ناڤبرا بیست و پێنجێ
شعوورا نهبیلایێ دهمێ دادایه عهردێ كوێتێ شعوورا وى مرۆڤى بوو یێ مشهخت دبت، دهمێ دیتى هژمارهكا مرۆڤان ژ ژن ومێران یێت ل هیڤیا وێ ئهو عهجێبگرتى ما، مهسهله ل بهر وێ گهلهكیا غهریب بوو، ئهو كهسهك ژ وان نانیاست، تو دبێژى ئهڤه كینه؟ ههڤالێ دختۆر سالمى ئهوێ كارێ وێ ب ڕێڤه دبهت، زانى نوكه ئهو یا هزرا خۆ د چ دا دكهت، لهو هێدى گۆتێ:
ــ ئهڤه ههمى خویشك وبرایێت تهنه..
ــ وان چاوا ئهز نیاسیم؟
ــ ههر تشتهكى ل دهمێ وى دێ زانى..
یا عهجێب ئهو بوو وێ گهلهك ب ڤێ ههڤالینیێ خۆش بوو، دا بێژى ئهڤه چهند سالـه ئهو ههڤالێت ئێكن، سهیدا عهبدلعهزیزێ سیسى ههڤالێ دختۆر سالمى گڕنژى وگۆت:
ــ روح هندهك لهشكهرێت چهكدارن، ئهوێت وهكى ئێكن بن دگههنه ئێك، ویێت وهكى ئێك نهبن ژێك دویر دكهڤن.. ئهو ژى ل سهر ئێك ڕێكێنه..
ب تهناهى ڤه وێ گۆت:
ــ بهلێ..
ئهو زێده یا كهیفخۆش بوو دهمێ وێ گوه لێ دبوو دان وستاندن ب ڕهنگهكێ ئازاد دئێنهكرن، وئهو كتێب وچاپكرى یێت كو ل مصرێ دقهدهغه ل ڤێرێ دسهربهستن.. ئهو كتێبێت خودانى ددهنه گرتن وبهرێ وى ددهنه مهحكهمێ.. دهست هاڤێتێ چهند كۆڤارێت عهرهبى وبیانى ژى تێكڤهدان، وێ دیت ئهو ب شێوهیهكێ جودا ژ وى شێوهیێ ل مصرێ ههى دنڤیسى، هندهكان ڕهخنهیهكا دژوار ل حاكمێت مصرێ دگرت، وهندهكان كریار وسهرهاتى بێى ترس دكرنه سهر بهڕكێ وشرۆڤه دكرن، وپهرده ژ سهر وان كریارێت هـهتكبهر ڕادكــر یێت ڕۆژنامهیێت مصرێ شانازى پێ دكر، ژ لایـهكێ دى ڤه وێ دیت هندهك ڕۆژنامهیێت دى ههبوون ب تمامى پشتهڤانیا مهزنێت مصرێ دكر، نهبیلایێ دیت حهژێكهرێت عهبدنناصرى هندهك فلسطینى بوون، وهندهك سوورى، وهندهك لوبنانى، وهندهك كوێتى ژى.. وێ ب ڤێ چهندێ خۆش نهبوو، هزرا وێ ئهو بوو ئهڤـ ڕهنگه مرۆڤه یان دخشیمن، یان كرێگرتینه، بهلێ سهیدا عهبدلعهزیزێ سیسى ب نهرمیا خۆ یا ناڤدار ڤه گۆت:
ــ هـنـدهك ژ دل وبـاوهر پشتهڤانن، ودێ بینى هندهك ژى ژ دل وباوهر دژبهرن، ههر ئێكى دیتنا خۆ ههیه، ئهڤه چهند سالهكن ئهز ل ڤێرێ دژیم، جڕه د ناڤبهرا مه ووان دا یێ بهردهوامه، وئهم ب ڕێكێت ئاشتیخواز جهنگێ د گهل ڤان پێلێت ههڤڕك دكهین، وكهس ل ڤێرێ نینه خهلكى ههمیێ ب قامچیێ بكهته ئێك بۆچوون..
بارا پتر ژ دهمێ خۆ نهبیلایێ ب خواندنا وانكتێبان ڤه بۆراند یێت بهحسێ مهسهلا ههڤڕكیا ئیخوانان وشۆڕهشێ دكهن، ولیستهیا ناڤێت شههیدان دهسنیشان دكهن، وبهحسێ وان ڕهنگێت تهعزیبا لهشى وهزرى دكهن یا زڕتهك پێ ڕادبن، وئهو كتێبێت بهحسێ وان پیلانان دكهن یێت داگیركهر وخاچپهرێس وشیووعى بۆ نههێلانا بزاڤا كۆمبوونا ئیسلامى دگێڕن ئهوا بهر ب زێدهبوونێ ڤه دچت، ودهمێ وێ ههڤبهركرنهك د ناڤبهرا وێ دا كرى یا وێ خواندى ویا ب چاڤــ دیتى، وێ زانى كو نێزیكه ههمى تشت بۆ خهلكى یێت ئاشكهرا بووین، لهو بێنا وێ فرهه بوو، بهلێ د گهل هندێ ژى وێ گهلهك پێ نهخۆش بوو دهمێ ددیت هندهك كهس ههنه رازى نابن ئهڤـ گاغیه ب گونههبار بێنه نیاسین، ئهو گۆتارێن دهنگ بلند یێت كو ژ ئێزگێ قاهیره دهردكهفت، وپهیڤێن بریسقهدار ژ (صوت العرب)، وكۆنگرهیێت مللى ب قێڕقێڕ ئهوێت ل سهر پێلێت ئێزگهى بهلاڤـ دبــوون، وئــهو زیــرهكـێـت حنێربهند یێت زڕنا وان پـالــددهت دا بــبــنــه ســهردارێــت نـوى.. ڤان ههمیان قاهیره ب ڕهنگهكێ سهربلند یێ پاشڤه نهچت نیشا خهلكى ددا، پیچهكێ ئـهو بـێ هـیـڤـى بوو، بهلێ عهبدلعهزیزێ سیسى گۆتێ:
ــ شهڕێ درێژه.. ونهحهقیێ ههمى هێزێت دیار ونهدیار ل وهلاتى و ژ دهرڤه ژى ههنه، یا ل سهر مه ئهوه ئهم كارهكێ بهردهوام بكهین، وبێنا خۆفرهه بكهین..
نهبیلایێ گۆت:
ــ حهتا كهنگى؟
ــ ئهڤه.. خودێ دزانت..
ــ ودویماهى؟؟
ــ ئهو ل سهر خودێیه.. یا ل سهر مه ئهوه ئهم بزاڤێ بكهین، بهلكى سوباهى ب سهركهڤین، ونه دویره سهركهفتن ل سهر دهستێت عهیالێ مه ب جه بێت..
نهخۆشى ل سهر دێمێ وێ یێ جوان ئاشكهرا بوو، وگۆت:
ــ چاوا ئهم ل درێژیا ڤان سالێت تژى نهخۆشى دێ ژین؟
ــ ما دێ چ كهین؟
ــ دێ كوژین.. ههڕفینین.. تۆلێ ستینین.. ب دههان بێ گونهه ل گرتیخانهیا حـهربـى یێت مـریـن، بۆچى مرنا مه یا ب بـهـا نـابـت؟ دێ كوژین پاشى بلا ئهم ژى بێینه كوشتـن.. ب ڤى ڕهنگى گۆریكرنێت مه دێ ب مهعنا بن!!
عهبدلعهزیز گڕنژى وسهرێ خۆ هژاند وگۆت:
ــ ئهز نه د گهل تهمه، مرنا ئێكى، یان دههان، یان هزاران چو گوهۆڕینێ نائێخته حالێ مه، بهلكى دێ زڕتهكان پتر حێنج ومجد كهت كو ئهو هێشتا خوینا بێ گونههان بڕێژن، مهسهله مهسهلا ڕژێمهكێیه، ڕژێمهكا تمام، ئهڤـ ڕژێمه بێى گازیهكا چاك وئاخفتنهكا رحهت نائێته گوهاڕتن، گوهۆڕین دڤێت ژ مه و ژ وژدانا خهلكى دهست پێ بكهت، ل سهرى دڤێت ئهو قانع ببن، هنگى كهلهێت پیس دێ ههڕفن، وجهێت وان دێ ب سهرێك دا ئێنه خوارێ، وعهگوهیێ مهلهوانى ویێت وهكى وى دێ ئێنه ڤهشارتن.. ڕۆژنامهڤانیهكا نوى دێ دهركهڤت، ودوڕوى دێ بێ دهنگ بن..
نهبیلا كهفته هزران، خهم ل سهر ڕویێ وێ ئاشكهرا بوو، بیرا وێ ل وان دێمێت زهر ومهلویل هاتهڤه ئهوێت ل كونجێت گرتیخانهیا حهربى ههین، ئهو مرۆڤێ ژ ب پیان ڤه هلاویستى، لهشێت ژ بهر تهعزیبێ خوینهلۆ بووین، قێژى وههوار.. بیرا وێ ل سهلوایێ وچاڤێت وێ یێت تژى ترس هاتهڤه، صابرێ بچویك ئهوێ ل ملێ وێ، جزدانكا عهگوهى یا تــژى پــاره، چـیـرۆكـا وێ یا عنتیكه د گهل موخابهراتێ.. و ل وى زهلامێ كۆره ل شهڤا ب باران.. دختۆر سالمێ جامێر.. ووێ ترس وسههما چهنگێ خۆ ب سهر ملیوونا مرۆڤان دا بهرداى، ژیانا درهوێ ودوڕویاتیێ ئهوا ل وهلاتێ كهسك بهلاڤ بووى، ئهو وهلاتێ شهیتانان تژى ئاگر وترس كرى.. نهبیلا ب دهنگێ عهبدلعهزیزى ژ ڤان خهونێت خۆ هشیار بوو، دهمێ وى گۆتى:
ــ لازم تو سهرهاتیا خۆ بنڤیسى دا ئهم وێ د ناڤـ خهلكى دا بهلاڤـ بكهین، بهلكى ئهو پیچهكێ نهخۆشیا ته سڤك بكهت..
نهبیلایێ گۆت:
ــ وئهو ژارێت خۆگۆریكهر ل وێرێ دێ چ مفایى ژ وێ نڤیسینێ بینن؟
ــ گهلهك مفایى دێ ژێ بینن..
ــ ئهز دبێژم ئهو زڕتهك پتر دێ عهزابێ ل وان زێده كهن..
ــ كون یا ژ پاتهى مهزنـتـر لـێ هاتى.. وزانینا ڕاستیێ دهسپێكا ڕێكێیه..
نهبیلایێ ب خهم ڤه گۆت:
ــ ڕاستى ل بن تۆزا گومانێ وزڤڕۆكا درهوێت ڕاگههاندنێ یا بهرزه بووى.. ئهو دبێژن: ئهڤه ئهون یێت نڤیسهر وهۆنهرمهندان دكوژن، وچایخانه وڕیڤهبهریێت كارهب وئاڤێ وسینهما وزانینگههان دپهقینن.. وئهفسهر ولهشكهران دڕهڤینن.. وان مللهت ههمى یێ ل مه كریه نهیار.. ههر كێماسیهكا ههبت یا ب مه ڕاداى، خۆ ناڤێ مه یێ كریه (ئیخوان ئهششهیاطین) پشتى وان فهتوا بۆ خۆ ژ هندهك كهسێت دلڕهش ونهزان وهرگرتى.. بیر وبۆچوونێت خهلكى د دهر حهقا مه دا یێت ژههركرین، ووان بۆ ڤێ چهندێ ههمى هێز وشیانێت خۆ یێت تهرخان كرین، گهلهك ڕۆژنامه وكۆڤار ل وهلاتێت عهرهب وموسلمانان یـێـت كـڕیـن.. لههیهكا دژوار ژ كهرب ونهیارهتیێ ل بهرا مه ههیه.. بهلكى ژ درهو وان بهلاڤكریه كو ئنیهتێت مه د گهل برایێت مه یێت فهله دخهلهتن، درهوێت پیس وكرێت وان یێ ب دویڤ مهزنێت مه ڤهناین.. چاوا ل ڤێ ڕێكا تارى تبلچاڤـ دێ ب ڕێڤه چین؟
عهبدلعهزیز ب تهعلى ڤه گڕنژى وگۆت:
ــ خودێ د كیتابا خۆ دا دبێژت..
ــ چ دبێژت؟
ــ (وقل اعملوا..).
ئاخفتن درێژ وبهرفرههــ بوو، دویماهیێ عهبدلعهزیزى ئهو تێ گههاند كو ژنا وى سپێدێ دێ د گهل وێ چته خانیێ سهیدایێت مهاجران، دا كو ئهو ل وێ ئاكنجى ببت، ودهرسان بێژته كچكان ل خواندنگهههكێ، دیسا وى ئهو تێ گههاند كو وى دهستویرى بۆ وێ ژ وهزارهتا پهروهردهیێ وهرگرتیه كو ئهو ل ههمى پێنج شهنبان بێته مالا وان وبێنڤهدانا خۆ یا حهفتانه د گهل وان وچهند خویشكێت موسلمان ببۆرینت یێت كو زهلامێت وان ل فهرمانبهریێت حوكمهتا كوێتێ كار دكهن..
نهبیلایێ ژیانا خۆ ل خواندنگههێ دبۆراند، ل دهسپێكا ڤێ قویناغا نوى ژ ژیانا خۆ ئهو ب غهریبیێ دحهسیا، ڕاسته ئهو ههر یا د ناڤ جڤاتهكا عهرهبى دا، بهلێ ڤێ جڤاتێ تبیعهتێ خۆ یێ تایبهت ههبوو، وێ گهلهك ب وان شیرهتان نهخۆش دبوو دهمێ ههڤالێت وێ دگۆتێ:
ــ هشیار بى ههڤڕكیا چو كچكان نهكه.. ئهڤه كچا فلانیه، ووا هه كچا بێڤانیه.. لێدان نابت.. ههوجه ناكهت بهحسێ سیاسهتێ بكهى، یان ڕهخنهیێ ل كاروبارێت جڤاكى بگرى، یا ل سهر ته ئهوه تو ب نهرمى وبێنفرههى بهرگریا وان كارێت نهچاك بكهى یێن ژ وان پهیدا دبن.. نه وهبت كچكهكێ عقوبه بدهى، مایێ خۆ د شۆلێت ڕێڤهبهریێ دا نهكه، دڤێت فهرمانان بێى خۆ نهرازیكرن ب جه بینى، بهس هزرێت خۆ د كارێ خۆ دا بكه، ل دویڤ وى مهنههجى ههڕه یێ وهزارهتێ داناى، ب ڕهنگهكێ تمام تو یا بهرپسیارى حهتا سهرێ سالێ، یا هشیار بى ل دهمێ هاتن وچوونێ.. جڕه د ناڤبهرا خهلكى دا دێ ههبت، وێ هه مصریه.. وێ هه فلسگینیه.. یێ دى عیراقیه.. سووریه.. كوێتیه.. هتد، ته شۆله ژ كهسێ نهبت، ئهگهر ههڤالهكا ته ڕهخنهیهكێ یان گهفهكێ ل ڕێڤهبهریا خواندنگههێ بكهت، بهرسڤا وێ نهده، هشیار بى، نه كو ئهو بچت بێژته كاربدهستان، ڤێجا نهخۆشى بۆ ته چێ ببت.. نهوهبت بێژیه ڕێڤهبهرا خواندنگههێ: (نه)..
وگهلهك شیرهتێت دى یێت گوهێت نهبیلایێ تژى كرین، نهبیلا زێده حێبهتى دبوو ژ ڤان تشتێت وێ گوه لێ دبوون، ئهو پێ دحهسیا كو هندهك قهیدێت نوى یێ سهربهستیا وێ گرێددهن، ئهڤ تشته وێ بهرى نوكه نهدیتیه، بهلێ عهبدلعهزیزێ سیسى ڕێڤهبهرێ كۆمپانیهكا مهزن ب نهرمیا خۆ یا ههر جار ڤه گۆتێ:
ــ ههر جڤاتهكێ تبیعهتهكێ ههى.. ئهوێ بۆ ڕێكا خودێ گازى بكهت، دڤێت یێ بێنفرهه بت، ههر تشتهكى وهختێ خۆ ههیه.. ومرۆڤێت چاك ودلێت پاقژ چو جاران نابریێن.. ب تنێ ڕهفتارێ ته د گهل خهلكى دشێت ته ههژى هندێ بكهت ڤیانا ته بكهفته د دلێت خهلكى دا.. ل ڤێرێ ئهم دگرتى نینین.. چ عهردهكێ مه بڤێت ژ عهردێت خودێ ئهم دشێین بچینێ.. وئهم ژ برسان ژى دا نامرین، بهس ئهم وێ پهیاما خۆ ژ بیر نهكهین ئهوا خودێ دانایه سهر مللێت مه.. یا دى ههمى چو نینه، مانێ ئهم ب وێ پهیامێ وبۆ وێ دژین..
نهبیلایێ گۆت:
ــ بهلێ دڤێت ئهم قهدرێ خۆ ژ بیر نهكهین، چونكى ئهو پشكهكه ژ دینێ مه.
ــ ئهڤه مسۆگهره..
چو دهزگههێت بهلاڤكرنێ ل كوێتێ رازی نهبوون كو بیرهاتنێت (نهبیلا عهبدوللاهــ)ێ، نهبیلا گهلهك ژ ڤێ چهندێ تهنگاڤـ بوو, بهلێ برادهران ئهو تێگههاند كو پێتڤیه ل سهر وێ ئهو ژ لایهكێ دى ژى ڤه بهرێ خۆ بدهته مهسهلێ، كاربدهستان ل ڤێرێ نهڤێت خۆ بێخنه چو سهرگێژیان د گهل حاكمێت مصرێ، بۆ كوێتێ بهسه كو وێ سنگێ خۆ بۆ وان كهسان ڤهكرى ئهوێت مشهختبووینێ، ودهلیڤهیا كارى وژینهكا ب شهرهف دایێ، ووان بۆ وێ ئاشكهراكر كو گهلهك كهسان ژ ئیخوانان ب خۆ ژى ژ بهر هندهك ئهگهرێت تایبهت حهز ناكهن تشتێ د دلێ خۆ دا ئاشكهرا بكهن، ههر وهسا وان گۆت: تو دشێى كتێبا خۆ ل دهرڤه چاپ بكهى، وهكى بهیرووتێ بۆ نموونه، ئهو دێ هێلن ئهو بێته ڤێرێ، ب ڤێ چهندێ تو دێ ئارمانجا خۆ ب جهــ ئینى..
وعهبدلعهزیزى گۆتێ:
ــ هێشتا تو ب هندێ یا قانعى كو ناڤێ خۆ یێ دورست بدانیه سهر كتێبێ؟
ــ بهلـێ.. ئهز د گهل وان كهسان نینم یێت ناڤێ خۆ یێ دورست نهداننه سهر كتێبێت خۆ.
ــ نهدویره ئهڤ كاره نهخۆشیێ بۆ ته چێ بكهت..
ــ بلا.. ئێدى ئهز ژ تشتهكى ناترسم.. من رحا خۆ یا دایه خودێ.. من شیا گهلهك نڤیسینێت ڕێبهرێ گشتى یێ ئێكێ یێ ئیخوانان شههید (حهسهن ئهلبهنناى)، ونڤیسینێت هندهك نڤیسهرێت دى ژى یێت ئیخوانان بخوینم، ب ڕاستى هندهك تشتێت دى یێت نوى بۆ من ئاشكهرا بوون، من هزر نهدكر ئهڤـ مهزنیا عهجێب د ئیسلامێ دا ههیه.. مهدرهسه وخواندنگههێت مه چو تشتێ ههژى ژ دینێ مه بۆ مه نهدگۆت.. دویماهیێ ئهز گههشتمه هندێ كو نیڤنیڤاتى لاوازیه، ڕهڤینه وكێم باوهریه.. یان دێ موسلمانهكا تمام بم یان نه.. لهو ئهز دێ نڤیسم، ونڤیسینا خۆ بهلاڤـ كهم، ودێ بهرپسیاریا تمام هلگرم.. ئێدى ئهز ژ مرنێ ناترسم..
عهبدلعهزیزێ سیسى سهرێ خۆ هژاند وگۆت:
ــ جوانه.. بهلێ بهرپسیاریا تو ژێ دبێژى دێ یا چهند بت؟
ــ بلا یا تمام ژى بت..
ــ ئهگهر مهسهلێ پهیوهندى ب ته ب تنێ ڤه ههبا، چو نهبوو, مرۆڤ گهلهك جاران خۆ گۆرى باوهریا خۆ دكهت، بهلێ پاشهڕۆژا ب سهدان هزاران یا گرێدایه ب كار وگۆتنێت ته ڤه.. ئهم وتو ژ ڤێ بهرپسیارین..
وێ سهرێ خۆ هژاند وگۆت:
ــ ڕاسته..
ڕۆژ بۆرین، ونهبیلا د ناڤـ پێلێت ژیانا خۆ یا نوى دا نقۆ بووبوو، د ناڤـ وێ گوهۆڕینێ دا یا كهفتیه ژین وهزرێت وێ، وێ زێده پێ نهخۆش بوو دهمێ گههشتیه بهحسێ نساخیا بابێ خۆ، ووێ دویچوونا عهطوهیێ مهلهوانى دكر، دهمێ وێ هزرا خۆ ل دیمهنێ بابێ خۆ یێ پیر وژار ئینایهڤه، وێ بهردا گریێ، ئهو یێ كهفتیه سهر نڤینان، و ژ ئێشا دلى ودویراتیا نهبیلایێ دنالت.. بێ گومان وى حهز نـهدكــر ژیـانـا وى ب ڤى دیمهنێ كرێت ب دویماهى بێت.. نهبیلایێ ب كزگریۆك ڤه گۆت:
ــ وهى خۆشتڤیێ من، باب! ما گونهها ته چیه؟ خهلهتیا من بوو، سویچێت من بوون، بهلێ ما دێ چ كهم خودێ؟؟
نهبیلا د مهزهلكا خۆ ڤه ل ئاڤایێ سهیدایان یا ب تنێ بوو، ڕۆندكێت خۆ هشككرن، سهرێ وێ بڕجكێت كهربێ هاتنێ، زۆردارى ئاگرهكێ سوژهكه، جودایێ نائێخته ناڤبهرا زارۆكى وپێرهمێرى، گونههكارى وبێ گونههى دا، دیتن یا هژیاى، ونیشانێت ڕێكێ یێت بهرزه بووین.. چاكى وخرابى یێت تێكهل بووین، جیهان د چاڤێت وێ دا وهكى باغچهكێ ڕزى ویێ تژى تڕس لێ هات، د گهل موژیلیا وێ ب كارێ وێ ڤه، ونڤیسینا وێ بۆ هزر وبیرهاتنان، وخواندنا وێ بۆ كتێبێت ئیسلامى وسیاسى وئهدهبى ل دهمێت بهتالیێ، بهلێ ئهو نهشیا دیمهنێ بابێ خۆ یێ نساخ وههژار ژ بهر چاڤێت خۆ ببهت، ته ڕاستى بڤێت دختۆر سالم ژى ژ بیرا وێ نـهدچــوو، دیـمـهنێ وى ژى د وهغهرا وێ یا بێ دویماهى دا ل بهر چاڤان دهات ودچوو، گڕنژینا وى یا جوان وپاك، گهشاتیا چاڤێت وى یێت پڕ باوهر، چاكیتێ سپى یێ وهكى ملیاكهتان، زارێ وى یێ ئاشكهرا وموكم، دا بێژى وى بهراهى ودویماهیا تشتان دزانى، ههر وهكى ڕێزێت ڤهشارتى ژى د جیهانا سیاسى وهزرى دا وى دخواندن، ههر جارهكا بیرا وێ ل سالمى دهاتهڤه، وێ هزر دكر زهلامێ خودان باوهر و ب هێز ئهوه، یێ چو جاران پاشڤه نهچت، ئهڤه ههما هزرهكه كهفتیه سهرێ وێ وئهو یا پێ قانعه.. وێ ب خۆ گۆت: ((ئهز ژ وى ناترسم.. ئهو یێ ئێكانهیه من دیتى یێ ب قهدهرا خۆ رازى ودلخۆش.. بهلێ عهگوهیێ مهلهوانى وزهبانیێت وى ب ڤى ڕهنگێ مرۆڤان نهخۆشه.. تو بێژى ئهو دێ نهخۆشیان ئینته ڕێكا وى؟ دلێ وێ یێ دبێژتێ ئهو ڕۆژهكێ دێ دهركهڤت، وئهو دێ وى بینت.. ئهو ههر دێ یێ وهكى خۆ بت.. خودان هێز وپههلهوان.. ڕهبهنێ شهڤێ وعهگیدێ ڕۆژێ، ئهڤهیه سۆپهرمان، یان مرۆڤێ بلند ئهوێ كتێبێت فهلسهفێ بهحس ژێ كرى، تمامى بهس یا خودێیه، بهلێ سالم ئهوه یێ ژ كانیا پێغهمبهرینیێ ڤهخوارى، زانایێ موسلمان وخهباتكهر نموونهیێ بلنده ل جیهانا مه.. خودێ ته بپارێزت، سالم..)).
نهبیلا فێرى جهێ خۆ یێ نوى بوو، یان نێزیك بوو.. ئهو نهشێت ئێدى بێژت: ئهز ههست ب كهیفخۆشیێ ناكهم، نهخاسم پشتى كتێبا خۆ یا نوى هاتیه چاپكرن هلگرتى.. ب سهربلندى وى بهرێ خۆ دا ناڤێ خۆ ئهوێ ل سهر هاتیه نهخشاندن، پاشى وێ ئهو ب نك دهڤێ خۆ ڤه بر و ب ڤیان ڤه ماچى كر، ههر وهكى وێ دهیك وباب وخویشك وبرایێت خۆ ماچى دكرن.. كتێب پارچهیهك بوو ژ وێ.. ژ رح ومهژیێ وێ.. بـهلـكـى ئــهو هــهر د وێ گاڤێ ژى دا قامچیهك بوو وێ ل سهر ولهشێ دكتاتوورییهتێ داى، بهلكى ئهو ژ شیرى تیژتر و ژ قامچیێ دژوارتر بت، نێزیك بوو ئهو ژ كهیفان دا بفڕت، خوزى ڕاهێلان كو نوكه ئهو ل جادێت قاهیره با، كربا غار، وگهڕیابا وێ ئهو بێ پاره ل سهر خهلكى بهلاڤكربا.. خوزى ڕاهێلان كو وێ دانهیهك ژێ بۆ سهرۆكاتیێ هنارتبا..
ڕاست ڕابووڤه.. كهفته هزران.. دیسا، ما بۆچى ئهو دانهیهكێ ناهنێرته كۆچكا كۆمارى.. بۆ سهرۆكى ب خۆ؟ وبۆچى ئهو هندهك دانهیان بۆ عهطوهیێ مهلهوانى ژى ناهنێرت؟ عهطوه گهلهك كتێبان ناخوینت، بهلێ مسۆگهر ئهو دێ ڤێ خوینت.. ههر چو نهبت دا بزانت كانێ من چ ل سهر وى نڤیسیه، ڤێ هزرێ جهێ خۆ د دلێ وێ دا كر.. د مهزلا خۆ ڤه وێ ژ دل بهردا كهنیێ، عهطوه دێ چ بێژت دهمێ ئهو شرۆڤهكرنا وێ بۆ هزر وبیر وكریارێت وى یێت غهریب دخوینت؟ ئهوشاهدهكه وێ ب چاڤێت خۆ بهلا یا دیتى، ڤێجا بلا دیرۆك بزانت، وخهلك ژى بلا بخوینن.. ئهڤه ئێكهمین جاره ئهو پێ دحهسیێت كو ئاخفتنێت وێ ب بها كهفتن.. نهبیلایێ دیت ههر كهسهكێ كتێبا وێ خواندى یێ قانعه ب گۆتنێت وێ، ویێ نهرازیه ژ وێ زۆرداریا دئێتهكرن، نێزیكى حهفتیهكێ نهبیلا د گهل خهونا خۆ یا شرین ژیا.. نهدشیا بنڤت، كتێب هل دگرت و ژ سهرى حهتا بنى دخواند، ههر وهكى وێ نهدزانى كانێ چ تێدا ههیه، یان دا بێژى ئهو نه ژ دانانا وێیه.. هزر نهدكر ئهڤ ڤیانه د ناڤبهرا وێ وكتێبێ دا دێ چێ بت.. ما دبت ئهڤپهیوهندیه د ناڤبهرا مرۆڤى وكاغهزێ دا چێ ببت؟ نوكه ژ نوى وێ زانى كانێ نڤیسهر وهۆنهرمهند چهند دلخۆش دبن دهمێ بهرههمێ رح ومهژیێ خۆ ل بهر دهستێ خهلكى دبینن..
نهبیلا ب سهرهدانا خۆ یا حهفتانه بۆ مالا عهبدلعهزیزێ سیسى ڕابوو، ژنا وى ب ڤیان وكهیفخۆشى ڤه ب خێرهاتنا وێ كر، پشتى نهبیلا ڕوینشتى دانهیهك ژ كتێبا خۆ ئینادهر ودیارى ل سهر نڤیسی وبۆ وێ پێشكێش كر، ب سوپاسى ڤه وێ ئهو ژێ وهرگرت و ب نهخۆشى ڤه گڕنژى وگۆت:
ــ من ئهو خواند.. ئهز گهلهك یا ژێ رازیمه.. بهلـێ من ههست ب نهخۆشیێ كر..
نهبیلایێ ب گهرمى ڤه گۆت:
ــ پێتڤیه مرۆڤى پێ نهخۆش بت..
عهبدلعهزیز ب ژۆركهفت، زهر بووبوو ویێ وهستیاى بوو، ژارى.. د كهڤن دا دلێ وى یێ نهخۆش بوو، دهمێ عێجزیهك بۆ وى چێ ببا بێنا وى تهنگ دبوو، بهلكى ژیانا غهریبیێ ونه ئاكنجیبوونا وى ل جههكى ژ بهر وێ گهڕیانا ل سالێت درێــژ ب دویــڤ وى ڤــه ههى ئێش پتر ل وى زێده كربت، لهو وى بــهردهوام دهرمانێت دلـى دخـــوارن.. عــهبــدلـعـهزیز ب دهستهكێ سار وتهزى ڤه چوو دهستى..
نهبیلایێ ب ترس ڤه گۆتێ: ته خێره؟
ب كۆڤان ڤه وى بێنا خۆ هلكێشا..
ــ سوپاسى بۆ خودێ.. من دهرمان خوار وئهز پیچهكێ تهنابووم..
ــ خودێ سلامهتیێ بدهت..
ل جهێ خۆ خۆ لڤلڤاند، ڤیا باخڤت، بهلێ وى خۆ بێ دهنگ كر، نهبیلا ب نهخۆشیهكێ حهسیا بێى ئهگهرهكێ بۆ بزانت، وگۆت:
ــ ته دڤێت تشتهكى بێژى؟
عهبدلعهزیزى بهرێ خۆ ژێ وهرگێڕا، وگۆت:
ــ عێجز نهبه..
ڕاست ڕابوو و ب نهرمى ڤه گۆت:
ــ بابێ من مر..
ئهو ژى ڕابووڤه وپشتا خۆ دایێ وگۆت:
ــ بابێ ته یێ ب سلامهته..
ــ پا چ چێبوویه؟
ــ سهفیرێ مصرێ..
وێ خۆ نێزیكى وى كر وگۆت:
ــ مه چ ژێ ههیه؟
عهبدلعهزیزى گۆت:
ــ وى نامهیهكا نهرازیبوونێ یا دایه دهرڤهییا كوێتى..
ــ بۆچى؟
ــ ژ بهر كتێبێ..
نهبیلا خوڕى:
ــ كتێبێ؟؟
ــ بهلێ..
ئهو بێ دهنگ بوون.. پاشى عهبدلعهزیزى گۆت:
ــ من دگۆته ته ناڤێ خۆ ل سهر كتێبێ نهنڤیسه..
ــ ما ئازادیا هزر وبیران نینه؟؟
ــ نهبیلا، دهڤخۆشى وئهو پهیوهندیێت ئهم پێ نــهزانـیـن د ناڤبهرا دهولهتان دا ههنه.. هشیارى یا پێتڤیه.
نهبیلا تێكچوو، ونێزیك بوو بكهته گرى، بهلێ شیا خۆ..
ــ بـهلـكـى ئــهو داخـوازێ ژ تـه بـكـهن كو تو ژ كوێـتـێ دهركهڤى، ئهگهر بۆ وان دیاربوو كو كتێب یا تهیه.
نهبیلا خوڕى:
ــ ئهڤه نابت..
ڤێ جارێ وى خۆ ب تهناهیێ ئینادهر وگۆت:
ــ ئهگهر پسیار ژ ته هاتهكرن تو دشێى بێژى كتێب نه یا منه، ئهڤـ چهنده گهلهك دێ بۆ مه بته هاریكار، و ژ باشیا ئێغبالا مه كتێب یا ل لوبنانێ چاپ بووى، وئهوێ كتێب بهلاڤكرى ل لوبنانێ ژ ههڤالێت مهیه، ئهو دێ هاریكاریا مه د ڤێ چهندێ دا كهت، وكهس نهشێت نهخۆشیهكێ بگههینتێ ل وێرێ، چونكى ئازادریهكا تمام ل لوبنانێ ههیه..
ئهنیا نهبیلایێ خوه دا وگۆت:
ــ بـهلـێ پا من دانهیهك ژ كتێبێ بۆ سهرۆكى وئێك بۆ عهطوهیێ مهلهوانى هنارتیه..
عهبدلعهزیز حێبهتى بوو، لێ زڤڕى وگۆت:
ــ نه.. نه..
ــ ئهڤه یا بووى..
ــ ته خهلهتیهكا مهزن یا كرى.. ل ڤێرێ كهس ژ مه ژ نك خۆ شۆلان ناكهت، ئهم ل ڤێرێ دڕێكخستینه، ومه مهزنێت خۆ ههنه، نابت كهسهك ژ مه ژ نك خۆ كارهكى بكهت، دا ئهڤ قهدما عهردى یا بچویك ئهوا ئهم ل سهر دژین، وكارێ خۆ لێ ب ڕێڤه دبهین، ژ دهست مه دهرنهكهڤت.. ته ئهم ئێخستینه گرفتاریێ..
نهبیلایێ سهرێ خۆ هژاند وگۆت:
ــ ببۆره، من ئهو ژ دلهكێ صافى كربوو، سۆز بت ئهز جارهكا دى كارهكێ هۆسا نهكهم..
دهمهكى بێ دهنگ بوو، پاشى گۆت:
ــ ئهگهر فهرمان ب دهرێخستنا من هاتهدان دێ چ كهم؟
ــ نهترسه، ههمى تشت مه یێت ب سهروبهر كرین، ئهگهر خودێ نهكهت وه لێ هات ژى، تو دێ چیه سعوودیێ یان لوبنانێ، ل وێرێ تو دێ هندهك برایێت دلسۆز بینى، وههر تشتهكێ تو ههوجه ببیێ ئهم دێ بۆ ته ئاماده كهین..
كهلا گریێ هاته نهبیلایێ، و د ناڤ ڕۆندكان ڕا گۆت:
ــ ئهزا كهیفخۆش بووم د گهل ههوه، هوین مرۆڤێت منن، وپاشهڕۆژا منن، من گیانێ خۆ یێ بهرزه د ناڤـ ههوه دا دیتبوو، جیهانا ههوه ئهو باژێڕێ پاكه یێ ههردهم من خهون پێڤه ددیتن.
عهبدلعهزیز ب سارى ڤه گڕنژى وگۆت:
ــ مهسهله هێشتا وهسا پیس نهبوویه.. بهلكى چارهیهك بۆ ههبت..
بێى خۆ مستهك ل وێ مێزێ دا ئهوا ل نێزیكى وێ، وگۆت:
ــ ته ب دهستێ خۆ تشتهك ل سهر وان كتێبان نڤیسیه ئهوێت ته هنارتینه قاهیره؟
نهبیلایێ هزرێت خۆ كرن، پاشى گۆت: نه..
ــ وناڤـ ونیشان؟
ــ من ئهو ب جیهازێ گابیعێ نڤیسیه.. چونكى نه یا دورست بوو بۆ سهرۆكاتیێ ئهز ب دهستێ خۆ بنڤیسم..
عهبدلعهزیز گڕنژى..
ــ ئهڤه هاریكاریه مهزنه ژ خودێ.. ئهو گهلهك دێ فایدێ مه كهت..
ــ تو وه دبێژى؟
ملێت خۆ هژاندن وگۆت:
ــ هـیـڤـیـا مــه بــلا ب خودێ بت.. گهلهك خودان خێران هاریكاریێت جودا جودا د گهل مه كرینه..
نهبیلایێ ب داخ ڤه بێهنا خۆ هلكێشا وگۆت:
ــ كهیفا من ههمى مر..
عهبدلعهزیزى حهبكهكا دى داعویرا وگۆت:
ــ ڕێك یا دویر ونــهخــۆشــه.. خــودێ هـاریـكــارێ مه بت ل سهر چاكیێ، وئهو بێنفرههیێ ب رزقێ مه بكهت..
نهبیلایێ خۆ هێلا ب هیڤیا خودێ ڤه، وچاڤهڕێى ڕویدان وسهرهاتیێت نوى كر.. وێ زانى برایهكێ مصرى دێ چته قاهیره وپشتى حهفتیهكێ دێ زڤڕت.. ووێ زانى كو ئهو مرۆڤهكێ باوهرێیه، و ل نك زهلامێت ئاسایشێ ئهو نه یێ ناسیاره ب لاگریا خۆ بۆ ئیخوانان، پسیارا نهبیلایێ هـاتــهكــرن كـانێ وێ شۆلهك ههیه یان نه، ههر زوى بیرا وێ ل سهلوایێ وصابرى هاته ڤه، ئینا وێ عهبدلعهزیز تێگههاند كو وێ دڤێت دهستێ هاریكاریێ بۆ وێ درێژ بكهت، لهو وێ هندهك پاره د گهل ناڤـ ونیشانێت وێ دانه عهبدلعهزیزى، ههر وهسا وێ ڤیا دهنگ وباسێت دهیك وبابێت خۆ بزانت، چونكى نساخیا بابێ وێ ئهو زێده دئێشاند، وشیرێ زۆردایێ ئـهوێ ل سـهر ستویێ مالا وێ ڕاكرى ئێش وترس ل نك وێ پهیدا دكر..
