ژ كیڤه
دهست پێ بكهین؟
بهرانبهر ههستكرنا ب پێتڤییا زڤڕینا ل خودێ، وچوونا بهر ب وى ڤه، ودانانا بارێ گونههان، د ناڤ مرۆڤان دا دو لایێن ههڤدژ وبهرانبهرى ئێك ههنه، لایهك بۆرییێ خۆ یێ تژى گونهه ب حهجـمـهكێ زێده مهزن وخراب دبینت، حهتا دهرهجهیهكا وهسا ئهو ژ رهحـمـا خودێ بێ هیڤى دبت وهزر دكهت یێن وهكى وى نه یێن هندێنه قهستا خودێ بكهن، یان چاڤهڕێـیـى رهحما وى بن، وگهلهك جاران خهلك ژى ب ڤى ڕهنگى بهرێ خۆ ددهنێ، هزر دكهن فلان كهس ژ بهر وى بارێ گونههان یێ وى ههى (موستهحیله) خودێ رهحـمێ پێ ببهت ئهگهر خۆ ئهو هزار جاران تۆبه بكهت ژى!
لایـێ دى یـێ بـهرانـبـهر ئهوه یێ باشى گهلهك كرین وهندى ژێ هاتى خۆ ژ گونهه وخرابییان ژى دایه پاش، ڤێجا ڤێ چهندێ ئێكا هند ژێ چێ كربت ئهو كارێ خۆ بكهته منهت ل سهر خودێ، ووهسا د خۆ بگههت كو وى چو عهیب وتهخسیرى نینن، لهو ب بێ منهتى ڤه پسیار بكهت: ما من چ كێماسى ههنه؟
ووهكى لایێ ئێكێ لایێ دووێ ژى ههوجهیى ب هندێ ههیه ل خۆ بزڤڕت و ل خهلهتییا خۆ هشیار ببت، و ب ڕاستى بزانت كانێ چ كێماسى وى ههنه، دا پشتى هنگى ئهو ژى بزانت: كانێ ژ كیڤه دهست پێ بكهت؟
(ژ كیڤه دهسپێكرنا ڕێكا زڤڕینا ل خودێ) ئهڤه ئهو مهسهلا گرنگه یا مه ههمیان ههردهم پێتڤى ب زانینا وێ ههى، چونكى مرۆڤێ نهزانت دێ ژ كیڤه دهست پێ كهت، مسۆگهر نزانت دێ كیڤه چت ژى یان دێ گههته كیڤه؟
تشتێ غهریب ل نك مرۆڤى ئهوه خۆ ئهو مرۆڤێ خراب ژى بت ودزانت یێ خرابه ژى لایێ خۆ یێ باش ب تنێ دبینت، چونكى ههردهم ئهو لـێ دگهڕیێت پهردهیهكى ب سهر خرابییێن خۆ دا بینته خوار، دا خهلك وئهو ب خۆ ژى وان خرابییان نهبینت، وئهگهر جارهكێ ئێك ژ وان خهلهتییان هاته بیرێ یان ئێكى ل بیرا وى ئیناڤه، ئهو دێ وهربادانێ ئێختێ دا ب ڕهنگهكێ جوان بینته پێش چاڤ، وهندهك (تهبریراتان) بۆ ببینت.
لهو ئهگهر مه بڤێت ههر ژ دهسپێكێ مهسهلـێ كورت بكهین دێ بـێـژیـن: بـهرى ئهم دهست ب زڤڕینا ل خودێ بكهین ووهك ئێكهمین پێگاڤـ ل سهر ڤێ ڕێكێ دڤێت ههر ئێك ژ مه ل سهرى بزانت: كانێ سهرهكانییا خهلهتییا وى چیه؟ وعهیبا وى ژ چ دهست پێ دكهت؟
وشـهرت نـیـنـه هـهر جار سهرهكانییا خهلهتییێ ژ گونههێ دهست پێ بكهت، نه.. هـنـدهك جـاران دهسپێكا خهلهتییێ ل نك هندهك كهسان دبـت ژ باشییهكێ دهست پێ بكهت.. بـهلـێ ژ باشـییـێ! كو (غوروور) بــۆ وى ب باشییهكا وى چێ ببت ڤێجا ئهو هزر بكهت ئهڤ باشییه حهققهكى ل سهر خودێ ددهته وى، ووى ژ غهزهبا خودێ ئێمن دكهت وپاراستى دهێلت.
كو تو بزانى كانێ دهسپێكا خهلهتییێ ل نك ته چیه، وسهرهكانییا خهلهلـێ ل كیڤهیه.. ئهو ته پێگاڤا خۆ یا ئێكێ ب دورستى هاڤێت، بـهلـێ دا كـو ئـهڤـ پێگاڤا ئـێـكـێ ب شـاشـى نهئێته هاڤێتن پێتڤییه ههر ئێك ژ مه ب دورستى خۆ بنیاست، دا ب سهر كێماسییێن خۆ هلببت، وبێ دودلى ئـعـتـرافێ ب وان خهلهتییان بكهت، وپاشى ب زیرهكى بڕیارا خۆ دویركرنا ژ وان خهلهتیا بدهت، نهكو ژ بهر لۆمهیێن خهلكى ئهوێن هندهك ژ نهزانین حسێب دكهن ژ عهزابا قهبرى نهخۆشتـر! ڕاببت هێجهتان بۆ خهلهتییێن خۆ بگرت.
