ئەڤە رەمەزان هاتەڤە ..
ئەڤە هەیڤێ ب كڤانێ خۆ یێ زراڤ ڤە جارەكا دی خۆ نیشا چاڤێن ئەڤیندارێن خـۆ داڤـە ، پـشـتـی یازدە هەیڤان ژ خەریبییێ .. جارەكا دی وێ ب هەلاتنا خۆ شەڤان چاڤەڕێیان گەش كرەڤە .. بەرێ خۆ بدەنێ چاوا هەردو لایێن كڤانی ب خۆچەماندن ڤە یێ قەستا ئێك ودو دكەن وەكی دو كەسێن ژێك خەریب بووین ، دا بچنە سەر وستویێن ئێك !
هەر جارەكا هەیڤ ژ نوی سەری هل ددەت و ب ڕۆناهییا خۆ یا زەلال دێمێ عەسمانی دشۆت ، خودان دل وە هەست دكەن كو عەسمان ب ڕێكا گـەشاتـییا هـەیـڤا خـۆ دلێـن وان دئاخـێـڤـت ، ( ئیلهامەكێ ) پێدا دكەت ، ژ جوانییێ تژی دكەت ، جوانییا شویندەستێ وێ هێزا ئەڤ هەیڤ ل عەسمانی دانای یا عەردی گەش دكەت وەكی كو ئەو دل ل عەردی دانای یێ ڕۆناهییا عەسمانی د ناڤ خۆ دا دحەوینت .
جارەكا دی هـەیـڤـێ خـۆ نیشا چاڤـێـن مە دا .. دا جارەكا دی دلێن مە ب بیـرهاتنا خۆ یا مەزن زێندی بكەتەڤە ، بیـرهاتنا ئاهەنگا مەزن ، دەمێ عەسمانی عەرد ئاخافتی وخودێ كەرەم د گەل نفشێ مرۆڤان كری وڕۆناهییەكا بێتە خواندن بۆ ئینایە خوارێ ، دا بۆ وی ببتە ڕێبەرێ ڕێكا سەرفەرازییێ ..
رەمەزان هاتەڤە .. پشتی سالەكا دی ژ دەفتەرا عەمرێ مە هاتییە پێچان ، هاتەڤە دا جارەكا دی مە ل بۆرینا دەمی هشیار بكەت وبێژتە مە : كارێ خۆ بكەن ، چو نەمایە دێ باركەن ، هاتەڤە دا ل هنداڤ مزگەفت ودایوانخانە ومالێن مە ببتە شاهد كو هەر گۆتن وكریارەكا مەخسەد پێ كنارێ خودێ نەبت د دنیایێ دا دێ یا خرش بت ، و ل ئاخرەتێ بۆ خودانی دێ بتە كول وكەسەر .
رەمەزان هاتەڤە .. دا جارەكا دی دلێن بێ ئاگەه هشیار بكەت ، وچاڤێن كەتینە بەندا دنیایێ ل ڕاستییێ ڤەكەت ، ودەستێن دارا غەفلەتێ د قوڕمی ڕا گرتی ب قورئانێ ڤە گرێ دەت ، وئەزمانێن بۆ شەیگانی كەفتینە زبارێ بۆ حەقییێ بكەتە پالە .
سالـێ چەرخا خۆ زڤڕاندەڤە ، وجارەكا دی ئەم ورەمەزان گەهاندینە ئێك ، جارەكا دی دەلیڤە دا مە كو ئەم پەیمانا خۆ د گەل خودێ نوی كەینەڤە ، ولەزێ د تۆڤچینێ دا بكەین بەری وەرزێ تۆڤچاندنێ ژ دەست مە دەركەڤت وكەسەرا چنینێ بمینتە د دلێن مە دا ..
رەمەزانە بهارا سالێ :
د سالـێ دا وەرزەك هەیە تۆڤچینان كەیف پێ دئێت ، چونكی عەرد تێدا قەلەو دبت وخۆ بۆ حەواندنا تۆڤی ئامادە دكەت ، دا بۆ دەمەكی د ناڤ خۆ دا بهێلت وجوان ب خودان كەت وشین بكەت ، حەتا ڕۆژەك ب سەر دا دئێت وئەو دبتە خودان بەرهەم .. مەتەلا رەمەزانێ ژی د ناڤ سالـێ دا بۆ خودان باوەری وەكی مەتەلا بهارێیە بۆ وەرازی ، خێر تێدا دئێنە وەرگرتن ، و ل بەر چاڤێن خودێ دئێنە ب خودانكرن ، وبۆ خودانی دئێنە هلگرتن ، حەتا ڕۆژا حسێبێ جزایەكێ چەند جاركی مەزنتـر بۆ دئێتە پێشكێشكرن .
ڤێجا بلا ئەم لەزێ بكەین ، وهەچییێ گۆتنەك ژ خودێ ستاند بت كو هێشتا گەلەك ژ عەمرێ وی مایە بلا ئەو لەزێ نەكەت ، بلا خۆ ل رەمەزانەكا دی بگرت ، بەلـێ كێ ئەڤ عەهدە ژ خودێ وەرگرتییە ؟ كێ گۆتییە وەكی فلانی وبێڤانی ئەڤە رەمەزانا مە یا دویماهییێ نابت ؟ ڤێجا بۆچی لەزێ د كاری دا نەكەین بەری دەمێ كاری ژ دەست مە دەركەڤت ؟
ڕۆژی وبناخەیێن دینی :
ژ تشتێن بەرعەقلە كو ئاڤاهی ئەگەر بناخەیێن خۆ یێن موكم د عەردی ڕا نەبن ، هەردەم دێ ل بەر گەفا هەلوەشیانێ بت ، وباوەرییا مرۆڤی نائێت پشت ڕاست لـێ ڕوینتە خوارێ ، یان خۆ ل دۆر وڕەخان ژی خۆ گیرۆ بكەت .. بیر وباوەر ژی هـەر د وەسانـە ، ئـەگـەر د ســەر ئاخ بــن وڕەه وڕیـشـالێـن وان د كویراتییا دلـی دا دداهێلای نەبن ، هەردەم دێ د بەر ئاتاف بن وخەلكی باوەری پێ نامینت !
وئیسلام دەمێ خودێ هلبژارتی دا بۆ مرۆڤان ببتە دین ومەنهەج هندەك بناخەیێن موكم بۆ دانان دا خەلك پێڤە بێنە گرێدان و ژ مەترسییا د سەردا چوون ولادانێ بێنە پاراستن ، وئەڤ بناخەیێن دینینە وێ ئاخا قەلەو پەیدا دكەن یا چەق وتایێن دینی لـێ شین دبن وبەرەكێ باش ژ خۆ ددەن .
وبەروڤاژییا ڤێ مەسەلـێ دێ بینی ئەو كەسێ خۆ ب چەق وتایێن دینی ڤە بگرت بەری باوەرییا خۆ ب بناخەیێن دینی موكم بكەت ، مرۆڤێ ژێ پشت ڕاست نابت كو ئەو ڕێكا خۆ ب سلامەتی دێ بەتە سەری بێی چ چەپدانێن كوژەك ڤێ بكەڤن یێن گومانێ د دلـێ وی دا پەیدا دكەن .
وئەگەر مرۆڤ هویر هـزرا خـۆ بـكـەت دێ بینت ئەڤەیە ئەگەرا سەرەكی د پشت وێ بەرسڤێ ڕا یا هندەك كەس ددەنە مرۆڤی دەمێ مرۆڤ دبێژتێ : بۆچی هوین نڤێژان ناكەن ؟ یان : بۆچی هوین ڕۆژییان ناگرن ؟ ئێكسەر ئەو دبێژن : بۆچی ئەم نڤێژان بكەین ؟ یان : بۆچی ئەم ڕۆژییان بگرین ؟
دیسا !! ئەو مرۆڤێ سەرمالـێ وی ژ وان بیـر وباوەران چوننە بت یێن بۆ دیـنـی دبنە بناخە ، حەقێ وی هەیە پسیارەكا مەزن بدانتە سەر وان ئەحكامێن ( فەرعی ) یێن دینی ژێ خواستین ، ئەوێ ب دورستی باوەری نەبت كو ئیسلام دینێ خودێیە چاوا دێ ژێ خوازی قەناعەتێ ب ڕۆژییێ بینت ؟!
مرۆڤی ئەگەر باوەری ب خودێ هەبت ، وباوەری هەبت كو ئیسلام دینێ وییە ، وئێك ژ سالۆخەتێن وی ( عەدالەتە ) قەناعەت دێ ل نك پەیدا بت كو هەر حوكمەكێ ئەڤ دینە پێ هاتی یێ د جهێ خۆ دایە وهنگی ئەو دێ زانت ڕۆژی ـ بۆ نموونە ـ ئێك ژ وان ئەحكامانە یێن مفایێ مرۆڤی تێدا هەی ، ئەگەر نە .. خودایێ كاربنەجه ئەو بۆ مە نەدكرە شریعەت بەلـێ مرۆڤێ ئەڤ باوەرییە ل نك نەبت ، یەعنی : د بناخەیێ دینی دا بكەفتە گومانێ ، یا بەرعەقل نابت ئەوی قەتاعەت ب گرتنا ڕۆژییێ هەبت ، ئەگەر خۆ ئەو مرۆڤەكێ ڕۆژیگر ژی بت !
وگرفتارییا مەزن د ڤێرێ ڕایە .. دیندارییا گەلەك كەسان ژ مە چاڤلێكرنە بەری كو قەناعەت بت ، ودینداری چی گاڤا بوو چاڤلێكرن دێ دارەكا سەرئاخ بت بـێ خـێـرتـریـن هەڕەبا دێ وێ د گەل خۆ بەت .. وچونكی ئێك ژ مەزنتـرین فایدێن هەیڤا رەمەزانێ ئەوە پێلەكا مەزن یا ل خۆزڤڕینێ د جڤاكێ دا پەیدا دكەت یا فەرە ل سەر مرۆڤێن زانا ڤی دەمی ژ دەست خۆ نەكەن ، ئێكا هند بكەن باوەرییا خەلكی ب موكمییا بناخەیێن دینی بینن ، وبەرێ وان بدەنە مەزنییا شریعەتێ خودێ ، دا رەمەزان بێ فایدە د سەر مە ڕا نەبۆرت .
