن بكه، ودلێ مه ب ههڤالینیا پێغهمبهرێ خۆ -سلاڤ لێ بن- شاد بكه.
یا رهببى ئهڤه داخوازا مهیه، وئهڤه دوعایا مهیه، مه -وهكى ته ئهمرى كرى- ئهو دانا بهر دهستێ ته، وهیڤیا مه ئهوه تو وێ بۆ مه ب جهـ بینى وهكى ته سۆز پێ دایه مه: ( وَقَالَ رَبُّكُمُ ادْعُونِي أَسْتَجِبْ لَكُمْ ۚ إِنَّ الَّذِينَ يَسْتَكْبِرُونَ عَنْ عِبَادَتِي سَيَدْخُلُونَ جَهَنَّمَ دَاخِرِينَ).
وصلى الله وسلم على سیدنا محمد، وعلى آله، وصحبه، والتابعین لهم بإحسان إلى یوم الدین.. وآخر دعوانا أن الحمد لله رب العالمین.
