ئێكهمین جار: ئـازادبـوونـا دلـى..
وى تێ دئینادهر كو نهباوهرى ئینانا وان ب وى دینێ موحهممهدى ئهو بۆ گازى دكرن نه ژ بهر خرابیهكێ بوو كو د وى دینى دا ههى.. نه خێر، گهلهك جاران وى گوهـ ل وان دبوو كو ههر باشیهكا ههبت د ڤى دینى دا یا ههى، بهلێ تشتێ ب زهحمهت ل بهر وان د ڤى دینى دا ئهو بوو ئهو پشت بدهنه وى دینى یێ وان باب وباپیرێن خۆ ل سهر دیتین ودینهكێ دى بۆ خۆ هلبژێرن، پشتى هنگى تـرسـا وان یـا مـهزن ئـهو بـوو ئـهڤ دینه ببته ئهگهرا هندێ ئهو مهزنیا قورهیشیان د ناڤ عهرهبان ههمیان دا ههى، بۆ وان نهمینت، وان هزر دكر ئهگهر ئهو باوهریێ ب ڤى دینێ نوى بینن عهرهب ههمى دژى وان دێ ڕاوهستن، وهنگى ئهو قهستا باژێڕێ وان ناكهن، ومهعنا ڤێ ئهوه ئهو (مهجد) و(مهركهزێ) قورهیشیان د ناڤ عهرهبان دا ههى، وئهو مفایێن ئابۆرى یێن دگههشتنه وان، ئێدى نامینن، ونهیارهتیا گهلهك ژ وان بۆ گازیا ئیسلامێ كهربڤهبوونا وان بوو ژ بابكێ هاشمیان، وان دگۆت: ههر تشتهكێ ههى د دهستێ هاشمیان دایه، پێغهمبهراتى ژى ژ وان بت؟! ئهڤه نابت!!
وڕۆژا خودێ ڤیاى دلێ (بیلالى) بۆ جارا ئێكێ بۆ ڕۆناهیا ئیسلامێ ڤهببت، بهرێ وى دا مرۆڤهكێ وهكى وى ههژار.. یێ چو مال ومهنصبێن مهزن د ناڤ قورهیشیان دا نهههین، عهممارێ كوڕێ یاسرى، وهنگى هژمارا وان كهسان یێن خۆ داینه د گهل پێلا ڕۆناهیێ هێشتا ب تبلێن دهستان دهاتنه هژمارتن، عهممارى بۆ بیلالى (تهئكید) كر كو ئهو دینێ موحهممهد پێ هاتى ههر ژ وێ ڕۆناهیێیه یا دینێ نووحى وئیبراهیمى ومووساى وعیساى ژێ هاتى، وئهو ههر یێ ل سهر وێ ڕێكێ یا پێغهمبهرێن بهرى وى ل سهر چووین، ڕێكا ئازادكرنا مرۆڤان، نه ب تنێ ژ قهید وزنجیرێن وێ كۆلهتیێ یا (مهزن وسهییدان) ئهو پێ گرێداین، بهلكى ژ وان هزر وبیرێن ڕزى ژى یێن هێلینێن خۆ د سهرێن وان دا چێكرین، ودلێن وان بن دهست كرین، وگاڤا بیلالى گۆتیێ:
- ئهو كیه بهرێ ته دایه ڤێ ڕێكێ؟
عهممارى گۆتێ:
- پشتى خودێ، ئهبووبهكر ئێكهمین كهس بوو بهرێ من دایه ڕۆناهیا خودێ..
- ئهبووبهكر؟ ههڤالێ موحهممهدى یێ نێزیك؟ ئهو زهلامێ دهولهمهند وخێرخواز یێ قورهیشى ههمى ئعترافێ ب قهنجى ودلپاكیا وى دكهن؟
- بهلێ.. وئهگهر تو حهز بكهى جارهكێ ئهز وتو دێ چینه نك وى؛ دا ئهو ڕاستیا ڤى دینى بۆ ته بێژت، وپشتى هنگى ئهگهر ته دل تێ ههبوو بێیه د گهل مه، ئهم دێ ته بهینه نك پێغهمبهرى سلاڤ لێ بن، دا ل سهر دهستێ وى موسلمان ببى..
و ب ڤى ڕهنگى بیلال پێ حهسیا كو ڕۆناهیا خودێ وهكى ئاڤهكا سار یا مرۆڤهكێ تێهنى ل ڕۆژهكا گهرم ب سهر هناڤێن خۆ دا دكهت و ب خۆشیێ بحهسیێت، وهسا خۆش وشرین یا ب سهر دلى دا دئێت، دهمێ وى گوهداریا گۆتنێن ئهبوو بهكرى دكر ئیسلام ب وى ددا نیاسین وبهرێ وى ددایێ، ههست پێ دكر ههر وهكى نهفسا وى یا دئێته گوهاڕتن، ئهو یێ دبته مرۆڤهكێ دى، مرۆڤهكێ دژیت بۆ ئارمانجهكا مهزن.. یێ هیڤیهكا بلند د دلى دا ههى، پشتى سهرپهشكێن باوهریێ گههشتینه دلێ وى ژیان د چاڤێن وى دا هاته گوهۆڕین، بوو خودان تامهكا دى یا تایبهت، وچهند كهیفا وى یا زێده بوو دهمێ وى د گهل ئهبوو بهكرى وعهممارى قهستا مالا ئهرقهمى كرى ل سهر گركێ صهفایێ، و ل دیوانا پێغهمبهرى -سلاڤ لێ بن- ئاماده بووى، وبوویه حهفتهمین كهس ل سهر دهستێ وى هاتیه د ئیسلامێ..
وهێشتا بیلال عهبد، دلێ وى ژ قهیدێن جاهلییهتێ ڕزگار بوو، بهرى كو باوهرى ڕێكا خۆ بۆ سهرێن مهزن ل مهكههێ ببینت، بیلالى سهرێ خۆ بۆ مهزنیا خودێ چهماند، ودلێ خۆ بۆ ڤیانا خودێ وپێغهمبهرێ وى ڤهكر.. وههر ژ ڕۆژا ئێكێ ڤیانا پیرۆز پهیوهندیهكا موكم د ناڤبهرا دلێ وى ویێ موحهممهدى دا گرێدا.. د چاڤێن مهكههیان دا بیلال ژ هندێ كێمتر بوو ئێك پسیارا وى بكهت، یان خهمێ ژ بڕیارهكا ئهو ددهت بخۆت، بیلالێ كوڕێ رهباحى، ئهو عهبدێ حهبهشى یێ ڕهش، باوهریێ ب چ دینى بینت، یان كوفرێ ب چ دینى بكهت، نه چویێ پێشڤه دئینت نه پاش ڤه دبهت، ههما وى چ دڤێت بلا بكهت..
بهلێ.. نه! شێخ ومهزنێ بابكێ جومهحیان ژ قورهیشیان (ئومهییهیێ كوڕێ خهلهفى) ب ڤى ڕهنگى هزرێ ناكهت.. ڕاسته ل نك وى بیلال ژ پێشیهكێ بێ قیمهتتره، بهلێ مهسهلا باوهرى ئینانا وى ب دینێ موحهممهدى یێ (ئومهییهى) نهڤیاى، وكوفرا وى ب وان خوداوهندێن (ئومهییه) سهرێ خۆ بۆ دچهمینت، بێنا نهگوهدارى و(تهمهررودێ) ژێ دئێته سهحكرن، ئهگهر عهبدێ وى بیلال ئهڤرۆ دلێ خۆ ژ وان باوهریان ڕزگار بكهت یێن ئهو ل سهر، وسهرێ خۆ ژ وان هزران داقوتت یێن وى كهیف پێ دئێت، سوباهى دویر نینه ئهو هندهك زێدهگاڤیێن دى ژى بهاڤێژت وهزر بكهت فهرقا وى ومرۆڤهكێ قورهیشى یێ ئازاد نینه، نه بهس هنده بهلكى ئهو ژى وهكى موحهممهدى هزر بكهت فهرقا وى و(ئومهییهى) ب خۆ ژى نینه!
نابت بۆ ئومهییهى ڤى دهرگههى ل سهر خۆ وبرایێن خۆ ژ زڕتهك ودفن بلندێن قورهیشیان ڤهكهت، ئهگهر ئهو ههڤسارێ بیلالى ئهڤرۆ بهردهت، سوباهى فعلێن گهلهك عهبدێن دى ژى یێن وهكى وى دێ خراب بن، وئهو ژى دێ پێ ل ئهمر وفهرمانێن سهییدێن خۆ دانن، ودێ گههنه موحهممهدى..
ئومهییهى ب بێن تهنگى ڤه گازى كره عهبدێ خۆ بیلالى..
- بهلێ ئهز بهنى، كهرهم كه..
- بیلال.. ئهو چیه من ژ ته گوهـ لێ بووى؟!
- ... ...
وبهرى بیلال پسیارا وى تشتى بكهت یێ وى ژێ گوهـ لێ بووى، وى گۆت:
- من یێ زانى تو ژى یێ د سهردا چووى، ته كوفر ب خوداوهندێن مه یا كرى وتو یێ چوویه سهر دینێ ئێتیمێ هاشمیان؟!
وبیلال، ئهوێ بڕیار داى پشتى موسلمانبوونا خۆ ببته مرۆڤهكێ دى، مرۆڤهكێ ژ خودێ پێڤهتر ژ كهسێ نهترست، وحهقیێ ل دویڤ كهسێ بهرنهدهت، ئهگهر خۆ ئهو ئێك سهییدێ وى یێ دلڕهق (ئومهییه) ژى بت.. ب دلهكێ رحهت ودێمهكێ گهش ڤه گۆت:
- بهلێ.. من باوهری ب خودایێ حهق ئینایه، یێ ئهز وتو وعهرد وعهسمان ئافراندین، یێ ئێكانه د ژات وسالۆخهتێن خۆ دا، ئهمر وفهرمان یا وییه، ووى چو شریك د ملكێ خۆ دا نینن.
ڤێ صهراحهتا بیلالى، وئعترافا وى یا ئێكسهر ب ڤێ تاوانا مهزن د ڕویێ سهییدێ وى دا، عهقل ژ سهرێ ئومهییهى بر، بێى وى هاى ژ خۆ ههبت، وى دهستێ خۆ ب كهرب ڤه ل وێ مێزێ دا یا ل بهر سنگى و ب گهف وگوڕ ڤه گۆت:
- ئهز ب لات وعوززاى كهمه، ئهز ناهێلم ڕۆژا ئهڤرۆ ل ته ئاڤا ببت، یان دێ ل دینێ مه ڤهگهڕیێى، یان دێ ته كهمه عیبرهت بۆ خهلكێ مهكههێ ههمیێ!!
