پێشگوتن
ب ناڤێ خودایێ مهزن و دلۆڤان
حهمد و سوپاسى بۆ وى خودایى بن یێ ئهزمان دایه مرۆڤى و ئهو فێرى دهربڕینێ كرى، ڕێكا باشی و خرابییێ ل بهراهییا وى داناى و بهرێ وى دایه باشییێ و چوونا بهر ب قهنجییێ ڤه ل بهر وى ب ساناهى كرى، و صهلات و سهلام ل پێغهمبهرێ وى یێ خودان قهدر بن، سهروهرێ مــرۆڤــان و پــێــشــهوایێ گــازیكهرێن ڕاستهڕێیا خودێ، و ل بنهمال و ههڤال و دویكهفتییێن وى ژى، هندى سهرهك ههبت بـــۆ خودێ بچهمیێت، و دلهك ب ڤینا وى بژیت، و ئهزمانهك ب ناڤێ وى بگهڕێێت.
•خواندهڤان هێژا:
ئهڤ كۆما گۆتار و ڤهكۆلینێن هوین د ڤێ كتێبێ دا دبینن، هژمارهكا بابهتێن جودانه جودانه ل هندهك دهمێن ژێك دویر و نێزیك هاتینه نڤیسین، و تشتێ وان ههمییان دگههینته ئێك ئهوه ئهو ل دۆر (ژین و باوهرى)یێ دزڤڕن، و ههر ئهڤ ناڤه بوو یێ پترییا ڤان بابهتان ل بهر سیبهرا وی هاتینه بهرههڤكرن، چونكى ئهو ناڤ ناڤێ وى بهرنامهیێ تهلهفزیوونى بوو یێ ههر ژ سالا (1994 ز) وهره و حهتا سالا (210 ز) مه ل سهر شاشا تهلهفزیوونا دهۆكێ پێشكێش دكر، ههر چهنده ناڤێ بهرنامهى (وهكى ناڤێ تهلهفزیوونێ ب خۆ ژى!) پتر ژ جارهكێ هاتبوو گوهاڕتن.
د ڤى بهرنامهیى دا، كو هندهك جاران یێ ڕۆژانه بوو، و هندهك جاران یێ حهفتیانه بوو، ب سهدان بابهتێن كورت و یێن درێژ ژی، مه بهرههڤكربوون، و پێشكێشى بینهران كربوون، و گهلهك ژ ڤان بابهتان د هژمارهكا كتێبێن خۆ دا یێن بهرى نوكه هاتینه چاپكرن مه بهلاڤكربوون، و هـنــدهك ژێ مابوون حهتا نوكه جهێ خۆ د ناڤ چو كتێبان دا نهدیتبوون، نوكه مه ڤیا ئهوێن مایى ژى بدهینه ئێك و د ڤێ كتێبێ دا كۆم بكهین و بدانینه بهر دهستێ خواندهڤانان؛ دا مفا ژێ بێته دیتن، هیڤییا مه ژ خودایێ مهزن ئهوه ئهو ڤى كارى بكهته د تهرازییا خێرێن مه دا.
و وهكى پتر ژ جارهكێ مه گۆتى دهورێ مه د بهرههڤكرنا ڤان بابهتان دا هندهك جاران ب تنێ وهرگێڕانهكا ب دهسكارى ڤهیه، و هندهك جاران بهرههڤكرن و لێكدانه، و بهلكى هندهك جاران دانان ژى بت.. بهلێ چونكى ئهڤ نڤیسینه بۆ بهرنامهیهكێ تهلهفزیوونى دهاتنه بهرههڤكرن، مخابن گهلهك جاران مه ژێدهر ل نك خۆ نهدنڤیسین، و نوكه پترییا وان ل بیرا مه نهماینه، لهو ئهم داخوازا لێبۆرینێ ژ خودانێن وان ژێدهران -ههر وهسا ژ خواندهڤانان ژى- دكهین ژ بهر ڤێ كێماسییێ، و هیڤییا مه یا بهراهییێ و دویماهییێ ژ خودێ ئهوه ئهو خێرا ههر لایهكى بنڤیست، یێن مه فایده ژێ دیتى، و یێن ئهو فایدهى ژ مه دبینن، ههر وهسا ئهم دوعایێ ژ خودێ دكهین كو خێرا وى خودانخێرى ژى مهزن بكهین یێ چاپكرنا ڤێ كتێبێ ب ستویێ خۆ ڤه گرتى، و داخوازكرى كو ناڤێ وى نهئێته گۆتن، خودێ خێرا وى مهزن بكهت، و نموونهیێن وهكى وى د ناڤ یێن پاشییێ دا ژ ئوممهتێ زێده بكهت، كانێ چاوا ئهو د ناڤ پێشییێن ئوممهتێ دا دزێده بوون، ژ وان یێن بهرههمێ وان یێ خێرێ یێ ئاشكهرا، و ناڤێن وان د دهفتهرا خێران دا ل نك خودایێ وان دڤهرشاتى.
یا رهببى تو دلهكێ پاقژ، و كارهكێ دورست، و ئهزمانهكێ ڕاست، و ئیخلاصهكا تمام ب رزقێ مه ههمییان بكهی.
