ناڤبرا هەڤدێ
نهبیلایێ هزرێت خۆ د سهرهاتیێت ڕۆژا بۆرى دا دكرن، ڤان سهرهاتیان پهرده ژ سهر چاڤێت وێ ڕاكر، ب كورتى وێ هاى ژ خۆ نهبوو، ڕاستیا وى تشتێ چێ دبوو نهدزانى، كارێ خۆ دكر.. دخوار وڤهدخوار، وڕادبوو ودنڤست، كتێب دخواندن وگوهێ خۆ ددا مۆسیقێ.. دلێ خۆ بۆ ڤیانێ وژیانێ ڤهدكر و ب چو بێنتهنگیێ وشڕاتیێ نهدحهسیا.. ژیانهكا بێ دهنگ وجوان بوو، چو تشتان خۆشیا وێ شێلى نهدكر.. بهلێ ڕۆژا وێ عهگوه تێدا نیاسى ههمى تشت سهر نشیف بوون، جیهانهكا دى ل بهر چاڤێت وێ ئاشكهرا بوو، جیهانهكا زێده زێده عنتیكه، یا وهكى شهڤێ تژى تارى وبهرزهیى وترس وخهونێت نهخۆش، بێ گومان دوهى دهمێ وێ هاى ژ خۆ نه ئهو یا كهیفخۆشتر بوو، بهلێ پشتى پیێ وى تهحسیه د ناڤ وێ جیهانا سیمهكرى دا تهناهى وبنهجهى ژ دهست وێ دهركهفت، ونهخۆشى وعهزابا نهفسى وهزركرنا ب وهستیان ڤه ما د دهستان دا، نیاسینا ڤى دهمێ نوى مرۆڤهكا دى ژ وێ دا چێكرن، ئهو ل هندهك سهر وبهرێت وهسا ئاگههدار كر یێت چو جاران نهدهاته سهر هزرا وێ، وتشتێ عنتیكه ئهو ئهو یا پهشێمان نینه ژ وى تشتێ بۆرى، ئهو وى دهژمێرت بهایێ زانینێ، سهربۆڕ یا تهعله بهلێ یا ب مفایه، بهلێ پا تشتێ ب دورستى ئهو غهمگین كرى ئهو بوو وێ مرۆڤێت خۆ ژى د سهربۆڕا خۆ یا ڕهق دا پشكدار كرن، ئهو گهلهكا هشیاره ل پاراستنا دهیكا خۆ یا نساخ وبابێ خۆ یێ پیر ومالا خۆ یا دلشاد ب ئهڤین وبنهجهیێ، هزرێت خۆ كرن كو ئهڤ شهڤه عهگوهى بكوژت، دهســت دایــێ وڕێــك بــۆ خـۆ دانان، دهمهكێ درێژ ژ شهڤێ ب ڤێ هزرێ ڤه بۆراند، سهردانا وێ بۆ گرتیخانهیا حهربى ئهو قانع كر كو عهطوه وههڤالێن وى كۆمهكا كوژهك وخوین مێژانه، وئهو ژ دلنهرمى ومرۆڤینیێ دشویشتینه، ئهگهر خۆ (ئـیـخـوان) دتـاوانـبـار ژى بـن ــ وئــهڤــه گـۆتـنـهكـا ڕهوایه ــ نه ژ دادیێ یه ئهو ڤێ د گهل وان بكهن یا كو ل درێژیا دیرۆكێ مللهتى نهدیتى نه ژ دهستێ ئنگلیزێ داگیركهر نه ژ دهستێ جوهیێت سهرداچووى، ڤێجا پا تو چ دبێژى بۆ وان برایێت ل وهلاتى ڤان كارێت كرێت دكهن!
بهلێ ل دویماهیێ ئهو گههشته هندێ كو كوشتنا ئێكى یان دووان چو گوهۆڕینێ نائێخته رژێمێ، ئهو رژێما ستهمكارى بۆ خۆ كریه ڕێك وئازاردانا لهش وگیانان بۆ خۆ كریه شێوه، رژێمهكا هۆسا ب هزاران بهلكى سهدان هزاران چهكدار بكهت، دا گهلهك ڕهنگێت تاوانان د دهر حهقا بێ گونههــ وخودان نامویسان دا بكهن، ومانێ ههڤڕكى د ناڤبهرا چاكى وخرابیێ ودادى وزۆرداریێ دا یا بهردهوامه، وقابیل وهابیلى ژ مێژه وهره شهڕ وجهنگه.. وئهگهر دهردهكى بنگههێ خۆ دانا جههكى فایده ناكهت تو نساخهكى یان دههان ڤهدهر بكهى، بـهلـێ گــوهــۆڕیــنــا تهڤایى ئهو هێزه یا ب دورستى دشێت گهشاتیێ بدهته دیمهنێ ژیانێ.. هندى عهطوهیه وهكى پارچههكا چهكێ هشكه یێ ژ دهرڤه دئینن.. ئهو ئامیرهتهكه زۆردارى وى ل دویڤ دلێ خۆ دئینت ودبهت، وبهرێ وى ددهته وێ ئارمانجا وێ دڤێت، وئهگهر رژێم وان ههمى دهستان ببڕت یێت مرنێ ووێرانكرنێ هل دگرن وبهرێ تۆپا خۆ ددهنه سنگێت بێ گونههان هنگى خرابى دێ بنبڕ بت وتهختێ زۆرداریێ دێ كهڤت.. وههر ڕژێمهكا ڕزى یا ههبت ــ وهكى دیرۆكێ نیشا داى ــ ئهگهرێت نهمانا خۆ د ناڤ خۆ دا هل دگرت.. وخرابى هێزه.. وپهیڤه.. وڕێكخستنه.. وشكهستنا وێ بێ چهك وهێز وپهیڤ وڕێكخستنێ نابت، بهلێ تووفانا بۆش و ب ترس خۆش یا دئێت وخرابى وگونههێت خۆ د گهل خۆ هل دگریت، ونهدویره تشتهكێ مهزن و ب ترس ل ڤى دهمى سهرى هل دهت، دلێ وێ وه دبێژتێ..
* * *
نهبیلا وهستیاى وداماى ژ سهر تهختێ خۆ ڕابوو، بهلێ یا ل سهر وێ ئهو بوو ئهو ڕابت وبچته كۆچكا كۆمارى ل دویڤ ژڤانێ خۆ.. دڤێت ئهو خۆ هشیار ونهرم وحهلیم بكهت، ئهگهر نه دهرگههێ گرفتاریێ ل سهر وێ دێ ڤهبت، وبزاڤێت وێ یێت ل پاشهڕۆژێ دێ لهنگ كهت وسهفهرا وێ تێك دهت، ومهعنا ڤێ ئهوه ئهو حهتا حهتایێ دێ مینته د ناڤ پهنجێت شهیتانى دا، وعهگوه دێ وێ گههینته خۆ، وئهو خهونێت ئهو ب پاشهڕۆژهكا گهش ڤه دبینت ههمى دێ ههڕفن..
بهرى ژڤانى ب چارێك سهعهتێ ئهو ل وێرێ بوو.. زهلامهك هاته بهراهیێ وگۆتێ:
ــ خێره.. ته چ دڤێت؟
ــ من دڤێت سهرۆكى ببینم..
ــ ههما هۆسا ب ساناهى؟!
ــ پێشهوایێ مللهتیه وئهز ئێك ژ مللهتیمه، ووى یێ گۆتى: دهرگههێ من ههردهم یێ ڤهكریه.
وى زهلامى گۆت:
ــ ڕاسته.. بهلێ..
ــ بهلێ چ؟
ــ من دڤێت ئهگهرا سهرهدانێ بزانم.
ــ ئهگهرێ دێ بۆ وى بێژم..
ــ باشه.. نابت تو وى ببینى حهتا وى تشتێ ته دڤێت بێژیێ ل سهر كاغهزهكێ بنڤیسى وئهم دێ وێ كاغهزێ نیشا دهین.. ئهگهر نه تو وى نابینى.. فهرمان ب ڤى ڕهنگیه.
نهبیلایێ زوى كاغزهك ئینا دهر، وئهوا وێ دڤێت بێژته سهرۆكى ب كورتى لێ نڤیسى، زهلامى كاغهز ژێ وهرگرت، باش خواند پاشى گۆت:
ــ تو بێژى ئهز ژ دلسۆزامه بۆ شۆڕهشێ وسهرۆكى؟
ــ بێ گومانه..
ــ بهلێ باوهریا ته ب سهرۆكى.. تشتهكى ل سهر ته فهر دكهت.
ــ ئهو چیه؟
ــ دڤێت ته باوهرى ب دورستیا كارێ سهرۆكاتیێ ههبت، وبێى جڕهكێشى ودان وستاندنێ قهبویل بكهى.
ــ بـهلـێ مــن باوهره كو فهرمانـێـت سهرۆكى ب ڕێكهكا خهلهت وشێوهیهكێ نهدورست دئێنه ب جهئینان..
زهلام گڕنژى وگۆت:
ــ كهس نهوێرت وه بكهت.
ــ مانێ یێ وه دكهن، ته (حهربى) دیتیه؟ ڕۆژهكێ تو چوویه د ئاڤاهیێ موخابهراتا گشتى ڤه؟
ــ بهلێ.. پهیوهندى د ناڤبهرا مه ووان دا یا بهردهوامه.
ــ یهعنى هوین دزانن چ ل وێرێ چێ دبت.
ــ بێ گومان.
نهبیلایێ ب حێبهتى بهرێ خۆ دایێ، وى گۆت:
ــ بۆ زانین سهرۆكى كاغهزا ته باش خواند، وهندهك خیچێت سۆر ل بن هندهك ڕستان كێشان، كاغهزهك نینه بۆ وى بێت وئهو نهخوینت، وههر گۆتنهكا ههبت ئهو كهیفا خۆ پێ دئینت و ب ڕێكا خۆ یا تایبهت ئهو مفایى ژێ وهردگرت، تو نزانى كانێ ئیخوانان چ ل بهر بوو، وان دڤیا سهرۆكى بكوژن، ووهلاتى وێران كهن، ودهسههلاتێ بێخنه دهستێ خۆ وخۆ بدهنه د گهل توخم پهڕێسى ومهژى هشكى وقهرقهشێ، ما ته باوهرى ههیه ئهورۆپا یان ئهمریكا یان رووسیا رازى ببان كو دهسههلات بۆ وان با؟ سهركهفتنا وان دا ئازادیا وهلاتى تێ بهت ومه كهته د ناڤ لهپێت داگیركهرێ بێ رهحم دا.. ونه ژ عهقلیه ئهز د گهل كهسى یێ نهرم بم ئهوێ كوشتنا من بخوازت..
نهبیلایێ گۆت:
ــ ما بۆچى مهحكهمهكا عهدهتى د گهل وان نائێتهكرن؟
ــ ل وان دهمێت شهڕێت ناڤخۆیى ههبن، یان تهناهیا وهلاتى د ترسێ دا بت، مهحكهمێت عهدهتى دبێ مفانه.
ــ چو شهڕێت ناڤخۆیى نهبوون..
ــ مه ئهو ژ بهرێك بر.. نه ژ عهقلى بوو ئهم خۆ ل هیڤیێ بگرین حهتا ئهو چێ دبت.
ــ بهلێ هندهك بێ گونههێت ئهز باش دنیاسم ل وێرێ بوون..
ــ گومان د وێ چهندێ دا نینه.. چونكى دهمێ فتنه ڕوى ددهن ئهو بێ گونههان ژى د گهل خۆ دبهن، بهلێ ل دویاهیێ سهروبهر ئاشكهرا بن.
نهبیلایێ خۆ ل سهر كورسیكێ لڤلڤاند، تبلێت خۆ پهرخاندن پاشى گۆت:
ــ ما بۆچى ئهم دان وستاندنێ د گهل وان ناكهین ل سهر هزرێت وان؟
ــ هزرێت وان ب سهر ڤه دكهڤنه عهقلێ مرۆڤى.. وان دڤێت شریعهتێ ئیسلامێ بێته ب كارئینان، وكهس نهشێت بێژت: ئهڤه نابت.
ــ یهعنى: ئهو دحهقن.
ــ نه مهسهله هۆ یا ب ساناهى نینه.. هژمارهكا ئهگهران ههنه دڤێت ژبیر نهكهین.
ــ دێ شێم زانم كانێ ئهو چنه؟
زهلام گڕنژى وگۆت:
ــ مهسهله نه ئهڤهیه.
ــ پا مهسهله چیه؟
ــ نهگوهدارى وچهكداریا وان.. ئهم دهستویریێ بۆ ڤێ چهندێ نادهین ئهگهر وان چو هێجهت ههبت ژى، ژ بهر هندێ مه بهرگریا بزاڤا وان كر نهخاسم شێوهیێ وان یێ خهلهت یان لایێ سیاسى د گازیا وان دا، ئهم ههمى موسلمانین، ما وه نینه؟
وێ دزانى كانێ چهند درهو وخهلهتى دگۆتنا ڤى زهلامى دا ههبوون، چونكى ئهو دزانت كو نه ئیخوان بوون ل سهرى تهعدایى كرى، وئهو دزانت كو سهرۆكى ب خۆ ژى هندهك پهیوهندى د گهل وان ههبوون، ووان ههر ل سهرى دهستێت خۆ كربوونه د دهستێت شۆڕهشگێڕان دا، بهلكى گهلهك ئهندامێت مهزن د (جڤاتا سهركردایهتى) یا ئێكێ دا ژ وان بوون، وئهڤ هاریكاریا وان ژ بهر هندێ بوو دا مللهت ئازاد بت، وڕێ ل بهر شریعهتێ خودایى بێته ڤهكرن، وسهردارى بۆ بێته زڤڕاندن، حهتا دادى بگههته ههمیان، بهلێ شۆڕهشێ غهدره ل وان كر، پتر ژ جارهك ودو جاران ئهو هاڤێتنه د بنێ زیندانان دا بێهن ل وان تهنگ كر.. ئهرزاق ژ وان بڕى ودهڤێت وان گرێدان، وگرفتارى ئێك ل دویڤ ئێكێ ئێخستنه ڕێكا وان.. وههر وهكى ژ (تهحقیقێ) دیار بووى ڕێبهرێ گشتى هاى ژ ڕویدانا (مهنشیه) نهبوو، وكهسهكێ دى ژى ژ مهزن وئهندامان.. وئهو كهسێت ب وێ چهندێ ڕابووین ههر زوى حوكمهتێ حوكمێ قنارهكرنێ دانا سهر وان وئهو كوشتن بهرى ڕاستى دیار ببت، لهو ڕاستیا وێ ڕویدانێ یا ڤهشارتیه د ناڤ تارى وبهرزهییهكامهزن دا، وخۆ ئهگهر وهسا ژى بت ووێ كۆما بچویك ئهو كار كربت، چو مهعنا بۆ هندێ نینه ئهڤى جزایێ گران ددهنه بهر وان ههمیان، وڤێ وێرانكرنا تهڤایى یا ستوینێت حهقیێ وئازادیێ ل دلێ مصرێ، بهلكى ل دلێ جیهانا ئیسلاى هژاندین..
ڕۆژنامـه وئێزگێت جیهانا ئازاد ههمیان نهرازیبوونا خۆ ژ بهر ڤى كارى دیار كر، وئیشارهت دا دلڕهقیا بێ وێنه یا دهسههلاتا مصرى ئهوا دهستویرى نهدایه كهسێ كو دان وستاندنهكا ساخلهم د گهل هزر وبیرێت ڤێ كۆمێ بكهت، لهو ههر كهسێ ئـهو تاوانـبـار بـكـهت نهشێت هیچ بهڕهڤانیێ ژ هزرا خۆ بكهت..
نهبیلایێ ب ڤێ ههمیێ وپترێ ژى دزانى، وئهو پێ دحهسیا كو د ناڤبهرا وێ وكهفتنا د چالا زۆرداریێ دا مویهكه، لهو ههر زوى و ب هشیارى حسێب د گهل خۆ كر، پاشى ژ قهستا گڕنژى گۆت:
ــ ڤێ گاڤێ ئهز تێ گههشتم!
ــ هیڤیا من ئهو كو تو قانع ببى.
ــ ئهز قانع بووم.
ــ ئهڤه ب تنێ بهس نینه.
نهبیلایێ ب گرنگى ڤه گۆتێ:
ــ پا چ ددى؟
ــ تو ژ جیلێ شۆڕهشێ یى وبارهكێ مهزن ێ ل سهر ملێت ته ههى، ودڤێت تو ڤێ چهندێ بۆ ههر كهسهكێ نێزیكى خۆ بێژى.
نهبیلایێ ب دهنگهكێ بلند كره كهنى، زهلامى ب حێبهتى بهرێ خۆ دایێ، ولێ خوڕى:
ــ بۆچى تو دكهیه كهنى؟
وێ خۆ نێزیكى وى كر و د گوهێ وى دا گۆت:
ــ ئهز ژ ڕێخستیێت مللیمه یێت بهڕهڤانیێ ژ شۆڕهشێ دكهن.. وئهز هاریكاریا موخابهراتێ ژى دكهم..
زهلامى ژى حێل كره كهنى وچوو دهستى وگۆتێ:
ــ ئێ دا ژ سهرى وه بێژى!
ــ ما عهگوهى نهگۆتیه ته؟ ئهو دهزگرێ منه..
زهلام گڕنژى وچاڤێ خۆ نقاندن وگۆت:
ــ ئهم ههمى تشتان دزانـیـن، وســهرۆكـى ژى ئهو تشتێ ب سهرێ ته هاتى زانى، ووى ل بهره خۆ ژ وى عێجز بكهت، ڕاستى ئهوا ب سهرێ ته هاتى تڕانهیهكا دارگران بوو..
نهبیلا ژ گۆتنا وى گوهشى، هویر سهحكرێ وگۆت:
ــ مهخسهدا ته چیه؟
ــ ئهو یاریهك بوو ژ عهطوهى پشتى ته خۆ ب دهست ڤه بهرنهداى، وى دڤیا ئهو دهرسهكێ نیشا ته بدهت دا تو خۆ ب دهست وى ڤه بهردهى، وى ئهو مهسهله د گهل هندهك ههڤالێت خۆ ژ زهلامێت موخابهراتێ تهرتیب كر، ئهو زهلامێت تو گرتى، مه گهلهك ب هندێ كره كهنى.. عهطوه مرۆڤهكێ ئهحمهقه، یێ كێم مهژیه، ئهم باش وى دنیاسین، لهو ئهم حسێبێ د گهل وى ناكهین سهرا ئهحمهقیێت وى بهلكى ئهم خۆ پێڤه موژیل دكهین وپێ دكهینه كهنى..
وێ چاڤێت خۆ گرتن، سهرێ وێ زڤڕى، باوهر ژ گوهێت خۆ نهكر، بهلێ پا دڤێت ئهوشانۆگهریێ ببهته سهرى، چاڤێت خۆ ڤهكرن وگۆت:
ــ ئهز ناهێلم تو بۆ خۆ یاریان ب دهزگرێ من بكهى..
ــ ئــهز یـاریــان پێ ناكهم، دێ ئێك ودو بینینهڤه وتو دێ د گهل مه بى وشهڤهكا خۆش دێ بۆرینین دهمێ دوباره ئهم وێ دئینینه بیرا ته یا ب سهرێ ته هاتى، و د سهر ههمى تشتان ڕا عهطوه مرۆڤهكێ غهریبه، وسهرۆك حهز ژێ دكهت.
نێزیك بوو ڕۆندكهك ژ ناڤ موژیلانكێت وێ ڤهپهشیێت، بهلێ وێ ئهو ڕۆندك ڤهگرت، و د بن لێڤلێڤكان ڕا گۆت: (صهیێ پیس) زهلامى هاى ژێ نهبوو ب بهرسڤدانا تهلهفوونێ ڤه یێ موژیل بوو، پشتى زڤڕى خۆ نێزیكى وێ كر، ب خۆشتڤى ڤه دهستێ خۆ ب ملى دا ئینا خوار، وگۆتێ:
ــ ڤێ گاڤێ گۆتنا ته چیه؟
ــ ما ئهز سهرۆكى نابینم؟
ــ بهلێ.. بهس پشتى سێ ڕۆژێت دى، چونكى ئهو یێ حـازر نــیــنــه، بـهلـێ یــا ژ مـن ڤه ههوجهى وێ چهندێ نینه، و ل پاشهڕۆژێ گهلهك دهلیڤه بۆ ته دێ ههبن تو وى ببینى.. مانێ تو ژنا زهلامهكێ دلسۆز ومهزنى..
پاشى كهنى وگۆت:
ــ ویێ یاریكهر ژى!
ــ ئهو دهلیڤهیا ژیێ منه.. من گهلهك پێ خۆشه ئهز وى ببینم..
زهلامى پلاكێ ئامیرهتهكێ بچویك شداند وگۆت:
ــ ته دڤێت گوهێ خۆ بدهیه دهنگێ خۆ؟
دهمێ وێ گوهــ ل دهنگێ خۆ بووى ئهو زێده مهندههۆش بوو.. د سهر كهرب وكینا خۆ ڕا وێ گۆت:
ــ من نهدزانى دهنگێ من هنده یێ خۆشه..
زهلامى گۆت:
ــ سهرۆك ژى دێ گوهێ خۆ دهتێ..
ب هیڤى ڤه گۆت:
ــ من دڤێت هندهك پهیڤێت دى ژى بێژم..
ــ بێژه..
دهنگێ خۆ خۆش كر وخۆ گرت حهتا ئامیرهت ئاماده كرى وگۆت:
ــ سهرۆكه ئهو ئومێدا ب ملیوونان دلان خۆ بۆ هلاڤێتى ههر ژ ئهلندا دیرۆكێ وهره، ئهوه هیڤیا ههژار وقهلهندهر وستهم لێكریان ژ سهدههان سالان وهره.. ئهى سهردارێ نهمر ههڕه وئهم یێت ل دویڤ ته.. دلێت مه چاڤدێریێ ل ته دكهن، ولێڤێت مه دوعایان بۆ ته دكهن.. تویى ئێكهمین حاكمێ هێڤێن مصرى یێ حوكمى ل وهلاتى دكهت ژ هزاران سالان وهره..
نهشیا گۆتنا خۆ بهته سهرى، بهردا گریێ.. دڤیا بهروڤاژیا ڤێ گۆتنێ بێژت، دڤیا پێش غهمگین وههژارێت وێ قهسابخانهیا بهرفرهه ڤه یا ل گرتیخانهیا حهربى ههى باخڤت، دڤیا بكهته گرى ژ بهر نههێلانا حهقیێ وژیانا عهبدان، وجیهانا درهو ودوڕیاتیێ یا كو خهلك بۆ دئێنه ڕاكێشان، وهكى كو نوكه د گهل وێ ب خۆ دئێتهكرن..
زهلامى گۆت:
ــ ب ڕاستى تو گهرم بووى.. سهرۆك ب گوهدانا دهنگێ ته دێ كهیفخۆش بت، ئهزێ پشت ڕاستم ل دهمهكێ نێزیك كارهكێ مهزن دێ كهفته دهستێ ته.. بهلێ ژبیر نهكهى بۆ مه بهخشیشى بینى..
نهبیلایێ ڕۆندكێت خۆ هشككرن وگۆت:
ــ من هیڤیه ئهوا چێبووى تو بۆ عهگوهى نهبێژى.. چونكى ئهز ئهو ڤێ چهندێ بزانت دێ من هێلت.
ــ نهشێت..
ــ چوا؟
ــ دترست كهربێت سهرۆكى ژێ ڤهببن.
ــ یهعنى: پهیوهندى د ناڤبهرا من ووى دا ههر دێ مینت.
ــ گومان د هندێ دا نینه.
زهلامى جگارهكا كێنت هلكرێ وگۆت:
ــ د گهل هندێ ژى ئهز دێ هیڤیا ته ب جه ئینم.. ئهز نابێژمه عهطوهى.
ــ نهبێژێ كو ئهز ب یاریا وى حهسیایمه.
ــ ئهڤه تشتهكه ل نك سهرۆكى ب خۆ ئهوێ بكهیفا خۆیه، بهلێ ئهز ب خۆ نابێژمێ..
ڕاست ڕابوو ڤه دهستێ خۆ هژاند:
ــ باى باى..
بێى هاى ژ خۆ ههبت ب ڕێڤه دچوو، دلـێ وێ چــوویـێ ل سهر پیێت خۆ بچت، لێڤێت جادێ دتژى مرۆڤ بوون، جامخانهیێت جهێت بازرگانیێ دتژى پهرتالێت جوان وپڕ بها بوون، تورمبێلان جاده پڕى قهرهبالغ دكر، پهیڤێت ئهڤینداریێ دهاتنێ.. خۆ ژ وان تۆلازێت خازۆك ژى ئهوێت ل بهر دیواران خۆ درێژ كرى، ب جلكێت خۆ یێت پیس وپرچێت قژ وپیێت ڕویت ڤه..
بهرى بێنهكێ تشتهكێ زۆرێ عنتیكه و ب سهیر بوو بۆ وێ ، د ناڤ ئاخفتنا وێ دا نهگوهدان وڕهخنهكا دژوار تێكهلى ئێك بووبوون، ژبلى دهست بهردان وباوهرى ب دهست خۆ ڤه ئینانێ، ههر تشتهكێ د مهژیێ وێ دا ههبت هژیا، پێ حهسیا كو پیێت وێ نهشێن وێ هلگرن.. بهلێ وێ خۆ ڤهگرت وزوى گاڤێت خۆ هاڤێتن، ههر وهكى ئهو ژ دهردهكى دڕهڤت، تو بێژى وان ئێك د دویڤ وێ دا هنارت بت دا بزانن كانێ ئهو دێ چ كهت؟ پاصهك ب بهر چاڤان كهفت ل بهر ترافكلایتێ یا ڕاوهستیاى بوو ونێزیك بوو بدهته ڕێ، خۆ هاڤێته بهراهیێ، پاشى پاشڤه چوو وبۆ لایێ ڕاستێ چوو.. دهستكێ دهرگههى گرت، شۆفێرى خۆ نهرازى كر ولێ خوڕى:
ــ ئهڤه ته خێره نێزیك بوو پێ ل ته بدانم؟
ــ ببۆره..
ل جهێ دى یێ ڕاوهستانا پاصێ و د ناڤ كۆما بۆش یا مرۆڤان ڕا خـۆ ئـیـنـادهر، پاشـى خـۆ هاڤێته سهر رهصیفى، ل پشت خۆ زڤڕى كهسهك نهدیت، بهردهوامى دا چوونا خۆ پاشى تهكسیهك گرت وقهستا عیادا دختۆر سالمى.. لهشێ خۆ یێ وهستیاى هاڤێته سهر كورسیكهكێ ل وێرێ ودهست ب گریێ كر، دختۆرى ههر زوى شرانقهكا تهناهیێ بۆ دانا، پاشى گوهێ خۆ دایێ.. تێ گههشت كو پهشێمانیهكا بۆ وێ چێبووى كو وێ ڕاستى نهدگۆته وان، بۆچى نهدگۆتێ: هوین زۆردارن، خائینن..
دختۆر سالمى دهست ژێ بهردا حهتا وێ ههمى كولێت خۆ دهركرین، وپیچهكێ تهنا بووى.. پاشى گۆتێ:
ــ ئهڤه تشتهكێ تهبیعیه..
ــ چاوا؟
ما.. د مهزلێ فوكرى وگۆت:
ــ دهمێ ههڤالهكێ پێغهمبهرى ب گرى ڤه هاتیه نك ولێبۆرین ژێ خواستى ژ بهر وێ تهعداییا كافران لێ كرى وعهزاب داى ومهجبوور كرى كو ئهو خهبهران بێژته پێغهمبهرى، موحهممهد ــ سلاڤ لێ بن ــ گڕنژى وگۆتێ: (ئهگهر ئهو دوباره زڤڕین، تو ژى وێ گۆتنێ دوباره بكه..) نهبیلا! تو ژى یا مهجبوور بووى.. دلێ ته هێشتا ب ئهڤین وچاكى وباوهریێ خۆ دهلاڤێت.. قهیدى ناكهت ته چ گۆت بت.
نهبیلایێ ڕۆندكێت خۆ هشك كرن وگۆت:
ــ ئهز ل بهر چاڤێت خۆ كێم بووم، یا ژ من ڤه ئهز مرۆڤهكا پیسم وچو نینم، ئهز ژ پاشڤهبرن وشفشهیان دترسم، ئێدى پا كى دێ شێت پهیڤا ڕاستیێ بێژت؟
دختۆر سالمى ب دهنگهكێ موكم ڤه گۆتێ:
ــ تو..
ــ چاوا؟
ــ ب كارێ خۆ..
سماعا بهر گوهى ژ ستویێ خۆ ڤهكر وگۆت:
ــ ئهو كهسێ كرنا چاكیێ بكهته دلێ خۆ، دێ ب دههان دهرگههێت ڤهكرى ل بهر سنگێ خۆ بینت، وخهباتا ب دهڤى ب سناهــیـتـرین ڕهنــگــێـت خــهبــاتــێ یـه، پــهیــڤ هاریكاریێ د چێكرنا گوهۆڕینێ دا دكهن، بهلێ پهیڤ نهههمى تشته.. هندى پهیڤ نهبنه كار سهروبهر ههر وهكى خۆ مینت.
پاشى لێ زڤڕى وگۆتێ:
ــ ته كاغهزێت سهفهرا خۆ بهرههڤكرینه؟
ب دو چاڤێت غهمگین ڤه سهحكرێ وگۆتێ:
ــ ئهگهر خودێ حهز بكهت ئهڤرۆ دێ دهست پێ كهم..
