ناڤبرا شەشێ
عهطوه بهگ ئهڤرۆ یێ تووشى گرفتاریهكێ بووى نهخۆشترین ومهزنترین گرفتاریه د ژیانا وى ههمیێ دا، گرفتاریێت سیاسى.. ڕۆژێت شهڕى ب كوشتن وبرس وترسا خۆ ڤه بهرانبهرى ڤێ گرفتاریێ چو نینن.. خۆ ڕكدارى وهشك باوهریا گرتیێت گرتیخانا حهربى ژى چو نینه، ئهو دشێت ب قامچى وتهفاندنێ وێ چهندێ نههێلت.. گرفتاریا مهزن ئهڤرۆ نهبیلایه، چونكى ئهو خۆ ب دهست وى ڤه بهرنادهت وكوتهكیێ لێ دكهت دا ئهو هندهك هزرێت نوى بكهت وئهو هزرێت بهرێ وى باوهرى پێ ئیناى بهێلت.. وچو هێزهكا مهزن ژى وێ نینه، نه خودان مالبهتهكا خودان سهنگه، ونه تشتهكا مهزنه ژى، هات وچوو مامۆستایه دهرسان ددهت.. نه ژ بنهمالهكا مهزنه، وئهها تشتێ عنتیكه ئهڤهیه! ژ مێژه ئهو هزر دكهت هێز ههمى گرێكان ڤهدكهت ئهگهر چهند دئالۆز ژى بن.. ب تنێ وێ جوانیهكا زێده ههیه، یا رح شرینه.. ڤێجا چ ڕێ ههیه ئهو ب هێزا خۆ بشێته ڤێ جوانیێ؟
عهطوهى هزرێت خۆ كرن وڕێ دانان، ئهو بێنفرههیێ نزانت.. هێدى و ب عهقلدارى ئهو ناچته شۆلان، حهز دكهت زوى كارێ خۆ بنبڕ بكهت، دا زوى بهرههمى ب دهست خۆ ڤه بینت.. كهنى.. وئهو یێ ب تنێ بوو دهمێ دكهنى، عوهیسى ئهو د دهرگههێ ڤهكرى ڕا دیت، ژێ حێبهتى بوو.. ئهڤـ دینه بــۆچـــى دكـــهتــــه كــهنــى؟ عـــهطـوهى كره غار ودهركهفت.. ب عوهیسى كهفت ونێزیك بوو وى بێخت، عهطوه چوو نك ههڤالهكێ خۆ یێ دلسۆز د دهزگهها موخابهراتێ دا.. دهمـــهكـــێ مـــا ب تـــنـــێ د گـــهل وى.. پاشــى كاغهزهك كره د دهستان دا پشتى چهند ڕێز لێ نڤیسین، ههردو كهنین وچوونه سهر وستویێت ئێك، بهرى خاترا خۆ ژێ بخوازت ههڤالێ وى گۆتێ:
ــ ب خێر بچى نمس! ئهز ههر دبێژم تو زهلامهكى كهس نهشێته ته.
نهبیلا ل خواندنگههێ بوو.. بهحسێ دیرۆكا تهتهران وهكى سهرهاتیهكا شرین بۆ شاگردێن خۆ دكر.. بۆ كچكان ئهو كار وكۆكێ غهریب یێ تهتهران ئاشكهرا دكر دهمێ وان ب هێزێ باژێڕێ بهغدا وچهند باژێڕهكێت دى ژى ستاندین.. دهمێ وان هژمارهكا مهزن یا كتێبان ــ كتێبێن كهلتۆرێ ئیسلامى یێ جوان ــ هاڤێتینه د ڕویبارى دا و د سهر ڕا دهربازبووینه لایێ ڕۆژئاڤایا باژێڕى.. پاشى نهبیلایێ بهحسێ خهباتا خهلكێ مصرێ ویا وهلاتێت دى یێت عهرهبان ل ژێر ئالایێ ئیسلامێ دژى تهتهران ب بهرفرههى كر.. دا بێژى تهیران یا دادایه سهر سهرێ كچكان، ههمیان گوهێ خۆ باش ددایێ.. وێ هـنـد دیت ڕێڤهبهرا قوتابخانێ ب دهستهكێ لهزى ڤه دهرگههــ قوتا، چاڤێت وێ د تژى ڕۆندك بوون، ب دهنگهكێ نزم ڤه گۆت:
ــ ببۆرن.. نهبیلا، وهره.. یێ داخوازا ته دكهن.
نهبیلایێ دڤیا سوحبهتا خۆ ببهته سهرى.. قوتابیان ژى حهز دكر دویماهیا وێ سهرهاتیا خۆش بزانن چونكى ئهو گهلهك حهز ژ سهرهاتیان دكهن.. بهلێ ڕێڤهبهرێ مهسهله بنبڕ كر.. نهبیلا وهكى مرۆڤهكێ دین كهته دویڤ، دهمێ وێ كوتهكى ل ڕێڤهبهرێ كرى كو بێژتێ كانێ كیه داخوازا وێ دكهت، و ژ چاڤێت وێ یا دیار بوو كو ئهو یا دترست:
ــ موخابهراته.. خودێ مه ستاره كهت.
ــ موخابهرات؟ بۆچى؟
ــ نزا..
ل ژۆرا ڕێڤهبهرێ زهلامهك یێ ڕوینشتى بوو خۆ ژێك ئینابوو دهرێ، بهرێ وى ما ل نهبیلایێ دهمێ ئهو ب ژۆر كهفتى یا حێبهتى.. ڕابووڤه چوو دهستى وگۆتێ:
ــ پێنج دهقیقان مه تو دڤێى..
ــ من وهخت نینه.. تو كى یى؟
ــ ئهز ژ زهلامێت ئاسایشێمه.
پاشى دهستێ خۆ كره د بهریكا چاكیتێ خۆ دا.. وناسنامهیهكا بچویك ژێ ئینا دهرێ، نیشا وێ دا وگۆت:
ــ حهتا تو پشت ڕات ببى.
نهبیلا نهشیا تشتهكى ژێ بخوینت، چونكى وى زهلامى زوى دهستێ خۆ ڤهكێشا.. چاڤێت وێ زڤڕین، دنیا ل بهر وێ تارى بوو.. د چو نهگههشت، ئهڤه چیه؟ ژ عهجێبیان دا نهشێت باخڤت، نێزیك بوو بكهته گرى، هێزا خۆ ههمى كۆم ڤه كر وگۆتێ:
ــ ئهرێ ئهز دێ شێم ئهگهرێ زانم؟
ــ ل ڤێرێ دهلیڤه نینه.. ههمى ههمى پێنج دهقیقهنه ودێ زڤڕیه ڤه..
ب سارى ڤه دهستێ خۆ درێژ كر وگۆت:
ــ كهرم كه تورمبێل یا ژ دهرڤه.
نهبیلا د پیێت خۆ هلنگفت ونێزیك بوو بكهڤت بهلێ خودێ ئهو ستاره كر.. ل دویڤ وى دهركهفت، نێزیكه ئهو چو نهبینت، باوهر ناكهت.. ئهڤه خهونه یان ڕاسته؟ چو پهیڤ نینن ئهو یا دلێ خۆ پێ بێژت.. دیمهنێ قوتابیێت وێ یێت كچ ل بهر چاڤێت وێ دوباره بوو دهمێ وێ سهرهاتیا تهتهران بۆ ڤهدگێڕا.. ڤیان وهیڤى د چاڤێت وان دا دهاته دیتن، دهمێ ڕێڤهبهر هاتیه ژۆر هێشتا سهرهاتیا شهڕێ تهتهران ب دویماهى نههاتبوو، داخواز ب لهز خۆشیا چاڤێكهفتنێ بهرزهكر.. بۆچى ئهو ڤێ گاڤێ ڤان هزران دكهت؟
بهرێ خۆ دا بهراهیا خۆ دیت زهلامێ ئاسایشێ یێ پێگاڤێت خۆ بهرفرهه دكهت.. سهحكره بهر سنگێ خۆ.. ترومبێلا ڕهشا تایبهت ل وێرا هه دیت، ژبلى چهند هژمارهكان چو تشتێ دى ل سهر نهنڤیسیه، ل پشت تورمبێلێ دو زهلامێت ب خۆڤه دراوهساینه، دهمێ گههشتیه نك تورمبێلێ زهلامى گۆتێ:
ــ سویار به..
ــ بۆ كیڤه؟
وى بهرسڤا وێ نهدا.. ئێك ژ ههردو زهلامێت ڕاوهستاى دهرگههێ پشتێ یێ چهپێ ڤهكر وسویار بوو، وزهلامێ دى دهستێ وێ گرت وپالدا ژۆر، و د گاڤێ دا وێ خۆ د ناڤبهرا دو زهلامێت نهنیاس دا ل پاشیا تورمبێلێ دیت، ل پێشیێ شۆفێر وزهلامێ ئاسایشێ دڕوینشتى بوون.. تورمبێلێ دهست ب ڕێ كر.. نهبیلا لێ خوڕى:
ــ ئهڤه ڕهڤاندنه.. هوین موجرمن، تورمبێلێ ڕاوهستینن، ئهگهر دێ خهلكى ههمیێ ل ههوه كۆم كهم..
دهنگ ژ كهسێ نههات.. نهبیلایێ قێژى ڕاهێلان وڤیا بێته خوارێ بهلێ ههردو زهلامان ئهو حێل كێشا.. دا بێژى جریسك یێت ژ چاڤێت وان دپهشت.. ئهفسهرێ ئاسایشێ فهرمان دا پهرنجهر بێنه گرتن وتورمبێل خۆش بچت، نێزیك بوو نهبیلا دین ببت، پهشێمان بوو كو وێ ب ساناهى خۆ دایه دهست وان، دهست ب قێژیان كر و ب ههردو دهستان كولم دانانه وان ههردو زهلامان یێت ب ڕهخ وێ ڤه دڕوینشتى.. ئهفسهرێ ئاسایشێ ل سهر ملێ خۆ زڤڕى، چاڤێت خۆ لێ كرنه گرێ، پاشى كهلامچهك ژ بهریكا خۆ ئینا دهر وهاڤێته بهر وى زهلامى یێ ل پشتێ ڕوینشتى، وچاڤهكێ خۆ نقاند.. زڕێن ژ ڕویێ وێ هات، عهجێبگرتى بــوو.. ئـــهڤـــه ئـێـكـهمـیــن جـاره ئهو شهقهكێ دخۆت! ڕۆندك ژ چاڤان هاتن، هاته بیرێ.. ژ نوى عهگوه هاته بیرێ..
ــ هوین دێ بهایهكێ مهزن سهرا كارێ خۆ دهن.. هوین من نانیاسن، ئهز دهزگرا عهگوه بهگێ مهلهوانیمه سهرۆكێ گرتیخانا حهربى.
ئهفسهر كهنى وگۆت: ئهم ب ڤان درهوان د سهر دا ناچین، عهگوه نهیارهكا ڕژێمێ بۆ خۆ ناخوازت..
ــ مهخسهدا ته چیه؟
ــ ههر تشتهكى د دهمێ وى دا دێ زانى.. دهمێ عهطوه بهگ بزاڤا ته یا دژى ڕژێمێ دزانت دێ خۆ ژ ته دهته پاش.. ئهو ب خۆ قامچیا خۆ یا ناڤدار دێ ل لهشێ ته یێ تهڕ دهت..
ــ ئهڤه چ درهون؟
ــ ئهز دزانم ژنك ههمى گاڤان دپڕبێژن، یا باشتر بۆ ته ئهوه تو خۆ بێ دهنگ بكهى چونكى ههر گۆتنهكا ژ دهڤێ ته دهركهڤت ل سهر حسێب دبت.. مسهجلهكا د گهل مه ههى ههمى دهنگان تۆمار دكهت، گۆتنا ته ژى وهكى ل دویڤچوون وزانینێت مه یا ته ئاشكهرا دكهت.
نهبیلا ل دۆرێت خۆ زڤڕى بهرێ خۆ دا وان زهلامێت وهكى صهنهمێت بهرى.. وهكى دینهكى كهنى وگۆت:
ــ ما چێ دبت ئهز تاوانهكێ بكهم بێى ئهز پێ بحهسیێم؟ وهكى وان مرۆڤێت ژ بهر خهو ب ڕێڤه دچن وهكى ئهم د وان فلمێت بێخێرێت ڤان ڕۆژان دا دبینین!
كهسێ چو نهگۆت.. بیرا وێ ل دهیك وباب وخویشك وبرایێت وێ هات، بیریێت مالا خۆ كرن، ئهو مالا بێ دهنگ.. مــێـــزا بــچــویـــك.. كـاسێتان.. ئهو دیمهنێت جوان یێت وێ ل دویڤ گێولێ خۆ هلبژارتین.. كچكێت بچویكێت خواندنگههێ ههڤالێت وێ دهمێ گهنگهشه ل سهر هۆنهر ودیرۆك وبیرهاتنان وژیانێ ههمیێ دكر.. هزر كر مرنا دورست ئهوه ئهو ژ وێ جیهانا هه یا بچویك بێته دهرێـخـسـتــن.. مـا مــرن چـــیـــه؟ ئـهو جوداهیا بێ دویماهیه ژ ڕامـانــێــت ژیــانــا شرین ب كهس وهۆنهر وهزرێت وێ ڤه.. ژ شینكاتى وعهسمانى وڕۆژ وئاڤێ.. ههما جههنهما دورست ئهوه یا ئهو نوكه ب چاڤێت خۆ دبینت..
بیرا وێ ل تهیركێ وێ یێ كهسك د ركهها وى یا جوان دا هاته ڤه، خوزیك ڕاهێلان كو نوكه دهستێ وێ گههشتبا ركههێ دا وێ ئهو ڤهكربا وئازادى دابا تهیركێ گرتى.. هزر كر گونهههكا مهزن وكرێت وێ یا كرى دهمێ ئهو تهیر كریه د ركههێ دا.. وبۆ خۆ گۆت: ئاخ ههڤالێ من تهیركێ غهمگین! ئهزا بۆ ته دگریم.
دهمێ ئهو زهلامێ ل لایێ وێ یێ ڕاستێ دیتى ڕۆندكێت وێ یێت دئێنه خوار گۆتێ:
ــ نهترسه.. ڕكدارى ونه ئعتیراف وهستیانێ بۆ خودانى چێ دكهت.. بهلێ ئهگهر ته ههمى تشت ڕاست گۆتن مهسهله دێ ل سهر ته ب ساناهى كهڤت.
ــ ئعتیرافێ بكهم؟ مهخسهدا ههوه چیه؟
ئهو ئهفسهرێ ل سنگێ تورمبێلێ ڕوینشتى خوڕى:
ــ ئاخفتن نابت.. بهیوومى، حهیوان!
ئهو زهلامێ ل لایێ چهپێ یێ نهبیلایێ ڕوینشتى گۆت:
ــ بهگێ من! ئهز نهئاخفتیمه..
ــ هوین ههمى حهیوانن.. مهخسهدا من ئهو زفتێ دیه موتهوهللى.
موتهوهللى ڕوینشتى تهمهنهك ڤهدا وگۆت:
ــ ئهمرێ تهیه ئهز بهنى.
ــ بهلێ كهڕ ببه.
ــ بهلێ ئهفهندى.
دهمێ تورمبێل گههشتیه مهلبهندێ سهرهكى ئهو د ناڤـ دهرگههێ فرههــ ڕا بۆرى و ب ژۆر كهفت.. تورمبیل ل لایهكى زڤڕى حهتا گههشتیه بهر دهرگهههكێ بچویكێ ئاڤاهیهكێ مهزن وبهركهفتى.. وان د دهمهكێ كورت دا نهبیلا ئینا خــوارێ و ب ژۆر ئـــێـــخـــســـت.. پـــشـــتـــى بـێـنـهكێ وێ خۆ د مهزهلهكێ ڤه دیت، دو زهلام د وێ مهزهلـێ ڤـه بـوون، ئێك ل پشت مێزهكا جوان یێ ڕوینشتى بوو، ل هنداڤى سهرێ وى وێنهیهكێ ڕهنگین یێ قوماندارێ عهرهبان (جمال عبد الناصر) ى یێ هلاویستى بوو، ل لایێ چهپێ یێ وێنهى پهیڤا (دادى بناخهیێ ملكیه) ب ئاڤا زێڕى ل سهر تهختهكێ ڕهش نڤیسى بوو..
نهبیلایێ هزرێت خۆ كرن كانێ وێ ئهڤـ پهیڤه ل كیڤه دیتیهڤه.. بهلێ، ل دادگههێ.. نهنه! وێ ئهو ل كۆكچا مهلكێ بهرێ فارووقى دیت بوو، ل (كۆچكا عابدین) ل (هۆلا عهرشى)..
ئهو زهلامێ ل پشت مێزێ ڕوینشتى گۆت:
ــ ماش للاه! ئهڤه ههمى چ جوانیه؟ مخابن تو هنده یا شرین خۆ ب هندهك كارێت خهگهر تێ دبهى..
نهبیلا ب چاڤێت تژى ڕۆندك ڤه ب نك وى ڤه چوو.. وههوار كر:
ــ چاكیهكێ بكه.. بهس بێژه من كانێ من چ كریه؟
ئهو گڕنژى وسهرێ خۆ هژاند.. دهستێ خۆ درێژ كر، چهند پهیڤهك ل سهر كاغهزهكا سپى دنڤیسین.. وگۆت:
ــ لهزێ نهكه.. هێدى هێدى.. ئهم زۆرداریێ ل كهسێ ناكهین.
نهبیلایێ ب كهیف ڤه گۆت:
ــ ئهز ژى وه دبێژم.. هندى شۆڕهش یا دلنهرمه ئهو چو جاران زۆرداریێ ل دلسۆژان ژ كوڕێت مللهتى ناكهت.
وى سهرێ خۆ ژ هنداڤى كاغهزێ بلند كر وگۆت:
ــ ههما ب خۆ وهیه.
پتر بێنا وێ هات، بهلێ گوه ل زهلامهكێ مهزن بوو گۆت:
ــ بهلێ هندهك ههنه دلنهرمیا شۆڕهشێ بۆ خۆ ئستغلال دكهن، یاریا ب ئاگرى دكهن، بهلێ مخابن ل شوینا كو ئاگر شۆڕهشێ بسوژت ئهو دێ دهستێت وان سوژت.
نهبیلایێ ب پشت ڕاستى ڤه گۆت:
ــ ههمى من دنیاسن.. ل مال، ل خواندنگههێ، ل جادێ، ل تاخێ مه، جڤاك ههمى من دنیاست..
ئهو ڕك وڕك بهرێ خۆ دایێ وگۆت:
ــ ئهم باشتر دزانین..
پاشى كاغهز هاڤێته بهر زهلامهكێ ڕاوهستیاى وگۆتێ:
ــ بیست وپێنج..
پشتى وى كاغهز ژێ وهرگرتى. دهستێ خۆ ئینا ڕاستا گوهێ خۆ.. پیێ خۆ ڕاكر ووهكى هژمارا حهفت دانا بهر پیێ دى.. زوى نهبیلا كێشا، بره مهزهلهكا بچویك ل بنێ ئاڤاهى، پالدا ژۆر ودهرگهه لێ گرت..
نهبیلایێ بهرێ خۆ دا دۆر وڕهخێت خۆ كهس نهدیت.. چاوا دێ ڕوینت؟ چاوا دێ نڤت؟ نابت ئهڤه ڕاستى بت.. بهلێ ئهڤه خهونه.. بێ گومان خهونه وزوى ئهو دێ ژێ هشیار بت.
