بوونا پێغهمبهرى بوونا ئوممهتهكێ بوو
ل دهمهكێ كاروانێ ژینێ ب سست و خاڤى و بێ ڕێبهر سهرگهشت و حێبهتى ددا ڕێ، و جیهانا مرۆڤینیێ ههر ژ ڕۆژههلاتێ حهتا ڕۆژئاڤایێ، د خورافه و درهوا صهنهم پهڕێسیێ دا نقۆ بووى، و ب ڕهشه داڤێن كۆلهتى و عبوودییهتێ دا هاتییه گرێدان، دنیا كهفتبوو دهستێ هندهك رۆمیێن فاسقى و بهطرانى و نهگوهداریێ ئهو بن دهست كرین، و هندهك فارسێن بێخیرى و طهمهع و سهرداچوونێ ئێخسیر كرین، و خهلك د ناڤبهرا ڤان ههردو هێزان دا ڕێ بهرزه مابوون، یان دێ دویڤهلانكییێ كهن، یان دێ دویڤهلانك مینن!
چو دهلیل نهبوون ڕێكا ڕاست نیشا خهلكى بدهن، و چو پهرژان نهبوون مــرۆڤــان ژ لادانێ بپارێزن، یان ژ كهفتنێ بدهنه پاش.. كڕێن و فرۆتن ب لهشى دهاته كرن، و رح مرارهكێ حهبسكرى بوو، و خودێ ب ههمى مهزنییا خۆ ڤه د هـــزرا خهلكى دا یان د قالبێ صهنهمهكى دا یێ نهخشاندى بوو، یان ژى د خورافا (ثالووثهكێ نهئێته فامكرن) دا بهرزه بووبوو!
چى لایێ ته بهرێ خۆ دابایێ چریسكهكا هیڤییێ ته لێ نهددیت، هنگى، ل نیڤا عهردهكێ كهسێ چو هزر ژێ نهدكر، ڕۆناهییهكا گهش بلند بوو، ئهو قهدهر تهخهیێن تارییێ هــهمــى ڤـــهڕهڤــاندن، و ژ نیڤا جهرگێ جاهلییهتێ گازییا تهوحیدێ بلند بوو، و ل جیهانێ هاته ڕاگههاندن كو: موحهممهد هاته دنیایێ.. و ب هاتنا وى دیــــرۆكــــهك ب دویماهى هات، و دیرۆكهكا دى دهست پێ كر، زهمانهك سهرژێر بوو و ئێكێ دى بهرژێر بوو، سهروهرى ژ دهست (جبت و طاغووتى) دهركهفت، و سهركێشى بۆ پێغهمبهرى هاتهدان، گڕنژینا هیڤییێ ژ نیڤا دهریایێن بێ ئومێدییێ هاتهدهر، و بوونا پێغهمبهرى -سلاڤ لێ بن- بوو بوونا ئوممهتهكا نوى، ئـــهو ئـــومــمـــهتا وهحدانییهتێ ب سهر وهثهنییهتێ دئێخت، و ئینسانییهتێ ب پێش عهصهبییهتێ دئێخت، و ئیسلامییهتێ ل جهێ جاهلییهتێ ددانت.
و ههر چهنده پێغهمبهرێ نوى ژ ناڤ عهرهبان هاته هلبژارتن، و ب ئهزمانێ وان دئاخفت، بهلێ بهرێخودان و پهیام و ئارمانجا وى گهلهك ژ هــنـــدێ مــــهزنــتــر بوو كو د قالبێ مللهتهكى دا بێته كۆمكرن، یان د چارچووڤهیێ زمانهكى دا بێته گرێدان، و كانێ چاوا ئهو ڕۆژا هوین دبینن ل عهسمانى گهش دكهت، ملكێ چو مللهتێن تایبهت نینه، چونكى ئهو تێنێ و گهرمێ ددهته دنیایێ ههمییێ، وهسا موحهممهد و گازییا وى ملكێ چو مللهتێن تایبهت نهبوویه، چونكى ئهو ڕێكێ بۆ ههر ئێكێ ڕێكێ بگرت ڤهدكهت! و كانێ چاوا زڤڕینا دۆلابا زهمانى وێ ڕۆژا هوین ل عهسمانى بلند دبینن كهڤن ناكهت، و ههر شهڤهكا ڕهشا بێت هیڤیێن خهلكى پتر ب هاتا وێ ڤه گرێ ددهت، و بهرێ وان ددهتێ، وهسا ئهو گازییا موحهممهد پێ هاتى، و ئهو ئوممهتا ب بوونا وى بووى، دمینت ئهو هیڤى یا خهلك پهنایێ دبهنه بهر دهمێ كۆره ڕێ مشه دبن، و گازیكهر بۆ دهرگههێن جههنهمێ زێده دبن.
ب بــوونـا پێغهمبهرى -سلاڤ لێ بن- ڕۆژا قورئانێ ههلات، ئهو ڕۆژا (تهجاوبێ) د گهل ههمى ڕاستیێن گهردوونێ دكهت، و ڕێ دكهڤت د گهل مهنطقێ عهقلێ ڕاست، و (موقهرراتێن) علمێ دورست، بێى ژ داخوازێن (فطرهتێ) دویر كهڤت، و ئهگهر ئهڤ چهنده ل بهر هندهك كهسان تشتهكێ غهریب بت، ئهو ل بهر مه یا غهریب نینه، مه ئهوێن مه باوهرى ههى كو ئیسلام و گهردوون و مرۆڤ صنعهتێ خودێیه: (صنع الله الذي أتقن كل شیء)، و ئهگهر بۆرینا زهمانى كهسهك ب هندێ نهحهساند بت كو گهردوون چێكریهكێ كهڤنه، یان مرۆڤ مهخلووقهكێ پیره، وهسا وێ كهسهك پێ نهحهساندیه كو ئهو قورئانا موحهممهد ژى پێ هاتى (توراثهكێ) كهڤنه، یان بیرهاتنهكه دهمێ وێ یێ چووى.. چونكى پهیاما موحهممهد پێ هاتى هزرهكا (موجهررهده) ژ ههر تهعهصصوب و تهحهززوب و كهرب و كینهكا ههبت.. هزرهكا ئاڤاكرنا مرۆڤى بۆ خۆ دكهته ئارمانج.
ڕۆژهكێ مرۆڤهكى پسیار ژێ كر: ئهى پێغهمبهرێ خودێ، ژ ههمى مرۆڤان خودێ پتر حهز ژ كیژ مرۆڤى دكهت؟
بهلكى هندهك ژ ههوه هزر بكهن، وى گۆت بت: ئهوێ پتر عیبادهتێ خودێ بكهت، نڤێژان بكهت ڕۆژیان بگرت، جیهادێ بكهت.. و هتد! بهلێ ئهز دبێژمه ههوه: نه.. بهرسڤا وى ئهو نهبوویه، وى گۆت: (أَحبُّ الناس إلى الله تعالى أنفعهمْ للناس, وأحبُّ الأَعمال إلى الله تعالى سرُورٌ تدخلهُ على مسلم, أوْ تكشفُ عنهُ كربةً, أوْ تقضي عنهُ دينا, أوْ تطردُ عنهُ جوعا, ولأنْ أمشيَ معَ أخ في حاجة أحبُّ إليَّ منْ أنْ أعتكف في هذا المسجد شهرا, ومنَ كفَّ غضبهُ سترَ الله عورتهُ, ومنْ كظمَ غيظهُ ولوْ شاء أنْ يمضيهُ أمضاهُ ملأَ الله قلبهُ رجاءً يومَ القيامة, ومنْ مشى معَ أخيه في حاجة حتى يتهيأَ لهُ أثبتَ الله قدمهُ يومَ تزولُ الأَقدام) مرۆڤهكێ مهزن و هیڤییێن زهلال وهكى ڤى مرۆڤى ههوه دیتیه؟!
مهزنترین مرۆڤ ب دیتنا موحهممهدى، یێ كو ژ ههمییان پتر خودێ حهز ژێ دكهت ئهو مرۆڤه پتر مفایى دگههینته مرۆڤان، ئهوێ تهفشیێ بهرۆكا خۆ ب تنێ بت، و مفایێ وى ژ دهرازینكا مالا وى دهرباس نهبت، نه ئهوه یێ خودێ حهز ژێ بكهت، ئهگهر شهڤێ ههمییێ سهرێ وى د سوجدێ دا بت، و كارێ ژ ههمییان پتر خودێ حهز ژێ دكهت، ب دیتنا موحهممهدى، ئهوه تو كهیفهكێ بێخیه دلێ مرۆڤهكى، كو تو تهنگاڤییهكێ ژ سهر ڕاكهى، یان دهینهكى پێشڤه بدهى، یان برسهكێ ژێ دویر بكهى.. و ئهگهر ئهز د گهل برایهكى دهركهڤم دا شۆلهكا وى بۆ ب جهـ بینم، ل بــهر مـــن خـــۆشتره ژ هندێ كو ئهز ههیڤهكێ ئعتكافێ ل ڤێ مزگهفتێ بكهم، ئهڤه گۆتنا پێغهمبهریه -سلاڤ لێ بن-!
و ئهو كهسێ غهزهبا خۆ داكهت خودێ عهیبێن وى دێ ستاره كهت، و ههچییێ بشێته خۆ دهمێ كهربێن وى ڤهدبن، و ئهگهر وى بڤێت ئهو دشێت كهربا خۆ داڕێژت، ڕۆژا قیامهتێ خودێ دلێ وى دێ تژى هیڤى كهت، و ههچیێ د گهل برایێ خۆ دهركهڤت حهتا ههوجهییا وى ب جهـ بینت، خودێ پیێن وى دێ موكم كهت ڕۆژا پێ دتهحسن.
ئهڤه (مقیاسێ) باشییا مرۆڤییه د دینێ موحهممهدى دا.. ڤێجا ئهڤرۆ، ل وى دهمێ ئوممهتا موحهممهدى وى ل بیرا خۆ دئینته ڤه، و بیرهاتنا وى ساخ دكهته ڤه، بلا سهح كهتێ كانێ چهند ژ دینێ موحهممهدى د دلێ وان دا مایه، و چهند ژ ئهخلاقێ وى د ناڤ ئهخلاقێ وان دا مایه، و ئهگهر بهرسڤ یا سلبى بوو، هنگى بلا ئهو بزانن ساخكرنا بیرهاتنان فلسهكى ل سهرمالێ مرۆڤى زێده ناكهت.
