خودایێ من
خودایێ من…
دهرمانێ دهرد وبرینا، ئهی خودانێ بێ دهلیلا… چێكهرێ وێ پارچا ڤیان خیڤهتا خۆ ل بهیابانا وێ ڤهددهت، د هێلینكێ دا دچیته لیسی، دبیته باوهریهكا شرین.. ئهوێ پارچا دبێژنێ: دل!
بلندكهرێ ئهڤێ ڕۆژا گهشا بلند، ئهڤێ ههیڤا خهون وخهو وبێ دهنگییێ ل هنداڤی جیهانا مه بهلاڤ دكهت، ههر تشتهكێ ب شیانا بێ توخیب ته دای، ههر تشتهكێ ب ئهمرێ ته مای:
ههر یهك ب تهماشاگههێ حوسنا ته ژ ههر جا
تـهشبـیـهـی نـگـاران ب جـهمـالا تـه دنازن
ئهڤ چیایێت هۆ سهر بلند، ئهڤ زنارێت سهخت وئاسێ، عهسمانێ شین، خودان عهور، دهریا هندی چاڤ قهتره كهت یا بهرفرهه، عهردێ بوویه پێشانگهها جوانییێ، سرشت پێكڤه، پهنجهرهكه، خودان عهقل.. خودان ههست ودلێت نازك.. تێدا جوان ته دبینن.
خودانێ پیـرۆزه ناڤا، سالۆخهتێت پاك وبلند… مه باوهره ههر دلهكێ ب ڤـیانا ته زێندی بیتـن، ههر چاڤهكێ ژ دویراتییێ، ژ بێ هۆشییێ، تاری ب سهر دا نههاتبیتـن، ل ههمی گاڤ وههمی دهما، جانییا ته.. شوین دهستێ هێز وشیانا ته یا موكم، مهیزه دكهن.
••━═══✿═══━••
خودایێ من…
ئــهڤ درهخـــت ودارێـت بلند، كولیلك وشالیل وئهلند، گازیكهرن، ب زمان حالـێ خۆ یێ دبێژن: پاك وپیـرۆز بت خودایێ شهڤ وڕۆژان.
ئاوازهكا دلڤهكهره، دخوازیت بلند ئهم سهح بكهین، باش بزانین:
ئهڤ جیهانه هــهمــــی تێكدا بۆ ڤیانێ پهرستگههه، نێ ههر ئهو یێ د ناڤ دا كهچه یێ دلـێ خۆ بۆ ئهڤینا خودایێ خۆ ڤهنهكری، یێ سهرێ خۆ بۆ مهزناتییا خودێ نهچهماندی.
هـــهر جـــارهكـا داڤێت ڕۆژێ، ڕۆژا ئهڤینیا ههروههر، تێن دا دلـی.. ژ خهوا نهزانینێ ڕاكر، هزر دكهت: ههر تایهكێ د گولزارا ڤێ ژینێ دا، بلبلهكێ ئاواز شرین ل هنداڤی وی بخوینت، دهستهكه ئهو ڕابهری ته یێ هاتییه بلندكرن، قهلهندهره، یێ دلـۆڤانییێ ههردهم ژ ته دخوازیتـن..
••━═══✿═══━••
خودایێ من..
ڕهحـما تهیه ئهو چرایێ تاری شهڤا ڤهدڕهڤینت، ڕهحـما تهیه تۆڤێ ئومێد وهیڤییا د نیڤا دلـێ مه دا دچینت، ژ وێ قهنجییێ ئهڤی دلـی زڕبار نهكه.. تو نه ئهوی یێ ههژار وبێ ڕێیهك وگونههكارهكێ وهكی من، بێ مراد بێته زڤڕاندن ژ بهر دهرگههێ ته یێ بلند!
••━═══✿═══━••
خودایێ من…
كهرهمكار وعهطا بهخشیـن، دهمێ ههیڤا چارده شهڤی تیشكێت خۆ یێت زێڕین د ناڤ پرچا شهڤێ دا بهرددهت، دهرێ دلـێ ترس وڤیانا ته تێدا بۆ ڕۆناهییێ ڤهدبیت… موناجات وههوار ههوار هنگی پتـر ب تام دكهڤیت، ژین دبیته گاڤهكا كورت، جوانی ل بهر دلـی دبیته ئهو هێڤێنێ ژین پێ دمههیت.
••━═══✿═══━••
خودایێ من..
ههر دێمهكێ وهكی دێمێ ههیڤا بلند، جوانییێ چهنگێ خۆ ب سهر دا بریه خوار، بهرپهڕهكه ژ دهفتهرا ڕاستییا شرین، نیشانهكه كو ئهڤ ڕێزه د خودایینه، لهوا ههردهم بێ باوهرێت خودێ نهناس، پاقژییێ د جوانییێ نائیننه دهر! ئهو زانینا هشك وزوها یا كو ههردهم ئهو پێ دخوڕن وهكی وی تیـركێ زێڕانه ئهوێ ههژار بۆ خۆ دبینت، نه ب هشیاری بهلكی د خهونا شهڤێ دا، یا د گاڤێ دا.. بهری ههلاتنا سپێدێ ڤهدڕهڤیتـن!!
ئـــهو هــــهژارێ خــۆ ب وان زێڕا پشت ڕاست دكهت، ئهو زانایێ خۆ ب زانینا هشك وزوها، یا بێ جوانی وباوهری، گهرم دكهت، دو قهلهمن ڤهڕێژا وان نهزانینه، دیناتی ژێ ڤهدپهشیتـن!
خودایێ من…
شیانا ته، زانیـن ومهردینییا ته، ئهڤ ههبوونا بوویه نهخشێ شوین دهستێ ته، نیشانهكه زێده یا هویر وبهرچاڤه، وێ دگههینت: كو ههژاری ئهوه مرۆڤ ته نهنیاسیت، خێزانییا دلـی ئهوه ژ ڤینا ته یێ ڤالا بیت، ئهی دوختۆرێ دهردێ مهزن، دهردێ بێ فامییا گران.
ئهی دلـێ من: باوهر نهكه بێ باوهرهك قهنجیخواز بت، دا كهڤرهك بۆ ههژارا یان بێ ڕێیا ڕۆندكهكا ڕاست ودورست ژ چاڤێت خۆ ببارینت، گهر جارهكێ كهسهكێ ب ڤی ڕهنگی ته دیت، باش بزانه ئهو دخوازت بێ باوهریا خۆ مۆر بكهت، باش بزانه ئهو دخوازت بێژت: وهرن، ئهزم دلـۆڤانێ مـــهزن! یــــێ كــو كارێ خودێ دكهت!! ئهو دخوازت بێ باوهریێ د گهل وی پاری بۆ ههژاری بكهته باوهریهكا پیـرۆز.
••━═══✿═══━••
خودایێ من…
ئهڤ نهمان ومرنا ههردهم ئهم دبینیـن، ئاڤابوونا ڕۆژا ژینێ، گازیهكه ژ خودان دلا دخوازت ههردهم دوعابێژ بن، بكهنه ههوار:
تـو هـهیی مـن لـهو د دنێ بهگلهر ومیـرم
زێڕ ومال گهر ژ نـهدیرم، ته ددیرم، نهفهقیـرم
••━═══✿═══━••
خـــودایــــێ مــــن:
ههر جارهكا جوانییا سهرڤه سهرڤه، تیڤلێ سهرڤه، د ئهڤینگهها مرۆڤی دا ببته ئارمانجا ئێكانه، ههر جارهكا گڕنژین وقهسا نه ژ دل، چاڤێت مرۆڤی خاپاندن، دل دێ چته ڕێكا نه ڕێ، دێ خۆ بینت یێ كهتیه ناڤ پێلێت بێ فامییا بهرێ، ژ دهرد وبرین وكهسهرا دێ بیته كۆم وتلۆڤه.. گهر نه زڤڕت بۆ ڕێیا ته، نهبێژیتـن: تویی من شافییێ دهردا.. دێ ههر مینت حێبهتی وسهودا سهر ویێ ڕێ بهرزه.
••━═══✿═══━••
خودایێ من…
ههر جارهكا ئهلندهكا نوی گهش بكهت، یان ژی پشتی ئێڤار زهركێ تاری شهڤهك بێت ڕهش بكهت، ئهم گونههكار دهستێت ڤالا ژ ههر تشتهكی، یێت پڕ ئومێد كو بێ مراد كهس ژ بهر دهگههێ ته نائێت زڤڕاندن، ههوار دكهین:
خودایێ باشناڤێن بلند.. ئهی خودایێ ب تنێ خودا، مه باوهریهك موكم ههیه خودا تویی، ئهم ئهڤ بێزار، بهنییێت تهینه، دگونههكارین، گهر تو نهبی كهسهك نینه ههوار كهینێ، گهر تو نهبی كهسهك نینه برینا مه دهرمان بكهت، گهر تو نهبی دێ بهرزه بیـن.
••━═══✿═══━••
خودایێ من:
ههر كهسێ قهستهك د دل دێ قهستێ دهرگاهێ ته كت
(یـێ مـرادهك كـو ههبت) دێ ههر رجاكارێ تـهبـی
••━═══✿═══━••
خودایێ من…
بۆ خاترا وێ باوهریا كو مه ب ته ههی، بۆ خاترا دلـۆڤانی وڕهحما مهزن یا كو ته ههی، مللهتێ مه یێ ژ ته پێڤه خودانهك نهی، د گهل دا ههمی موسلمانا، ژ بهرزهبوونێ، ژ سهرداچوونێ، ژگرانییێ وهشكاتییێ، ژ ههر گرفتاریهكا ههبت، بپارێزه.
••━═══✿═══━••
خودایێ من:
گونههكارین، دهفتهرهكا تژی خرابی مه یا ههی، ئهڤان لهشێت لهغهر –خودا- تو ب ئاگرێ دۆژهها خۆ نهسۆژینه.. ڕاسته گونههكارین گهلهك، بهلـێ ڕهحـما ته ژ گونههێت مه مهستـره.. ڕاسته گونههكارین گهلهك، بهلـێ كارێ ته ههر ئهوه ڕهحـمێ ب گونههكارا ببهی.
••━═══✿═══━••
خودایێ من..
ئهگهر دێ من دهرێخی ڤه، جـه ما ئهز دێ ڕهڤم كیڤه؟ نـه من حاله، نه من شیڤه، نه من صهبره ونه تهسكینه …
••━═══✿═══━••
خودایێ من:
زهنگین تویی، فهقیرێ دهرگههێ تهمه، خودان تویی، دهلیل وڕێبهری یا حهق.. گهر تو نهبی ههمی دهما سهرگهشتهمه، ڕێ بهرزهمه.. مه ئازاكه، ل بن ئالایێ حهبیبێ خۆ تو مه ژ قهبری تازه ڕاكه..
••━═══✿═══━••
خودایێ من..
ئهگهر بێژی: تو نهژ ڕهنگی.. چو جه نینن ژ بهر تهنگی، ل هیڤیا وی حهتا كهنگی، مه ئاخ وداخ ونالینه؟!
ئهگهر ڕهحـما ته یا كێمه، ئهزێ بێ مال وبێ ڕێمه، فهقیـرێ بهر دهرێ كێمه؟ چو كهس وهك من نهبرسینه.
ئهگهر بێژی ڕهحیم نینم! ب ڤی ناڤی ته ناخوینم، ڕحهت دێ ل جههنهمێ ڕوینم، مه پاكی ب جهننهتێ نینه!
بهلـێ.. حاشا، بهلـێ حاشا تو ئهو نینی د گهل من كهربهكێ ببینی، یهقیـن دێ ههر مه غهفرینی، ههڕۆ سهد جار مه ئامینه.. ههڕۆ سهد جار مه ئامینه.
••━═══✿═══━••
خودایێ من..
هـــهر جـــارهكا ڕۆژهكا نوی سهری هلدهت، شهڤهكا دی ژ ئێخسیـرییێ وئێكاتییێ ڕزگار دكهت، دلـی ژ خهوێ هشیار دكهت، هێدی هێدی د گهل هاتنا گهرمه تیـڕۆژكێت ڕۆژا نوی یا هێژ ساڤا تاما غهریبیێ سهح دكهت، ڤێ گـۆتنێ ئهو دبێژته خۆ:
ڕابه، ڕابه، ئێڤاره ل ته هێشتا ههڤالا ل بهتهنێ تو نههێلای، ڕابه، ڕابـــه بـــلا غــهریبی ته بهس بت، غافل نهبه، ڤیانا ڤێ خاپینۆكێ ههڕۆ ب سهدا یا بن ئاخ دكهت، سهحكێ چهوا یا ڕێكێ بۆ پائیزا بهلگ وهرین ڤهدكهت!
ڕابه سهحكێ: نه پهلچهم مان نه سونبول مان، نه ڕهیحان ونه سۆر گول مان، نه ههڤڕێ مان، نهههڤدل مان، تنێ حهیف من ژ وان خاره.. ڕابه بێژه: ئهی خودایێ ههدارا مه ڤان غهریبا ب ڕهحـما ته تێ، ههوار ههوار… پشتهڤانێ بێ خودانا، دهرمانێ ڤان دهرد وژانا: ئهزێ ئیـرۆ زهعــیـــف حــالم، دنالم ئهز ژ بهر تایێ، گونههكار وپهشێمانم، پهریشانم ل دنیایێ!
••━═══✿═══━••
خودایێ من…
غهریبم ئهز حهبیبی تو، نهخۆشم ئهز تهبیبی تو، چرا تو ل من نهڤهمرینه.. خودایێ من ڕۆژا تهنگاڤییا مهزن، مرنا گران، ب سهر گیانێ مه دا دئێتـن، ئهزمانێ مه ڕههوان بكه؛ دا ب ناڤێ ته بێت وبچت.. ڕۆژا ههوار وههی ههیێ، ئهوێ ڕۆژا بۆ بهر ڕهحـما ته كـۆم دبیـن، ڕۆژا نه مال، ونه عهیال بۆ خودانی مفای نهدهن.. ب دیتنا خۆ مه شاد بكه.
ڕۆژا هندهك ڕوی سپی دبن، وهندهك ژی وهكی سێلا ل سهر كوچكی سیاه دبن، پێغهمبهری ل مه بكه خودان، بێ بار نهكه مه ژ مههدهرا وی یا مهزن، مه بێخه ژێر ئالایێ وی.. تــــو ل بـــهحـــهشتا خۆ یا بهرین مه د گهل چاك وموسلمانا بكه مێڤان… بكه خوادن.
••━═══✿═══━••
خودایێ من..
مه عومر بێ فایده بۆراند، ههچی نهقهنجییا ههبت، مه دل ئهڤرۆ پێ تژی كر، مه ژێ فووراند، لهو مه ههواره ئهی خودا: مه بێ دل وئینصاف نهكهی، دهردێ گران، دهردێ دویراتییا ژ ته، تو مه تویشی داڤا نهكهی، گهل ووار وهلاتێ مه، ههر وهلاتێ تو ناس كربی، سهرێ خۆ بۆ ته چهماندی، ڕزگار بكه، ئهم غهریبین ههدار تویی.
••━═══✿═══━••
خودایێ من:
مه توی ههوار، ژ گرانییێ، ژ ههژارییێ، ژ ههمی ئێشا، پاراستنا مه دێ ب ته بت، فهقیـرییا مه یا زۆره، رجاكارین كو ههژارێت دینی نهبین، ڤیانا ڤێ ژینا بهروهخت دلـێ مه دهستهسهر نهكهت.
••━═══✿═══━••
خودایێ من..
تو قهنجییێ د گهل مه بكه؛ دا ئهم بشێین ههردهم عهبدینیا ته بكهین.. قهناعهتێ هند بده مه كو ب قهدهرا ته ڕازی بین، مه داخوازه: شیانا ل سهر گوهدارییێ، هێزێ بۆ كرنا تاعهتی، صهبرا ل سهر ڕازیبوونێ، د دلـێ مه دا ب ڕهحـما خۆ ـ ئهی خودان ڕهحـمێ ژ ههر ئێكی دلـۆڤانتـر ـ پهیدا بكه..
••━═══✿═══━••
خودایێ من:
گهر ڕۆژهكێ خۆشییهكا دنیا نزم، ئهز عهبدێ ته ژ بیـرڤه كرم، تو ـ ئهی خودا ـ من ژ بیـر نهكه! گهر رۆِژهكێ پهرتالهكێ دنیا نزم، دل ب لایێ خۆڤه كێشا، تو قهنجییا هشیاربوونێ ههر زوی بدێ.
••━═══✿═══━••
خودایێ من:
گهر ڕۆژهكێ ئاتافهكا شهڤ وڕۆژا ئهم گراندین، ههدارا مه ب هندێ بینه، بێین ڕۆندكا ل بهر دهرگههێ ته ببارینین.. ئهی خودایێ ڤیان هاڤێتییه دلا، گهرمه ڕۆندك داینه چاڤا!
••━═══✿═══━••
خودایێ من:
شوكرا چ قهنجییا ته ئهز دێ شێم بكهم؟ كو ته هند هێز دایه بشێم صهبرا ل سهر بهلا بكهم؟ یان ژی دهمێ صهبرێ دكهم تاما نێزیكیا ته سهحكهم؟ وه ههست بكهم خۆشی ئهوه: بهلا بێتـن ههوار بكهم؟ تـــهنــگـــاڤــــی مــــن فــێــری زڤڕینێ بكهتن؛ دا بهرێ من نهمینته ل چ دهرگهها، ب تنێ دلـێ من بهندهیێ ڤینا ته بت، چاڤهڕێیێ ڕهحـما ته بت؟
••━═══✿═══━••
خودایێ من…
ل وێ شهڤا ڕهشا درێژ.. دهمێ دلـێ منێ شكهستی، هاتی قهستا دهرازینكا دلـۆڤانییا ته كری، من وه سهحكر: دهرگههێ خۆشیێ ل بهر ڤهبوو.. نهما شكهستی! ڕۆناهییهك هاته نیڤێ، گهشاتی دا، هیڤییهكا گهلهك مهزن د نیڤێ دا هاته چاندن، ههر وێ گاڤێ شینبوو… شینبوو، وهاته بهری.
خودایێ من گهدایێ ئیحسانا تهمه، ژ ههر نهخۆشییهكا ههبیت، تهنگاڤیهكێ، ڕهڤینا من بۆ بهر سها ڕهحـما تهیه، ئهزم بێ ڕێ، ل بهر دهرگههێ مهردینییا ته -ئهی خودا- ههمیشه دێ جهی دانم. ئهگهر خهلك مــــن دهربـكــهن دێ قهستا دهرگههێ ڕهحـما ته كهم خودا، بهلـێ ئهگهر تو ل من نههاتییه ڕهحـمێ، ژ دهرگههێ خۆ ته دهركرم… دێ كیڤه چم؟ ههوارا من دێ كی بیتـن، ئهی خودایێ ڕهحـما ته خر تشت ڤهگرتیـن؟
••━═══✿═══━••
خودایێ من...
چاوا چاڤرێیێ قهنجییا ته ئهز نهبم، وتو ئهوی یێ ڕۆژهكێ ژ سهر سفرا قهنجییا خۆ ته گونههكارهكێ وهك من نهكریه دهر؟ چاوا هیڤیدارێ ڕهحـما ته ئهز نهبم، وجارهكێ تهڤیه بارانا ڕهحـما خۆ ته ژ هنداڤی ژییێ من قهت ڕانهوهستاندیه خودا؟ چاوا چاڤێ من ل دهرگههێ دانێ نهبت، وته ههردهم ئهزێ فێری دانێ كریم، ل بن سیبهرا قهنجییێت خۆ ته ئهزێ دایم وڕاكریم؟
••━═══✿═══━••
خودایێ من:
پاراستنا من ههردهم دێ ب ڕهحـما ته بت، ئهو ڕهحـما كو تهڤ ههبوونا من ڤهگرتی.. پاراستنا من ب تهیه، كو بكهڤمه داڤێت خرناقهكا مهزن، یان ژی قهدایهكا وهسا كو ئهز نهشێم خۆ ل بهر بگرم، صهبرێ ل سهر نهخۆشییا وێ بكێشم.
••━═══✿═══━••
خودایێ من..
پسیارا ته ژ من كرن، من گۆته وان: ههر جارهكا ههوه ب دورستی خۆ ناسی، دێ وی بینن! گـۆتنه من: باشه ب چ ئهو تێته دیتـن؟ من گـۆته وان: ب دلـی ب دلـی! ههر كهسێ بوو خودان دلهك، بلڤیت.. بهژیێت، بئێشیت.. بگریت، دنیا ب ههمی خۆشیا خۆڤه، شوین تبلهكێ تــێــدا بــۆ خــۆ جهـ نهگریت.. هنگی ئهوی خودێ ناسی! هنگی دلێ وی ب ڤیانا وی یا پیـرۆز دێ لڤیتـن، ههمی دهما دێ ڤهژیتـن.
••━═══✿═══━••
خــودایـــێ مــــن:
ئــهی خودانێ بێ دهلیلا، ئهی چێكهرێ سپێدههییا ژ تاری شهڤا، دهرهێنهرێ بهارا ساخ ژ پائیزا هشك ومری، داهێنهرێ شاهی وكهیف وخۆشییا، ژ جهرگێ تهنگاڤی وخهما.. چاوا ئهز بێ هیڤی ببم وههر خودایێ من تو بی؟ چاوا هیڤی دلـی فرهه نهكهت خودا، پشتی ئومێدا من توبی؟
••━═══✿═══━••
خودایێ من..
هیڤی وئومێد… تشتهكه ئهز ههڕۆ دخوینم ل سهر بهلگێت بهارا گهش، تشتهكه ئهز ههڕۆ دبینم د گهل بایێ سحارا تێت، تشتهكه ئهز ههڕۆ دچینم.. ل نیڤا دلـی تێته بهری، باوهری پێڤه شین دبت كو دێ مێڤانێ بهحهشتا ته بم خودا.
••━═══✿═══━••
خودایێ من:
پسیارا من، پسیارا وی ههژارییه یێ چو ڕێ ل بهر سنگی نهماین، بارهك ههبت ژ ههمی ڕهنگێت گونهها یێ تژی كری… پشتی ههیامهكێ ئهو چووی، دایه ڕێكێ، زانی نهشێته ڤی باری، ل دۆر خۆ زڤڕی، ژ ته پێڤهتر كهسهك نهدیت ههوار كهتێ، بۆ مهزنییا ته خۆ چهماند، زانی گونهه ژێبـر تویی، پسیارا خۆ ئینا بهر دهرگههێ ڕهحـما ته یا مهزن… ڕهحـمێ پێ ببه.
••━═══✿═══━••
خودایێ من..
كهرهمكار وعهتا بهخشین، نه بابهتی ڕهحـما تهیه منێ ههژار تو بێ هیڤی ژ بهر دهرگههی ڤهگهڕینی، ته یێ گـۆتی -وگـۆتنا ته ههر ڕاستییه-: دوعا ژ من بكهن، ئهز دێ دههوارا ههوه ئێم.
ئهی خودایێ مه ههردهمی ههوار تویی، ناڤ وزكرێ تهیێ شرین ساخكر ل من دلـێ مری، بوو ئهو كلیل یا دهرگههێ ڕاستییێ ل بهر مه ڤهكری، بوو ئهو چرا یێ تارییا ژینا نزم ل بهر چاڤا روهنكری.. بلندكری!
••━═══✿═══━••
خودایێ من: ڤێ دنیایێ ـ وهكی نههنگێ یوونسی ـ دلـێ مه یێ داگیـركری، د ناڤ تارییا خۆ یا مهزن دا یێ پێچای ویێ بری، هیڤییا مه ڤێجا تویی، كو دارا ڕهحـمێ ل هنداڤی مه شین بكهی، مه ژ نههنگێ دنێ ل دهریا ئهڤێ ژینێ ڕزگار بكهی، ههوار تویی.
••━═══✿═══━••
خودایێ من..
ب رهحما خۆ، یا كو ههر تشتهك ڤهگرتى،
ب هێزا خۆ یا ههمى تشت بێزاركرین، ههر تشتهكى خۆ بۆ چهماندى وههوجه بووى..
ب جهبهرووتا خۆ یا تو پێ شیایه ههمى تشتان،ب عززهتا خۆ یا چو تشتهك خۆ ل بهرانبهر وێ نهگرت..
••━═══✿═══━••
خودایێ من..
ب مهزنیا خۆ یا تشت ههمى تژى كرین..
سولطانێ خۆ یێ ب سهر ههمى تشتان كهفتى،
ب وهجهێ باقى پشتى فهنابوونا چى تشتهكێ ههیى، ب ناڤێن خۆ یێن كو ههر تشتهكێ ههبت تژى كرى،ب علمێ خۆ یێ دۆرگرتى ل ههر تشتهكى، ب نوورا وهجهێ خۆ یێ كو ههر تشتهكێ ههى گهشكرى..
••━═══✿═══━••
خودایێ من..
ئهى ڕۆناهى، پاكێ پیرۆز، ئێكێ ئێكان.. دویماهیێ دویماهیان،وان گونههێن پهردێ ستارهیێ ڕادكهن ژێ ببه بۆ من،وان گونههێن غهزهب بارین ژێ ببه بۆ من، وان گونههێن نعمهت هلین ژێ ببه بۆ من.
••━═══✿═══━••
خودایێ من..
وان گونههێن دوعایێن من حهبس دكهن ژێ ببه بۆ من، وان گونههێن بهلایێ ب سهر من دا تینن ژێ ببه بۆ من، وان گونههێن هیڤى د گهل دا دئێنه بڕین ژێ ببه بۆ من، چى خهلهتییا من كربت، ههر گونهها ب نك ڤه چووبم، تو ب رهحما خۆ ژێ ببه بۆ من.
••━═══✿═══━••
خودایێ من..
ب زكرێ ته، ئهز خۆ نێزیكى ته دكهم،
بۆ نك ته ئهز ته دكهمه مههدهر بۆ خۆ، داخوازا من ژ ته ئهوه ب رهحما خۆ تو من نێزیكى خۆ بكهى، هارى من بكهى شوكرا ته بكهم، زكرێ ته بكهم.
••━═══✿═══━••
خودایێ من..
پسیارا من پسیارا عهبدێ ب ترسه، یێ شكهستیه، كو لێ ببۆرى، رهحمێ پێ ببهى، رازى بكهى ب قسمهتا ته دایه وى، قانع بكهى، ل ههر حالهكى (تهواضع) بارا وى بتن.
پسیارا مــن ژ ڕهنگێ پسیارا وییه یێ فهقیرییا وى زێده بووى، ل تهنگاڤیێ هـــهوجـــهى ته بووى، ئومێدهكا مـــهزن وى هـــــهى ب قهنجیا ل نك ته ههى.. خودایێ من.
••━═══✿═══━••
خودایێ من..
مهزن بوویه سولطانێ ته.. بلند بوویه مهكانێ ته، مهكرا ته یا ڤهشارتیه.. یێ ئاشكهرایه كارێ ته، قههرا ته سهرڤههاتییه.. قودرهتا ته یا چووییه، ژ دهسههلاتا ته كهسێ ڕهڤهك نینه..
غهففارهكى بۆ گونههێن خۆ ژبلى ته ئهز نابینم، كهسهك نینه كرێتیێن من ڤهشێرت، تشتهكى ژ كارێ خرابێ من بگوهۆڕت، ژبلى ته ئهى خودایێ حهق.
••━═══✿═══━••
خودایێ من..
حهمد ههمى بۆ ته بتن، پاكێ پیرۆز،
من زۆردارى ل نهفسا خۆ كر، ژ جههلێ ئهز یێ بسته بووم،منهتا ته بهرى نوكه د گهل من كرى،
دلێ خۆ من پێ خۆش كر.. وكهیف پێ ئینا،
چهند كرێتى من ههبوون وته ڤهشارتن،
چهند بهلا ته ژ من دوریر كرن، هلنگفتن ته ڤهگرتن، چهند نهخۆشى ته پالدان، وناڤ ودهنگێن ئهز نه ژ ههژى ته دانه من..
••━═══✿═══━••
خودایێ من..
بهلایا من یا مهزن بووى، حالێ خراب ههمى ڕێ یێ ل بهر من گرتین،كریارێن من.. من ناگههیننه ئارمانجێ، قهید وزنجیرا دهست وپێ ل من گرتینه، درێژه هیڤى ناهێلن ئهز بگههم مهنفعهتێ، دنیایێ ئهز یێ خاپاندیم ب غوروورا خۆ، ونهفسا من ب خیانهتێ.
••━═══✿═══━••
خودایێ من..
تو ب عززهتا خۆ كهى خودا،
كارێ منێ خراب نهكه سهبهب دوعا من نهئێته قهبویلكرن،ب سررا من یا ڤهشارتى وتو پێ دزانى، خودا شهرما من نهبه تو.. ژ بهر وان خرابه كریارێن من كرین وتو پێ دزانى، نهزانین و ب ناڤهچوونا منا درێـــــژ، شــــههــــوهت وغــهفـلـهتا زێده، لـــــهزێ د عقووبهدانا من دا تو نهكه.
••━═══✿═══━••
خودایێ من..
تو ب عززهتا خۆ كهى ههردهم رهحمێ ب حالێ من ببه، ود ههمى كاران دا دلۆڤانیێ من ببه،
ژ ته پێڤهتر -خودایێ من- ئهز دێ ژ كێ پسیار بكهم نهخۆشییا من ڕاكهتن؟ ب چاڤێ رهحمێ سهح كهته من؟
خودانێ من، ته حوكمهك سهر من نڤیسى من دویچوونا نهفسا خۆ كر، من ژ خاپاندنا نهیارى قهت وقهت خۆ نهدا پاش، ب وى تشتێ ئهز حهژێ دكهم ئهز خڕاندم، دسهردا برم، وقهزایا ته.. ب وێ چهندێ ئهو دلخۆش كر، حهتا هندهك توخویبێن خۆ من بهزاندن، موخالهفا هندهك فهرمانێن ته من كر..
••━═══✿═══━••
خودایێ من..
د ههر حالى دا حهمدا ته ل سهر من واجبه، من چو هێجهت نینن ژ بۆ تشتێ قهزایا ته ل سهر من پێ گهڕیاى، حوكمێ ته ئهز پێ جهڕباندیم وگرتیم.. پشتى تهخسیرى وزولما من ل خۆ كرى، ئهزێ هاتیم عوزرێ دخوازم، پهشێمانێ شكهستیمه ئهز، من بارهكێ گرانێ ههى، هیڤییا من ئهوه تو من بغهفرینى.
••━═══✿═══━••
خودایێ من..
ژ وى كارێ من كرى و.. ئعترافێ ئهز پێ دكهم،
جههكى بۆ ڕهڤینا خۆ ئهز نابینم،
ڕێیهك من نینه قهست كهمێ ژ بلى كو تو ڤێ عوزرا من قهبویل بكهى، من داخلى رهحما خۆ یا فرههـ بكهى،خودا ڤێجا تو عوزرا من قهبویل بكه، رهحمێ ببه ب حالێ من، من ئازا كه ژ وێ قهیدا ئهز گرتیم ورهحمێ ب لهغهریا من ببه، ب ڤى چهرمێ نازك وههستیێ زراڤ،
ئهى خودایێ ته ئهز دایم و ب خودانكریم، من ببهخشه كهرهما خۆ.
••━═══✿═══━••
خودایێ من..
ئهرێ ما دێ من عهزاب دهى ب ئاگرێ خۆ،
پشتى من باوهرى ب تهوحیدا ته ئیناى؟
پشتى دلێ من تو نیاسى ئهى خودا؟
پشتى ئهزمانێ من ب ناڤێ ته گهڕیاى؟
ڤیانا ته كهتیه دلى؟
پشتى كو من ب ڕاستى ئعتراف كرى خودان تویى؟
حاشا تــــو ژ هــنــدێ مهسترى، كهریمترى وى بهرزه كهى یێ ته ب رهحم وكهرهما خۆ ب خودانكرى، یان وى دویر كهى یێ ته نێزیكى خۆ كرى، دهربهدهر كهى یێ ته حهواندى و ب نك خۆ ڤه برى.. یان تهسلیمى بهلایێ بكهى یێ ته پاراستى ورهحما خۆ پێ برى.
••━═══✿═══━••
خودایێ من..
ئهوان دێمێن بۆ مهزنیا ته چهمیاین وسوجده برى، ئهزمانێن شوكرا ته كرى.. ب تهوحیدا ته گهڕیاین، و ئهوان دلێن ئعتراف ب خوداینیا ته كرى، و ئهوان سنگێن تو نیاسى، وخوشووع كرى، وان پیێن كـــو ب كـــهیــفــا خۆ قهستا جهێن پهرستنا ته كرى، و ب خوشكاندن ڤه غهفراندنا گونههان ژ ته داخواز كرى..
ما ئاگرى دێ ب وان ئێخى؟
هزرا مه ژ ته قهت ئهو نینه، ونه وهسا بهحسێ فهضلێ ته بۆ مه هاتییه كرن ئهى خودایێ خودان كهرهم..
