نیشانێن دویماهییا خراب
شەرتێ كاری دویماهییە ، وهەر كارەكێ هەبت ب دویماهییا خــۆ دئـێـتـە ناسـیـن ، وەكی د حەدیسەكا دورست دا هاتی : ( الأعمال بخواتیمها ) ژ بەر ڤێ چەندێ دڤێت خودان باوەر هەر دەم دوعایان بۆ خۆ ژ خودێ بكەت كو ئەو كارێ وی یێ دویماهییێ باش بینت ، وكو كارێ وی یێ دویماهییا ژییێ خۆ ئەو دكەت ژ هەمی كارێ وی باشـتـر بت .. هەر وەسا دڤێت ئــەو خــۆ د وان تـشـتـان دا شـارەزا بكەت یـێـن دبنە ئەگەرا ( دویماهییا خراب ) دا خۆ ژێ بدەتە پاش .
و ل ڤێرێ ئەم دێ ئیشارەتێ دەینە هندەك ژ وان تشتان یێن دویماهییا مرۆڤی خراب دكەن .. خودێ مە بپارێزت .
1- عەقیدا خراب :
دبت مرۆڤەك یێ چاك وباش ژی بت ، وعـیـبـادەتـەكـێ بـۆش وزۆر ژی بكەت ، بەلـێ هندەك لایێن خراب د عەقیدا وی دا هەبن ، وبیـر وباوەرێن وی د دەر حەقا خودێ دا نە ئەو بن یێن ئیسلام پێ هاتی ـ هەر چەندە ئەو هزر دكەت كو عەقیدا وییە یا دورست ـ ئەڤ ڕەنگە مرۆڤە گەلەك جاران دەمێ دكەڤنە بەر مرنێ هندەك گۆتن وكریار ژێ پەیدا دبن كو كارێ وان یێ باش ژی هەمییێ پویچ بكەت ، لەو تشتەكێ گەلەكێ فەرە موسلمان عەقیدا خۆ ب خودێ وپێغەمبەری وئیسلامێ دورست بكەت ، وەكی د كیتاب وسوننەتێ دا هاتی ، دا خودێ دویماهییەكا باش ب رزقێ وی بكەت بكەت ، ویا ئاشكەرایە كو تەقوایێ ئەگەر عەقیدا دورست د گەل دا نەبت دێ وەكی دیوارێ ل سەر بەفرێ بت .
2- بەردەوامییا ل سەر كرنا گونەهان :
كرنا گونەهێ دلـێ خودانی ڕەق دكەت ، وئێكا هند ژێ چێ دكەت كو بێ ئەمرییا خودێ ل نك وی ببتە تشتەكێ عەدەتی ، وئــەو مــرۆڤێ ل سەر كرنا گونەهێ بەردەوام بت گونەه كاری ل سەر باوەرییا وی دكەت ، وهێدی هێدی ئیمانا وی لاواز دكــەت ، وكانــێ مرۆڤ ژییێ خۆ ب چ ڤە دبۆرینت وپـتـر چ دكەت گاڤا كەفتە بەر مرنێ پـتـر هـزرا وی ل سـەر وی تـشـتی دئێت ، وەكی د خەونێ دا كا چاوا ( یێ برسی نانی دبینت ، ویێ رویس جانگی ) وەسا مری ژی ل بەر مرنێ پـتـر هزرا وی ل سەر وی تشتی دمینت یێ وی د ژینا خۆ دا دكر وحەز ژێ دكر .
( ئیمام موجاهد ) ـ خودێ ژێ ڕازی بت ـ دبێژت : (( هەر كەسەكێ بكەفتە بەر مرنێ هەڤالێن وی یێن ئەو د گەل دڕوینشت دئێنە بەر چاڤان .. )) ئینا مـرۆڤـەكێ شەترنج دكر كەفتە بەر مـرنـێ هندەك چوونە نك گۆتنێ : بێژە ( لا إلە إلا الله ) وی گۆت : ( كش مەلك ! ) .
مـەعـنـا : ئــەو مرۆڤێ بەردەوامییێ ل سەر كرنا گونەهەكێ بكەت ترس ل سەر هەیە كو ل بەر مرنێ دویماهییا وی یا خراب بت .
3- باوەرییا لاواز :
دلـی ئەگەر باوەرییەكا موكم و ب هێز تێدا نەبوو ، ڤیانا دنیایێ جهێ خۆ تێدا دكەت ، وهێدی هێدی جهی بۆ خۆ ڤەدگرت حەتا چو جهی بۆ ڤیانا خودێ تێدا نەهێلت ..
وئەو مرۆڤێ دلـێ وی بۆ دنیایێ ببتە هێلین بەرێ وی ب هەمی ڤە دێ كـەفـتـە خۆشی وشەهوەتێن دنیایێ وترسا خودێ ل نك وی نامینت ، و ب ڤی ڕەنگی ئەڤ مرۆڤە غافل دبت ، ڤێجا ئەگەر مرن ڤێڕا گەهشت خلاس ئێدی وی چو دەلیڤە نابن پەشێمان ببت یان ل خۆ بزڤڕت ، وئەو دزانت ئێدی دنیا ژ دەست وی دەركەفت ڤێجا كەسەر دێ ب وی مینن وئەو ل سەر دویماهییەكا خراب دێ چت !
ژ ڤێ چەندێ بۆ مە دیار دبت كو غەقیدا خراب ، وكرنا گونەهان ، وڤیانا دنیایێ ، ئەو سێ گۆشەیا ب ترسە یا دویماهییەكا خراب دئینتە ڕێكا خودانی ، هیڤییا مە ژ خودێ ئەوە ئەو مە ژێ بپارێزت ، ورحا مە ل سەر دویماهییەكا باش بستینت .
