ل دیوانا عهمرى
وپشتى ماریا ژ دیوانا عهمرى وههڤالێن وى زڤڕیه نك خاتوینا خۆ ئهرمانۆسایا كچا موقهوقسى، گۆتێ:
- خاتوینا منا هێژا! دهمێ من نامهیا ته گههاندیه عهمرى، وى گۆته من: ما ئهو چ هزرێ ژ مه دكهت؟ یا ژ وێ ڤه ئهم دێ چ ل وێ كهین؟
- ئهى ئهمیر، هزرا وێ ژ ته ئهو هزره یا مرۆڤ ژ كهسهكێ جامێر دكهت، یێ دو تشت وى دهاژۆن: جامێریا وى، ودینێ وى..
ئینا وى گۆته من:
- بێژه خاتوینا خۆ: پێغهمبهرێ مه فهرمان ل مه كربوو ههر جارهكا ئهم هاتین ومه مصر ڤهكر، ئهم د گهل قبتیان د قهنج بین؛ چونكى وان خزماینى د گهل مه ههیه وحهقێ وان یێ ل سهر مه ههى.. وبێژێ: بلا ئهو باش بزانت ئهم نههاتینه ڤێرێ هێڕشهكێ بكهین دا عهردهكێ نوى ڤهكهین، ئهم یێن هاتین دا هندهك دلێن نوى بۆ حهقیێ ڤهكهین..
گاڤا ئهرمانۆسایێ ئهڤ گۆتنه ژێ بهیستى، گۆتێ:
- سالۆخهتێن وى بۆ من بێژه..
وێ گۆت:
- دهمێ ئهو د گهل كۆمهكا ههڤالێن خۆ ب نك مه ڤه هاتین، وى ئیشارهت دا تهرجومانێ خۆ (وهردانى) كۆ گۆتنا وى بۆ مه ڤهگێڕت، ژ بهر ڤێ چهندێ من زانى ئهو دێ مهزنێ وان عهمر بت.. ئهو ل سهر ههسپهكێ كومێت بوو، ههسپهكێ د ناڤبهرا سۆرى وڕهشى دا بوو، ب موكمى ڤه پیێن خۆ ل عهردى ددان دا بێژى ئهو ههسپهكه نوكه دێ ب ئهزمان كهڤت، ناڤچاڤێن وى..
ل ڤێرێ ئهررمانۆسایێ گۆتنا وێ بڕى وگۆتێ:
- من گۆتبوو ته سالۆخهتێن وى بۆ من بێژه، نه یێن ههسپێ وى!
ماریایێ گۆتێ:
- بهلێ.. چهكێ وى..
- وچهكێ وى ژى مه شۆله ژێ نینه.. ئهو یێ چاوا بوو ئهو..
ماریایێ گۆتێ:
- وى بهژنهكا كورت ههبوو، نیشانا هێز وموكمیێ بوو، وهیممهتهكا زێده ههبوو نیشانا عهقلهكێ زێده، ودو چاڤێن ڕهش ههبوون..
- وئهو نیشانا چنه..
ئهرمانۆسایێ ب گڕنژین ڤه گۆتێ.. ماریایێ بهردهوامى دا گۆتنا خۆ:
- .. دێمێ وى ڕۆناهى ژێ دچوو، وهێز ژ ناڤچاڤێن وى ڤهدپهشى، دا بێژى هێز ههمى یا ل نك وى كۆم بووى، یێ وى ببینت ئێكسهر دێ هزر كهت كو (دههاء) وشارهزایى ههمى ملكێ ویه، ههر جارهكا ئهز د دێمێ وى دفوكریم من وه هزر دكر كو مرۆڤ نهشێت د دێمێ وى بگههت حهتا جارهكا دى تێ نهفوكرت..
هنگى ئهرمانۆسایێ ب گڕنژینهكا تێر مهعنا ڤه گۆتێ:
- خۆشى ههمى دوهسانه حهتا نهئێنه دوبارهكرن ب دورستى نائێته مهعناكرن!
شهرم ل سهر دێمێ ماریایێ ئاشكهرا بوو، سهرێ خۆ نزم كر وگۆت:
- ب خودێ ئهو یێ وهسا بوو وهكى من گۆتیه ته، و ژ بهر ههیبهتا وى یا زێده من د خۆ ڕا نهدیت تێر بهرێ خۆ بدهمێ.. وههر چاوا بت عهمرى گۆته من: بڕیارا مه ئهوه هوین ب جوانترین وقهدرترین ڕهنگى بۆ موقهوقسى بێنه هنارت، وئهڤه پشكهكه ژ وێ قهنجیێ یا پێغهمبهرێ مه فهرمان پێ ل مه كرى ئهم د گهل ههوه بكهین، وچى داخوازا ههوه ههبت دێ بۆ ههوه ب جهـ ئینین.. وبهرى ئهز داخوازا خۆ بگههینمێ ئهو ل دۆر خۆ زڤڕى وگۆته زهلامهكى: قهیس! تو كۆمهكا موجاهدان دێ د گهل خۆ بهى وهوین دێ زێرهڤانیێ ل كچا مهلكى وههڤالێن وێ كهن حهتا هوین وان دگههیننه مهلكى ل جهێ وى.. وهنگى وى چو دهلیڤه بۆ من نههێلا ئهز داخوازا خۆ ژێ بكهم..
