پێشگوتن
حەمد وسوپاسی بۆ وی خودایی بن ئەوێ شەڤەكا ب خێرتر ژ هزار هەیڤان د رەمەزانێ دا دای ، ژ بەر وێ خێرا مەزن یا كو تێدا چێبووی كو هنارتنا قورئانا پیرۆزە ، دا بۆ ئوممەتا ئیسلامێ ببتە بەرنامە ودەستوور ، وصەلات وسلاڤێن بەردەوام ل سەر پێغەمبەرێ وی بن سەروەرێ هەمی پێغەمبەران ، وهەمی صەحابی ودویكەفتییێن وی .
ژینا مرۆڤی د دنیایێ دا یا تژییە ژ ئاستەنگ ونەخۆشییان ، وحەتا ئەو بشێت ب سلامەتی بگەهتە ئارمانـجـێ پـێـتڤییە ل سەر وی ئەو ڤان ئاستەنگان ژ ڕێـكـا خـۆ لادەت ، وبـێ گـومان لادانا ڤان ئاسـتـەنگان ئـیـرادەیەكا مەزن و ب هێز پێ دڤێت ، چونكی ئیـرادەیە دشێت فرەهییێ وتەنگاڤییێ بێختە ژینا مرۆڤی ، ئەگەر ئەو یا ب هێز بوو دێ خودانێ خۆ سەربەست كەت ، و ژ بن پێبەستا دلچوونان دەرێخت ، وهنگی ئەو دێ هەست ب بێنفرەهییێ كەت ، وئەگەر ئیـرادەیا وی یا لاواز بوو دلچوونێن وی وی دێ وی بن دەستی خۆ كەن ، وهنگی ئەو دێ هەستێ ب بەرتەنگییا بن دەستییێ كەت ، مەعنا : ئیـرادەیە هێزێ ددەتە خودانی .
وچونكی ئیسلامێ دڤێت مرۆڤەكێ نموونەیی دورست بكەت ، شریعەتی خەمەكا خەم ژ لایێ ب هێزكرنا ئیـرادەیا مرۆڤی خوارییە ، وهندەك شریعەتێن تایبەت بۆ ڤێ هێزكرنێ داناینە ، وئێك ژ وان شریعەتان شریعەتێ فەركرنا ڕۆژییێ رەمەزانێ یە ..
وئاشكەرایە كو ڕۆژی مەزنتـرین فێرگەها ئیسلامییە ئیـرادەیا مرۆڤێ موسلمان ب هێز دئێخت ، چونكی ڕۆژی پـتـر ژ هەر تشتەكێ دی زالبوونا لەشی ل سەر رحێ و ( مادییەتێ ) ل سەر ( ئنسانییەتێ ) سنۆر ددەت ، وئەڤ چەندە پـتـر بۆ مە بەرچاڤ دبت دەمێ ئەم ڤان ڕاستییان ل بیـرا خۆ دئینینەڤە :
1 ـ ئەو حەلالێن ڕۆژی ل سەر مرۆڤی حەرام دكەت هەمی ئەون یێن پەیوەندییەكا موكم ب ژینا مرۆڤی ڤە هەی ، وەكی : خوارن وڤەخوارنێ ، وپـێ نەڤێت بێژین ئەگەر ئـەو شیا ب دلـێ خۆ خۆ ژ وان تشتان بدەتە پاش یێن ئەو د ڕەفتارا خۆ یا ڕۆژانە دا هەوجە دبتێ ، ئەو دێ شێت وان تشتێن دی ژی یێن كاری بۆ بن دەستكرنا وی دكەن لاواز بكەت .
2 ـ ڕۆژی وێ ڕووتینێ دشكێنت یا ژینا مرۆڤی چارچووڤە دكەت ، ژ بەر ڤێ ئێكێ ڕۆژی گوهۆڕینەكا سەرەكی دئێختە دەست ودارێ ژینا مرۆڤی ، وئەو مرۆڤی بشێت ل سالـێ هەیڤەكێ سەروبەرێ ژینا خۆ بگوهۆڕت ، دێ شێت چی دەمێ بڤێت پێ ل وان ئاستەنگان دانت یێن دكەڤنە ڕێكا وی ، چونكی ئەو دێ فێری خۆ ( تەكییفكرنا ) د گەل كاودانان بت .
3 ـ دبت مرۆڤ د ژینا خۆ دا گەلەك جاران هەوجەیی هندێ ببت وی عەدەتی وڕووتینی بگوهۆڕت یێ ژینا وی ل سەر ب ڕێڤە دچت ، ڤێجا ئەگەر ئەو ژ وان نەبت یێن ڕۆژییێ ئەو فێری شكاندنا ڕووتینی كرین ، هنگی ئەو دێ ڕووتینی هلبژێرت ، و د ئەنجام دا ئەو د گەل خۆ دێ كەفتە هەڤڕكییەكا نەفسی یا دژوار .
وپێخەمەت بەردانا هندەك سیناهییان ل سەر شریعەتێ ڕۆژییێ ووێ پەیاما رەمەزان دگەهینت ئەڤ بەرپەڕە مە بەرهەڤكرینە ، كو د بنیات دا هندەك پەیڤ بوون د ئێزگە وتەلەفزیوونا كوردستان كەنالـێ دهۆكێ دا ل هەیڤێن رەمەزانێ هاتبوونە پێشكێش كرن .. هیڤیدارین مفا ژێ بێتە وەرگرتن .
