مزگینیا مهزن
ڕۆژ هـێــدى دچــوون، ودهمـى پێگاڤێن خۆ -ل بهر وى- گران دهاڤێتن، وئهگهر ژ بهر وێ هیڤیێ نهبا یا د كویراتیا دلێ وى دا دژیا هندهك جاران ئهو دا خوزیێن مرنێ ڕاهێلت، عهبدینیێ دهست وپیێن وى گرێدابوون، دنیا ل بهر وى بێ تام كربوو، وكو مرۆڤ عهبدێ جوهیهكێ مالپهڕێس بت هێشتا كۆڤانا مرۆڤى گرانتر لێ دئێت، بهلێ.. چاڤێ وى ل ڕێكێ بوو كانێ كهنگى مزگینیا مهزن دێ گههته گوهێن وى، وهاتنا زانایهكێ وهكى (ئبن ههیبانى) بۆ وى حصنێ ئهو لێ دژیا، وئهو گۆتنێن وى یێن دلڤهكهر یێن بۆ وى ژێ هاتینه ڤهگوهاستن، هیڤیا وى گهشتر ومهزنتر لێ كربوو.. ڤێجا، بلا بێهنا خۆ فرههـ بكهت!!
ووێ ڕۆژێ دنیا یا بێ دهنگ بوو.. بایهكێ هوین ورحهت دهات، هژمارهكا عهبدان ل سهر گۆپیتكێن دارقهسپان بوون تهڤركێن وان د دهستان دا بوون وكارێ پاقژكرنا بنێن دارقهسپان ژ چهق وطایێن هشك دكر، وسهییدێ وان یێ جوهى گاڤ بۆ گاڤێ دهنگێ خۆ ل وان بلند دكر، و ب زڤرى ڤه فهرمان ل وان دكر كو ئهو باش كارێ خۆ بكهن، وخۆ ژ قهستا موژیل نهكهن.. وعهبدێ فارسى ژى وهكى وان ههمى عهبدێن دى كارێ خۆ ب بێ دهنگى ل سهرێن دارقهسپهكێ دكر، وهندهك جاران ب بهرێخۆدانهكا تژى مهعنا ژۆردا بهرێ خۆ ددا (سهییدێ) خۆ یێ دلڕهق، ئهوێ ژ لێ خوڕینێ نهدوهستیا..
گاڤهكێ دهنگهكێ غهریب هاتێ وئهو ژ دالغان ئینادهر، ژۆردا بهرێ خۆ دا، دیت پسمامهكێ سهییدێ وى ب لهز یێ دئێت، وهێشتا ژ دویر ڤه یێ گازى پسمامێ خۆ دكهت، وپشتى ههردو گههشتینه ئێك وسلاڤ كریه ئێك ودو، ئهو ب نك وێ بنا دارقهسپێ ڤه هاتن یا وى ل سهر شۆل دكر، وههردو ب ڕهخ قورمێ وێ ڤه ڕوینشتن..
- ها (حویهى) پسمام، تو ژ كیڤه دئێى هۆسا بێنا ته یا تهنگ؟
ب ڤى ڕهنگى سهییدێ وى پسیار ژ پسمامێ خۆ كر، وچونكى ئهو د نێزیكى وى بوون، دهنگێ وان خۆش دگههشتێ.. ب بێنتهنگى ڤه (حویهى) بهرسڤا سهییدێ وى دا وگۆتێ:
- ئهزێ ژ یهپربێ دئێم
- تشتهكێ نوى ههبوو؟
- خودێ كوڕێن قهیلێ(قەیلە ناڤێ ژنەکێ یە دبێژن دەیکا ئەوس و خەزرەجییان بوو) بكوژت!! نوكه دهمێ ئهز هاتیم، وان ههمیان كارێ خۆ كربوو دا چنه (قوبائێ) ل بهراهیا مێڤانێ خۆ یێ نوى.
- مێڤانێ وان یێ نوى؟
- بهلێ.. پێغهمبهرێ خۆ، ئهوێ ئویجاخا وى یا قورهیشى ڕاهێلایه ب دویڤ ڤه، ودهرێخستى، ڤێجا بهلا خۆ فرۆتیه مه، وهاتى قهستا باژێڕێ مه كرى، دا ئهوس وخهزرهجى بهڕهڤانیێ ژێ بكهن.. ته گوهـ لێ ههیه!
تهزینكهك ب سهر لهشێ وى دا هات گاڤا وى گوهـ ل ناڤێ پێغهمبهرێ خودێ ومشهختبوون وهاتنا یهپربێ بووى، ئهرێ ئهڤه خهونه ئهو دبینت یان یێ هشیاره؟ دهستێن وى لهرزین وترسیا ژ سهرێ دارێ ژۆردا ب سهر سهرێ سهییدێ خۆ وپـسـمـامـێ وى دا بێته خوارێ، بێى هاى ژ خۆ ههبت، یان بزانت كانێ ئهو یێ چ دكهت زوى ژ دارێ هاته خوار و ب نك (حویهى) ڤه چوو وملێ وى گرت وهژاند، وگۆتێ:
- ته چ گۆت؟ پێغهمبهرێ خودێ؟ ئهو چووینه بهراهیا پێغهمبهرێ خودێ؟
ههر وهكى وى دڤیا خۆ پشت ڕاست بكهت كانێ وى دورست گوهـ ل ئاخفتنا وى بوویه یان نه؟ كانێ ئهو یێ هشیاره یان ئهڤه خهونهكه ئهو دبینت؟ دڤیا تهئكید بكهت كانێ ئهو ئاخفتنا هاتیه گوهێن وى ئهو زگینیا مهزنه یا ئهڤه هنده ساله ئهو ل هیڤیێ یان نه؟ و ژ بهر مهزنیا (موفاجهئێ) وى سهییدێ خۆ وزڤراتیا وى ژ بیركر، وههر نهزانى كانێ ل وێرێیه یان نه! بهلێ سهییدێ وى یێ دلڕهق ئهوێ ئهڤ كارێ وى ب غهریبى ڤه وهرگرتى وژێ عهجێبگرتى ماى ههر زوى كولمهكا حێل ل سنگێ وى دا ولێ خوڕى:
- عهبدێ پیس!! ته شۆله ژ هندێیه.. زوى به ب سهر دارێ بكهڤه وكارێ خۆ تمام بكه، ونه وه بت جارهكا دى مایێ خۆ د ڤان شۆلان بكهى..
مهعنا ڕاسته ئهو گۆتنا هاتیه گوهێن وى یا دورست بوو، وئهڤه نه خهونه ئهو دبینت، كولمهكا سهییدێ وى ههر چهنده یا دژوار بوو ژى بهلێ ژ لایهكێ دى ڤه كهیفا وى گهلهك ئینا چونكى ڕاستیا گۆتنا هاتیه وى بۆ وى تهئكید كر..
- چوننه چوننه.. ههما من دڤیا ڤێ گۆتنا وى یا غهریب تهئكید بكهم..
وى هێدى ئهڤ گۆتنه گۆت و ب مجدى ڤه زڤڕى سهر كارێ خۆ.. وى ههست ب لهش سڤكیهكا غهریب كر، حهز دكر كو د گاڤێ دا وى كارى ههمیێ بكهت یێ سهییدێ وى ژێ خواستى ئهو بكهت؛ دا بهطال ببت بهلكى ڕێكا خۆ ببینت وبچت قهستا (قوبائێ) بكهت، وئهو ب خۆ ڤى خهبهرێ گههشتیێ تهئكید بكهت، هزرهكێ ئهو ئینا وئێكێ ئهو بر، ئهرێ تو بێژى ئهو ئهو بت یێ سهیدایێ من ئوسقوفێ عهمووریێ بهحسێ وى بۆ من كرى؟ تو بێژى ئهو بت یێ (ئبن ههیبان) ژ بهر هاتى ومرى بهرى ببینت؟ وئهگهر ئهو بوو چاوا دێ شێم خۆ گههینمێ، باوهریێ پێ ئینم، وچمه د گهل؟ وعهبدینى وسهییدێ من یێ زڤر ودلڕهق؟ ئاخ.. چهند حهز دكر ڤێ گاڤێ ئهو زهلام ل نك با یێ جارا ئێكێ دهستێن وى ب كنفا عهبدینێ گرێداى، دا ئهو ب تهڤركێ لێ ڕاوهستیابا حهتا سهرێ وى دههڕشاندن.. چو جاران ئهو وهكى ڤێ جارێ ب گرانیا بارێ عهبدینیێ نهحهسیایه، بهلێ ههر چاوا بت دڤێت ئهو خۆ ژ مهسهلێ پشت ڕاست كهت، وپاشى یا دى ب هیڤیا خودێ ڤه.
